ਕੁਵੈਤ ਸਿਟੀ, 13 ਅਕਤੂਬਰ (ਹਿ.ਸ.)। ਹੁਣ ਔਰਤਾਂ ਨੂੰ ਵੀ ਕੁਵੈਤ ਦੀ ਫੌਜ ਵਿੱਚ ਕੰਮ ਕਰਨ ਦੀ ਇਜਾਜ਼ਤ ਦੇ ਦਿੱਤੀ ਗਈ ਹੈ। ਕੁਵੈਤ ਦੀ ਫੌਜ ਨੇ ਕਿਹਾ ਹੈ ਕਿ ਸਾਲਾਂ ਤੋਂ ਨਾਗਰਿਕ ਭੂਮਿਕਾਵਾਂ ਤੱਕ ਸੀਮਤ ਰਹਿਣ ਤੋਂ ਬਾਅਦ ਹੁਣ ਔਰਤਾਂ ਨੂੰ ਪਹਿਲੀ ਵਾਰ ਜੰਗੀ ਭੂਮਿਕਾਵਾਂ ਵਿੱਚ ਸ਼ਾਮਲ ਕੀਤਾ ਜਾਵੇਗਾ।
ਰੱਖਿਆ ਮੰਤਰੀ ਹਮਦ ਜਾਬਰ ਅਲ-ਅਲੀ ਅਲ-ਸਬਾਹ ਨੇ ਕਿਹਾ ਕਿ ਔਰਤਾਂ ਲਈ ਵੱਖ-ਵੱਖ ਲੜਾਕੂ ਰੈਂਕਾਂ ਵਿੱਚ ਸ਼ਾਮਲ ਹੋਣ ਲਈ ਸਾਰੇ ਦਰਵਾਜ਼ੇ ਖੋਲ੍ਹ ਦਿੱਤੇ ਗਏ ਹਨ, ਜਿਨ੍ਹਾਂ ਵਿੱਚ ਅਫਸਰ ਵਜੋਂ ਸੇਵਾ ਵੀ ਸ਼ਾਮਲ ਹੈ।
ਸਥਾਨਕ ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਮੰਤਰੀ ਨੇ ਕਿਹਾ ਕਿ ਕੁਵੈਤੀ ਔਰਤਾਂ ਦੇ ਆਪਣੇ ਭਰਾਵਾਂ ਦੇ ਨਾਲ ਕੁਵੈਤੀ ਫੌਜ ਵਿੱਚ ਸ਼ਾਮਲ ਹੋਣ ਦਾ ਸਮਾਂ ਆ ਗਿਆ ਹੈ। ਰੱਖਿਆ ਮੰਤਰੀ ਨੇ ਔਰਤਾਂ ਦੀ "ਕਾਬਲੀਅਤਾਂ ... ਅਤੇ ਉਨ੍ਹਾਂ ਦੀ ਮੁਸ਼ਕਲ ਸਹਿਣ ਦੀ ਸਮਰੱਥਾ" ਵਿੱਚ ਵਿਸ਼ਵਾਸ ਪ੍ਰਗਟ ਕੀਤਾ।
ਜ਼ਿਕਰਯੋਗ ਹੈ ਕਿ ਸਾਲ 2005 ਵਿੱਚ ਕੁਵੈਤ ਵਿੱਚ ਔਰਤਾਂ ਨੂੰ ਵੋਟ ਪਾਉਣ ਦਾ ਅਧਿਕਾਰ ਦਿੱਤਾ ਗਿਆ ਸੀ। ਔਰਤਾਂ ਕੈਬਨਿਟ ਅਤੇ ਸੰਸਦ ਦੋਵਾਂ ਵਿੱਚ ਸਰਗਰਮ ਰਹੀਆਂ ਹਨ। ਹਾਲਾਂਕਿ ਮੌਜੂਦਾ ਸੰਸਦ ਵਿੱਚ ਔਰਤਾਂ ਲਈ ਕੋਈ ਸੀਟ ਨਹੀਂ ਹੈ।
ਹੋਰ ਖਾੜੀ ਦੇਸ਼ਾਂ ਦੇ ਉਲਟ, ਕੁਵੈਤ ਦੀ ਸੰਸਦ ਨੂੰ ਵਿਧਾਨਿਕ ਸ਼ਕਤੀ ਪ੍ਰਾਪਤ ਹੈ। ਦੇਸ਼ ਦੀ ਸੰਸਦ ਮੈਂਬਰਾਂ ਨੂੰ ਸਰਕਾਰ ਅਤੇ ਸ਼ਾਹੀ ਪਰਿਵਾਰ ਦੇ ਵਿਰੋਧ ਲਈ ਵੀ ਜਾਣੀ ਜਾਂਦੀ ਹੈ।
ਹਿੰਦੁਸਥਾਨ ਸਮਾਚਾਰ/ਕੁਸੁਮ