ਨਵੀਂ ਦਿੱਲੀ, 05 ਜੂਨ (ਹਿ. ਸ.)। ਭਾਰਤੀ ਜੂਨੀਅਰ ਮਹਿਲਾ ਹਾਕੀ ਟੀਮ ਨੇ ਜਾਪਾਨ ਵਿੱਚ ਚੱਲ ਰਹੇ ਮਹਿਲਾ ਜੂਨੀਅਰ ਏਸ਼ੀਆ ਕੱਪ 2023 ਦੇ ਆਪਣੇ ਦੂਜੇ ਮੈਚ ਵਿੱਚ ਸੋਮਵਾਰ ਨੂੰ ਮਲੇਸ਼ੀਆ ਨੂੰ 2-1 ਨਾਲ ਹਰਾਇਆ। ਮੈਚ ’ਚ ਭਾਰਤ ਲਈ ਮੁਮਤਾਜ਼ ਖਾਨ (10ਵੇਂ ਮਿੰਟ) ਅਤੇ ਦੀਪਿਕਾ (26ਵੇਂ ਮਿੰਟ) ਨੇ ਇਕ-ਇਕ ਗੋਲ ਕੀਤਾ, ਜਦਕਿ ਮਲੇਸ਼ੀਆ ਲਈ ਇਕੋ ਇੱਕ ਗੋਲ ਡੀਆਨ ਨਾਜ਼ੇਰੀ (6ਵੇਂ ਮਿੰਟ) ਨੇ ਕੀਤਾ।

ਮਲੇਸ਼ੀਆ ਨੇ ਮੈਚ ਦੀ ਚੰਗੀ ਸ਼ੁਰੂਆਤ ਕੀਤੀ ਅਤੇ ਉਸਦਾ ਧਿਆਨ ਗੇਂਦ ’ਤੇ ਕਬਜ਼ਾ ਬਣਾਈ ਰੱਖਣ ’ਤੇ ਸੀ, ਜਿਸਦਾ ਨਤੀਜਾ ਨਿਕਲਿਆ ਅਤੇ ਮੈਚ ਦੇ ਛੇਵੇਂ ਮਿੰਟ ’ਚ ਡਿਆਨ ਨਾਜ਼ਰੀ ਨੇ ਮਲੇਸ਼ੀਆ ਨੂੰ 1-0 ਨਾਲ ਅੱਗੇ ਕਰ ਦਿੱਤਾ, ਹਾਲਾਂਕਿ ਇਸ ਗੋਲ ਤੋਂ 4 ਮਿੰਟ ਬਾਅਦ ਹੀ ਮੁਮਤਾਜ਼ ਖਾਨ ਨੇ ਮੈਚ ਦੇ 10ਵੇਂ ਮਿੰਟ ’ਚ ਪੈਨਲਟੀ ਕਾਰਨਰ ’ਤੇ ਗੋਲ ਕਰਕੇ ਭਾਰਤ ਨੂੰ 1-1 ਦੀ ਬਰਾਬਰੀ ਦਿਵਾ ਦਿੱਤੀ। ਪਹਿਲੇ ਕੁਆਰਟਰ ਦੇ ਅੰਤ ਤੱਕ ਦੋਵੇਂ ਟੀਮਾਂ 1-1 ਦੀ ਬਰਾਬਰੀ ’ਤੇ ਸਨ।

ਦੂਜੇ ਕੁਆਰਟਰ ’ਚ ਭਾਰਤ ਨੇ ਪੂਰਾ ਤਾਕਤ ਲਗਾ ਦਿੱਤੀ ਅਤੇ ਯੋਜਨਾ ਕੰਮ ਕਰ ਗਈ। ਦੀਪਿਕਾ ਨੇ ਮੈਚ ਦੇ 26ਵੇਂ ਮਿੰਟ ਵਿੱਚ ਪੈਨਲਟੀ ਸਟ੍ਰੋਕ ਨੂੰ ਗੋਲ ਵਿੱਚ ਬਦਲ ਕੇ ਭਾਰਤ ਨੂੰ 2-1 ਨਾਲ ਅੱਗੇ ਕਰ ਦਿੱਤਾ। ਦੂਜੇ ਕੁਆਰਟਰ ’ਚ ਭਾਰਤੀ ਟੀਮ 2-1 ਨਾਲ ਅੱਗੇ ਰਹੀ। ਅੰਤਰਾਲ ਤੋਂ ਬਾਅਦ ਮਲੇਸ਼ੀਆ ਨੇ ਵਾਪਸੀ ਕਰਨ ਦੀ ਪੂਰੀ ਕੋਸ਼ਿਸ਼ ਕੀਤੀ, ਪਰ ਉਹ ਭਾਰਤੀ ਡਿਫੈਂਸ ਨੂੰ ਪਾਰ ਨਹੀਂ ਪਾ ਸਕੀ ਅਤੇ ਅੰਤ ਵਿੱਚ ਭਾਰਤ ਨੇ ਇਹ ਮੈਚ 2-1 ਨਾਲ ਜਿੱਤ ਲਿਆ।

ਉਥੇ ਹੀ ਭਾਰਤੀ ਜੂਨੀਅਰ ਮਹਿਲਾ ਹਾਕੀ ਟੀਮ ਹੁਣ 6 ਜੂਨ ਨੂੰ ਆਪਣੇ ਤੀਜੇ ਪੂਲ ਏ ਮੈਚ ਵਿੱਚ ਕੋਰੀਆ ਦੇ ਖਿਲਾਫ ਖੇਡੇਗੀ।

ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ