ਸਰਕਾਰ ਬਦਲਦੇ ਹੀ ਭਾਰਤ ਨੂੰ ਮਿਲਣਗੇ ਨਵੇਂ ਸੈਨਾ, ਹਵਾਈ ਸੈਨਾ ਅਤੇ ਜਲ ਸੈਨਾ ਦੇ ਮੁਖੀ
ਨਵੀਂ ਦਿੱਲੀ, 14 ਅਪ੍ਰੈਲ (ਹਿ.ਸ.)। ਇਹ ਚੋਣ ਵਰ੍ਹਾ ਨਾ ਸਿਰਫ਼ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਸਰਕਾਰ ਲਈ ਮਹੱਤਵਪੂਰਨ
31


ਨਵੀਂ ਦਿੱਲੀ, 14 ਅਪ੍ਰੈਲ (ਹਿ.ਸ.)। ਇਹ ਚੋਣ ਵਰ੍ਹਾ ਨਾ ਸਿਰਫ਼ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਸਰਕਾਰ ਲਈ ਮਹੱਤਵਪੂਰਨ ਹੈ, ਸਗੋਂ ਤਿੰਨਾਂ ਫ਼ੌਜਾਂ ਵਿੱਚ ਨਵੇਂ ਚਿਹਰੇ ਮਿਲਣ ਦੇ ਮਾਮਲੇ ਵਿੱਚ ਭਾਰਤ ਦੇ ਰੱਖਿਆ ਖੇਤਰ ਲਈ ਵੀ ਮਹੱਤਵਪੂਰਨ ਹੈ। ਆਉਣ ਵਾਲੇ ਦਿਨਾਂ ਵਿੱਚ, ਭਾਰਤ ਨੂੰ ਸੈਨਾ, ਹਵਾਈ ਸੈਨਾ ਅਤੇ ਜਲ ਸੈਨਾ ਦੇ ਨਵੇਂ ਮੁਖੀਆਂ ਦੇ ਨਾਲ-ਨਾਲ ਦੇਸ਼ ਦੀ ਪ੍ਰਮੁੱਖ ਰੱਖਿਆ ਏਜੰਸੀ ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ (ਡੀਆਰਡੀਓ) ਦੇ ਲਈ ਵੀ ਨਵਾਂ ਚੇਅਰਮੈਨ ਮਿਲੇਗਾ।

ਫਿਲਹਾਲ ਨੇਵੀ, ਆਰਮੀ ਅਤੇ ਡੀਆਰਡੀਓ ਲਈ ਨਵੇਂ ਮੁਖੀ ਲਿਆਉਣ ਦੀ ਪ੍ਰਕਿਰਿਆ ਸ਼ੁਰੂ ਹੋ ਗਈ ਹੈ। ਅਗਲੇ ਹਵਾਈ ਸੈਨਾ ਮੁਖੀ ਦੀ ਚੋਣ ਬਾਅਦ ਵਿੱਚ ਕੀਤੀ ਜਾਵੇਗੀ। ਖਾਸ ਗੱਲ ਇਹ ਹੈ ਕਿ ਫੌਜ ਮੁਖੀ ਜਨਰਲ ਮਨੋਜ ਪਾਂਡੇ, ਏਅਰ ਚੀਫ ਮਾਰਸ਼ਲ ਵੀ.ਆਰ.ਚੌਧਰੀ ਅਤੇ ਐਡਮਿਰਲ ਆਰ. ਹਰੀ ਕੁਮਾਰ 61ਵੇਂ ਨੈਸ਼ਨਲ ਡਿਫੈਂਸ ਅਕੈਡਮੀ ਕੋਰਸ ਵਿੱਚ ਬੈਚਮੇਟ ਹਨ। ਦੇਸ਼ ਲਈ ਇਹ ਲਗਾਤਾਰ ਦੂਜੀ ਵਾਰ ਹੈ ਜਦੋਂ ਦੇਸ਼ ਦੀਆਂ ਤਿੰਨੇ ਸੈਨਾਵਾਂ ਦੀ ਕਮਾਨ ਇੱਕੋ ਐਨਡੀਏ ਬੈਚ ਦੇ ‘ਤਿੰਨ ਦੋਸਤਾਂ’ ਦੇ ਹੱਥਾਂ ਵਿੱਚ ਹੈ। ਇਸ ਤੋਂ ਪਹਿਲਾਂ ਭਾਰਤੀ ਹਥਿਆਰਬੰਦ ਬਲਾਂ ਦੀ ਅਗਵਾਈ ਕਰਨ ਵਾਲੀ 'ਤਿਕੜੀ' ਐਡਮਿਰਲ ਕਰਮਬੀਰ ਸਿੰਘ, ਏਅਰ ਚੀਫ ਮਾਰਸ਼ਲ ਰਾਕੇਸ਼ ਕੁਮਾਰ ਸਿੰਘ ਭਦੌਰੀਆ ਅਤੇ ਥਲ ਸੈਨਾ ਮੁਖੀ ਐਮਐਮ ਨਰਵਾਣੇ ਵੀ 56ਵੇਂ ਐਨਡੀਏ ਬੈਚ ਦੇ ਫੈਲੋ ਸਨ।

ਰੱਖਿਆ ਮੰਤਰਾਲੇ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਜਲ ਸੈਨਾ ਨੂੰ ਅਪ੍ਰੈਲ ਦੇ ਅੰਤ ਤੱਕ ਨਵਾਂ ਮੁਖੀ ਮਿਲ ਜਾਵੇਗਾ ਕਿਉਂਕਿ 25ਵੇਂ ਮੁਖੀ ਐਡਮਿਰਲ ਹਰੀ ਕੁਮਾਰ 30 ਅਪ੍ਰੈਲ ਨੂੰ ਆਪਣਾ ਕਾਰਜਕਾਲ ਪੂਰਾ ਕਰ ਰਹੇ ਹਨ। ਰੱਖਿਆ ਮੰਤਰਾਲੇ ਦੀ ਚੋਣ ਕਮੇਟੀ ਨੇ ਪੰਜ ਸੀਨੀਅਰ ਜਲ ਸੈਨਾ ਅਧਿਕਾਰੀਆਂ ਦੇ ਨਾਮ ਮੰਤਰੀ ਮੰਡਲ ਦੀ ਨਿਯੁਕਤੀ ਕਮੇਟੀ (ਏ. ਸੀ. ਸੀ.) ਨੂੰ ਭੇਜ ਦਿੱਤੇ ਹਨ, ਜੋ ਨਿਯੁਕਤੀਆਂ 'ਤੇ ਫੈਸਲਾ ਲੈਣ ਵਾਲੀ ਸਰਵਉੱਚ ਸੰਸਥਾ ਹੈ। ਏਸੀਸੀ ਵੱਲੋਂ ਅਗਲੇ ਜਲ ਸੈਨਾ ਮੁਖੀ ਦਾ ਐਲਾਨ ਜਲਦੀ ਹੀ ਕੀਤੇ ਜਾਣ ਦੀ ਉਮੀਦ ਹੈ।

ਸੀਨੀਆਰਤਾ ਦੇ ਮੱਦੇਨਜ਼ਰ ਜਲ ਸੈਨਾ ਸਟਾਫ਼ ਦੇ ਮੌਜੂਦਾ ਡਿਪਟੀ ਚੀਫ਼ ਵਾਈਸ ਐਡਮਿਰਲ ਦਿਨੇਸ਼ ਕੇ. ਤ੍ਰਿਪਾਠੀ ਮੁੱਖ ਦਾਅਵੇਦਾਰ ਹਨ। ਵਾਈਸ ਐਡਮਿਰਲ ਤ੍ਰਿਪਾਠੀ ਜੁਲਾਈ 1985 ਵਿੱਚ ਜਲ ਸੈਨਾ ਵਿੱਚ ਸ਼ਾਮਲ ਹੋਏ। ਉਨ੍ਹਾਂ ਕੋਲ ਸੰਚਾਰ ਅਤੇ ਇਲੈਕਟ੍ਰਾਨਿਕ ਯੁੱਧ ਵਿੱਚ ਮੁਹਾਰਤ ਹੈ ਅਤੇ ਉਨ੍ਹਾਂ ਫਰੰਟਲਾਈਨ ਜੰਗੀ ਜਹਾਜ਼ਾਂ 'ਤੇ ਸਿਗਨਲ ਸੰਚਾਰ ਅਧਿਕਾਰੀ ਅਤੇ ਇਲੈਕਟ੍ਰਾਨਿਕ ਯੁੱਧ ਅਧਿਕਾਰੀ ਵਜੋਂ ਭੂਮਿਕਾਵਾਂ ਨਿਭਾਈਆਂ ਹਨ। ਉਨ੍ਹਾਂਨੇ ਭਾਰਤੀ ਜਲ ਸੈਨਾ ਦੇ ਜਹਾਜਾਂ ਆਈਐਨਐਸ ਵਿਨਾਸ਼, ਆਈਐਨਐਸ ਕਿਰਚ ਅਤੇ ਆਈਐਨਐਸ ਤ੍ਰਿਸ਼ੂਲ ਨੂੰ ਆਪਣੀ ਅਗਵਾਈ ਵਿੱਚ ਸੰਚਾਲਨ ਸਮਰੱਥਾ ਵਧਾਉਣ ਦੀ ਕਮਾਂਡ ਦਿੱਤੀ ਹੈ।

ਇਸ ਤੋਂ ਬਾਅਦ ਅਗਲੀ ਨਿਯੁਕਤੀ ਆਰਮੀ ਚੀਫ ਦੀ ਹੋਵੇਗੀ ਕਿਉਂਕਿ ਜਨਰਲ ਮਨੋਜ ਪਾਂਡੇ 31 ਮਈ ਨੂੰ ਆਪਣਾ ਅਹੁਦਾ ਛੱਡ ਦੇਣਗੇ। ਜਨਰਲ ਪਾਂਡੇ ਨੇ 30 ਅਪ੍ਰੈਲ 2022 ਨੂੰ ਜਨਰਲ ਮਨੋਜ ਮੁਕੁੰਦ ਨਰਵਾਣੇ ਤੋਂ ਸੈਨਾ ਦੀ ਵਾਗਡੋਰ ਸੰਭਾਲੀ ਸੀ। ਭਾਰਤੀ ਫੌਜ ਚੀਨ ਤੋਂ ਬਾਅਦ ਦੁਨੀਆ ਦੀ ਦੂਜੀ ਸਭ ਤੋਂ ਵੱਡੀ ਫੌਜ ਹੈ, ਜਿਸ ਦੇ 20 ਲੱਖ ਤੋਂ ਵੱਧ ਸਰਗਰਮ ਕਰਮਚਾਰੀ ਹਨ। ਥਲ ਸੈਨਾ ਮੁਖੀ ਤੋਂ ਇਲਾਵਾ ਪੰਜ ਸਭ ਤੋਂ ਸੀਨੀਅਰ ਅਫ਼ਸਰ ਵੀ ਉੱਚ ਅਹੁਦਿਆਂ ਲਈ ਚੁਣੇ ਜਾਣੇ ਹਨ। ਲੈਫਟੀਨੈਂਟ ਜਨਰਲ ਉਪੇਂਦਰ ਦਿਵੇਦੀ, ਜੋ ਉੱਤਰੀ ਕਮਾਨ ਵਿੱਚ ਕਮਾਂਡਰ ਵਜੋਂ ਇੱਕ ਮਹੱਤਵਪੂਰਨ ਕਾਰਜਕਾਲ ਤੋਂ ਬਾਅਦ 15 ਫਰਵਰੀ ਨੂੰ ਥਲ ਸੈਨਾ ਦੇ ਉਪ ਮੁਖੀ ਬਣੇ ਸਨ, ਮੌਜੂਦਾ ਸੈਨਾ ਮੁਖੀ ਜਨਰਲ ਪਾਂਡੇ ਤੋਂ ਬਾਅਦ ਸਭ ਤੋਂ ਸੀਨੀਅਰ ਸੈਨਾ ਅਧਿਕਾਰੀ ਹਨ।

ਇਸ ਦੇ ਨਾਲ ਹੀ ਸਰਕਾਰ ਨਵੇਂ ਡੀਆਰਡੀਓ ਮੁਖੀ ਦੀ ਵੀ ਤਲਾਸ਼ ਕਰ ਰਹੀ ਹੈ ਕਿਉਂਕਿ ਏਜੰਸੀ ਦੇ ਮੌਜੂਦਾ ਚੇਅਰਮੈਨ ਡਾਕਟਰ ਸਮੀਰ ਵੀ ਕਾਮਥ ਕਰੀਬ ਤਿੰਨ ਸਾਲ ਦੇ ਕਾਰਜਕਾਲ ਤੋਂ ਬਾਅਦ 31 ਮਈ ਨੂੰ ਸੇਵਾਮੁਕਤ ਹੋ ਰਹੇ ਹਨ। ਡੀਆਰਡੀਓ ਭਵਿੱਖ ਦੇ ਯੁੱਧ ਲਈ ਉੱਚ-ਪੱਧਰੀ ਤਕਨਾਲੋਜੀਆਂ ਨੂੰ ਵਿਕਸਤ ਕਰਨ ਵਿੱਚ ਰੁੱਝਿਆ ਹੋਇਆ ਹੈ। ਸਕ੍ਰੀਨਿੰਗ ਕਮੇਟੀ ਨੇ ਤਿੰਨ ਸੀਨੀਅਰ ਡੀਆਰਡੀਓ ਵਿਗਿਆਨੀਆਂ ਦੇ ਨਾਵਾਂ ਦੀ ਸਿਫ਼ਾਰਸ਼ ਕੀਤੀ ਹੈ, ਜਿਵੇਂ ਕਿ ਡਾ. ਬੀ.ਕੇ. ਦਾਸ, ਡਾਇਰੈਕਟਰ ਜਨਰਲ, ਇਲੈਕਟ੍ਰੋਨਿਕਸ ਅਤੇ ਸੰਚਾਰ ਪ੍ਰਣਾਲੀਆਂ, ਸੁਮਾ ਵਰੁਗੇਜ਼, ਡਾਇਰੈਕਟਰ ਜਨਰਲ, ਮਾਈਕ੍ਰੋ ਇਲੈਕਟ੍ਰਾਨਿਕ ਡਿਵਾਈਸਿਸ, ਕੰਪਿਊਟੇਸ਼ਨਲ ਸਿਸਟਮ ਅਤੇ ਸਾਈਬਰ ਸਿਸਟਮ ਅਤੇ ਉਮਾਲਨੇਨੀ ਰਾਜਾ ਬਾਬੂ ਦਾਸ, ਡਾਇਰੈਕਟਰ ਜਨਰਲ ਮਿਜ਼ਾਈਲ ਅਤੇ ਰਣਨੀਤਕ ਪ੍ਰਣਾਲੀਆਂ ਹਨ।

ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ


 rajesh pande