ਨਵੀਂ ਦਿੱਲੀ, 13 ਅਕਤੂਬਰ (ਹਿੰ.ਸ.)। ਬਿਹਾਰ ਚੋਣਾਂ ਦੇ ਵਿਚਕਾਰ, ਰਾਸ਼ਟਰੀ ਜਨਤਾ ਦਲ (ਆਰਜੇਡੀ) ਦੇ ਨੇਤਾ ਤੇਜਸਵੀ ਯਾਦਵ ਨੇ ਆਈਆਰਸੀਟੀਸੀ ਘੁਟਾਲੇ ਵਿੱਚ ਦਿੱਲੀ ਰਾਊਜ਼ ਐਵੇਨਿਊ ਅਦਾਲਤ ਦੇ ਹੁਕਮ ਨੂੰ ਪਾਰਟੀ 'ਤੇ ਹਮਲਾ ਦੱਸਿਆ ਹੈ। ਇਸ ’ਤੇ ਸਾਬਕਾ ਕੇਂਦਰੀ ਕਾਨੂੰਨ ਮੰਤਰੀ ਅਤੇ ਸੀਨੀਅਰ ਭਾਜਪਾ ਨੇਤਾ ਰਵੀ ਸ਼ੰਕਰ ਪ੍ਰਸਾਦ ਨੇ ਤੇਜਸਵੀ 'ਤੇ ਸਵਾਲ ਉਠਾਉਂਦੇ ਹੋਏ ਕਿਹਾ ਕਿ ਉਹ ਬਿਹਾਰ ਨੂੰ ਬਦਲਣ ਦਾ ਵਾਅਦਾ ਕਰਦੇ ਹਨ, ਪਰ ਆਈਪੀਸੀ ਦੀ ਧਾਰਾ 420 ਅਜੇ ਵੀ ਉਨ੍ਹਾਂ 'ਤੇ ਲੱਗੀ ਹੈ। ਉਹ ਇਸ ਨਾਲ ਬਿਹਾਰ ਨੂੰ ਕਿਵੇਂ ਬਦਲਣਗੇ? ਤੇਜਸਵੀ ਨੇ ਇੱਥੇ ਪੱਤਰਕਾਰਾਂ ਨੂੰ ਕਿਹਾ ਕਿ ਅਸੀਂ ਪਹਿਲਾਂ ਹੀ ਕਈ ਦਿਨ੍ਹਾਂ ਤੋਂ ਕਹਿ ਰਹੇ ਸੀ ਕਿ ਹੁਣ ਜਦੋਂ ਚੋਣਾਂ ਨੇੜੇ ਆਈਆਂ ਹਨ, ਤਾਂ ਅਜਿਹੀਆਂ ਚੀਜ਼ਾਂ ਹੋਣਗੀਆਂ। ਅਸੀਂ ਮੁਕੱਦਮੇ ਦਾ ਸਾਹਮਣਾ ਕਰਾਂਗੇ। ਤੂਫਾਨਾਂ ਨਾਲ ਲੜਨ ਵਿੱਚ ਵੱਖਰਾ ਮਜਾ ਹੁੰਦਾ ਹੈ। ਅਸੀਂ ਹਮੇਸ਼ਾ ਸੰਘਰਸ਼ ਦਾ ਰਸਤਾ ਚੁਣਿਆ ਹੈ। ਅਸੀਂ ਚੰਗੇ ਮੁਸਾਫ਼ਿਰ ਵੀ ਬਣਾਂਗੇ ਅਤੇ ਮੰਜ਼ਿਲ 'ਤੇ ਵੀ ਪਹੁੰਚਾਂਗੇ। ਬਿਹਾਰ ਦੇ ਲੋਕ ਬੁੱਧੀਮਾਨ ਹਨ। ਉਹ ਸਭ ਕੁਝ ਜਾਣਦੇ ਹਨ ਕਿ ਕੀ ਹੋ ਰਿਹਾ ਹੈ। ਉਹ ਆਦਮੀ (ਲਾਲੂ ਯਾਦਵ) ਜਿਸਨੇ ਰੇਲਵੇ ਨੂੰ 90,000 ਕਰੋੜ ਰੁਪਏ ਦਾ ਮੁਨਾਫਾ ਦਿੱਤਾ, ਹਰ ਬਜਟ ਵਿੱਚ ਕਿਰਾਏ ਘਟਾਏ, ਅਤੇ ਇਤਿਹਾਸਕ ਰੇਲ ਮੰਤਰੀ ਵਜੋਂ ਜਾਣੇ ਗਏ, ਤਾਂ ਬਿਹਾਰ ਦੇ ਲੋਕ ਜਾਣਦੇ ਹਨ, ਦੇਸ਼ ਦੇ ਲੋਕ ਜਾਣਦੇ ਹਨ ਕਿ ਸੱਚਾਈ ਕੀ ਹੈ। ਜਿੰਨਾ ਚਿਰ ਭਾਜਪਾ ਮੌਜੂਦ ਹੈ ਅਤੇ ਮੇਰੀ ਉਮਰ ਰਹੇਗੀ, ਅਸੀਂ ਭਾਜਪਾ ਨਾਲ ਲੜਦੇ ਰਹਾਂਗੇ।ਇਸ ਦੌਰਾਨ, ਭਾਜਪਾ ਨੇਤਾ ਰਵੀ ਸ਼ੰਕਰ ਪ੍ਰਸਾਦ ਨੇ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ ਕਿ ਅੱਜ ਅਦਾਲਤ ਨੇ ਆਰਜੇਡੀ ਮੁਖੀ ਲਾਲੂ ਪ੍ਰਸਾਦ ਯਾਦਵ, ਉਨ੍ਹਾਂ ਦੇ ਪੁੱਤਰ ਤੇਜਸਵੀ ਯਾਦਵ ਅਤੇ ਉਨ੍ਹਾਂ ਦੀ ਪਤਨੀ ਬਿਹਾਰ ਦੀ ਸਾਬਕਾ ਮੁੱਖ ਮੰਤਰੀ ਰਾਬੜੀ ਦੇਵੀ ਵਿਰੁੱਧ ਦੋਸ਼ ਤੈਅ ਕੀਤੇ ਹਨ। ਦੋਸ਼ ਗੰਭੀਰ ਹਨ। ਸਰਕਾਰੀ ਜਾਇਦਾਦਾਂ ਦੀ ਵੰਡ ਵਿੱਚ ਭ੍ਰਿਸ਼ਟਾਚਾਰ, ਸਾਜ਼ਿਸ਼, ਬੇਈਮਾਨੀ, ਅਤੇ ਇੱਥੋਂ ਤੱਕ ਕਿ ਧਾਰਾ 420 ਵੀ ਸ਼ਾਮਲ ਹੈ। ਇਸਦਾ ਮਤਲਬ ਹੈ ਕਿ ਤੇਜਸਵੀ ਯਾਦਵ ਇੱਕ ਸਮਰੱਥ ਅਦਾਲਤ ਦੁਆਰਾ ਆਪਣੇ ਵਿਰੁੱਧ ਧਾਰਾ 420 ਦੇ ਦੋਸ਼ਾਂ ਨਾਲ ਬਿਹਾਰ ਨੂੰ ਬਦਲਣ ਲਈ ਤਿਆਰ ਹਨ। ਜੇਕਰ ਇਹ ਉਨ੍ਹਾਂ ਦੀ ਛਵੀ ਹੈ ਅਤੇ ਅਦਾਲਤ ਨੇ ਉਨ੍ਹਾਂ ਵਿਰੁੱਧ ਇਹ ਦੋਸ਼ ਤੈਅ ਕੀਤੇ ਹਨ, ਤਾਂ ਉਹ ਕਿਸ ਤਰ੍ਹਾਂ ਦਾ ਬਿਹਾਰ ਬਣਾਉਣਗੇ?

ਮੁਖਤਾਰ ਅੱਬਾਸ ਨਕਵੀ ਨੇ ਕਿਹਾ ਕਿ ਕੁਸ਼ਾਸਨ, ਕਰੱਪਸ਼ਨ ਅਤੇ ਕ੍ਰਾਈਮ ਦਾ ਜੋ ਕੁਨਬਾ ਹੈ, ਉਹ ਇੱਕ ਵਾਰ ਫਿਰ ਕਾਨੂੰਨ ਦੀ ਗ੍ਰਿਫ਼ਤ ਵਿੱਚ ਆ ਗਿਆ ਹੈ। ਜੇਕਰ ਇਹ ਪੂਰਾ ਕੁਨਬਾ ਗੱਠਜੋੜ ਕਰਕੇ ਰਾਜ ਵਿੱਚ ਕੁਸ਼ਾਸਨ ਵਾਪਸ ਲਿਆਉਣ ਦੀ ਸੋਚ ਰਿਹਾ ਹੈ, ਤਾਂ ਜਨਤਾ ਜ਼ਰੂਰ ਆਪਣਾ ਫੈਸਲਾ ਦੇਵੇਗੀ, ਅਤੇ ਕਾਨੂੰਨ ਵੀ ਆਪਣਾ ਕੰਮ ਕਰ ਰਿਹਾ ਹੈ।ਭਾਜਪਾ ਆਈਟੀ ਸੈੱਲ ਦੇ ਮੁਖੀ ਅਮਿਤ ਮਾਲਵੀਆ ਨੇ ਕਿਹਾ ਕਿ ਭ੍ਰਿਸ਼ਟਾਚਾਰ ਦੀ ਇਹ ਲੜੀ ਦਰਸਾਉਂਦੀ ਹੈ ਕਿ ਜਦੋਂ ਸੱਤਾ ਅਤੇ ਮੌਕਾ ਲਾਲੂ ਪਰਿਵਾਰ ਦੇ ਹੱਥਾਂ ਵਿੱਚ ਹੋਣ, ਤਾਂ ਗਰੀਬਾਂ ਦੀ ਜ਼ਮੀਨ ਤੋਂ ਲੈ ਕੇ ਸਰਕਾਰੀ ਸੰਸਥਾਵਾਂ ਤੱਕ ਕੋਈ ਵੀ ਸੁਰੱਖਿਅਤ ਨਹੀਂ ਰਹਿੰਦਾ।

ਭਾਜਪਾ ਸੰਸਦ ਮੈਂਬਰ ਮਨੋਜ ਤਿਵਾੜੀ ਨੇ ਕਿਹਾ ਕਿ ਇਹ ਇੱਕ ਪੁਰਾਣਾ ਮਾਮਲਾ ਹੈ ਅਤੇ ਇਹ ਹੈਰਾਨ ਕਰਨ ਵਾਲਾ ਹੈ ਕਿ ਆਰਜੇਡੀ ਆਗੂਆਂ ਨੇ ਨੌਕਰੀਆਂ ਦੇ ਬਦਲੇ ਜ਼ਮੀਨ ਲਈ। ਨੌਕਰੀਆਂ ਦੇ ਬਦਲੇ ਜ਼ਮੀਨ ਮੰਗਣਾ ਭ੍ਰਿਸ਼ਟਾਚਾਰ ਦਾ ਇੱਕ ਵਿਲੱਖਣ ਰੂਪ ਹੈ। ਜੇਕਰ ਦੋਸ਼ ਸਾਬਤ ਹੋ ਜਾਂਦੇ ਹਨ, ਤਾਂ ਇਹ ਵੱਡੀ ਖ਼ਬਰ ਹੋਵੇਗੀ। ਉਨ੍ਹਾਂ ਕੋਲ ਆਪਣੀ ਬੇਗੁਨਾਹੀ ਸਾਬਤ ਕਰਨ ਲਈ ਕਾਫ਼ੀ ਸਮਾਂ ਹੈ। ਫਿਰ ਵੀ ਦੋਸ਼ ਤੈਅ ਕਰਨ ਲਈ ਕੇਸ ਚੱਲੇਗਾ।ਕਾਂਗਰਸ ਨੇਤਾ ਸ਼ਕੀਲ ਅਹਿਮਦ ਖਾਨ ਨੇ ਕਿਹਾ ਕਿ ਇਸ ਦਾ ਬਿਹਾਰ ਚੋਣਾਂ 'ਤੇ ਕੋਈ ਅਸਰ ਨਹੀਂ ਪਵੇਗਾ। ਅਸੀਂ ਤੇਜਸਵੀ ਯਾਦਵ ਦੇ ਨਾਲ 100 ਫੀਸਦੀ ਹਾਂ।ਜ਼ਿਕਰਯੋਗ ਹੈ ਕਿ ਰਾਊਜ਼ ਐਵੇਨਿਊ ਅਦਾਲਤ ਨੇ ਆਈਆਰਸੀਟੀਸੀ ਘੁਟਾਲੇ ਵਿੱਚ ਲਾਲੂ, ਰਾਬੜੀ ਅਤੇ ਤੇਜਸਵੀ ਵਿਰੁੱਧ ਦੋਸ਼ ਤੈਅ ਕਰਨ ਦਾ ਹੁਕਮ ਦਿੱਤਾ। ਅਦਾਲਤ ਨੇ ਕਿਹਾ ਕਿ ਪਹਿਲੀ ਨਜ਼ਰੇ ਇਹ ਸਾਬਤ ਹੁੰਦਾ ਹੈ ਕਿ ਲਾਲੂ ਦੇ ਪਰਿਵਾਰ ਨੂੰ ਰੇਲਵੇ ਮੰਤਰੀ ਵਜੋਂ ਉਨ੍ਹਾਂ ਦੇ ਕਾਰਜਕਾਲ ਦੌਰਾਨ ਹੋਏ ਸੌਦੇ ਤੋਂ ਸਿੱਧਾ ਫਾਇਦਾ ਹੋਇਆ। ਲਾਲੂ 'ਤੇ ਭਾਰਤੀ ਦੰਡਾਵਲੀ ਦੀਆਂ ਧਾਰਾਵਾਂ 420 ਅਤੇ 120B ਦੇ ਨਾਲ-ਨਾਲ ਭ੍ਰਿਸ਼ਟਾਚਾਰ ਰੋਕਥਾਮ ਕਾਨੂੰਨ ਦੀਆਂ ਧਾਰਾਵਾਂ 13(2) ਅਤੇ 13(1)(D) ਦੇ ਤਹਿਤ ਦੋਸ਼ ਲਗਾਏ ਗਏ ਹਨ। ਜਦੋਂ ਕਿ ਰਾਬੜੀ ਅਤੇ ਤੇਜਸਵੀ 'ਤੇ ਭਾਰਤੀ ਦੰਡ ਸੰਹਿਤਾ ਦੀ ਧਾਰਾ 120ਬੀ ਅਤੇ 420 ਤਹਿਤ ਮੁਕੱਦਮਾ ਚਲਾਇਆ ਜਾਵੇਗਾ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ