ਨਾਗਪੁਰ, 2 ਅਕਤੂਬਰ (ਹਿੰ.ਸ.)। ਰਾਸ਼ਟਰੀ ਸਵੈਮ ਸੇਵਕ ਸੰਘ ਦੇ ਸਰਸੰਘਚਾਲਕ ਡਾ. ਮੋਹਨ ਭਾਗਵਤ ਨੇ ਵੀਰਵਾਰ ਨੂੰ ਕਿਹਾ ਕਿ ਦੇਸ਼ ਦੀ ਏਕਤਾ ਦੀ ਭਾਵਨਾ ਸਰਬ-ਵਿਆਪੀ ਹੈ ਅਤੇ ਇਹ ਸਾਡੀ ਪਛਾਣ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਵਿਭਿੰਨਤਾ ਨਾਲ ਭਰਪੂਰ ਦੇਸ਼ ਹੈ, ਪਰ ਸਮਾਜ, ਦੇਸ਼ ਅਤੇ ਸੱਭਿਆਚਾਰ ਦੇ ਪੱਧਰ 'ਤੇ, ਅਸੀਂ ਸਾਰੇ ਇੱਕ ਹਾਂ।ਡਾ. ਭਾਗਵਤ ਇੱਥੇ ਰੇਸ਼ਮਬਾਗ ਮੈਦਾਨ ਵਿੱਚ ਸੰਘ ਦੀ ਸਥਾਪਨਾ ਦੀ 100ਵੀਂ ਵਰ੍ਹੇਗੰਢ 'ਤੇ ਆਯੋਜਿਤ ਵਿਜੇਦਸ਼ਮੀ ਉਤਸਵ ਨੂੰ ਸੰਬੋਧਨ ਕਰ ਰਹੇ ਸਨ। ਮੰਚ 'ਤੇ ਸਾਬਕਾ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ, ਪ੍ਰਾਂਤ ਸੰਘਚਾਲਕ ਦੀਪਕ ਤਾਮਸ਼ੇਟੀਵਾਰ ਅਤੇ ਨਾਗਪੁਰ ਮਹਾਨਗਰ ਸੰਘਚਾਲਕ ਰਾਜੇਸ਼ ਲੋਇਆ ਪ੍ਰਮੁੱਖ ਤੌਰ 'ਤੇ ਮੌਜੂਦ ਸਨ।ਸੰਘ ਮੁਖੀ ਨੇ ਹਾਲ ਹੀ ਵਿੱਚ ਹੋਏ ਪਹਿਲਗਾਮ ਹਮਲੇ ਦਾ ਹਵਾਲਾ ਦਿੰਦੇ ਹੋਏ ਕਿਹਾ ਕਿ ਸਮਾਜ ਵਿੱਚ ਦੁੱਖ ਅਤੇ ਗੁੱਸੇ ਦੀ ਲਹਿਰ ਸੀ, ਪਰ ਸਰਕਾਰ ਦੇ ਸਖ਼ਤ ਜਵਾਬ ਅਤੇ ਸਮਾਜ ਦੀ ਏਕਤਾ ਨੇ ਇਹ ਸਾਬਤ ਕੀਤਾ ਕਿ ਭਾਰਤ ਸੰਕਟ ਦੇ ਸਮੇਂ ਹੋਰ ਵੀ ਸੰਗਠਿਤ ਹੁੰਦਾ ਹੈ।
ਡਾ. ਭਾਗਵਤ ਨੇ ਕਿਹਾ ਕਿ ਸਿਰਫ਼ ਭਾਰਤ ਦਾ ਏਕੀਕ੍ਰਿਤ ਦ੍ਰਿਸ਼ਟੀਕੋਣ ਹੀ ਦੁਨੀਆ ਨੂੰ ਸਮੱਸਿਆਵਾਂ ਦਾ ਸਥਾਈ ਹੱਲ ਪ੍ਰਦਾਨ ਕਰ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਰਾਜ ਬਦਲਦੇ ਰਹਿੰਦੇ ਹਨ, ਪਰ ਰਾਸ਼ਟਰ ਸਦੈਵ ਰਹਿੰਦਾ ਹੈ। ਸਾਨੂੰ ਆਪਣੀ ਏਕਤਾ ਦੇ ਆਧਾਰ ਨੂੰ ਕਦੇ ਨਹੀਂ ਭੁੱਲਣਾ ਚਾਹੀਦਾ।ਵਿਸ਼ਵਵਿਆਪੀ ਹਾਲਾਤਾਂ ਦਾ ਹਵਾਲਾ ਦਿੰਦੇ ਹੋਏ, ਡਾ. ਭਾਗਵਤ ਨੇ ਆਤਮ-ਨਿਰਭਰਤਾ ਨੂੰ ਸਮੇਂ ਦੀ ਲੋੜ ਦੱਸਿਆ। ਉਨ੍ਹਾਂ ਕਿਹਾ ਕਿ ਦੁਨੀਆ ਅੰਤਰ-ਨਿਰਭਰਤਾ 'ਤੇ ਚੱਲਦੀ ਹੈ, ਪਰ ਸਾਨੂੰ ਮਜਬੂਰੀ ਨਹੀਂ, ਵਿਕਲਪ ਵਜੋਂ ਆਤਮ-ਨਿਰਭਰ ਬਣਨਾ ਪਵੇਗਾ। ਇਸਦੇ ਲਈ ਸਵਦੇਸ਼ੀ ਅਤੇ ਆਤਮ-ਨਿਰਭਰਤਾ ਇੱਕੋ ਇੱਕ ਰਸਤਾ ਹੈ।
ਉਨ੍ਹਾਂ ਨੇ ਸਮਾਜ ਵਿੱਚ ਸੰਘ ਦੇ ਕੰਮ ਵਿੱਚ ਵਧ ਰਹੀ ਜਾਗਰੂਕਤਾ ਅਤੇ ਭਾਗੀਦਾਰੀ ਦੀ ਪ੍ਰਸ਼ੰਸਾ ਕੀਤੀ। ਉਨ੍ਹਾਂ ਦੱਸਿਆ ਕਿ ਨਵੀਂ ਪੀੜ੍ਹੀ ਵਿੱਚ ਦੇਸ਼ ਭਗਤੀ ਅਤੇ ਸੱਭਿਆਚਾਰ ਪ੍ਰਤੀ ਆਸਥਾ ਲਗਾਤਾਰ ਵਧ ਰਹੀ ਹੈ। ਸਮਾਜਿਕ ਸੰਸਥਾਵਾਂ ਅਤੇ ਅਨੇਕ ਵਿਅਕਤੀ ਸੇਵਾ ਕਾਰਜ ਲਈ ਅੱਗੇ ਆ ਰਹੇ ਹਨ। ਸੰਘ ਮੁਖੀ ਨੇ ਸ਼ਾਖਾਵਾਂ ਦੀ ਭੂਮਿਕਾ ਨੂੰ ਰੇਖਾਂਕਿਤ ਕਰਦੇ ਹੋਏ ਕਿਹਾ ਕਿ ਸ਼ਾਖਾਵਾਂ ਸਮਾਜ ਵਿੱਚ ਸਦਭਾਵਨਾ ਅਤੇ ਸਮੂਹਿਕਤਾ ਦਾ ਵਾਤਾਵਰਣ ਬਣਾਉਂਦੀਆਂ ਹਨ। ਸਵੈਮਸੇਵਕ ਸ਼ਾਖਾਵਾਂ ਰਾਹੀਂ ਆਪਣੇ ਆਚਰਣ ਵਿੱਚ ਸਕਾਰਾਤਮਕ ਬਦਲਾਅ ਲਿਆਉਂਦੇ ਹਨ; ਇਹ ਸੰਘ ਦੀ ਆਤਮਾ ਹੈ।
ਜ਼ਿਕਰਯੋਗ ਹੈ ਕਿ ਸੰਘ ਆਪਣੀ ਸਥਾਪਨਾ ਦੀ 100ਵੀਂ ਵਰ੍ਹੇਗੰਢ ਮਨਾ ਰਿਹਾ ਹੈ। ਇਸ ਲਈ ਸੰਘ ਦੇ ਸਵੈਮਸੇਵਕਾਂ ਲਈ ਇਹ ਵਿਜੇਦਸ਼ਮੀ ਉਤਸਵ ਵਿਸ਼ੇਸ਼ ਮਹੱਤਵ ਰੱਖਦਾ ਹੈ। ਡਾ. ਕੇਸ਼ਵ ਬਲੀਰਾਮ ਹੇਡਗੇਵਾਰ ਨੇ ਵਿਜੇਦਸ਼ਮੀ ਦੇ ਹੀ ਦਿਨ 27 ਸਤੰਬਰ, 1925 ਨੂੰ ਨਾਗਪੁਰ ਵਿੱਚ ਸੰਘ ਦੀ ਸਥਾਪਨਾ ਕੀਤੀ ਸੀ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
