ਜਕਾਰਤਾ, 6 ਅਕਤੂਬਰ (ਹਿੰ.ਸ.)। ਇੰਡੋਨੇਸ਼ੀਆਈ ਟਾਪੂ ਪੂਰਬੀ ਜਾਵਾ ਦੇ ਸਿਦੋਆਰਜੋ ਸ਼ਹਿਰ ਵਿੱਚ ਇੱਕ ਸਕੂਲ ਦੀ ਇਮਾਰਤ ਡਿੱਗਣ ਦੀ ਵਾਪਰੀ ਘਟਨਾ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ ਵਧ ਕੇ ਘੱਟੋ-ਘੱਟ 50 ਹੋ ਗਈ ਹੈ। 13 ਲੋਕ ਅਜੇ ਵੀ ਲਾਪਤਾ ਹਨ।

ਆਫ਼ਤ ਮਿਟੀਗੇਸ਼ਨ ਏਜੰਸੀ ਦੇ ਡਿਪਟੀ ਡਾਇਰੈਕਟਰ, ਬੁਡੀ ਇਰਾਵਨ ਨੇ ਸੋਮਵਾਰ ਨੂੰ ਇੱਥੇ ਪ੍ਰੈਸ ਕਾਨਫਰੰਸ ਵਿੱਚ ਦੱਸਿਆ ਕਿ ਪਿਛਲੇ ਹਫ਼ਤੇ ਢਹਿ ਗਈ ਅਲ ਖਜ਼ੀਨੀ ਇਸਲਾਮਿਕ ਬੋਰਡਿੰਗ ਸਕੂਲ ਦੀ ਇਮਾਰਤ ਦੇ ਮਲਬੇ ਨੂੰ ਹਟਾਉਣ ਲਈ ਭਾਰੀ ਮਸ਼ੀਨਰੀ ਦੀ ਵਰਤੋਂ ਕੀਤੀ ਗਈ। ਬਚਾਅ ਕਰਮਚਾਰੀਆਂ ਨੇ ਐਤਵਾਰ ਦੇਰ ਰਾਤ 80 ਪ੍ਰਤੀਸ਼ਤ ਮਲਬੇ ਨੂੰ ਸਾਫ਼ ਕਰ ਦਿੱਤਾ। ਜ਼ਿਆਦਾਤਰ ਲਾਸ਼ਾਂ ਭਾਰੀ ਕੰਕਰੀਟ ਦੇ ਮਲਬੇ ਹੇਠ ਦੱਬੇ ਕਿਸ਼ੋਰ ਵਿਦਿਆਰਥੀਆਂ ਦੀਆਂ ਸਨ। ਹੁਣ ਤੱਕ, 50 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ। ਬਚਾਅ ਟੀਮ ਸੋਮਵਾਰ ਰਾਤ ਤੱਕ ਮਲਬੇ ਵਿੱਚ ਫਸੇ 13 ਲੋਕਾਂ ਨੂੰ ਕੱਢਣ ਲਈ ਹਰ ਸੰਭਵ ਕੋਸ਼ਿਸ਼ ਕਰੇਗੀ। ਉਨ੍ਹਾਂ ਫਸੇ ਲੋਕਾਂ ਦੇ ਬਚਣ ਦੀ ਸੰਭਾਵਨਾ ਬਹੁਤ ਘੱਟ ਦੱਸੀ।ਇਸ ਦੌਰਾਨ, ਰਾਹਤ ਅਤੇ ਬਚਾਅ ਏਜੰਸੀ ਦੇ ਇੱਕ ਅਧਿਕਾਰੀ ਯੁਧੀ ਬ੍ਰਾਮੰਤਯੋ ਨੇ ਦੱਸਿਆ ਕਿ ਮਲਬੇ ਵਿੱਚ ਸਰੀਰ ਦੇ ਟੁਕੜੇ ਟੁਕੜੇ ਖਿੰਡੇ ਮਿਲੇ ਹਨ, ਜਿਸ ਨਾਲ ਮਰਨ ਵਾਲਿਆਂ ਦੀ ਗਿਣਤੀ ਘੱਟੋ-ਘੱਟ 54 ਹੋ ਸਕਦੀ ਹੈ। ਇਮਾਰਤ ਢਹਿਣ ਦਾ ਕਾਰਨ ਉੱਪਰਲੀਆਂ ਮੰਜ਼ਿਲਾਂ 'ਤੇ ਚੱਲ ਰਿਹਾ ਨਿਰਮਾਣ ਕਾਰਜ ਸੀ, ਜਿਸ ਨੂੰ ਇਮਾਰਤ ਦੀ ਨੀਂਹ ਬਰਦਾਸ਼ਤ ਨਹੀਂ ਕਰ ਸਕੀ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ