ਨਵੀਂ ਦਿੱਲੀ, 10 ਨਵੰਬਰ (ਹਿੰ.ਸ.)। ਹਵਾਬਾਜ਼ੀ ਕੰਪਨੀ ਅਕਾਸਾ ਏਅਰ ਜਲਦੀ ਹੀ ਰਾਸ਼ਟਰੀ ਰਾਜਧਾਨੀ ਨਵੀਂ ਦਿੱਲੀ ਤੋਂ ਅੰਤਰਰਾਸ਼ਟਰੀ ਉਡਾਣਾਂ ਸ਼ੁਰੂ ਕਰੇਗੀ। ਕੰਪਨੀ ਨੂੰ ਬੋਇੰਗ ਤੋਂ ਜਹਾਜ਼ਾਂ ਦੀ ਸਪੁਰਦਗੀ ਵੀ ਤੇਜ਼ ਹੋਣ ਦੀ ਉਮੀਦ ਹੈ। ਅਗਸਤ 2022 ਵਿੱਚ ਸੰਚਾਲਨ ਸ਼ੁਰੂ ਕਰਨ ਵਾਲੀ ਏਅਰਲਾਈਨ ਕੋਲ ਇਸ ਸਮੇਂ 30 ਜਹਾਜ਼ਾਂ ਦਾ ਬੇੜਾ ਹੈ।

ਅਕਾਸਾ ਏਅਰ ਦੇ ਸਹਿ-ਸੰਸਥਾਪਕ ਅਤੇ ਮੁੱਖ ਵਪਾਰਕ ਅਧਿਕਾਰੀ (ਸੀਸੀਓ) ਪ੍ਰਵੀਨ ਅਈਅਰ ਨੇ ਇੱਥੇ ਇੱਕ ਪ੍ਰੈਸ ਬ੍ਰੀਫਿੰਗ ਵਿੱਚ ਕਿਹਾ,‘‘ਅਸੀਂ ਜਲਦੀ ਹੀ ਦਿੱਲੀ ਤੋਂ ਅੰਤਰਰਾਸ਼ਟਰੀ ਉਡਾਣਾਂ ਸ਼ੁਰੂ ਕਰਾਂਗੇ।‘‘ ਉਨ੍ਹਾਂ ਇਹ ਵੀ ਕਿਹਾ ਕਿ ਏਅਰਲਾਈਨ ਸਿੰਗਾਪੁਰ, ਉਜ਼ਬੇਕਿਸਤਾਨ, ਇੰਡੋਨੇਸ਼ੀਆ, ਵੀਅਤਨਾਮ ਅਤੇ ਤਾਸ਼ਕੰਦ ਸਮੇਤ ਵੱਖ-ਵੱਖ ਵਿਦੇਸ਼ੀ ਸਥਾਨਾਂ ਲਈ ਉਡਾਣਾਂ ਚਲਾਉਣ ਬਾਰੇ ਵਿਚਾਰ ਕਰੇਗੀ।

ਏਅਰਲਾਈਨ ਕੋਲ ਕੁੱਲ 226 ਬੋਇੰਗ 737 ਮੈਕਸ ਜਹਾਜ਼ਾਂ ਲਈ ਪੱਕਾ ਆਰਡਰ ਹੈ ਅਤੇ ਜਹਾਜ਼ਾਂ ਦੀ ਸਪੁਰਦਗੀ ਵਿੱਚ ਦੇਰੀ ਦਾ ਸਾਹਮਣਾ ਕਰ ਰਹੀ ਹੈ। ਅਈਅਰ ਨੇ ਕਿਹਾ ਕਿ ਬੋਇੰਗ ਦੁਆਰਾ ਉਤਪਾਦਨ ਵਧਾਉਣ ਦੇ ਨਾਲ, ਅਕਾਸਾ ਏਅਰ ਨੂੰ ਉਮੀਦ ਹੈ ਕਿ ਜਹਾਜ਼ ਤੇਜ਼ੀ ਨਾਲ ਪਹੁੰਚਣਗੇ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਇਸ ਸਮੇਂ ਲੋਡ ਫੈਕਟਰ ਅਤੇ ਹਵਾਈ ਕਿਰਾਏ ਵਿਚਕਾਰ ਸੰਤੁਲਨ ਬਣਿਆ ਹੋਇਆ ਹੈ।

ਜ਼ਿਕਰਯੋਗ ਹੈ ਕਿ ਇਹ ਏਅਰਲਾਈਨ 24 ਘਰੇਲੂ ਅਤੇ ਛੇ ਅੰਤਰਰਾਸ਼ਟਰੀ ਸਥਾਨਾਂ ਲਈ ਉਡਾਣਾਂ ਚਲਾਉਂਦੀ ਹੈ, ਜਿਸ ਵਿੱਚੋਂ ਇਸ ਵੇਲੇ ਨਵੀਂ ਦਿੱਲੀ ਤੋਂ ਰੋਜ਼ਾਨਾ 24 ਉਡਾਣਾਂ ਚੱਲਦੀਆਂ ਹਨ। ਉੱਥੇ ਹੀ ਦੋਹਾ, ਜੇਦਾਹ, ਰਿਆਧ, ਅਬੂ ਧਾਬੀ, ਕੁਵੈਤ ਸਿਟੀ (ਕੁਵੈਤ) ਅਤੇ ਫੁਕੇਟ (ਥਾਈਲੈਂਡ) ਲਈ ਵੀ ਅੰਤਰਰਾਸ਼ਟਰੀ ਉਡਾਣਾਂ ਚਲਾਉਂਦੀ ਹੈ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ