ਮਾਸਕੋ, 14 ਨਵੰਬਰ (ਹਿੰ.ਸ.)। ਰੂਸ ਦੀ ਸੰਘੀ ਸੁਰੱਖਿਆ ਸੇਵਾ (ਐਫਐਸਬੀ) ਨੇ ਐਲਾਨ ਕੀਤਾ ਹੈ ਕਿ ਉਸਨੇ ਯੂਕਰੇਨੀ ਖੁਫੀਆ ਏਜੰਸੀਆਂ ਦੁਆਰਾ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦੇ ਲੰਬੇ ਸਮੇਂ ਤੋਂ ਅਧਿਆਤਮਿਕ ਸਲਾਹਕਾਰ ਰਹੇ ਮੈਟਰੋਪੋਲੀਟਨ ਤਿਖੋਨ (ਜਾਰਜੀ ਸ਼ੇਵਕੁਨੋਵ) ਦੀ ਹੱਤਿਆ ਕਰਨ ਦੀ ਸਾਜ਼ਿਸ਼ ਨੂੰ ਨਾਕਾਮ ਕਰ ਦਿੱਤਾ ਹੈ। ਐਫਐਸਬੀ ਨੇ ਹਾਲ ਹੀ ਵਿੱਚ ਇਹ ਜਾਣਕਾਰੀ ਦਿੱਤੀ ਹੈ।
ਇਸਦੇ ਅਨੁਸਾਰ, ਇਹ ਸਾਜ਼ਿਸ਼ ਅਮਰੀਕਾ ਨਾਲ ਚੱਲ ਰਹੀ ਸ਼ਾਂਤੀ ਗੱਲਬਾਤ ਨੂੰ ਪਟੜੀ ਤੋਂ ਉਤਾਰਨ ਦੀ ਕੋਸ਼ਿਸ਼ ਸੀ, ਤਾਂ ਜੋ ਰੂਸ ਇਸ ਤੋਂ ਪਿੱਛੇ ਹਟ ਜਾਵੇ। ਮੈਟਰੋਪੋਲੀਟਨ ਤਿਖੋਨ ਮਾਸਕੋ ਦੇ ਸਰੇਟੈਂਸਕੀ ਮੱਠ ਦਾ ਮਠਾਧੀਸ਼ ਅਤੇ ਰੂਸੀ ਆਰਥੋਡਾਕਸ ਚਰਚ ਵਿੱਚ ਪ੍ਰਮੁੱਖ ਸ਼ਖਸੀਅਤ ਹਨ।
ਐਫਐਸਬੀ ਨੇ ਦਾਅਵਾ ਕੀਤਾ ਕਿ ਤਿਖੋਨ ਦੇ ਨਿੱਜੀ ਸਹਾਇਕ, ਡੇਨਿਸ ਪੋਪੋਵਿਚ, ਅਤੇ ਇੱਕ ਪਾਦਰੀ, ਨਿਕਿਤਾ ਇਵਾਨਕੋਵਿਚ, ਨੂੰ ਯੂਕਰੇਨੀ ਵਿਸ਼ੇਸ਼ ਸੇਵਾਵਾਂ ਦੁਆਰਾ ਭਰਤੀ ਕੀਤੀ ਗਈ ਸੀ ਅਤੇ ਮੱਠ ਦੇ ਅਹਾਤੇ 'ਤੇ ਇੱਕ ਇੰਪ੍ਰੋਵਾਈਜ਼ਡ ਵਿਸਫੋਟਕ ਯੰਤਰ (ਆਈਈਡੀ) ਰੱਖਣ ਦੇ ਨਿਰਦੇਸ਼ ਦਿੱਤੇ ਗਏ ਸਨ। ਐਫਐਸਬੀ ਨੇ ਕਿਹਾ ਕਿ ਯੂਕਰੇਨੀ ਸ਼ਾਸਨ ਨੂੰ ਉਮੀਦ ਸੀ ਕਿ ਸਫਲ ਹਮਲਾ ਸਖ਼ਤ ਰੂਸੀ ਪ੍ਰਤੀਕਿਰਿਆ ਨੂੰ ਭੜਕਾਏਗਾ, ਜਿਸ ਨਾਲ ਰੂਸ ਦੇ ਸੰਯੁਕਤ ਰਾਜ ਅਮਰੀਕਾ ਨਾਲ ਨੇੜਲੇ ਸਬੰਧ ਬਣਾਉਣ ਦੇ ਯਤਨ ਰੁਕ ਜਾਣਗੇ।
ਐਫਐਸਬੀ ਨੇ ਦੱਸਿਆ ਕਿ ਇਸ ਸਬੰਧੀ 11 ਨਵੰਬਰ ਨੂੰ ਮਾਸਕੋ, ਪਸਕੌਵ ਖੇਤਰ ਅਤੇ ਕ੍ਰੀਮੀਆ ਵਿੱਚ ਛਾਪੇ ਮਾਰੇ ਗਏ। ਐਫਐਸਬੀ ਨੇ ਕਥਿਤ ਸ਼ੱਕੀਆਂ ਦੇ ਵੀਡੀਓ ਜਾਰੀ ਕੀਤੇ ਹਨ, ਪਰ ਯੂਕਰੇਨੀ ਖੁਫੀਆ ਏਜੰਸੀਆਂ ਨਾਲ ਉਨ੍ਹਾਂ ਦੇ ਸਿੱਧੇ ਸਬੰਧਾਂ ਨੂੰ ਸਥਾਪਿਤ ਕਰਨ ਵਾਲਾ ਅਜੇ ਤੱਕ ਕੋਈ ਠੋਸ ਸਬੂਤ ਨਹੀਂ ਮਿਲਿਆ ਹੈ। ਹੋਰ ਵੇਰਵੇ ਅਜੇ ਤੱਕ ਪ੍ਰਦਾਨ ਨਹੀਂ ਕੀਤੇ ਗਏ ਹਨ।
ਜ਼ਿਕਰਯੋਗ ਹੈ ਕਿ ਚਰਚ ਨੇ ਕ੍ਰੇਮਲਿਨ ਦਾ ਸਮਰਥਨ ਕੀਤਾ ਹੈ ਅਤੇ ਯੂਕਰੇਨ ਉੱਤੇ ਰੂਸੀ ਹਮਲੇ ਨੂੰ ਪਵਿੱਤਰ ਯੁੱਧ ਕਿਹਾ ਹੈ। ਇਸ ਦੌਰਾਨ, ਕ੍ਰੇਮਲਿਨ ਦੇ ਬੁਲਾਰੇ ਦਮਿਤਰੀ ਪੇਸਕੋਵ ਨੇ ਤਾਸ ਨਿਊਜ਼ ਏਜੰਸੀ ਨੂੰ ਦੱਸਿਆ ਕਿ ਰੂਸ ਨੇ ਇਸ ਸਾਜ਼ਿਸ਼ ਨੂੰ ਸੰਯੁਕਤ ਰਾਜ ਅਮਰੀਕਾ ਨਾਲ ਨਹੀਂ ਉਠਾਇਆ ਹੈ। ਇਸ ਮਾਮਲੇ 'ਤੇ ਯੂਕਰੇਨ ਨੇ ਅਜੇ ਤੱਕ ਕੋਈ ਟਿੱਪਣੀ ਨਹੀਂ ਕੀਤੀ ਹੈ। ਇਸ ਸਾਲ, ਰੂਸ ਨੇ 12 ਤੋਂ ਵੱਧ ਯੂਕਰੇਨੀ ਸਾਜ਼ਿਸ਼ਾਂ ਨੂੰ ਨਾਕਾਮ ਕਰਨ ਦਾ ਦਾਅਵਾ ਕੀਤਾ ਹੈ, ਜਦੋਂ ਕਿ ਯੂਕਰੇਨ ਨੇ ਕੀਵ ਵਿੱਚ ਰੂਸ ਦੁਆਰਾ ਕੀਤੀਆਂ ਗਈਆਂ ਇਸੇ ਤਰ੍ਹਾਂ ਦੀਆਂ ਕੋਸ਼ਿਸ਼ਾਂ ਨੂੰ ਨਾਕਾਮ ਕਰਨ ਦਾ ਦਾਅਵਾ ਕੀਤਾ ਹੈ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
