ਇਸਲਾਮਾਬਾਦ, 21 ਨਵੰਬਰ (ਹਿੰ.ਸ.)। ਪਾਕਿਸਤਾਨ ਦੇ ਖੈਬਰ ਪਖਤੂਨਖਵਾ ਸੂਬੇ ਦੇ ਡੇਰਾ ਇਸਮਾਈਲ ਖਾਨ ਜ਼ਿਲ੍ਹੇ ਵਿੱਚ ਵੀਰਵਾਰ ਨੂੰ ਇੱਕ ਪੁਲਿਸ ਵੈਨ 'ਤੇ ਬੰਬ ਹਮਲਾ ਕੀਤਾ ਗਿਆ। ਇਸ ਹਮਲੇ ਵਿੱਚ ਦੋ ਪੁਲਿਸ ਮੁਲਾਜ਼ਮ ਮਾਰੇ ਗਏ ਅਤੇ ਚਾਰ ਜ਼ਖਮੀ ਹੋ ਗਏ। ਜ਼ਿਲ੍ਹਾ ਪੁਲਿਸ ਮੁਖੀ ਸੱਜਾਦ ਅਹਿਮਦ ਸਾਹਿਬਜ਼ਾਦਾ ਨੇ ਇਸ ਘਟਨਾ ਦੀ ਪੁਸ਼ਟੀ ਕੀਤੀ।

ਡਾਨ ਅਖਬਾਰ ਦੀ ਰਿਪੋਰਟ ਦੇ ਅਨੁਸਾਰ, ਜ਼ਿਲ੍ਹਾ ਪੁਲਿਸ ਮੁਖੀ ਸੱਜਾਦ ਅਹਿਮਦ ਸਾਹਿਬਜ਼ਾਦਾ ਨੇ ਕਿਹਾ ਕਿ ਪੁਲਿਸ ਵੈਨ ਤਕਵਾੜਾ ਚੈੱਕ ਪੋਸਟ ਦੀ ਹੈ। ਵੈਨ ਵਿੱਚ ਸਵਾਰ ਪੁਲਿਸ ਮੁਲਾਜ਼ਮ ਹਥਲਾ-ਗਿਲੋਟੀ ਸੜਕ 'ਤੇ ਗਸ਼ਤ ਕਰ ਰਹੇ ਸਨ ਕਿ ਅਚਾਨਕ ਉਸ ’ਚ ਬੰਬ ਫਟ ਗਿਆ। ਇਸ ਹਮਲੇ ਵਿੱਚ ਡਰਾਈਵਰ ਰਮਜ਼ਾਨ ਅਤੇ ਕਾਂਸਟੇਬਲ ਸੈਫੁਰ ਰਹਿਮਾਨ ਦੀ ਮੌਤ ਹੋ ਗਈ। ਹਵਲਦਾਰ ਸ਼ਾਹਿਦ, ਕਾਂਸਟੇਬਲ ਮਹਿਬੂਬ ਆਲਮ, ਆਸਿਫ ਅਤੇ ਕਿਫਾਯਤ ਜ਼ਖਮੀ ਹੋ ਗਏ।

ਇਹ ਘਟਨਾ ਡੇਰਾ ਇਸਮਾਈਲ ਖਾਨ ਦੀ ਦਰਬਨ ਤਹਿਸੀਲ ਵਿੱਚ ਹੋਏ ਬੰਬ ਹਮਲੇ ਤੋਂ ਇੱਕ ਹਫ਼ਤੇ ਬਾਅਦ ਹੋਈ ਹੈ। ਦਰਬਨ ਤਹਿਸੀਲ ਵਿੱਚ ਸੁਰੱਖਿਆ ਬਲਾਂ ਦੇ ਵਾਹਨ 'ਤੇ ਬੰਬ ਫਟਣ ਨਾਲ ਘੱਟੋ-ਘੱਟ 14 ਸੁਰੱਖਿਆ ਕਰਮਚਾਰੀ ਜ਼ਖਮੀ ਹੋ ਗਏ ਸਨ। ਡੇਰਾ ਇਸਮਾਈਲ ਖਾਨ ਵਿੱਚ ਇਸ ਹਫ਼ਤੇ ਇੱਕ ਅੱਤਵਾਦੀ ਮਾਰਿਆ ਗਿਆ। ਹਫ਼ਤੇ ਦੇ ਅੰਤ ਵਿੱਚ ਜ਼ਿਲ੍ਹੇ ਦੇ ਕੁਲਾਚੀ ਖੇਤਰ ਵਿੱਚ ਦਸ ਲੜਾਕੇ ਮਾਰੇ ਗਏ। 15 ਨਵੰਬਰ ਤੋਂ 19 ਨਵੰਬਰ ਤੱਕ ਚੱਲੇ ਅੱਤਵਾਦ ਵਿਰੋਧੀ ਅਭਿਆਨ ਵਿੱਚ ਸੂਬੇ ਵਿੱਚ 45 ਲੜਾਕੇ ਮਾਰੇ ਗਏ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ