ਬਿਲਾਸਪੁਰ, 5 ਨਵੰਬਰ (ਹਿੰ.ਸ.)। ਛੱਤੀਸਗੜ੍ਹ ਦੇ ਬਿਲਾਸਪੁਰ ਦੇ ਗਤੌਰਾ ਸਟੇਸ਼ਨ ਨੇੜੇ ਲਾਲਖਦਾਨ ਖੇਤਰ ਵਿੱਚ ਮੰਗਲਵਾਰ ਨੂੰ ਕੋਰਬਾ ਪੈਸੇਂਜਰ ਟ੍ਰੇਨ ਪਟੜੀ 'ਤੇ ਖੜੀ ਇੱਕ ਮਾਲਗੱਡੀ ਨਾਲ ਟਕਰਾ ਗਈ, ਜਿਸ ’ਚ ਲੋਕੋ ਪਾਇਲਟ ਦਾ ਇੰਜਣ ਮਾਲਗੱਡੀ 'ਤੇ ਚੜ੍ਹ ਗਿਆ। ਇਸ ਭਿਆਨਕ ਹਾਦਸੇ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ, ਜਿਸਦਾ ਅਨੁਮਾਨ ਮੰਗਲਵਾਰ ਦੇਰ ਰਾਤ ਅੱਠ ਜਾਂ ਨੌਂ ਲਗਾਇਆ ਗਿਆ ਸੀ, ਜੋ ਹੁਣ 11 ਹੋ ਗਈ ਹੈ, ਉੱਥੇ ਹੀ 20 ਤੋਂ ਵੱਧ ਲੋਕ ਜ਼ਖਮੀ ਹਨ।ਸੀਪੀਆਰਓ ਵਿਪੁਲ ਕੁਮਾਰ ਨੇ ਬੁੱਧਵਾਰ ਨੂੰ ਇਸ ਜਾਣਕਾਰੀ ਦੀ ਪੁਸ਼ਟੀ ਕੀਤੀ। ਉਨ੍ਹਾਂ ਦੱਸਿਆ ਕਿ ਜ਼ਖਮੀ ਯਾਤਰੀਆਂ ਦਾ ਇਲਾਜ ਰੇਲਵੇ ਹਸਪਤਾਲ, ਸਿਮਸ ਅਤੇ ਅਪੋਲੋ ਹਸਪਤਾਲ ਵਿੱਚ ਕੀਤਾ ਜਾ ਰਿਹਾ ਹੈ। ਬਚਾਅ ਟੀਮਾਂ ਨੇ ਕਈ ਯਾਤਰੀਆਂ ਨੂੰ ਬੋਗੀ ਵਿੱਚੋਂ ਸੁਰੱਖਿਅਤ ਕੱਢ ਲਿਆ। ਯਾਤਰੀ ਰੇਲਗੱਡੀ ਦੀ ਬੋਗੀ ਨੂੰ ਗੈਸ ਕਟਰ ਨਾਲ ਵੀ ਕੱਟਿਆ ਗਿਆ ਹੈ। ਅੰਦਰ ਫਸੇ ਸਾਰੇ ਲੋਕਾਂ ਨੂੰ ਬਚਾਇਆ ਗਿਆ, ਜਿਨ੍ਹਾਂ ਵਿੱਚ ਬੱਚੇ ਅਤੇ ਔਰਤਾਂ ਵੀ ਸ਼ਾਮਲ ਹਨ। ਬਚਾਅ ਟੀਮ ਦਾ ਬਚਾਅ ਕਾਰਜ ਦੇਰ ਰਾਤ ਤੱਕ ਜਾਰੀ ਰਿਹਾ ਅਤੇ ਤਿੰਨ ਲੋਕਾਂ ਦੀਆਂ ਲਾਸ਼ਾਂ ਵੀ ਬਰਾਮਦ ਕੀਤੀਆਂ ਗਈਆਂ। ਰੇਲਵੇ ਵੱਲੋਂ ਜਾਂਚ ਦੀ ਗੱਲ ਆਖੀ ਜਾ ਰਹੀ ਹੈ। ਜ਼ਿਕਰਯੋਗ ਹੈ ਕਿ ਇਹ ਹਾਦਸਾ ਮੰਗਲਵਾਰ ਸ਼ਾਮ 4:00 ਵਜੇ ਦੇ ਕਰੀਬ ਵਾਪਰਿਆ।

10 ਘੰਟਿਆਂ ਤੋਂ ਵੱਧ ਸਮੇਂ ਤੱਕ ਚੱਲਿਆ ਬਚਾਅ ਕਾਰਜ, ਟ੍ਰੈਕ ਦੀ ਮੁਰੰਮਤ ’ਚ ਲੱਗੀ ਟੀਮ :

ਹਾਦਸੇ ਤੋਂ ਬਾਅਦ 10 ਘੰਟਿਆਂ ਤੋਂ ਵੱਧ ਸਮੇਂ ਤੱਕ, ਰੇਲਵੇ, ਜ਼ਿਲ੍ਹਾ ਪ੍ਰਸ਼ਾਸਨ, ਪੁਲਿਸ, ਐਸਡੀਆਰਐਫ ਅਤੇ ਐਨਡੀਆਰਐਫ ਦੀਆਂ ਟੀਮਾਂ ਰਾਹਤ ਅਤੇ ਬਚਾਅ ਕਾਰਜਾਂ ਵਿੱਚ ਰੁੱਝੀਆਂ ਰਹੀਆਂ। ਇਸ ਦੌਰਾਨ, ਡੱਬਿਆਂ ਵਿੱਚ ਫਸੇ ਮ੍ਰਿਤਕਾਂ ਅਤੇ ਜ਼ਖਮੀ ਯਾਤਰੀਆਂ ਨੂੰ ਇੱਕ-ਇੱਕ ਕਰਕੇ ਬਾਹਰ ਕੱਢਿਆ ਗਿਆ। ਇਸ ਦੌਰਾਨ, ਰੇਲਵੇ ਦੇ ਸੁਰੱਖਿਆ ਅਤੇ ਤਕਨੀਕੀ ਵਿਭਾਗਾਂ ਦੀਆਂ ਟੀਮਾਂ ਟ੍ਰੈਕ ਦੀ ਮੁਰੰਮਤ ਵਿੱਚ ਰੁੱਝੀਆਂ ਰਹੀਆਂ। ਰੇਲਵੇ ਨੇ ਸ਼ਾਮ 7 ਵਜੇ ਦੇ ਕਰੀਬ ਇੱਕ ਟ੍ਰੈਕ 'ਤੇ ਕੰਮ ਦੁਬਾਰਾ ਸ਼ੁਰੂ ਕੀਤਾ। ਦੇਰ ਰਾਤ ਨੂੰ ਵਿਚਕਾਰਲੀ ਲਾਈਨ ਨੂੰ ਵੀ ਬਹਾਲ ਕਰ ਦਿੱਤਾ ਗਿਆ। ਕ੍ਰੇਨਾਂ ਦੀ ਮਦਦ ਨਾਲ ਬਚਾਅ ਕਾਰਜ ਜਾਰੀ ਰਹੇ।

ਮਾਲ ਗੱਡੀ ਨਾਲ ਟਕਰਾਉਣ ਤੋਂ ਬਾਅਦ, ਮੇਮੂ ਲੋਕਲ ਦਾ ਇੰਜਣ ਅਤੇ ਉਸ ਨਾਲ ਜੁੜਿਆ ਮਹਿਲਾ ਰਿਜ਼ਰਵਡ ਕੋਚ ਬੁਰੀ ਤਰ੍ਹਾਂ ਨੁਕਸਾਨਿਆ ਗਿਆ। ਅੰਦਰ ਫਸੇ ਲੋਕਾਂ ਨੂੰ ਕੱਢਣ ਲਈ, ਕੋਚ ਅਤੇ ਸੀਟਾਂ ਨੂੰ ਕਟਰ ਨਾਲ ਕੱਟਣਾ ਪਿਆ। ਰਾਤ 10 ਵਜੇ ਦੇ ਕਰੀਬ, ਅੱਠ ਲਾਸ਼ਾਂ ਕੱਢੀਆਂ ਗਈਆਂ ਸਨ। ਇੱਕ ਜ਼ਖਮੀ ਵਿਅਕਤੀ ਦੀ ਰੇਲਵੇ ਹਸਪਤਾਲ ਵਿੱਚ ਮੌਤ ਹੋ ਗਈ। ਤਿੰਨ ਯਾਤਰੀ ਕੋਚ ਦੇ ਅੰਦਰ ਫਸੇ ਹੋਏ ਸਨ, ਅਤੇ ਉਨ੍ਹਾਂ ਨੂੰ ਕੱਢਣਾ ਮੁਸ਼ਕਲ ਸੀ। ਇਸ ਲਈ, ਦੇਰ ਰਾਤ ਤੱਕ ਚੱਲੇ ਬਚਾਅ ਕਾਰਜ ਦੌਰਾਨ, ਕੋਚ ਨੂੰ ਕਰੇਨ ਦੀ ਮਦਦ ਨਾਲ ਸਾਈਡ ’ਤੇ ਲਿਆਂਦਾ ਗਿਆ। ਇਸ ਤੋਂ ਬਾਅਦ, ਕਰੇਨ ਅਤੇ ਕਟਰ ਦੀ ਵਰਤੋਂ ਕਰਕੇ ਖਿੜਕੀਆਂ ਅਤੇ ਸੀਟਾਂ ਨੂੰ ਹਟਾ ਦਿੱਤਾ ਗਿਆ ਅਤੇ ਤਿੰਨਾਂ ਲਾਸ਼ਾਂ ਨੂੰ ਵੀ ਬਾਹਰ ਕੱਢਿਆ ਗਿਆ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ