ਮਾਊਂਟ ਮਾਊਂਗਾਨੁਈ, 19 ਦਸੰਬਰ (ਹਿੰ.ਸ.)। ਨਿਊਜ਼ੀਲੈਂਡ ਅਤੇ ਵੈਸਟਇੰਡੀਜ਼ ਵਿਚਕਾਰ ਚੱਲ ਰਹੀ ਟੈਸਟ ਲੜੀ ਵਿੱਚ ਤੇਜ਼ ਗੇਂਦਬਾਜ਼ਾਂ ਦੀਆਂ ਸੱਟਾਂ ਦਾ ਸਿਲਸਿਲਾ ਲਗਾਤਾਰ ਜਾਰੀ ਹੈ। ਇਸੇ ਕ੍ਰਮ ’ਚ ਹੋਏ ਘਟਨਾਕ੍ਰਮ ਵਿੱਚ, ਵੈਸਟਇੰਡੀਜ਼ ਦੇ ਸੀਨੀਅਰ ਤੇਜ਼ ਗੇਂਦਬਾਜ਼ ਕੇਮਾਰ ਰੋਚ ਸ਼ੁੱਕਰਵਾਰ ਨੂੰ ਮਾਊਂਟ ਮੌਂਗਾਨੁਈ ਵਿੱਚ ਟੈਸਟ ਦੇ ਦੂਜੇ ਦਿਨ ਤੋਂ ਬਾਹਰ ਹੋ ਗਏ। ਵੈਸਟਇੰਡੀਜ਼ ਨੇ ਪਹਿਲੇ ਦਿਨ ਸਿਰਫ਼ ਇੱਕ ਵਿਕਟ ਹੀ ਲਈ ਸੀ। 89ਵੇਂ ਓਵਰ ਦੌਰਾਨ, ਕੇਮਾਰ ਰੋਚ ਨੂੰ ਹੈਮਸਟ੍ਰਿੰਗ ਵਿੱਚ ਖਿਚਾਅ ਮਹਿਸੂਸ ਹੋਇਆ ਅਤੇ ਓਵਰ ਪੂਰਾ ਕਰਨ ਤੋਂ ਬਾਅਦ ਮੈਦਾਨ ਛੱਡ ਦਿੱਤਾ। ਉਹ ਸ਼ੁੱਕਰਵਾਰ ਸਵੇਰੇ ਟੀਮ ਦੇ ਅਭਿਆਸ ਸੈਸ਼ਨ ਦੌਰਾਨ ਵੀ ਨਹੀਂ ਦੇਖੇ ਗਏ। ਪ੍ਰਸਾਰਣ ਦੌਰਾਨ ਇਹ ਪੁਸ਼ਟੀ ਕੀਤੀ ਗਈ ਕਿ ਰੋਚ ਦੂਜੇ ਦਿਨ ਦੇ ਖੇਡ ਲਈ ਉਪਲਬਧ ਨਹੀਂ ਹਨ। ਹਾਲਾਂਕਿ, ਇਹ ਸਪੱਸ਼ਟ ਨਹੀਂ ਹੈ ਕਿ ਉਹ ਟੀਮ ਵਿੱਚ ਕਦੋਂ ਵਾਪਸ ਆ ਸਕਣਗੇ। ਇਸ ਤੋਂ ਇਲਾਵਾ, ਸ਼ਾਈ ਹੋਪ ਵੀ ਬਿਮਾਰੀ ਹੋਣ ਕਾਰਨ ਹੋਟਲ ਵਿੱਚ ਰੁਕੇ ਹੋਏ ਹਨ।ਵੈਸਟਇੰਡੀਜ਼ ਤਿੰਨ ਮੈਚਾਂ ਦੀ ਟੈਸਟ ਲੜੀ ਵਿੱਚ ਪਹਿਲਾਂ ਹੀ 1-0 ਨਾਲ ਪਿੱਛੇ ਹੈ ਅਤੇ ਪਹਿਲੀ ਪਾਰੀ ਵਿੱਚ ਵੱਡੇ ਸਕੋਰ ਦੀ ਸੰਭਾਵਨਾ ਨਾਲ ਜੂਝ ਰਿਹਾ ਹੈ, ਕਿਉਂਕਿ ਡੇਵੋਨ ਕੌਨਵੇ ਦੋਹਰੇ ਸੈਂਕੜੇ ਦੇ ਨੇੜੇ ਹਨ। ਰੋਚ ਦੀ ਗੈਰਹਾਜ਼ਰੀ ਵਿੱਚ, ਵੈਸਟਇੰਡੀਜ਼ ਦਾ ਤੇਜ਼ ਗੇਂਦਬਾਜ਼ੀ ਹਮਲਾ ਹੁਣ ਜੈਡਨ ਸੀਲਸ 'ਤੇ ਨਿਰਭਰ ਕਰਦਾ ਹੈ, ਜਿਨ੍ਹਾਂ ਨੇ ਇਸ ਦੌਰੇ ਵਿੱਚ ਹੁਣ ਤੱਕ ਪੰਜ ਪਾਰੀਆਂ ਵਿੱਚ ਸਿਰਫ ਪੰਜ ਵਿਕਟਾਂ ਲਈਆਂ ਹਨ। ਉਨ੍ਹਾਂ ਨੂੰ ਐਂਡਰਸਨ ਫਿਲਿਪ ਅਤੇ ਜਸਟਿਨ ਗ੍ਰੀਵਜ਼ ਦਾ ਸਮਰਥਨ ਹੈ।
ਟੀਮ ਦੀਆਂ ਮੁਸ਼ਕਲਾਂ ਇੱਥੇ ਹੀ ਖਤਮ ਨਹੀਂ ਹੁੰਦੀਆਂ। ਓਜੇ ਸ਼ੀਲਡਜ਼ ਅਤੇ ਤੇਗ ਨਾਰਾਇਣ ਚੰਦਰਪਾਲ ਵੀ ਮਾਮੂਲੀ ਸੱਟਾਂ ਨਾਲ ਜੂਝ ਰਹੇ ਹਨ। ਜਦੋਂ ਜਸਟਿਨ ਗ੍ਰੀਵਜ਼ ਦੂਜੇ ਸੈਸ਼ਨ ਵਿੱਚ ਮੈਦਾਨ ਛੱਡ ਕੇ ਚਲੇ ਗਏ, ਤਾਂ ਸਥਾਨਕ ਖਿਡਾਰੀ ਸੇਬੇਸਟੀਅਨ ਹੀਥ ਨੂੰ ਵੈਸਟਇੰਡੀਜ਼ ਲਈ ਬਦਲ ਵਜੋਂ ਮੈਦਾਨ ਵਿੱਚ ਆਉਣਾ ਪਿਆ।
ਇਸ ਲੜੀ ਵਿੱਚ ਨਿਊਜ਼ੀਲੈਂਡ ਨੂੰ ਵੀ ਸੱਟਾਂ ਦਾ ਸਾਹਮਣਾ ਕਰਨਾ ਪਿਆ ਹੈ। ਮੈਟ ਹੈਨਰੀ ਅਤੇ ਨਾਥਨ ਸਮਿਥ ਕ੍ਰਾਈਸਟਚਰਚ ਟੈਸਟ ਵਿੱਚ ਜ਼ਖਮੀ ਹੋ ਗਏ ਸਨ, ਜਿੱਥੇ ਵੈਸਟਇੰਡੀਜ਼ ਨੇ ਸਖ਼ਤ ਡਰਾਅ ਖੇਡਿਆ ਸੀ। ਦੂਜੇ ਟੈਸਟ ਵਿੱਚ ਬਲੇਅਰ ਟਿਕਨਰ ਦੀ ਭਾਗੀਦਾਰੀ ਵੀ ਸੀਮਤ ਰਹੀ। ਟੌਮ ਬਲੰਡੇਲ, ਜਿਨ੍ਹਾਂ ਨੂੰ ਪਹਿਲੇ ਟੈਸਟ ਦੇ ਪਹਿਲੇ ਦਿਨ ਹੈਮਸਟ੍ਰਿੰਗ ਦੀ ਸੱਟ ਲੱਗੀ ਸੀ, ਹੁਣ ਠੀਕ ਹੋ ਗਏ ਹਨ ਅਤੇ ਤੀਜੇ ਟੈਸਟ ਲਈ ਵਾਪਸ ਆਏ ਹਨ।
ਜ਼ਿਕਰਯੋਗ ਹੈ ਕਿ ਵੈਸਟਇੰਡੀਜ਼ 2025-27 ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਚੱਕਰ ਵਿੱਚ ਹੁਣ ਤੱਕ ਖੇਡੇ ਗਏ ਸੱਤ ਟੈਸਟਾਂ ਵਿੱਚੋਂ ਛੇ ਹਾਰ ਚੁੱਕਾ ਹੈ। ਇਹ ਨਵੇਂ ਚੱਕਰ ਦੀ ਨਿਊਜ਼ੀਲੈਂਡ ਦੀ ਪਹਿਲੀ ਟੈਸਟ ਲੜੀ ਹੈ, ਜਿਸ ਵਿੱਚ ਉਨ੍ਹਾਂ ਨੇ ਇੱਕ ਮੈਚ ਡਰਾਅ ਕੀਤਾ ਹੈ ਅਤੇ ਇੱਕ ਜਿੱਤਿਆ ਹੈ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
