ਪੈਰਿਸ, 23 ਸਤੰਬਰ (ਹਿੰ.ਸ.)। ਫਰਾਂਸ ’ਚ ਸੋਮਵਾਰ ਨੂੰ 80 ਤੋਂ ਵੱਧ ਨਗਰ ਪਾਲਿਕਾਵਾਂ ਨੇ ਫਲਸਤੀਨੀ ਝੰਡਾ ਲਹਿਰਾਇਆ, ਹਾਲਾਂਕਿ ਸਰਕਾਰ ਨੇ ਅਜਿਹਾ ਕਰਨ ਵਿਰੁੱਧ ਚੇਤਾਵਨੀ ਦਿੱਤੀ ਸੀ। ਇਹ ਕਦਮ ਉਦੋਂ ਚੁੱਕਿਆ ਗਿਆ ਹੈ ਜਦੋਂ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਨਿਊਯਾਰਕ ਵਿੱਚ ਸੰਯੁਕਤ ਰਾਸ਼ਟਰ ਮਹਾਸਭਾ ਦੌਰਾਨ ਫਲਸਤੀਨੀ ਰਾਜ ਨੂੰ ਮਾਨਤਾ ਦੇਣ ਦੀ ਤਿਆਰੀ ਕਰ ਰਹੇ ਹਨ।
ਇਸ ਮਾਨਤਾ ਦੇ ਐਲਾਨ ਨੇ ਇਜ਼ਰਾਈਲ ਵਿੱਚ ਸਖ਼ਤ ਰਾਜਨੀਤਿਕ ਆਲੋਚਨਾ ਨੂੰ ਜਨਮ ਦਿੱਤਾ ਹੈ। ਲਿਓਨ, ਨੈਨਟੇਸ, ਰੇਨੇਸ ਅਤੇ ਬੇਸਨਕੋਨ ਵਰਗੇ ਪ੍ਰਮੁੱਖ ਫਰਾਂਸੀਸੀ ਸ਼ਹਿਰਾਂ ਵਿੱਚ ਨਗਰ ਪਾਲਿਕਾਵਾਂ ਨੇ ਫਲਸਤੀਨੀ ਝੰਡਾ ਲਹਿਰਾਇਆ। ਪੈਰਿਸ ਵਿੱਚ ਖੱਬੇ-ਪੱਖੀ ਸਿਟੀ ਕੌਂਸਲ ਮੈਂਬਰਾਂ ਨੇ ਮੇਅਰ ਐਨੀ ਹਿਡਾਲਗੋ ਦੇ ਵਿਰੋਧ ਦੇ ਬਾਵਜੂਦ ਸਿਟੀ ਹਾਲ ਵਿੱਚ ਅੱਧੇ ਘੰਟੇ ਲਈ ਝੰਡਾ ਲਹਿਰਾਇਆ।
ਗ੍ਰਹਿ ਮੰਤਰਾਲੇ ਨੇ ਦੱਸਿਆ ਕਿ ਦੇਸ਼ ਭਰ ਵਿੱਚ 34,875 ਵਿੱਚੋਂ ਸਿਰਫ਼ 86 ਨਗਰ ਪਾਲਿਕਾਵਾਂ ਨੇ ਫਲਸਤੀਨੀ ਝੰਡਾ ਲਹਿਰਾਇਆ। ਮੰਤਰਾਲੇ ਨੇ ਇਸ ਕਦਮ ਨੂੰ ਸਰਕਾਰੀ ਆਦੇਸ਼ ਦੀ ਉਲੰਘਣਾ ਦੱਸਿਆ। ਫਰਾਂਸ ਵਿੱਚ ਇਹ ਘਟਨਾ ਦੇਸ਼ ਵਿੱਚ ਫਲਸਤੀਨੀ ਮੁੱਦੇ ਪ੍ਰਤੀ ਵੱਧ ਰਹੀ ਸੰਵੇਦਨਸ਼ੀਲਤਾ ਅਤੇ ਇਸ ਸੰਬੰਧੀ ਸਥਾਨਕ ਰਾਜਨੀਤੀ ਵਿੱਚ ਵੱਖੋ-ਵੱਖਰੇ ਰੁਝਾਨਾਂ ਨੂੰ ਉਜਾਗਰ ਕਰਦੀ ਹੈ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
