ਫਾਜਿਲਕਾ 24 ਸਤੰਬਰ (ਹਿੰ. ਸ.)। ਪੰਜਾਬ ਸਰਕਾਰ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਅਤੇ ਡਾ. ਰਾਜ ਕੁਮਾਰ ਸਿਵਲ ਸਰਜਨ ਦੀ ਉਚੇਚੀ ਨਿਗਰਾਨੀ ਵਿੱਚ ਡਾ. ਰੋਹਿਤ ਗੋਇਲ ਨੇ ਵਿਸ਼ਵ ਅਲਜਾਈਮਰ ਦਿਵਸ ਸਬੰਧੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਅਲਜ਼ਾਈਮਰ ਰੋਗ ਡਿਮੈਂਸ਼ੀਆ ਦੀ ਕਿਸਮ ਹੈ, ਜੋ ਆਮ ਤੌਰ ਤੇ 65 ਸਾਲ ਤੋਂ ਵੱਧ ਉਮਰ ਦੇ ਲੋਕਾਂ ਨੂੰ ਪ੍ਰਭਾਵਿਤ ਕਰਦੀ ਹੈ। ਜੋ ਯਾਦ ਸ਼ਕਤੀ, ਸੋਚਣ, ਭਾਸ਼ਾ ਸਮਝਣ ਅਤੇ ਸਿੱਖਣ ਵਿੱਚ ਮੁਸ਼ਕਿਲ ਪੈਦਾ ਕਰਦੀ ਹੈ।ਇਸ ਸਮੇਂ ਡਾ. ਪਿਕਾਕਸ਼ੀ ਅਰੋੜਾ ਮਨੋ ਰੋਗਾਂ ਦੇ ਮਾਹਿਰ ਨੇ ਦੱਸਿਆ ਕਿ ਕਈ ਤਰ੍ਹਾਂ ਦੇ ਹਾਦਸਿਆਂ, ਬਿਮਾਰੀਆਂ ਕਾਰਣ ਮਰੀਜ਼ ਦੇ ਦਿਮਾਗ ਅਤੇ ਸਪਾਈਨਲ ਕਾਰਡ ਵਿੱਚ ਲੰਬੇ ਸਮੇਂ ਤੱਕ ਸੋਜ਼ ਰਹਿਣਾ, ਸਿਰ ਦੀ ਸੱਟ, ਥਾਇਰਾਇਡ, ਸਰੀਰ ਵਿੱਚ ਤਰਲ ਪਦਾਰਥਾਂ ਦੀ ਕਮੀ, ਪੌਸ਼ਟਿਕ ਭੋਜਣ ਨਾ ਖਾਣਾ, ਬਹੁਤ ਜ਼ਿਆਦਾ ਤਣਾਅ, ਪਰਿਵਾਰਿਕ ਇਤਿਹਾਸ ਇਸ ਦਾ ਕਾਰਣ ਹੋ ਸਕਦੇ ਹਨ। ਕਈ ਵਾਰੀ ਦਵਾਈਆਂ ਦੇ ਬੁਰੇ ਪ੍ਰਭਾਵ ਨਾਲ ਦਿਮਾਗ ਅਤੇ ਸੋਚਣ ਸ਼ਕਤੀ ਪ੍ਰਭਾਵਿਤ ਹੁੰਦੀ ਹੈ ਅਤੇ ਫਿਰ ਇਹ ਬਿਮਾਰੀ ਦਾ ਰੂਪ ਧਾਰਣ ਕਰ ਲੈਂਦੀ ਹੈ। ਉਨਾਂ ਦੱਸਿਆ ਕਿ ਗੱਡੀ ਚਲਾਉਂਦਿਆਂ ਅਚਾਨਕ ਰਸਤਾ ਭੁੱਲ ਜਾਣਾ, ਕੋਈ ਚੀਜ਼ ਖਰੀਦਣ ਤੋਂ ਬਾਅਦ ਪੈਸੇ ਦੇਣਾ ਭੁੱਲ ਜਾਣਾ, ਕੋਈ ਸਮਾਨ ਖਰੀਦਣ ਸਮੇਂ ਸਮਾਨ ਭੁੱਲ ਜਾਣਾ, ਜਿੰਦਗੀ ਦੀਆਂ ਕੋਈ ਵੀ ਯਾਦਾਂ ਭੁੱਲ ਜਾਣਾ, ਵਾਰ ਵਾਰ ਇੱਕੋ ਸਵਾਲ ਕਰਨਾ ਇਸ ਬਿਮਾਰੀ ਦੇ ਲੱਛਣ ਹੋ ਸਕਦੇ ਹਨ।ਹਰੇਕ ਇਨਸਾਨ ਨੂੰ ਖਾਸ ਕਰਕੇ ਇਸ ਬਿਮਾਰੀ ਦੇ ਲੱਛਣਾਂ ਵਾਲੇ ਵਿਅਕਤੀਆਂ ਨੂੰ ਸਲਾਹ ਦਿਓ ਕਿ ਰੋਜ਼ਾਨਾ ਦੀ ਜ਼ਿੰਦਗੀ ਵਿੱਚ ਸਰਗਰਮ ਰਹੋ, ਦੋਸਤਾਂ ਨਾਲ ਸਮਾਂ ਬਿਤਾਓ, ਅਖਬਾਰਾਂ ਅਤੇ ਟੀ.ਵੀ ਦੇਖੋ, ਨਵੇਂ ਹੁਨਰ ਸਿੱਖੋ, ਧਾਰਮਿਕ ਸਥਾਨਾਂ ਤੇ ਜਾਓ, ਸਮਾਜ ਸੇਵੀ ਸੰਸਥਾਵਾਂ ਨਾਲ ਜੁੜ ਕੇ ਆਪਣੇ ਆਪ ਨੂੰ ਸਰਗਰਮ ਰੱਖਿਆ ਜਾ ਸਕਦਾ ਹੈ। ਰਿਟਾਇਰ ਹੋਣ ਤੋਂ ਬਾਅਦ ਆਪਣੇ ਆਪ ਨੂੰ ਕਿਸੇ ਕੰਮਾਂ ਵਿੱਚ ਸਰਗਰਮ ਰੱਖੋ। ਰੋਜ਼ਾਨਾ 7 ਤੋਂ 8 ਘੰਟੇ ਨੀਂਦ ਲਵੋ। ਉਨਾਂ ਕਿਹਾ ਕਿ ਆਪਣੇ ਰੋਜ਼ਾਨਾ ਦੇ ਭੋਜਨ ਵਿੱਚ ਸਿਹਤਮੰਦ ਭੋਜਨ ਖਾਓ।ਸਿਹਤਮੰਦ ਜੀਵਨਸ਼ੈਲੀ, ਖਾਣ ਪੀਣ ਦੀ ਆਦਤਾਂ ਬਦਲ ਕੇ ਅਤੇ ਨਿਯਮਿਤ ਚੈਕਅੱਪ ਨਾਲ ਬਿਮਾਰੀ ਤੋਂ ਬਚਿਆ ਜਾ ਸਕਦਾ ਹੈ। ਜੇਕਰ ਕਿਸੇ ਪਰਿਵਾਰ ਵਿੱਚ ਪਹਿਲਾਂ ਕੋਈ ਅਲਜ਼ਾਈਮਰ ਦਾ ਮਰੀਜ਼ ਸੀ ਤਾਂ ਨੌਜਵਾਨ ਅਵਸਥਾ ਵਿੱਚ ਹੀ ਸੁਚੇਤ ਰਹੋ। ਉਹਨਾਂ ਦੱਸਿਆ ਕਿ ਸ਼ੁਰੂ ਦੇ ਲੱਛਣਾਂ ਸਮੇਂ ਹੀ ਮਾਹਿਰ ਡਾਕਟਰ ਤੋਂ ਸਲਾਹ ਲੈਣ ਨਾਲ ਭੁੱਲਣ ਦੀ ਸਮੱਸਿਆ ਤੇ ਕਾਬੂ ਪਾਇਆ ਜਾ ਸਕਦਾ ਹੈ। ਉਹਨਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਇਸ ਤਰ੍ਹਾਂ ਦੇ ਲੱਛਣਾਂ ਵਾਲਿਆਂ ਮਰੀਜ਼ਾਂ ਨੂੰ ਇਲਾਜ ਵਿੱਚ ਸਹਾਇਤਾ ਕਰੋ।

ਹਿੰਦੂਸਥਾਨ ਸਮਾਚਾਰ / ਦਵਿੰਦਰ ਸਿੰਘ