ਵਾਸ਼ਿੰਗਟਨ, 06 ਜਨਵਰੀ (ਹਿੰ.ਸ.)। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਈਰਾਨ ਬਾਰੇ ਇਰਾਦਿਆਂ ਨੇ ਸਸਪੈਂਸ ਵਧਾ ਦਿੱਤਾ ਹੈ। ਟਰੰਪ ਦੀ 'ਮੇਕ ਇਰਾਨ ਗ੍ਰੇਟ ਅਗੇਨ' ਹੈਟ ਫੜੇ ਸਾਹਮਣੇ ਆਏ ਇੱਕ ਨਵੀਂ ਤਸਵੀਰ ਨੇ ਲੋਕਾਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਹੈ। ਹਾਲਾਂਕਿ, ਈਰਾਨ ਵਿੱਚ ਵਿਰੋਧ ਪ੍ਰਦਰਸ਼ਨਾਂ ਦੌਰਾਨ ਟਰੰਪ ਨੇ ਅਜੇ ਤੱਕ ਕੋਈ ਸਿੱਧੀ ਟਿੱਪਣੀ ਨਹੀਂ ਕੀਤੀ ਹੈ।

ਇਰਾਨ ਇੰਟਰਨੈਸ਼ਨਲ ਦੀ ਰਿਪੋਰਟ ਦੇ ਅਨੁਸਾਰ, ਸੈਨੇਟਰ ਲਿੰਡਸੇ ਗ੍ਰਾਹਮ ਨੇ ਆਪਣੇ ਐਕਸ ਅਕਾਊਂਟ 'ਤੇ ਇਹ ਤਸਵੀਰ ਸਾਂਝੀ ਕੀਤੀ ਹੈ। ਤਸਵੀਰ ਵਿੱਚ, ਦੋਵੇਂ ਲੋਕ ਏਅਰ ਫੋਰਸ ਵਨ ਵਿੱਚ ਮੁਸਕਰਾਉਂਦੇ ਦਿਖਾਈ ਦੇ ਰਹੇ ਹਨ ਅਤੇ ਟਰੰਪ ਨੇ ਉਹ ਹੈਟ ਫੜੀ ਹੋਈ ਹੈ। ਟਰੰਪ ਨੇ ਸਭ ਤੋਂ ਪਹਿਲਾਂ ਜੂਨ ਵਿੱਚ 12 ਦਿਨਾਂ ਦੀ ਜੰਗ ਦੌਰਾਨ ਕਿਹਾ ਸੀ ਕਿ ਜੇਕਰ ਈਰਾਨ ਦੇ ਸ਼ਾਸਕ ਈਰਾਨ ਨੂੰ ਦੁਬਾਰਾ ਮਹਾਨ ਨਹੀਂ ਬਣਾ ਸਕਦੇ, ਤਾਂ ਸ਼ਾਸਨ ਤਬਦੀਲੀ 'ਤੇ ਵਿਚਾਰ ਕੀਤਾ ਜਾਣਾ ਚਾਹੀਦਾ ਹੈ।

ਗ੍ਰਾਹਮ ਨੇ ਲਿਖਿਆ, ਤਾਨਾਸ਼ਾਹੀ ਦੇ ਵਿਰੁੱਧ ਖੜ੍ਹੇ ਈਰਾਨ ਦੇ ਬਹਾਦਰ ਲੋਕਾਂ ’ਤੇ ਭਗਵਹਨ ਦੀ ਕ੍ਰਿਪਾ ਹੋਵੇ ਅਤੇ ਉਹ ਸੁਰੱਖਿਅਤ ਰਹਿਣ। ਉਨ੍ਹਾਂ ਨੇ ਦੇਸ਼ ਭਰ ਵਿੱਚ ਚੱਲ ਰਹੇ ਵਿਰੋਧ ਪ੍ਰਦਰਸ਼ਨਾਂ ਦਾ ਹਵਾਲਾ ਦਿੱਤਾ। ਵਾਸ਼ਿੰਗਟਨ ਇੰਸਟੀਚਿਊਟ ਵਿੱਚ ਈਰਾਨ ਮਾਮਲਿਆਂ ਦੀ ਮਾਹਰ ਹੋਲੀ ਡੈਗਰੇਸ ਨੇ ਕਿਹਾ ਕਿ ਇਸ ਫੋਟੋ ਦੀ ਕਈ ਤਰੀਕਿਆਂ ਨਾਲ ਵਿਆਖਿਆ ਕੀਤੀ ਜਾ ਸਕਦੀ ਹੈ, ਪਰ ਇਹ ਘੱਟੋ ਘੱਟ ਦਰਸਾਉਂਦਾ ਹੈ ਕਿ ਈਰਾਨ ਦਾ ਮੁੱਦਾ ਰਾਸ਼ਟਰਪਤੀ ਟਰੰਪ ਦੇ ਧਿਆਨ ਵਿੱਚ ਹੈ।

ਡੈਗਰੇਸ ਨੇ ਕਿਹਾ, ਦੁਨੀਆ ਦਾ ਜ਼ਿਆਦਾਤਰ ਧਿਆਨ ਵੈਨੇਜ਼ੁਏਲਾ 'ਤੇ ਹੈ। ਇਸ ਟੋਪੀ ਨਾਲ ਫੋਟੋ ਖਿਚਵਾ ਕੇ, ਰਾਸ਼ਟਰਪਤੀ ਟਰੰਪ ਨੇ ਸੰਕੇਤ ਦਿੱਤਾ ਹੈ ਕਿ ਉਹ ਈਰਾਨ 'ਤੇ ਵੀ ਕੇਂਦ੍ਰਿਤ ਹਨ। ਡੈਗਰੇਸ ਨੇ ਕਿਹਾ ਕਿ ਇਹ ਸਮਝਣਾ ਮੁਸ਼ਕਲ ਹੈ ਕਿ ਰਾਸ਼ਟਰਪਤੀ ਦਾ ਅਗਲਾ ਕਦਮ ਕੀ ਹੋਵੇਗਾ। ਜ਼ਿਕਰਯੋਗ ਹੈ ਕਿ ਈਰਾਨ ਭਰ ਵਿੱਚ ਪ੍ਰਦਰਸ਼ਨਕਾਰੀ ਦੇਸ਼ ਦੇ ਸੁਪਰੀਮ ਲੀਡਰ ਵਿਰੁੱਧ ਨਾਅਰੇ ਲਗਾ ਰਹੇ ਹਨ।

ਟਰੰਪ ਨੇ ਦੋ ਵਾਰ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਈਰਾਨੀ ਅਧਿਕਾਰੀ ਪ੍ਰਦਰਸ਼ਨਕਾਰੀਆਂ ਨੂੰ ਮਾਰਦੇ ਹਨ ਤਾਂ ਅਮਰੀਕਾ ਸਖ਼ਤ ਜਵਾਬ ਦੇਵੇਗਾ। ਹਿਊਮਨ ਰਾਇਟਸ ਐਕਟੀਵਿਸਟਸ ਨਿਊਜ਼ ਏਜੰਸੀ ਦੇ ਅਨੁਸਾਰ, ਈਰਾਨ ਵਿਰੋਧ ਪ੍ਰਦਰਸ਼ਨਾਂ ਦੇ ਨੌਵੇਂ ਦਿਨ ਹੁਣ ਤੱਕ ਘੱਟੋ-ਘੱਟ 19 ਪ੍ਰਦਰਸ਼ਨਕਾਰੀ ਅਤੇ ਸੁਰੱਖਿਆ ਬਲਾਂ ਦਾ ਇੱਕ ਮੈਂਬਰ ਮਾਰਿਆ ਗਿਆ ਹੈ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ