ਕਾਠਮੰਡੂ, 25 ਅਪ੍ਰੈਲ (ਹਿੰ.ਸ.)। ਨੇਪਾਲ ਦੀ ਸੱਤਾਧਾਰੀ ਰਾਸ਼ਟਰਵਾਦੀ ਪਾਰਟੀ (ਆਰਐਸਪੀ) ਦੇ ਸੰਸਦ ਮੈਂਬਰ ਖਗੇਂਦਰ ਸੁਨਾਰ ਸਮੇਤ ਪੰਜ ਸੰਸਦ ਮੈਂਬਰ ਪਿਛਲੇ 12 ਘੰਟਿਆਂ ਤੋਂ ਸਿੰਧੂਲੀ ਜ਼ਿਲ੍ਹਾ ਪ੍ਰਸ਼ਾਸਨ ਦਫ਼ਤਰ ਦੇ ਗੇਟ 'ਤੇ ਧਰਨਾ ਦੇ ਰਹੇ ਹਨ।

ਉਹ 22 ਸਾਲਾ ਸ਼੍ਰੀਕ੍ਰਿਸ਼ਨ ਬੀਕੇ ਲਈ ਇਨਸਾਫ਼ ਦੀ ਮੰਗ ਕਰ ਰਹੇ ਹਨ, ਜਿਨ੍ਹਾਂ ਦੀ ਸ਼ੁੱਕਰਵਾਰ ਸ਼ਾਮ ਤੋਂ ਪੁਲਿਸ ਹਿਰਾਸਤ ਵਿੱਚ ਮੌਤ ਹੋ ਗਈ ਸੀ। ਸ਼੍ਰੀਕ੍ਰਿਸ਼ਨ ਬੀਕੇ ਸਿੰਧੂਲੀ ਦੇ ਸੁਨਕੋਸ਼ੀ ਗ੍ਰਾਮੀਣ ਨਗਰਪਾਲਿਕਾ-3, ਜੁਮਲੇ ਡਾਂਡਾ ਦੇ ਨਿਵਾਸੀ ਸਨ। ਧਰਨੇ ਵਿੱਚ ਆਰਐਸਪੀ ਸੰਸਦ ਮੈਂਬਰ ਖਗੇਂਦਰ ਸੁਨਾਰ, ਰੀਮਾ ਵਿਸ਼ਵਕਰਮਾ, ਸੁਸ਼ਮਾ ਸਵਰਨਕਰ, ਖੀਮਾ ਵਿਸ਼ਵਕਰਮਾ ਅਤੇ ਆਸ਼ੀਸ਼ ਗਜੂਰੇਲ ਦੇ ਨਾਲ-ਨਾਲ ਬੁੱਧੀਜੀਵੀ ਅਤੇ ਜੁਮਲੇ ਡਾਂਡਾ ਦੇ ਕੁਝ ਸਥਾਨਕ ਨਿਵਾਸੀ ਸ਼ਾਮਲ ਹਨ।

ਖਗੇਂਦਰ ਸੁਨਾਰ ਨੇ ਫੇਸਬੁੱਕ 'ਤੇ ਲਿਖਿਆ, ਅਸੀਂ ਪਿਛਲੇ 12 ਘੰਟਿਆਂ ਤੋਂ ਜ਼ਿਲ੍ਹਾ ਪ੍ਰਸ਼ਾਸਨ ਦਫ਼ਤਰ ਦੇ ਗੇਟ 'ਤੇ ਬੈਠੇ ਹਾਂ। ਉਨ੍ਹਾਂ ਦੇ ਨਿੱਜੀ ਸਹਾਇਕ ਅਰਜੁਨ ਸੁਨਾਰ ਨੇ ਦੱਸਿਆ ਕਿ ਉਹ ਸਾਰੀ ਰਾਤ ਧਰਨਾ ਪ੍ਰਦਰਸ਼ਨ ਵਾਲੀ ਥਾਂ 'ਤੇ ਹੀ ਡਟੇ ਰਹੇ। ਸ਼੍ਰੀਕ੍ਰਿਸ਼ਨ ਬੀ.ਕੇ. ਦੇ ਪਰਿਵਾਰਕ ਮੈਂਬਰਾਂ ਦਾ ਦੋਸ਼ ਹੈ ਕਿ ਪੁਲਿਸ ਨੇ ਹਿਰਾਸਤ ਵਿੱਚ ਉਨ੍ਹਾਂ ਨੂੰ ਤਸੀਹੇ ਦੇ ਕੇ ਮਾਰ ਦਿੱਤਾ।

ਬੀ.ਕੇ. ਨੇ 11 ਅਪ੍ਰੈਲ ਨੂੰ ਖੋਟਾਂਗ ਦੀ 17 ਸਾਲ ਦੀ ਕੁੜੀ ਨਾਲ ਅੰਤਰ-ਜਾਤੀ ਪ੍ਰੇਮ ਵਿਆਹ ਕਰਵਾਇਆ ਸੀ। ਵਿਆਹ ਤੋਂ ਬਾਅਦ, ਉਹ ਲਲਿਤਪੁਰ ਵਿੱਚ ਆਪਣੇ ਛੋਟੇ ਭਰਾ ਨਾਲ ਰਹਿੰਦੇ ਸੀ, ਪਰ ਬਾਅਦ ਵਿੱਚ ਸਿੰਧੂਲੀ ਵਾਪਸ ਆ ਗਏ। 16 ਅਪ੍ਰੈਲ ਨੂੰ, ਲਲਿਤਪੁਰ ਦੇ ਸਤਦੋਬਾਟੋ ਪੁਲਿਸ ਸਰਕਲ ਨੇ ਉਨ੍ਹਾਂ ਨੂੰ ਬੁਲਾਇਆ, ਇਹ ਕਹਿੰਦੇ ਹੋਏ ਕਿ ਕੁੜੀ ਦਾ ਪਰਿਵਾਰ ਗੱਲ ਕਰਨਾ ਚਾਹੁੰਦਾ ਹੈ। ਪਹੁੰਚਣ 'ਤੇ, ਬੀ.ਕੇ. ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਅਤੇ ਅਗਲੇ ਦਿਨ ਸਿੰਧੂਲੀ ਭੇਜ ਦਿੱਤਾ ਗਿਆ। ਲਲਿਤਪੁਰ ਪੁਲਿਸ ਦੇ ਅਨੁਸਾਰ, ਕੁੜੀ ਵੱਲੋਂ ਜਬਰ ਜਨਾਹ ਦੀ ਸ਼ਿਕਾਇਤ ਦਰਜ ਕਰਵਾਉਣ ਤੋਂ ਬਾਅਦ ਬੀ.ਕੇ. ਨੂੰ ਹੋਰ ਜਾਂਚ ਲਈ ਸਿੰਧੂਲੀ ਭੇਜਿਆ ਗਿਆ, ਕਿਉਂਕਿ ਕਥਿਤ ਘਟਨਾ ਉੱਥੇ ਵਾਪਰੀ ਸੀ।

20 ਅਪ੍ਰੈਲ ਨੂੰ, ਬੀ.ਕੇ. ਖੁਰਕੋਟ ਖੇਤਰ ਪੁਲਿਸ ਦਫ਼ਤਰ ਦੀ ਹਿਰਾਸਤ ਵਿੱਚ ਮ੍ਰਿਤਕ ਪਾਇਆ ਗਿਆ। ਸਿੰਧੂਲੀ ਜ਼ਿਲ੍ਹਾ ਪੁਲਿਸ ਦਫ਼ਤਰ ਦੇ ਬੁਲਾਰੇ ਡੀ.ਐਸ.ਪੀ. ਸੂਰਿਆ ਪ੍ਰਕਾਸ਼ ਸੁਬੇਦੀ ਦੇ ਅਨੁਸਾਰ, ਬੀ.ਕੇ. ਹਿਰਾਸਤ ਵਿੱਚ ਬੇਹੋਸ਼ ਪਾਇਆ ਗਿਆ ਸੀ ਅਤੇ ਉਨ੍ਹਾਂ ਦੀ ਕਮੀਜ਼ ਗਲੇ ਵਿੱਚ ਬੰਨ੍ਹੀ ਹੋਈ ਸੀ। ਉਨ੍ਹਾਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਹਾਲਾਂਕਿ, ਪਰਿਵਾਰ ਦਾ ਦਾਅਵਾ ਹੈ ਕਿ ਉਨ੍ਹਾਂ ਦੀ ਮੌਤ ਪੁਲਿਸ ਦੀ ਕੁੱਟਮਾਰ ਕਾਰਨ ਹੋਈ ਹੈ। ਉਹ ਇਸ ਦੋਸ਼ ਨੂੰ ਲੈ ਕੇ ਪਿਛਲੇ ਚਾਰ ਦਿਨਾਂ ਤੋਂ ਜ਼ਿਲ੍ਹਾ ਪੁਲਿਸ ਦਫ਼ਤਰ ਅਤੇ ਜ਼ਿਲ੍ਹਾ ਅਦਾਲਤ ਦੇ ਬਾਹਰ ਪ੍ਰਦਰਸ਼ਨ ਕਰ ਰਹੇ ਹਨ।

ਪਰਿਵਾਰ ਨੇ ਲਾਸ਼ ਨੂੰ ਸਵੀਕਾਰ ਕਰਨ ਤੋਂ ਇਨਕਾਰ ਕਰ ਦਿੱਤਾ ਅਤੇ ਨਿਰਪੱਖ ਜਾਂਚ ਦੀ ਮੰਗ ਕੀਤੀ, ਜਿਸ ਤੋਂ ਬਾਅਦ 21 ਅਪ੍ਰੈਲ ਨੂੰ ਇੱਕ ਜਾਂਚ ਕਮੇਟੀ ਬਣਾਈ ਗਈ। ਸਿੰਧੂਲੀ ਦੇ ਸਹਾਇਕ ਮੁੱਖ ਜ਼ਿਲ੍ਹਾ ਅਧਿਕਾਰੀ ਦੀਪੇਂਦਰ ਪੌਡੇਲ ਨੇ ਕਿਹਾ ਕਿ ਜਾਂਚ ਜਾਰੀ ਹੈ। ਉਨ੍ਹਾਂ ਕਿਹਾ, ਅਸੀਂ ਇਸ ਘਟਨਾ ਦੀ ਗੰਭੀਰਤਾ ਨਾਲ ਜਾਂਚ ਕਰ ਰਹੇ ਹਾਂ। ਜਾਂਚ ਤੋਂ ਬਾਅਦ ਸੱਚਾਈ ਸਾਹਮਣੇ ਆਵੇਗੀ।‘‘

ਬੀ.ਕੇ. ਨੂੰ 16 ਅਪ੍ਰੈਲ ਨੂੰ ਲਲਿਤਪੁਰ ਵਿੱਚ 17 ਸਾਲ ਦੀ ਲੜਕੀ ਨਾਲ ਜਬਰ ਜਨਾਹ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਹਾਲਾਂਕਿ, ਪਰਿਵਾਰ ਦਾ ਦਾਅਵਾ ਹੈ ਕਿ ਦੋਵਾਂ ਦਾ ਸਹਿਮਤੀ ਨਾਲ ਪ੍ਰੇਮ ਵਿਆਹ ਹੋਇਆ ਸੀ।

ਲਲਿਤਪੁਰ ਦੇ ਜ਼ਿਲ੍ਹਾ ਪੁਲਿਸ ਸਟੇਸ਼ਨ ਦੇ ਪੁਲਿਸ ਸੁਪਰਡੈਂਟ ਗੌਤਮ ਮਿਸ਼ਰਾ ਨੇ ਕਿਹਾ ਕਿ ਕਿਉਂਕਿ ਕਥਿਤ ਘਟਨਾ ਖੁਰਕੋਟ ਵਿੱਚ ਵਾਪਰੀ ਸੀ, ਇਸ ਲਈ ਬੀ.ਕੇ. ਨੂੰ ਸਿੰਧੂਲੀ ਪੁਲਿਸ ਨਾਲ ਤਾਲਮੇਲ ਕਰਕੇ ਉੱਥੇ ਭੇਜਿਆ ਗਿਆ ਸੀ। ਉਨ੍ਹਾਂ ਕਿਹਾ, ਸ਼ਿਕਾਇਤ ਦਰਜ ਹੋਣ ਤੋਂ ਬਾਅਦ, ਦੋਸ਼ੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਅਤੇ 17 ਅਪ੍ਰੈਲ ਨੂੰ ਅਸਲ ਸ਼ਿਕਾਇਤ ਪੱਤਰ ਦੇ ਨਾਲ ਖੁਰਕੋਟ ਭੇਜ ਦਿੱਤਾ ਗਿਆ। ਸਾਨੂੰ ਇਸ ਤੋਂ ਬਾਅਦ ਕੀ ਹੋਇਆ ਇਸ ਬਾਰੇ ਜਾਣਕਾਰੀ ਨਹੀਂ ਹੈ।

17 ਅਪ੍ਰੈਲ ਨੂੰ, ਜ਼ਿਲ੍ਹਾ ਪੁਲਿਸ ਦਫ਼ਤਰ ਨੇ ਸਿੰਧੂਲੀ ਜ਼ਿਲ੍ਹਾ ਅਦਾਲਤ ਤੋਂ ਪੰਜ ਦਿਨਾਂ ਦਾ ਰਿਮਾਂਡ ਪ੍ਰਾਪਤ ਕੀਤਾ ਅਤੇ ਬੀਕੇ ਨੂੰ ਹਿਰਾਸਤ ਵਿੱਚ ਲੈ ਲਿਆ। ਹਾਲਾਂਕਿ, ਬੀਕੇ ਦੇ ਪਰਿਵਾਰ ਦੀ ਕਹਾਣੀ ਵੱਖਰੀ ਹੈ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਉਸ 'ਤੇ ਜਬਰ ਜਨਾਹ ਦਾ ਦੋਸ਼ ਉਸ ਦੇ ਅੰਤਰਜਾਤੀ ਵਿਆਹ ਕਾਰਨ ਲਗਾਇਆ ਗਿਆ ਅਤੇ ਪੁਲਿਸ ਨੇ ਜਾਣਬੁੱਝ ਕੇ ਉਨ੍ਹਾਂ ਨੂੰ ਕੁੱਟ-ਕੁੱਟ ਕੇ ਮਾਰ ਦਿੱਤਾ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ