ਚੰਡੀਗੜ੍ਹ, 25 ਅਪ੍ਰੈਲ (ਹਿੰ.ਸ.)| ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲੇ ਦਾ ਨਵਾਂ ਗਾਣਾ “ਆਈਜ਼ ਆਨ ਮੀ” ਦਾ ਟੀਜ਼ਰ ਉਨ੍ਹਾਂ ਦੀ ਟੀਮ ਵੱਲੋਂ ਵੱਖ-ਵੱਖ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ‘ਤੇ ਜਾਰੀ ਕੀਤਾ ਗਿਆ। ਟੀਜ਼ਰ ਜਾਰੀ ਹੋਣ ਦੇ ਕੁਝ ਮਿੰਟਾਂ ਵਿੱਚ ਹੀ ਇਹ ਇੰਟਰਨੈੱਟ ‘ਤੇ ਵਾਇਰਲ ਹੋ ਗਿਆ ਅਤੇ ਭਾਰੀ ਰਿਸਪਾਂਸ ਮਿਲਿਆ। ਕੇਵਲ 7 ਘੰਟਿਆਂ ਵਿੱਚ ਹੀ ਯੂਟਿਊਬ ‘ਤੇ 10 ਲੱਖ ਤੋਂ ਵੱਧ ਵੀਊਜ਼ ਅਤੇ ਇੰਸਟਾਗ੍ਰਾਮ ‘ਤੇ 10 ਲੱਖ ਲਾਈਕਸ ਪਾਰ ਕਰ ਗਿਆ।

35 ਸਕਿੰਟ ਦੇ ਇਸ ਟੀਜ਼ਰ ਵਿੱਚ ਸਿੱਧੂ ਮੂਸੇਵਾਲਾ ਇੱਕ ਐਕਸ਼ਨ ਭਰੇ ਅੰਦਾਜ਼ ਵਿੱਚ ਨਜ਼ਰ ਆ ਰਹੇ ਹਨ। ਟੀਜ਼ਰ ਦੀ ਸ਼ੁਰੂਆਤ ਇੱਕ ਨਕਾਬਪੋਸ਼ ਵਿਅਕਤੀ ਵੱਲੋਂ ਪੰਜਾਬ ਦੇ ਨਕਸ਼ੇ ‘ਚ ਮਾਨਸਾ ਜ਼ਿਲ੍ਹੇ ਵੱਲ ਬੰਦੂਕ ਤਾਣਦੇ ਹੋਏ ਹੁੰਦੀ ਹੈ। ਇਸ ਤੋਂ ਬਾਅਦ ਮੂਸੇਵਾਲਾ ਜੀਪ ਚਲਾਉਂਦੇ ਹੋਏ ਅਤੇ ਏਕੇ ਰਾਈਫਲ ਨਾਲ ਫਾਇਰ ਕਰਦੇ ਦਿਖਾਈ ਦਿੰਦੇ ਹਨ, ਜਦਕਿ ਕੁਝ ਲੋਕ ਉਨ੍ਹਾਂ ਦਾ ਰਾਹ ਰੋਕਣ ਅਤੇ ਹਥਿਆਰ ਤਾਣਦੇ ਵੀ ਨਜ਼ਰ ਆਉਂਦੇ ਹਨ।

ਮੂਸੇਵਾਲਾ ਦੇ ਕਤਲ ਤੋਂ ਬਾਅਦ ਉਨ੍ਹਾਂ ਦੀ ਟੀਮ ਵੱਲੋਂ ਹੁਣ ਤੱਕ 12 ਗਾਣੇ ਜਾਰੀ ਕੀਤੇ ਜਾ ਚੁੱਕੇ ਹਨ, ਜਿਨ੍ਹਾਂ ਨੂੰ ਹਰ ਵਾਰ ਫੈਨਜ਼ ਵੱਲੋਂ ਭਰਪੂਰ ਪਿਆਰ ਮਿਲਿਆ ਹੈ। “ਆਈਜ਼ ਆਨ ਮੀ” ਦੇ ਟੀਜ਼ਰ ਨੂੰ ਵੀ ਫੈਨਜ਼ ਵੱਲੋਂ ਵੱਡੀ ਗਿਣਤੀ ਵਿੱਚ ਸ਼ੇਅਰ ਅਤੇ ਪ੍ਰਸ਼ੰਸਾ ਮਿਲ ਰਹੀ ਹੈ।

ਹਿੰਦੂਸਥਾਨ ਸਮਾਚਾਰ / GURSHARAN SINGH