ਜੰਮੂ, 26 ਅਪ੍ਰੈਲ (ਹਿੰ.ਸ.)| 3 ਜੁਲਾਈ ਤੋਂ ਸ਼ੁਰੂ ਹੋਣ ਵਾਲੀ ਸ਼੍ਰੀ ਅਮਰਨਾਥ ਯਾਤਰਾ ਤੋਂ ਪਹਿਲਾਂ ਪੰਜਾਬ ਅਤੇ ਜੰਮੂ-ਕਸ਼ਮੀਰ ਨੂੰ ਜੋੜਨ ਵਾਲੇ ਰਾਵੀ ਦਰਿਆ ‘ਤੇ ਬਣੇ ਮਹੱਤਵਪੂਰਨ ਰੇਲ ਪੁਲ ਨੰਬਰ 17 ‘ਤੇ ਰੇਲ ਆਵਾਜਾਈ ਦੁਬਾਰਾ ਸ਼ੁਰੂ ਹੋਣ ਦੀ ਉਮੀਦ ਜਤਾਈ ਜਾ ਰਹੀ ਹੈ। ਅਗਸਤ 2025 ਵਿੱਚ ਆਏ ਹੜ੍ਹਾਂ ਕਾਰਨ ਨੁਕਸਾਨ ਹੋਣ ਤੋਂ ਬਾਅਦ ਇਹ ਪੁਲ ਬੰਦ ਪਿਆ ਸੀ।

ਜੰਮੂ ਰੇਲ ਡਿਵੀਜ਼ਨ ਦੇ ਡਿਵਿਜ਼ਨਲ ਰੇਲਵੇ ਮੈਨੇਜਰ (ਡੀ.ਆਰ.ਐਮ.) ਵਿਵੇਕ ਕੁਮਾਰ ਖੁਦ ਮੌਕੇ ‘ਤੇ ਪਹੁੰਚ ਕੇ ਮੁਰੰਮਤ ਕੰਮ ਦਾ ਜਾਇਜ਼ਾ ਲੈ ਰਹੇ ਹਨ। ਉਨ੍ਹਾਂ ਅਧਿਕਾਰੀਆਂ ਨੂੰ ਨਿਰਧਾਰਿਤ ਸਮੇਂ ਵਿੱਚ ਕੰਮ ਮੁਕੰਮਲ ਕਰਨ ਦੇ ਹੁਕਮ ਦਿੱਤੇ ਹਨ। ਰੇਲਵੇ ਪ੍ਰਸ਼ਾਸਨ ਮਈ ਮਹੀਨੇ ਵਿੱਚ ਹੀ ਮੁਰੰਮਤ ਕੰਮ ਮੁਕੰਮਲ ਕਰਕੇ ਰੇਲ ਸੇਵਾ ਬਹਾਲ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ, ਤਾਂ ਜੋ ਅਮਰਨਾਥ ਯਾਤਰਾ ਲਈ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਕੋਈ ਦਿੱਕਤ ਨਾ ਆਵੇ।

ਪਿਛਲੇ ਸਾਲ ਅਗਸਤ ਵਿੱਚ ਆਏ ਹੜ੍ਹਾਂ ਕਾਰਨ ਰਾਵੀ ਦਰਿਆ ‘ਤੇ ਬਣੇ ਇਸ ਪੁਲ ਦਾ ਇੱਕ ਸਤੰਭ ਖਿਸਕ ਗਿਆ ਸੀ, ਜਿਸ ਕਾਰਨ ਰੇਲ ਆਵਾਜਾਈ ਪ੍ਰਭਾਵਿਤ ਹੋ ਗਈ। ਇਸ ਸਮੇਂ ਤੱਕ ਕਈ ਟ੍ਰੇਨਾਂ ਜੰਮੂ ਤੱਕ ਨਹੀਂ ਚੱਲ ਰਹੀਆਂ ਅਤੇ ਕੁਝ ਨੂੰ ਅੰਬਾਲਾ, ਜਲੰਧਰ ਜਾਂ ਫਿਰੋਜ਼ਪੁਰ ਤੱਕ ਹੀ ਸੀਮਿਤ ਕੀਤਾ ਗਿਆ ਹੈ।

ਦਿੱਲੀ ਤੋਂ ਸ਼੍ਰੀ ਮਾਤਾ ਵੈਸ਼ਣੋ ਦੇਵੀ ਕਟੜਾ ਜਾਣ ਵਾਲੀ ਵੰਦੇ ਭਾਰਤ ਐਕਸਪ੍ਰੈਸ, ਜੰਮੂ ਤਵੀ ਅਤੇ ਰਿਸ਼ਿਕੇਸ਼ ਐਕਸਪ੍ਰੈਸ ਵਰਗੀਆਂ ਕਈ ਟ੍ਰੇਨਾਂ ਅਜੇ ਬੰਦ ਹਨ। ਜੰਮੂ ਮੇਲ ਨੂੰ ਵੀ ਅੰਬਾਲਾ ਕੈਂਟ ਤੱਕ ਹੀ ਚਲਾਇਆ ਜਾ ਰਿਹਾ ਹੈ।

ਡੀ.ਆਰ.ਐਮ. ਵਿਵੇਕ ਕੁਮਾਰ ਨੇ 10 ਦਿਨਾਂ ਵਿੱਚ ਦੂਜੀ ਵਾਰ ਮੌਕੇ ‘ਤੇ ਪਹੁੰਚ ਕੇ ਕੰਮ ਦੀ ਸਮੀਖਿਆ ਕੀਤੀ। ਇਸ ਦੌਰਾਨ ਕਮਿਸ਼ਨਰ ਆਫ ਰੇਲਵੇ ਸੇਫਟੀ ਦਿਨੇਸ਼ ਚੰਦ ਦੇਸ਼ਵਾਲ ਅਤੇ ਯੂ.ਐਸ.ਬੀ.ਆਰ.ਐਲ. ਪ੍ਰੋਜੈਕਟ ਦੇ ਅਧਿਕਾਰੀ ਆਲੋਕ ਮਿਸ਼ਰਾ ਸਮੇਤ ਉੱਚ ਸਤ੍ਹਾ ਦੀ ਟੀਮ ਨੇ ਪੁਲ ਦੀ ਨੀਂਹ, ਸਤੰਭਾਂ ਅਤੇ ਲੋਡ ਸਮਰੱਥਾ ਦੀ ਜਾਂਚ ਕੀਤੀ। ਟੀਮ ਵੱਲੋਂ ਰੇਲ ਪਟੜੀ, ਸਲੀਪਰਾਂ, ਆਧੁਨਿਕ ਸਿਗਨਲਿੰਗ ਸਿਸਟਮ ਅਤੇ ਸੁਰੱਖਿਆ ਪ੍ਰਬੰਧਾਂ ਦੀ ਵੀ ਗਹਿਰਾਈ ਨਾਲ ਸਮੀਖਿਆ ਕੀਤੀ ਗਈ। ਅਧਿਕਾਰੀਆਂ ਨੇ ਹੁਕਮ ਦਿੱਤੇ ਕਿ ਬਾਕੀ ਤਕਨੀਕੀ ਕੰਮ ਜਲਦੀ ਪੂਰੇ ਕੀਤੇ ਜਾਣ।

ਰਾਵੀ ਦਰਿਆ ‘ਤੇ ਬਣਿਆ ਇਹ ਪੁਲ ਪੰਜਾਬ ਅਤੇ ਜੰਮੂ-ਕਸ਼ਮੀਰ ਦਰਮਿਆਨ ਰੇਲ ਸੰਪਰਕ ਲਈ ਬਹੁਤ ਹੀ ਮਹੱਤਵਪੂਰਨ ਹੈ। ਰੇਲਵੇ ਵੱਲੋਂ ਇਸਨੂੰ ਜਲਦ ਤੋਂ ਜਲਦ ਚਾਲੂ ਕਰਨ ਲਈ ਕੋਸ਼ਿਸ਼ਾਂ ਤੇਜ਼ ਕਰ ਦਿੱਤੀਆਂ ਗਈਆਂ ਹਨ।

ਹਿੰਦੂਸਥਾਨ ਸਮਾਚਾਰ / GURSHARAN SINGH