ਨਵੀਂ ਦਿੱਲੀ, 19 ਜੁਲਾਈ (ਹਿੰ.ਸ.)। ਭਾਰਤੀ ਸਬ-ਜੂਨੀਅਰ ਪੁਰਸ਼ ਅਤੇ ਮਹਿਲਾ ਹਾਕੀ ਟੀਮਾਂ ਪਹਿਲੀ ਐਫਆਈਐਚ ਯੂਥ ਹਾਕੀ 5ਐਸ ਏਸ਼ੀਅਨ ਚੈਂਪੀਅਨਸ਼ਿਪ 2026 ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਦਾ ਟੀਚਾ ਰੱਖਣਗੀਆਂ। 20 ਤੋਂ 25 ਜੁਲਾਈ ਤੱਕ ਮਸਕਟ, ਓਮਾਨ ਵਿੱਚ ਹੋਣ ਵਾਲਾ ਇਹ ਟੂਰਨਾਮੈਂਟ ਪਹਿਲੇ ਐਫਆਈਐਚ ਅੰਡਰ-18 ਯੂਥ ਹਾਕੀ 5ਐਸ ਵਿਸ਼ਵ ਕੱਪ ਲਈ ਏਸ਼ੀਅਨ ਕੁਆਲੀਫਾਇਰ ਵਜੋਂ ਵੀ ਕੰਮ ਕਰੇਗਾ।

ਇਸ ਮੁਕਾਬਲੇ ਵਿੱਚ ਏਸ਼ੀਆ ਦੀਆਂ ਸਭ ਤੋਂ ਵਧੀਆ ਉੱਭਰ ਰਹੀਆਂ ਟੀਮਾਂ ਸ਼ਾਮਲ ਹੋਣਗੀਆਂ, ਜੋ ਮਹਾਂਦੀਪੀ ਖਿਤਾਬ ਅਤੇ ਵਿਸ਼ਵ ਕੱਪ ਵਿੱਚ ਜਗ੍ਹਾ ਬਣਾਉਣ ਲਈ ਮੁਕਾਬਲਾ ਕਰਨਗੀਆਂ।

ਸਰਦਾਰ ਸਿੰਘ ਦੀ ਕੋਚਿੰਗ ਹੇਠ ਖੇਡੇਗੀ ਪੁਰਸ਼ ਟੀਮ : ਸਰਦਾਰ ਸਿੰਘ ਦੀ ਅਗਵਾਈ ਹੇਠ ਭਾਰਤੀ ਸਬ-ਜੂਨੀਅਰ ਪੁਰਸ਼ ਟੀਮ ਹਾਲ ਹੀ ਵਿੱਚ ਅੰਡਰ-18 ਏਸ਼ੀਆ ਕੱਪ 2026 ਦਾ ਖਿਤਾਬ ਜਿੱਤਣ ਤੋਂ ਬਾਅਦ ਪੂਰੇ ਆਤਮਵਿਸ਼ਵਾਸ ਨਾਲ ਟੂਰਨਾਮੈਂਟ ਵਿੱਚ ਪ੍ਰਵੇਸ਼ ਕਰ ਰਹੀ ਹੈ। ਭਾਰਤ ਨੇ ਫਾਈਨਲ ਵਿੱਚ ਮੇਜ਼ਬਾਨ ਜਾਪਾਨ ਨੂੰ 4-1 ਨਾਲ ਹਰਾ ਕੇ ਖਿਤਾਬ ਜਿੱਤਿਆ ਸੀ। ਟੀਮ ਨੂੰ ਮੇਜ਼ਬਾਨ ਓਮਾਨ, ਪਾਕਿਸਤਾਨ ਅਤੇ ਬੰਗਲਾਦੇਸ਼ ਦੇ ਨਾਲ ਏਲੀਟ ਪੂਲ ਵਿੱਚ ਰੱਖਿਆ ਗਿਆ ਹੈ।

ਰਾਣੀ ਦੀ ਅਗਵਾਈ ਵਾਲੀ ਮਹਿਲਾ ਟੀਮ ਵੀ ਤਿਆਰ : ਸਾਬਕਾ ਭਾਰਤੀ ਕਪਤਾਨ ਰਾਣੀ ਦੀ ਕੋਚਿੰਗ ਵਾਲੀ ਭਾਰਤੀ ਸਬ-ਜੂਨੀਅਰ ਮਹਿਲਾ ਟੀਮ ਵੀ ਇਸ ਟੂਰਨਾਮੈਂਟ ਵਿੱਚ ਹਿੱਸਾ ਲਵੇਗੀ। ਇਸ ਟੀਮ ਨੇ ਅੰਡਰ-18 ਮਹਿਲਾ ਏਸ਼ੀਆ ਕੱਪ 2026 ਵਿੱਚ ਕਾਂਸੀ ਦਾ ਤਗਮਾ ਜਿੱਤਿਆ ਸੀ। ਮਹਿਲਾ ਟੀਮ ਨੂੰ ਚੀਨ, ਕਜ਼ਾਕਿਸਤਾਨ ਅਤੇ ਉਜ਼ਬੇਕਿਸਤਾਨ ਦੇ ਨਾਲ ਐਲੀਟ ਪੂਲ ਵਿੱਚ ਰੱਖਿਆ ਗਿਆ ਹੈ।

20 ਜੁਲਾਈ ਤੋਂ ਸ਼ੁਰੂ ਹੋ ਰਹੀ ਭਾਰਤ ਦੀ ਮੁਹਿੰਮ : ਭਾਰਤ ਆਪਣੀ ਮੁਹਿੰਮ 20 ਜੁਲਾਈ ਨੂੰ ਸ਼ੁਰੂ ਕਰੇਗਾ। ਮਹਿਲਾ ਟੀਮ ਪਹਿਲਾਂ ਕਜ਼ਾਕਿਸਤਾਨ ਨਾਲ ਭਿੜੇਗੀ, ਜਦੋਂ ਕਿ ਪੁਰਸ਼ ਟੀਮ ਸ਼ਾਮ ਨੂੰ ਬੰਗਲਾਦੇਸ਼ ਵਿਰੁੱਧ ਆਪਣਾ ਪਹਿਲਾ ਮੈਚ ਖੇਡੇਗੀ।ਇਸ ਤੋਂ ਬਾਅਦ ਪੁਰਸ਼ ਟੀਮ 21 ਜੁਲਾਈ ਨੂੰ ਓਮਾਨ ਅਤੇ ਪਾਕਿਸਤਾਨ ਨਾਲ ਭਿੜੇਗੀ ਅਤੇ 23 ਅਤੇ 24 ਜੁਲਾਈ ਨੂੰ ਇਨ੍ਹਾਂ ਹੀ ਟੀਮਾਂ ਵਿਰੁੱਧ ਵਾਪਸੀ ਮੈਚ ਖੇਡੇਗੀ। ਮਹਿਲਾ ਟੀਮ 21 ਜੁਲਾਈ ਨੂੰ ਚੀਨ ਅਤੇ ਉਜ਼ਬੇਕਿਸਤਾਨ ਨਾਲ ਭਿੜੇਗੀ, ਫਿਰ 23 ਜੁਲਾਈ ਨੂੰ ਕਜ਼ਾਕਿਸਤਾਨ ਨਾਲ ਖੇਡੇਗੀ ਅਤੇ 24 ਜੁਲਾਈ ਨੂੰ ਚੀਨ ਅਤੇ ਉਜ਼ਬੇਕਿਸਤਾਨ ਵਿਰੁੱਧ ਵਾਪਸੀ ਮੈਚ ਖੇਡੇਗੀ। ਵਰਗੀਕਰਣ ਮੈਚ 25 ਜੁਲਾਈ ਨੂੰ ਹੋਣਗੇ।

ਇਸ ਟੂਰਨਾਮੈਂਟ ਵਿੱਚ ਏਲੀਟ ਪੂਲ ਮੈਚ ਡਬਲ ਰਾਊਂਡ-ਰੋਬਿਨ ਫਾਰਮੈਟ ਵਿੱਚ ਖੇਡੇ ਜਾਣਗੇ। ਲੀਗ ਪੜਾਅ ਤੋਂ ਸਿਖਰਲੀਆਂ ਦੋ ਟੀਮਾਂ ਸਿੱਧੇ ਸੋਨ ਤਗਮੇ ਦੇ ਮੈਚ ਲਈ ਅੱਗੇ ਵਧਣਗੀਆਂ, ਜਦੋਂ ਕਿ ਤੀਜੇ ਸਥਾਨ 'ਤੇ ਰਹਿਣ ਵਾਲੀ ਟੀਮ ਕਾਂਸੀ ਦੇ ਤਗਮੇ ਦੇ ਮੈਚ ਲਈ ਕੁਆਲੀਫਾਈ ਕਰੇਗੀ।

ਭਾਰਤੀ ਸਬ-ਜੂਨੀਅਰ ਪੁਰਸ਼ ਟੀਮ ਦੇ ਮੁੱਖ ਕੋਚ ਸਰਦਾਰ ਸਿੰਘ ਨੇ ਕਿਹਾ, ਖਿਡਾਰੀਆਂ ਨੇ ਅੰਡਰ-18 ਏਸ਼ੀਆ ਕੱਪ ਵਿੱਚ ਆਪਣੇ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਦੇ ਦਮ 'ਤੇ ਇਹ ਮੌਕਾ ਹਾਸਲ ਕੀਤਾ ਹੈ। ਖਿਤਾਬ ਜਿੱਤਣ ਨਾਲ ਟੀਮ ਦਾ ਆਤਮਵਿਸ਼ਵਾਸ ਵਧਿਆ ਹੈ, ਪਰ ਹਾਕੀ 5ਐਸ ਇੱਕ ਤੇਜ਼ ਰਫ਼ਤਾਰ ਵਾਲਾ ਫਾਰਮੈਟ ਹੈ ਜਿਸ ਲਈ ਜਲਦੀ ਫੈਸਲਿਆਂ ਦੀ ਲੋੜ ਹੁੰਦੀ ਹੈ। ਖਿਡਾਰੀਆਂ ਨੇ ਚੰਗੀ ਤਿਆਰੀ ਕੀਤੀ ਹੈ। ਸਾਡਾ ਉਦੇਸ਼ ਆਪਣੀਆਂ ਯੋਜਨਾਵਾਂ ਨੂੰ ਸਹੀ ਢੰਗ ਨਾਲ ਲਾਗੂ ਕਰਨਾ, ਇਕਸਾਰਤਾ ਬਣਾਈ ਰੱਖਣਾ ਅਤੇ ਪਹਿਲੇ ਐਫਆਈਐਚ ਅੰਡਰ-18 ਯੂਥ ਹਾਕੀ 5 ਐਸ ਵਿਸ਼ਵ ਕੱਪ ਲਈ ਕੁਆਲੀਫਾਈ ਕਰਨਾ ਹੈ। ਅਸੀਂ ਏਸ਼ੀਆ ਦੀਆਂ ਸਭ ਤੋਂ ਵਧੀਆ ਯੂਥ ਟੀਮਾਂ ਦੇ ਖਿਲਾਫ ਭਾਰਤ ਦੀ ਨੁਮਾਇੰਦਗੀ ਕਰਨ ਦੀ ਉਡੀਦ ਕਰ ਰਹੇ ਹਾਂ।

ਮਹਿਲਾ ਟੀਮ ਦੀ ਮੁੱਖ ਕੋਚ ਰਾਣੀ ਨੇ ਕਿਹਾ, ਇਹ ਟੂਰਨਾਮੈਂਟ ਸਾਡੇ ਨੌਜਵਾਨ ਖਿਡਾਰੀਆਂ ਲਈ ਆਪਣੀ ਪ੍ਰਤਿਭਾ ਦਿਖਾਉਣ ਦਾ ਵਧੀਆ ਮੌਕਾ ਹੈ। ਟੀਮ ਨੂੰ ਅੰਡਰ-18 ਏਸ਼ੀਆ ਕੱਪ ਤੋਂ ਬਹੁਤ ਤਜਰਬਾ ਮਿਲਿਆ ਹੈ ਅਤੇ ਅਸੀਂ ਤੇਜ਼ ਰਫ਼ਤਾਰ ਹਾਕੀ 5 ਐਸ ਫਾਰਮੈਟ ਲਈ ਚੰਗੀ ਤਿਆਰੀ ਕੀਤੀ ਹੈ। ਖਿਡਾਰੀ ਪੂਰੀ ਤਰ੍ਹਾਂ ਪ੍ਰੇਰਿਤ ਹਨ ਅਤੇ ਹਰ ਮੈਚ ਵਿੱਚ ਆਪਣਾ ਸਰਵੋਤਮ ਦੇਣ ਲਈ ਤਿਆਰ ਹਨ। ਸਾਡਾ ਉਦੇਸ਼ ਨਿਡਰ ਹਾਕੀ ਖੇਡਣਾ, ਲਗਾਤਾਰ ਸੁਧਾਰ ਕਰਨਾ ਅਤੇ ਪਹਿਲੇ ਐਫਆਈਐਚ ਅੰਡਰ-18 ਯੂਥ ਹਾਕੀ 5ਐਸ ਵਿਸ਼ਵ ਕੱਪ ਲਈ ਕੁਆਲੀਫਾਈ ਕਰਕੇ ਦੇਸ਼ ਦਾ ਮਾਣ ਵਧਾਉਣਾ ਹੈ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ