ਪੀਐਚਡੀਸੀਸੀਆਈ ਵੱਲੋਂ ਸੂਫਿਨ ਫੋਰਮ ਨਾਲ ਬੀ2ਬੀ ਮਾਰਕੀਟ ਲਿੰਕੇਜ ਸਬੰਧੀ ਸੈਸ਼ਨ ਕਰਵਾਇਆ

ਚੰਡੀਗੜ੍ਹ, 18 ਅਗਸਤ (ਹਿੰ.ਸ.)| ਪੀਐਚਡੀ ਚੈਂਬਰ ਆਫ਼ ਕਾਮਰਸ ਐਂਡ ਇੰਡਸਟਰੀ ਵੱਲੋਂ ਸੋਲਰ ਪਾਵਰ ਖੇਤਰ ਲਈ ‘ਬੀ2ਬੀ ਮਾਰਕੀਟ ਲਿੰਕੇਜ ਫੋਰਮ-2026’ ਤਹਿਤ ‘ਸੋਰਸਿੰਗ ਡੈਸਟੀਨੇਸ਼ਨ ਵਜੋਂ ਚੰਡੀਗੜ੍ਹ’ ਵਿਸ਼ੇ ’ਤੇ ਇੱਕ ਵਿਸ਼ੇਸ਼ ਪ੍ਰੋਗਰਾਮ ਕਰਵਾਇਆ ਗਿਆ। ਪੀਐਚਡੀਸੀਸੀਆਈ-ਸੂਫਿਨ ਫੋਰਮ ਵਿੱਚ ਸੋਲਰ ਉਦਯੋਗ ਨਾਲ ਜੁੜੇ ਉਦਯੋਗਪਤੀ ਅਤੇ ਮਾਹਿਰ ਇਕੱਠੇ ਹੋਏ। ਇਸ ਦੌਰਾਨ ਬੀ2ਬੀ ਈ-ਕਾਮਰਸ ਰਾਹੀਂ ਸੋਲਰ ਊਰਜਾ ਖੇਤਰ ਵਿੱਚ ਐੱਮਐੱਸਐੱਮਈਜ਼ ਦੀ ਸਪਲਾਈ ਚੇਨ ਨੂੰ ਹੋਰ ਮਜ਼ਬੂਤ ਕਰਨ ਦੇ ਤਰੀਕਿਆਂ ’ਤੇ ਵਿਚਾਰ-ਵਟਾਂਦਰਾ ਕੀਤਾ ਗਿਆ। ਪੀਐਚਡੀਸੀਸੀਆਈ ਦੀ ਰੀਜਨਲ ਰਿਨਿਊਏਬਲ ਐਨਰਜੀ ਐਂਡ ਪਾਵਰ ਕਮੇਟੀ ਦੇ ਕਨਵੀਨਰ ਪਰਵ ਅਰੋੜਾ ਨੇ ਕਿਹਾ ਕਿ ਭਾਰਤ ਵਿੱਚ ਸੋਲਰ ਪਾਵਰ ਕ੍ਰਾਂਤੀ ਨੂੰ ਅੱਗੇ ਵਧਾਉਣ ਵਿੱਚ ਈ-ਕਾਮਰਸ ਅਹਿਮ ਭੂਮਿਕਾ ਨਿਭਾ ਸਕਦਾ ਹੈ।

ਉਨ੍ਹਾਂ ਕਿਹਾ ਕਿ ਬੀ2ਬੀ ਈ-ਕਾਮਰਸ ਡਿਜੀਟਲ ਪਲੇਟਫਾਰਮਾਂ ਰਾਹੀਂ ਸੋਲਰ ਪੈਨਲ, ਇਨਵਰਟਰ, ਬੈਟਰੀ, ਮਾਊਂਟਿੰਗ ਸਟ੍ਰਕਚਰ ਅਤੇ ਹੋਰ ਕੰਪੋਨੈਂਟਸ ਤੱਕ ਪਹੁੰਚ ਆਸਾਨ ਬਣਾਈ ਜਾ ਸਕਦੀ ਹੈ, ਖਾਸ ਕਰਕੇ ਛੋਟੇ ਕਾਰੋਬਾਰਾਂ ਲਈ ਇਹ ਕਾਫ਼ੀ ਲਾਹੇਵੰਦ ਸਾਬਤ ਹੋ ਸਕਦਾ ਹੈ। ਸੂ-ਫਿਨ ਦੀ ਰੀਜਨਲ ਲੀਡ-ਨਾਰਥ ਸੌਮਿਆ ਪਾਠਕ ਨੇ ਦੱਸਿਆ ਕਿ ਕੰਪਨੀ ਸੋਲਰ ਊਰਜਾ, ਉਦਯੋਗਿਕ ਅਤੇ ਨਿਰਮਾਣ ਖੇਤਰਾਂ ਨਾਲ ਸਬੰਧਤ ਵੱਖ-ਵੱਖ ਉਤਪਾਦਾਂ ਨੂੰ ਡਿਜੀਟਲ ਤਰੀਕੇ ਨਾਲ ਖੋਜਣ, ਸੋਰਸ ਕਰਨ ਅਤੇ ਉਨ੍ਹਾਂ ਦੀ ਖਰੀਦ-ਫਰੋਖ਼ਤ ਵਿੱਚ ਸਹਾਇਤਾ ਕਰਦੀ ਹੈ। ਉਨ੍ਹਾਂ ਦੱਸਿਆ ਕਿ ਸੂਫਿਨ ਲਿਮਟਿਡ ਦਾ ‘ਰਿਕਵੈਸਟ ਫਾਰ ਕੋਟੇਸ਼ਨ’ ਆਧਾਰਿਤ ਪ੍ਰੋਕਿਊਰਮੈਂਟ ਮਾਡਲ ਖਰੀਦਦਾਰਾਂ ਨੂੰ ਕਈ ਸਪਲਾਇਰਾਂ ਤੋਂ ਮੁਕਾਬਲੇ ਵਾਲੀਆਂ ਕੀਮਤਾਂ ਮੰਗਣ ਅਤੇ ਉਨ੍ਹਾਂ ਦੀ ਤੁਲਨਾ ਕਰਨ ਦੀ ਸਹੂਲਤ ਦਿੰਦਾ ਹੈ।

ਸੋਲਰ ਐਨਰਜੀ ਵੈਂਡਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਸੁਖਪਾਲ ਸਿੰਘ ਨੇ ਕਿਹਾ ਕਿ ਸੌਰ ਊਰਜਾ ਕਾਰੋਬਾਰ ਲਈ ਬੀ2ਬੀ ਕਾਮਰਸ ਬੇਹੱਦ ਜ਼ਰੂਰੀ ਹੈ। ਇਸ ਨਾਲ ਕਾਰੋਬਾਰੀ ਪ੍ਰਕਿਰਿਆਵਾਂ ਆਸਾਨ ਹੁੰਦੀਆਂ ਹਨ, ਕੰਮਕਾਜ ਦੀ ਸਮਰੱਥਾ ਵਧਦੀ ਹੈ ਅਤੇ ਕਾਰੋਬਾਰ ਦੇ ਵਿਕਾਸ ਨੂੰ ਹੁਲਾਰਾ ਮਿਲਦਾ ਹੈ। ਉਨ੍ਹਾਂ ਕਿਹਾ ਕਿ ਰੀਅਲ-ਟਾਈਮ ਕੀਮਤਾਂ ਦੀ ਤੁਲਨਾ, ਪਾਰਦਰਸ਼ੀ ਜਾਣਕਾਰੀ, ਆਸਾਨ ਰਿਸਰਚ ਅਤੇ ਲਾਗਤ ਘਟਾਉਣ ਦੀਆਂ ਸਹੂਲਤਾਂ ਕਾਰਨ ਖਰੀਦਦਾਰਾਂ ਨੂੰ ਕੱਚੇ ਮਾਲ ਅਤੇ ਹੋਰ ਉਤਪਾਦਾਂ ਤੱਕ ਤੇਜ਼ੀ ਨਾਲ ਅਤੇ ਬਿਹਤਰ ਜਾਣਕਾਰੀ ਦੇ ਨਾਲ ਪਹੁੰਚ ਮਿਲਦੀ ਹੈ। ਪ੍ਰੋਗਰਾਮ ਵਿੱਚ ਪਹੁੰਚੇ ਭਾਗੀਦਾਰਾਂ ਦਾ ਸਵਾਗਤ ਕਰਦਿਆਂ ਪੀਐਚਡੀਸੀਸੀਆਈ ਦੇ ਸੀਨੀਅਰ ਸਕੱਤਰ ਪੁਨੀਤ ਚੌਧਰੀ ਨੇ ਪੰਜਾਬ ਵਿੱਚ ਐੱਮਐੱਸਐੱਮਈ ਖੇਤਰ ਨਾਲ ਜੁੜੀਆਂ ਸਮੱਸਿਆਵਾਂ ਦੇ ਹੱਲ ਲਈ ਪੀਐਚਡੀਸੀਸੀਆਈ ਵੱਲੋਂ ਮੁਹੱਈਆ ਕਰਵਾਈਆਂ ਜਾ ਰਹੀਆਂ ਸੇਵਾਵਾਂ ਬਾਰੇ ਜਾਣਕਾਰੀ ਸਾਂਝੀ ਕੀਤੀ।

ਹਿੰਦੂਸਥਾਨ ਸਮਾਚਾਰ / GURSHARAN SINGH