ਚੰਡੀਗੜ੍ਹ, 18 ਅਗਸਤ (ਹਿੰ.ਸ.)| ਭਾਰਤ ਅਤੇ ਯੂਨਾਈਟਿਡ ਕਿੰਗਡਮ ਵਿਚਕਾਰ ਹੋਇਆ ਵਿਆਪਕ ਆਰਥਿਕ ਅਤੇ ਵਪਾਰਕ ਸਮਝੌਤਾ ਹਰਿਆਣਾ ਦੇ ਉਦਯੋਗਾਂ, ਐਮਐਸਐਮਈ, ਕਿਸਾਨਾਂ, ਨਿਰਯਾਤਕਾਂ ਅਤੇ ਸੇਵਾ ਖੇਤਰ ਲਈ ਅੰਤਰਰਾਸ਼ਟਰੀ ਬਾਜ਼ਾਰਾਂ ਵਿੱਚ ਨਵੇਂ ਮੌਕੇ ਲੈ ਕੇ ਆਇਆ ਹੈ। ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ 15 ਜੁਲਾਈ 2026 ਤੋਂ ਲਾਗੂ ਹੋਏ ਇਸ ਸਮਝੌਤੇ ਤਹਿਤ ਭਾਰਤ ਦੇ ਲਗਭਗ 99 ਫੀਸਦੀ ਨਿਰਯਾਤ ਨੂੰ ਯੂਕੇ ਦੇ ਬਾਜ਼ਾਰ ਵਿੱਚ ਡਿਊਟੀ-ਮੁਕਤ ਪਹੁੰਚ ਮਿਲੀ ਹੈ।ਮੁੱਖ ਮੰਤਰੀ ਨੇ ਕਿਹਾ ਕਿ ਇਸ ਸਮਝੌਤੇ ਨਾਲ ਹਰਿਆਣਾ ਦੇ ਮਜ਼ਬੂਤ ਨਿਰਮਾਣ, ਖੇਤੀਬਾੜੀ, ਆਟੋਮੋਬਾਈਲ, ਇੰਜੀਨੀਅਰਿੰਗ, ਟੈਕਸਟਾਈਲ ਅਤੇ ਸੇਵਾ ਖੇਤਰ ਨੂੰ ਵਿਸ਼ੇਸ਼ ਲਾਭ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਜਿਨ੍ਹਾਂ ਉਤਪਾਦਾਂ ’ਤੇ ਪਹਿਲਾਂ 4 ਤੋਂ 70 ਫੀਸਦੀ ਤੱਕ ਡਿਊਟੀ ਲੱਗਦੀ ਸੀ, ਉਨ੍ਹਾਂ ਨੂੰ ਹੁਣ ਸਿਫ਼ਰ ਡਿਊਟੀ ਪਹੁੰਚ ਮਿਲਣ ਨਾਲ ਭਾਰਤੀ ਉਤਪਾਦ ਯੂਕੇ ਦੇ ਬਾਜ਼ਾਰ ਵਿੱਚ ਵਧੇਰੇ ਮੁਕਾਬਲੇਬਾਜ਼ ਬਣ ਸਕਣਗੇ।ਸੀਈਟੀਏ ਤਹਿਤ ਟੈਕਸਟਾਈਲ ਅਤੇ ਕਪੜੇ, ਚਮੜਾ ਤੇ ਫੁੱਟਵੀਅਰ, ਰਤਨ ਅਤੇ ਗਹਿਣੇ, ਰਸਾਇਣ, ਇੰਜੀਨੀਅਰਿੰਗ ਉਤਪਾਦ, ਆਟੋ-ਪਾਰਟਸ, ਮਸ਼ੀਨਰੀ, ਫਾਰਮਾਸਿਊਟੀਕਲ, ਪ੍ਰੋਸੈਸਡ ਫੂਡ, ਹੈਂਡੀਕ੍ਰਾਫਟ ਅਤੇ ਸਿਰੇਮਿਕ ਉਤਪਾਦਾਂ ਨੂੰ ਲਾਭ ਮਿਲਣ ਦੀ ਸੰਭਾਵਨਾ ਹੈ। ਪਾਣੀਪਤ ਦਾ ਟੈਕਸਟਾਈਲ ਅਤੇ ਹੋਮ ਫਰਨਿਸ਼ਿੰਗ ਉਦਯੋਗ, ਗੁਰੂਗ੍ਰਾਮ-ਮਾਨੇਸਰ ਦਾ ਆਟੋਮੋਬਾਈਲ ਸੈਕਟਰ ਅਤੇ ਫਰੀਦਾਬਾਦ ਦਾ ਇੰਜੀਨੀਅਰਿੰਗ ਉਦਯੋਗ ਇਸ ਮੌਕੇ ਦਾ ਵੱਡਾ ਲਾਭ ਲੈ ਸਕਦੇ ਹਨ।ਮੁੱਖ ਮੰਤਰੀ ਨੇ ਦੱਸਿਆ ਕਿ ਸਮਝੌਤਾ ਲਾਗੂ ਹੋਣ ਤੋਂ ਬਾਅਦ 15 ਜੁਲਾਈ ਨੂੰ ਹਰਿਆਣਾ ਤੋਂ ਯੂਕੇ ਲਈ ਫਾਸਟਨਰਜ਼ ਦੀ ਪਹਿਲੀ ਨਿਰਯਾਤ ਖੇਪ ਰਵਾਨਾ ਹੋਈ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਰਾਜ ਦੇ ਨਿਰਮਾਣ ਅਤੇ ਨਿਰਯਾਤ ਖੇਤਰ ਲਈ ਨਵੇਂ ਮੌਕਿਆਂ ਦੀ ਸ਼ੁਰੂਆਤ ਹੋਈ ਹੈ।ਹਰਿਆਣਾ ਦੀ ਖੇਤੀਬਾੜੀ ਅਰਥਵਿਵਸਥਾ ਨੂੰ ਧਿਆਨ ਵਿੱਚ ਰੱਖਦਿਆਂ ਪ੍ਰੋਸੈਸਡ ਫੂਡ, ਫਲ-ਸਬਜ਼ੀਆਂ, ਮਸਾਲਿਆਂ ਅਤੇ ਹੋਰ ਮੁੱਲ-ਵਰਧਿਤ ਖੇਤੀਬਾੜੀ ਉਤਪਾਦਾਂ ਲਈ ਯੂਕੇ ਦਾ ਬਾਜ਼ਾਰ ਮਹੱਤਵਪੂਰਨ ਸਾਬਤ ਹੋ ਸਕਦਾ ਹੈ। ਇਸ ਨਾਲ ਕਿਸਾਨਾਂ ਦੇ ਨਾਲ ਐਫਪੀਓ, ਫੂਡ ਪ੍ਰੋਸੈਸਿੰਗ ਯੂਨਿਟਾਂ ਅਤੇ ਐਮਐਸਐਮਈ ਨੂੰ ਵੀ ਨਵੇਂ ਨਿਰਯਾਤ ਮੌਕੇ ਮਿਲਣਗੇ। ਮੁੱਖ ਮੰਤਰੀ ਮੁਤਾਬਕ ਸਮਝੌਤਾ ਸਿਰਫ਼ ਵਸਤੂਆਂ ਦੇ ਵਪਾਰ ਤੱਕ ਸੀਮਤ ਨਹੀਂ ਹੈ। ਯੂਕੇ ਵਿੱਚ ਭਾਰਤੀ ਸੇਵਾਵਾਂ ਲਈ 137 ਉਪ-ਖੇਤਰਾਂ ਵਿੱਚ ਬਾਜ਼ਾਰ ਪਹੁੰਚ ਦੇ ਮੌਕੇ ਵਧੇ ਹਨ। ਇਸ ਨਾਲ ਗੁਰੂਗ੍ਰਾਮ ਵਰਗੇ ਆਈਟੀ ਅਤੇ ਸੇਵਾ ਕੇਂਦਰਾਂ ਨੂੰ ਸਾਫਟਵੇਅਰ, ਬੀਪੀਓ, ਵਿੱਤੀ ਸੇਵਾਵਾਂ, ਇੰਜੀਨੀਅਰਿੰਗ ਡਿਜ਼ਾਈਨ ਅਤੇ ਤਕਨੀਕੀ ਸਲਾਹ ਵਰਗੇ ਖੇਤਰਾਂ ਵਿੱਚ ਅੰਤਰਰਾਸ਼ਟਰੀ ਕਾਰੋਬਾਰ ਵਧਾਉਣ ਦਾ ਮੌਕਾ ਮਿਲੇਗਾ।ਸੈਣੀ ਨੇ ਕਿਹਾ ਕਿ ਇਹ ਸਮਝੌਤਾ ਹਰਿਆਣਾ ਨੂੰ ਗਲੋਬਲ ਵੈਲਿਊ ਚੇਨ ਨਾਲ ਜੋੜਨ, ਨਿਰਯਾਤ ਵਧਾਉਣ, ਨਿਵੇਸ਼ ਆਕਰਸ਼ਿਤ ਕਰਨ ਅਤੇ ਰੁਜ਼ਗਾਰ ਦੇ ਨਵੇਂ ਮੌਕੇ ਪੈਦਾ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾ ਸਕਦਾ ਹੈ। ਉਨ੍ਹਾਂ ਨੇ ਉਦਯੋਗ ਨੂੰ ਗੁਣਵੱਤਾ ਅਤੇ ਅੰਤਰਰਾਸ਼ਟਰੀ ਮਾਪਦੰਡਾਂ ’ਤੇ ਹੋਰ ਧਿਆਨ ਦੇ ਕੇ ਇਸ ਮੌਕੇ ਦਾ ਵੱਧ ਤੋਂ ਵੱਧ ਲਾਭ ਉਠਾਉਣ ਦੀ ਅਪੀਲ ਕੀਤੀ।

ਹਿੰਦੂਸਥਾਨ ਸਮਾਚਾਰ / GURSHARAN SINGH