ਨਿਯਮਾਂ ਦੀ ਪਾਲਣਾ ਨਾ ਕਰਨ ’ਤੇ ਪ੍ਰਸ਼ਾਸਨ ਦੀ ਕਾਰਵਾਈ, ਓਲਾ ਅਤੇ ਇਨਡਰਾਈਵ ਤੋਂ ਬਾਅਦ ਚਾਰੋਂ ਪ੍ਰਮੁੱਖ ਕੈਬ ਐਗਰੀਗੇਟਰ ਮੁਅੱਤਲ

ਚੰਡੀਗੜ੍ਹ, 08 ਸਤੰਬਰ (ਹਿੰ.ਸ.)| ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਮੰਗਲਵਾਰ ਨੂੰ ਉਬਰ ਇੰਡੀਆ ਸਿਸਟਮਜ਼ ਪ੍ਰਾਈਵੇਟ ਲਿਮਟਿਡ ਅਤੇ ਰੈਪਿਡੋ (ਰੋਪੇਨ ਟਰਾਂਸਪੋਰਟੇਸ਼ਨ ਸਰਵਿਸਿਜ਼ ਪ੍ਰਾਈਵੇਟ ਲਿਮਟਿਡ) ਦੇ ਐਗਰੀਗੇਟਰ ਲਾਇਸੈਂਸ ਤੁਰੰਤ ਪ੍ਰਭਾਵ ਨਾਲ ਛੇ ਮਹੀਨਿਆਂ ਲਈ ਮੁਅੱਤਲ ਕਰ ਦਿੱਤੇ ਹਨ। ਇਸ ਕਾਰਵਾਈ ਤੋਂ ਬਾਅਦ ਦੋਵੇਂ ਕੰਪਨੀਆਂ ਮਾਰਚ 2027 ਤੱਕ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਵਿੱਚ ਕੈਬ ਅਤੇ ਬਾਈਕ ਟੈਕਸੀ ਸੇਵਾਵਾਂ ਨਹੀਂ ਚਲਾ ਸਕਣਗੀਆਂ।

ਪ੍ਰਸ਼ਾਸਨ ਦੇ ਇਸ ਫੈਸਲੇ ਨਾਲ ਟ੍ਰਾਈਸਿਟੀ ਵਿੱਚ ਸੇਵਾਵਾਂ ਦੇਣ ਵਾਲੇ ਚਾਰ ਪ੍ਰਮੁੱਖ ਕੈਬ ਐਗਰੀਗੇਟਰ-ਓਲਾ, ਇਨਡਰਾਈਵ, ਉਬਰ ਅਤੇ ਰੈਪਿਡੋ-ਹੁਣ ਮੁਅੱਤਲੀ ਦੇ ਦਾਇਰੇ ਵਿੱਚ ਹਨ। ਓਲਾ ਅਤੇ ਇਨਡਰਾਈਵ ’ਤੇ ਕ੍ਰਮਵਾਰ ਜੂਨ ਅਤੇ ਅਗਸਤ ਵਿੱਚ ਰੋਕ ਲਗਾਈ ਗਈ ਸੀ। ਫਿਲਹਾਲ ਸਹਿਕਾਰੀ ਟੈਕਸੀ ਕੋਆਪਰੇਟਿਵ ਲਿਮਟਿਡ ਦੀ ਭਾਰਤ ਟੈਕਸੀ ਸ਼ਹਿਰ ਵਿੱਚ ਪ੍ਰਮੁੱਖ ਵਿਕਲਪ ਵਜੋਂ ਉਪਲਬਧ ਹੈ।

ਰਾਜ ਟਰਾਂਸਪੋਰਟ ਅਥਾਰਟੀ ਦੇ ਸਕੱਤਰ ਅਤੇ ਲਾਇਸੈਂਸਿੰਗ ਅਧਿਕਾਰੀ ਨਿਤੀਸ਼ ਸਿੰਗਲਾ ਵੱਲੋਂ ਜਾਰੀ ਵੱਖ-ਵੱਖ ਹੁਕਮਾਂ ਵਿੱਚ ਚੰਡੀਗੜ੍ਹ ਪ੍ਰਸ਼ਾਸਨ ਮੋਟਰ ਵਾਹਨ ਐਗਰੀਗੇਟਰ ਨਿਯਮ, 2025 ਦੇ ਨਿਯਮ 17 ਤਹਿਤ ਕਾਰਵਾਈ ਕੀਤੀ ਗਈ ਹੈ। ਹੁਕਮਾਂ ਅਨੁਸਾਰ, ਦੋਵੇਂ ਕੰਪਨੀਆਂ ਨੂੰ ਡਰਾਈਵਰਾਂ ਦੇ ਸਿਹਤ ਅਤੇ ਮਿਆਦੀ ਬੀਮੇ, ਸਿਖਲਾਈ ਅਤੇ ਨਿਰਧਾਰਤ ਕਿਰਾਇਆ ਪ੍ਰਣਾਲੀ ਨਾਲ ਸਬੰਧਤ ਨਿਯਮਾਂ ਦੀ ਪਾਲਣਾ ਕਰਨ ਲਈ ਵਾਰ-ਵਾਰ ਨੋਟਿਸ ਅਤੇ ਸੁਣਵਾਈ ਦੇ ਮੌਕੇ ਦਿੱਤੇ ਗਏ ਸਨ।

ਪ੍ਰਸ਼ਾਸਨ ਦੇ ਹੁਕਮਾਂ ਅਨੁਸਾਰ, ਉਬਰ ਤੋਂ ਪਹਿਲੀ ਵਾਰ 8 ਜੁਲਾਈ 2025 ਨੂੰ ਪਾਲਣਾ ਰਿਪੋਰਟ ਮੰਗੀ ਗਈ ਸੀ। ਅਸੰਤੋਸ਼ਜਨਕ ਜਵਾਬ ਤੋਂ ਬਾਅਦ 10 ਅਕਤੂਬਰ 2025 ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਗਿਆ। ਮਈ 2026 ਵਿੱਚ ਤਿੰਨ ਨਿਰੀਖਣਾਂ ਦੌਰਾਨ ਸੈਕਟਰ-47ਸੀ ਸਥਿਤ ਕੰਪਨੀ ਦਾ ਸਥਾਨਕ ਦਫ਼ਤਰ ਬੰਦ ਪਾਇਆ ਗਿਆ।

ਹੁਕਮਾਂ ਵਿੱਚ ਕਿਹਾ ਗਿਆ ਹੈ ਕਿ ਉਬਰ ਨੇ 7 ਜੁਲਾਈ 2025 ਨੂੰ ਅਧਿਸੂਚਿਤ ਕਿਰਾਇਆ ਦਰਾਂ ਲਾਗੂ ਨਹੀਂ ਕੀਤੀਆਂ ਅਤੇ ਨਿਰਧਾਰਤ ਦਰਾਂ ਤੋਂ ਵੱਧ ਕਿਰਾਇਆ ਵਸੂਲਣ ਦੇ ਮਾਮਲੇ ਸਾਹਮਣੇ ਆਏ। ਡਰਾਈਵਰ ਜਥੇਬੰਦੀਆਂ ਨੇ ਸਬਸਕ੍ਰਿਪਸ਼ਨ ਜਾਂ ਰੀਚਾਰਜ ਮਾਡਲ ਲਾਗੂ ਕਰਨ ਅਤੇ ਗੈਰ-ਵਪਾਰਕ ਵਾਹਨਾਂ ਨੂੰ ਪਲੇਟਫਾਰਮ ਨਾਲ ਜੋੜਨ ਦੀਆਂ ਸ਼ਿਕਾਇਤਾਂ ਵੀ ਕੀਤੀਆਂ ਸਨ।

ਰੈਪਿਡੋ ਦੇ ਸਬੰਧ ਵਿੱਚ ਪ੍ਰਸ਼ਾਸਨ ਨੇ ਪਾਇਆ ਕਿ ਬਾਈਕ ਟੈਕਸੀ ਡਰਾਈਵਰਾਂ ਦਾ ਬੀਮਾ ਕਵਰ ਨਿਰਧਾਰਤ ਨਿਯਮਾਂ ਅਨੁਸਾਰ ਨਹੀਂ ਸੀ। ਸੈਕਟਰ-32ਡੀ ਸਥਿਤ ਕੰਪਨੀ ਦਾ ਦਫ਼ਤਰ ਵੀ ਮਈ ਵਿੱਚ ਤਿੰਨ ਨਿਰੀਖਣਾਂ ਦੌਰਾਨ ਬੰਦ ਮਿਲਿਆ। ਹੁਕਮਾਂ ਵਿੱਚ ਸਬਸਕ੍ਰਿਪਸ਼ਨ ਮਾਡਲ, ਵੱਧ ਕਿਰਾਇਆ ਵਸੂਲਣ ਅਤੇ ਗੈਰ-ਵਪਾਰਕ ਵਾਹਨਾਂ ਨੂੰ ਜੋੜਨ ਸਬੰਧੀ ਸ਼ਿਕਾਇਤਾਂ ਦਾ ਵੀ ਜ਼ਿਕਰ ਕੀਤਾ ਗਿਆ ਹੈ।

ਚਾਰੋਂ ਪ੍ਰਮੁੱਖ ਸੇਵਾਵਾਂ ਦੀ ਮੁਅੱਤਲੀ ਨਾਲ ਐਪ ਆਧਾਰਿਤ ਕੈਬ ਅਤੇ ਬਾਈਕ ਟੈਕਸੀ ’ਤੇ ਨਿਰਭਰ ਯਾਤਰੀਆਂ ਨੂੰ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਸ਼ਹਿਰ ਵਿੱਚ ਪਹਿਲਾਂ ਤੋਂ ਹੀ ਕਿਰਾਏ ਅਤੇ ਐਗਰੀਗੇਟਰ ਕਮਿਸ਼ਨ ਨੂੰ ਲੈ ਕੇ ਡਰਾਈਵਰਾਂ ਵਿੱਚ ਅਸੰਤੋਸ਼ ਬਣਿਆ ਹੋਇਆ ਹੈ। ਅਜਿਹੇ ਵਿੱਚ ਕੈਬਾਂ ਦੀ ਉਪਲਬਧਤਾ ਅਤੇ ਆਵਾਜਾਈ ਦੇ ਬਦਲਵੇਂ ਸਾਧਨਾਂ ਨੂੰ ਲੈ ਕੇ ਚਿੰਤਾ ਵਧ ਗਈ ਹੈ।

ਹਿੰਦੂਸਥਾਨ ਸਮਾਚਾਰ / GURSHARAN SINGH