ਹਰਿਦੁਆਰ, 1 ਅਕਤੂਬਰ (ਹਿੰ.ਸ.)। ਥਾਣਾ ਸ਼ਿਆਮਪੁਰ ਪੁਲਿਸ ਨੇ ਵੱਡੀ ਸਫਲਤਾ ਹਾਸਿਲ ਕੀਤੀ ਹੈ। ਪੁਲਿਸ ਨੇ ਅੰਤਰਰਾਜੀ ਵਾਹਨ ਚੋਰੀ ਕਰਨ ਵਾਲੇ ਗਰੋਹ ਦੇ ਤਿੰਨ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕਰਕੇ ਅੱਠ ਚੋਰੀ ਕੀਤੇ ਵਾਹਨ ਅਤੇ ਇੱਕ ਬਾਈਕ ਦੇ ਪੁਰਜ਼ੇ ਬਰਾਮਦ ਕੀਤੇ ਹਨ। ਜਦਕਿ ਦੋ ਮੁਲਜ਼ਮ ਭੱਜਣ ਵਿੱਚ ਕਾਮਯਾਬ ਹੋ ਗਏ। ਪੁਲਿਸ ਨੇ ਵਾਹਨ ਚੋਰਾਂ ਨੂੰ ਗ੍ਰਿਫ਼ਤਾਰ ਕਰਨ ਦੇ ਨਾਲ-ਨਾਲ ਛੇ ਮਾਮਲਿਆਂ ਦਾ ਖੁਲਾਸਾ ਕੀਤਾ ਹੈ।
ਦਰਅਸਲ ਸ਼ਿਆਮਪੁਰ ਥਾਣਾ ਖੇਤਰ 'ਚ ਦੋਪਹੀਆ ਵਾਹਨ ਚੋਰੀ ਦੀਆਂ ਘਟਨਾਵਾਂ ਪੁਲਿਸ ਲਈ ਸਿਰਦਰਦੀ ਬਣੀਆਂ ਹੋਈਆਂ ਸਨ। ਐਸਐਸਪੀ ਪ੍ਰਮਿੰਦਰ ਡੋਵਾਲ ਨੇ ਵਾਹਨ ਚੋਰੀ ਦੀਆਂ ਲਗਾਤਾਰ ਵਾਪਰ ਰਹੀਆਂ ਘਟਨਾਵਾਂ ਦਾ ਪਰਦਾਫਾਸ਼ ਕਰਨ ਲਈ ਪੁਲਿਸ ਨੂੰ ਸਖ਼ਤ ਹਦਾਇਤਾਂ ਦਿੱਤੀਆਂ। ਇਸ ਸਬੰਧ ਵਿੱਚ ਕਾਰਵਾਈ ਕਰਦੇ ਹੋਏ ਸ਼ਿਆਮਪੁਰ ਪੁਲਿਸ ਨੇ 24 ਘੰਟਿਆਂ ਵਿੱਚ ਵਾਹਨ ਚੋਰੀ ਦੀਆਂ ਕਈ ਵਾਰਦਾਤਾਂ ਦਾ ਪਰਦਾਫਾਸ਼ ਕੀਤਾ।
ਵਰਨਣਯੋਗ ਹੈ ਕਿ 29 ਸਤੰਬਰ ਨੂੰ ਨਵੀਨ ਰਾਣਾ ਪੁੱਤਰ ਮਹੀਪਾਲ ਸਿੰਘ ਰਾਣਾ ਵਾਸੀ ਸ਼ਿਆਮਪੁਰ ਹਰਿਦੁਆਰ, ਮੁਲਖਰਾਜ ਪੰਵਾਰ ਪੁੱਤਰ ਦੌਲਤ ਸਿੰਘ ਪੰਵਾਰ ਵਾਸੀ ਟਿਹਰੀ ਗੜ੍ਹਵਾਲ ਅਤੇ 30 ਸਤੰਬਰ ਨੂੰ ਵਿਕਾਸ ਪੁੱਤਰ ਜਗਬੀਰ ਵਾਸੀ ਹਰਿਆਣਾ, ਰਵਿੰਦਰ ਪੁੱਤਰ ਰਾਜਪਾਲ ਵਾਸੀ ਸ਼ਿਆਮਪੁਰ ਹਰਿਦੁਆਰ ਨੇ ਆਪਣਾ ਮੋਟਰਸਾਈਕਲ ਚੋਰੀ ਹੋਣ ਸਬੰਧੀ ਥਾਣਾ ਸ਼ਿਆਮਪੁਰ ਵਿਖੇ ਸ਼ਿਕਾਇਤ ਦਰਜ ਕਰਵਾ ਕੇ ਅਣਪਛਾਤੇ ਚੋਰਾਂ ਖ਼ਿਲਾਫ਼ ਕੇਸ ਦਰਜ ਕਰਵਾਇਆ।
ਚੋਰਾਂ ਦੀ ਭਾਲ 'ਚ ਜੁਟੀ ਪੁਲਿਸ ਨੇ ਮੁਖਬਰ ਦੀ ਇਤਲਾਹ 'ਤੇ ਦੋਪਹੀਆ ਵਾਹਨ ਚੋਰੀ ਕਰਨ ਵਾਲੇ ਗਿਰੋਹ ਦੇ ਤਿੰਨ ਮੈਂਬਰਾਂ ਨੂੰ ਪਿੰਡ ਟਾਂਟਵਾਲਾ ਵੱਲ ਜਾਂਦੀ ਨਹਿਰ ਦੇ ਪੁਲ ਦੇ ਨਾਲ ਕੱਚੀ ਸੜਕ 'ਤੇ ਜੰਗਲ 'ਚੋਂ ਕਾਬੂ ਕਰਕੇ ਉਨ੍ਹਾਂ ਕੋਲੋਂ ਚੋਰੀ ਦੇ ਪੰਜ ਮੋਟਰਸਾਈਕਲ ਅਤੇ ਇੰਜਣ ਅਤੇ ਟੈਂਕੀ ਬਰਾਮਦ ਕਰ ਲਈ ਹੈ। ਸਾਈਕਲ ਪੁਲਿਸ ਨੇ ਮੁਲਜ਼ਮਾਂ ਤੋਂ ਪੁੱਛਗਿੱਛ ਮਗਰੋਂ ਤਿੰਨ ਹੋਰ ਚੋਰੀਸ਼ੁਦਾ ਬਾਈਕ ਵੀ ਬਰਾਮਦ ਕੀਤੇ।
ਫੜੇ ਗਏ ਮੁਲਜ਼ਮਾਂ 'ਚ ਦੀਪਕ (19) ਵਾਸੀ ਪਿੰਡ ਗੈਂਡੀਖਾਤਾ ਥਾਣਾ ਸ਼ਿਆਮਪੁਰ, ਜ਼ਾਇਦ (21) ਵਾਸੀ ਪਿੰਡ ਇੰਦਰਾਨਗਰ ਗੈਂਡੀਖਾਤਾ ਅਤੇ ਮੁਕੇਸ਼ ਬਿਸ਼ਟ ਉਰਫ਼ ਰੈਪਰ (20) ਵਾਸੀ ਪਿੰਡ ਹੁਡਾਣਾ ਥਾਣਾ ਲੰਬਗਾਵ ਟਿਹਰੀ ਗੜ੍ਹਵਾਲ ਹਾਲ ਪਤਾ ਗੈਂਡੀਖਾਤਾ ਥਾਣਾ ਸ਼ਿਆਮਪੁਰ ਜ਼ਿਲ੍ਹਾ ਹਰਿਦੁਆਰਾ ਹੈ। ਜਦਕਿ ਮਨੀਸ਼ ਵਾਸੀ ਸ਼ਿਆਮਪੁਰ ਹਰਿਦੁਆਰ ਅਤੇ ਨਿਕਿਤ ਵਾਸੀ ਬਿਜਨੌਰ, ਉੱਤਰ ਪ੍ਰਦੇਸ਼ ਫਰਾਰ ਹਨ। ਪੁਲਿਸ ਨੇ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕਰਕੇ ਉਨ੍ਹਾਂ ਦਾ ਚਲਾਨ ਪੇਸ਼ ਕਰ ਦਿੱਤਾ ਹੈ।
---------------
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
