ਅਹਿਮਦਾਬਾਦ, 18 ਅਪ੍ਰੈਲ (ਹਿ.ਸ.)। ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐਲ) 2024 ਦੇ ਘੱਟ ਸਕੋਰ ਵਾਲੇ ਮੁਕਾਬਲੇ ਵਿੱਚ ਦਿੱਲੀ ਕੈਪੀਟਲਜ਼ (ਡੀਸੀ) ਵਿਰੁੱਧ ਹਾਰ ਤੋਂ ਬਾਅਦ, ਗੁਜਰਾਤ ਟਾਈਟਨਜ਼ (ਜੀਟੀ) ਦੇ ਕਪਤਾਨ ਸ਼ੁਭਮਨ ਗਿੱਲ ਨੇ ਕਿਹਾ ਕਿ ਉਨ੍ਹਾਂ ਦੀ ਟੀਮ ਦੀ ਬੱਲੇਬਾਜ਼ੀ ਬਹੁਤ ਔਸਤ ਸੀ। ਗੇਂਦਬਾਜ਼ਾਂ ਤੋਂ ਬਾਅਦ ਜੇਕ ਫ੍ਰੇਜ਼ਰ-ਮੈਕਗੁਰਕ, ਅਭਿਸ਼ੇਕ ਪੋਰੇਲ ਅਤੇ ਸ਼ਾਈ ਹੋਪ ਦੀ ਸ਼ਾਨਦਾਰ ਬੱਲੇਬਾਜ਼ੀ ਦੀ ਮਦਦ ਨਾਲ ਦਿੱਲੀ ਨੇ ਨਰਿੰਦਰ ਮੋਦੀ ਸਟੇਡੀਅਮ 'ਚ ਗੁਜਰਾਤ ਖਿਲਾਫ ਛੇ ਵਿਕਟਾਂ ਨਾਲ ਜਿੱਤ ਦਰਜ ਕੀਤੀ।

ਸੱਜੇ ਹੱਥ ਦੇ ਸਲਾਮੀ ਬੱਲੇਬਾਜ਼ ਨੇ ਕਿਹਾ ਕਿ ਅਸੀਂ ਖਰਾਬ ਬੱਲੇਬਾਜ਼ੀ ਕੀਤੀ, ਵਿਕਟ 'ਚ ਕੋਈ ਖਰਾਬੀ ਨਹੀਂ ਸੀ। ਗਿੱਲ ਨੇ ਮੈਚ ਤੋਂ ਬਾਅਦ ਕਿਹਾ, ਸਾਡੀ ਬੱਲੇਬਾਜ਼ੀ ਬਹੁਤ ਔਸਤ ਸੀ ਅਤੇ ਅੱਗੇ ਵਧਣਾ ਅਤੇ ਮਜ਼ਬੂਤੀ ਨਾਲ ਵਾਪਸੀ ਕਰਨਾ ਮਹੱਤਵਪੂਰਨ ਹੈ। ਵਿਕਟ ਵਧੀਆ ਸੀ, ਜੇਕਰ ਤੁਸੀਂ ਆਊਟ ਹੋਏ ਕੁਝ ਖਿਡਾਰੀਆਂ ਨੂੰ ਦੇਖਦੇ ਹੋ ਤਾਂ ਇਸਦਾ ਪਿੱਚ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਸੀ। ਮੈਂ ਕਹਾਂਗਾ ਕਿ ਬੱਲੇਬਾਜ਼ਾਂ ਨੇ ਖਰਾਬ ਸ਼ਾਟ ਖੇਡੇ। ਜਦੋਂ ਵਿਰੋਧੀ ਟੀਮ 89 ਦੌੜਾਂ ਦਾ ਪਿੱਛਾ ਕਰ ਰਹੀ ਹੁੰਦੀ ਹੈ ਅਤੇ ਜਦੋਂ ਤੱਕ ਕੋਈ ਗੇਂਦਬਾਜ਼ ਡਬਲ ਹੈਟ੍ਰਿਕ ਨਹੀਂ ਲੈਂਦਾ, ਵਿਰੋਧੀ ਟੀਮ ਹਮੇਸ਼ਾ ਖੇਡ ਵਿੱਚ ਬਣੀ ਰਹੇਗੀ। ਇਹ ਸਾਡੇ ਲਈ ਸੀਜ਼ਨ ਦਾ ਅੱਧਾ ਪੜਾਅ ਹੈ, ਅਸੀਂ 3 ਜਿੱਤੇ ਹਨ ਅਤੇ ਉਮੀਦ ਹੈ ਕਿ ਅਸੀਂ ਅਗਲੇ 7 ਮੈਚਾਂ ਵਿੱਚੋਂ 5-6 ਜਿੱਤਾਂਗੇ।”

ਮੈਚ ਦੀ ਗੱਲ ਕਰੀਏ ਤਾਂ ਇਸ ਮੈਚ 'ਚ ਦਿੱਲੀ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਗੁਜਰਾਤ ਲਈ ਰਾਸ਼ਿਦ ਖਾਨ (24 ਗੇਂਦਾਂ ਵਿੱਚ ਦੋ ਚੌਕਿਆਂ ਅਤੇ ਇੱਕ ਛੱਕੇ ਦੀ ਮਦਦ ਨਾਲ 31 ਦੌੜਾਂ) ਸਭ ਤੋਂ ਵੱਧ ਸਕੋਰਰ ਰਹੇ। ਗੁਜਰਾਤ ਦੇ ਸਿਰਫ਼ ਤਿੰਨ ਬੱਲੇਬਾਜ਼ ਹੀ ਦੋਹਰੇ ਅੰਕੜੇ ਤੱਕ ਪਹੁੰਚੇ। ਗੁਜਰਾਤ ਦੀ ਟੀਮ 17.3 ਓਵਰਾਂ 'ਚ 89 ਦੌੜਾਂ 'ਤੇ ਸਿਮਟ ਗਈ। ਦਿੱਲੀ ਲਈ ਮੁਕੇਸ਼ ਕੁਮਾਰ ਨੇ 3, ਇਸ਼ਾਂਤ ਸ਼ਰਮਾ ਅਤੇ ਟ੍ਰਿਸਟਨ ਸਟੱਬਸ ਨੇ 2-2 ਵਿਕਟਾਂ ਲਈਆਂ।

ਜਵਾਬ ਵਿੱਚ ਦਿੱਲੀ ਨੇ ਜੇਕ ਫ੍ਰੇਜ਼ਰ-ਮੈਕਗਰਕ (10 ਗੇਂਦਾਂ ਵਿੱਚ 20 ਦੌੜਾਂ, ਇੱਕ ਚੌਕਾ ਅਤੇ ਦੋ ਛੱਕੇ), ਅਭਿਸ਼ੇਕ ਪੋਰਲ (15), ਸ਼ਾਈ ਹੋਪ (19), ਕਪਤਾਨ ਰਿਸ਼ਭ ਪੰਤ (16*) ਅਤੇ ਸੁਮਿਤ ਕੁਮਾਰ (9*) ਦੀਆਂ ਛੋਟੀਆਂ ਪਾਰੀ ਦੀ ਬਦੌਲਤ 8.5 ਓਵਰਾਂ ਵਿੱਚ 4 ਵਿਕਟਾਂ ਗੁਆ ਕੇ ਛੇ ਵਿਕਟਾਂ ਨਾਲ ਜਿੱਤ ਪ੍ਰਾਪਤ ਕੀਤੀ। ਪੰਤ ਨੂੰ ਸ਼ਾਨਦਾਰ ਵਿਕਟਕੀਪਿੰਗ ਲਈ 'ਪਲੇਅਰ ਆਫ ਦ ਮੈਚ' ਦਾ ਪੁਰਸਕਾਰ ਦਿੱਤਾ ਗਿਆ।

ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ