ਕੋਲਕਾਤਾ, 02 ਮਈ (ਹਿ.ਸ.)। ਪੱਛਮੀ ਬੰਗਾਲ ਦੇ ਜਮੂਰੀਆ ਥਾਣਾ ਖੇਤਰ ਵਿੱਚ ਇੱਕ ਅਜੀਬ ਘਟਨਾ ਵਾਪਰੀ ਹੈ। ਇੱਥੇ ਅਸਮਾਨ ਤੋਂ ਇੱਕ ਰਹੱਸਮਈ ਗੋਲਾਕਾਰ ਵਸਤੂ ਇਮਾਰਤ ਨਾਲ ਟਕਰਾ ਕੇ ਜ਼ਮੀਨ ਵਿੱਚ ਧਸ ਗਈ ਹੈ। ਵੀਰਵਾਰ ਸਵੇਰੇ 9 ਵਜੇ ਦੇ ਕਰੀਬ ਵਾਪਰੀ ਇਸ ਘਟਨਾ ਦੀ ਸੂਚਨਾ ਮਿਲਣ ਤੋਂ ਬਾਅਦ ਪੁਲਿਸ ਵੀ ਮੌਕੇ 'ਤੇ ਪਹੁੰਚ ਗਈ ਹੈ।
ਚਸ਼ਮਦੀਦਾਂ ਦਾ ਕਹਿਣਾ ਹੈ ਕਿ ਇਹ ਚੀਜ਼ ਧਾਤ ਦੀ ਬਣੀ ਹੋਈ ਸੀ। ਇਕਰਾ ਪਿੰਡ ਦੇ ਕੁਝ ਸਥਾਨਕ ਲੋਕਾਂ ਨੇ ਦਾਅਵਾ ਕੀਤਾ ਕਿ ਸਵੇਰੇ ਨੌਂ ਵਜੇ ਉਨ੍ਹਾਂ ਨੇ ਅਸਮਾਨ ਤੋਂ ਤੇਜ਼ ਰਫ਼ਤਾਰ ਨਾਲ ਦੋ ਗੋਲ ਧਾਤ ਦੀਆਂ ਵਸਤੂਆਂ ਨੂੰ ਹੇਠਾਂ ਆਉਂਦੇ ਦੇਖਿਆ। ਇਨ੍ਹਾਂ ਵਿੱਚੋਂ ਇੱਕ ਨੇ ਪਿੰਡ ਵਾਸੀ ਅਨਿਲ ਬਦਿਆਕਰ ਦੇ ਦੋ ਮੰਜ਼ਿਲਾ ਮਕਾਨ ਦੀ ਛੱਤ ਦਾ ਇੱਕ ਹਿੱਸਾ ਢਾਹ ਦਿੱਤਾ। ਇਸ ਤੋਂ ਬਾਅਦ ਇਹ ਮਿੱਟੀ ਵਿੱਚ ਧਸ ਗਿਆ।
ਦੂਸਰਾ ਗੋਲਾ ਮਗਾਰਾਮ ਬਦਿਆਕਰ ਨਾਮਕ ਇੱਕ ਨਿਵਾਸੀ ਦੇ ਵਿਹੜੇ ਵਿੱਚ ਡਿੱਗਿਆ ਹੈ। ਇਸ ਕਾਰਨ ਘਰ ਦੀ ਬੇਟੀ ਝੂਲਨ ਬਦਿਆਕਰ ਜ਼ਖਮੀ ਹੋ ਗਈ। ਉਸਦੇ ਸਰੀਰ ਦੇ ਕਈ ਹਿੱਸੇ ਸੜ ਗਏ। ਉਸਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ। ਵਿਹੜੇ ਵਿੱਚ ਡਿੱਗਣ ਤੋਂ ਬਾਅਦ ਇਹ ਗੋਲਾ ਵੀ ਧਰਤੀ ਦੇ ਅੰਦਰ ਸਮਾ ਗਿਆ। ਜਮੂਰੀਆ ਥਾਣੇ ਦੀ ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਉਸਦਾ ਕਹਿਣਾ ਹੈ ਕਿ ਗੋਲੇ ਨੂੰ ਪੁੱਟ ਕੇ ਬਾਹਰ ਕੱਢਿਆ ਜਾਵੇਗਾ। ਉਸ ਤੋਂ ਬਾਅਦ ਹੀ ਪਤਾ ਲੱਗ ਸਕੇਗਾ ਕਿ ਇਹ ਚੀਜ਼ ਕੀ ਹੈ। ਸਥਾਨਕ ਲੋਕ ਇਸਦੇ ਉਲਕਾ ਹੋਣ ਦਾ ਦਾਅਵਾ ਕਰ ਰਹੇ ਹਨ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
