ਚੇਂਗਦੂ, 06 ਮਈ (ਹਿ. ਸ.)। ਚੀਨ ਦੀ ਪੁਰਸ਼ ਟੀਮ ਨੇ ਇੰਡੋਨੇਸ਼ੀਆ ਨੂੰ 3-1 ਨਾਲ ਹਰਾ ਕੇ 6 ਸਾਲ ਦੇ ਇੰਤਜ਼ਾਰ ਨੂੰ ਖਤਮ ਕਰਦਿਆਂ ਥਾਮਸ ਕੱਪ ਬੈਡਮਿੰਟਨ ਟੂਰਨਾਮੈਂਟ ਦਾ ਖਿਤਾਬ ਜਿੱਤ ਲਿਆ ਹੈ, ਜਦਕਿ ਮਹਿਲਾ ਟੀਮ ਨੇ ਵੀ ਐਤਵਾਰ ਨੂੰ ਇੰਡੋਨੇਸ਼ੀਆ ਨੂੰ 3-0 ਨਾਲ ਹਰਾ ਕੇ 2020 ਤੋਂ ਬਾਅਦ ਪਹਿਲੀ ਵਾਰ ਉਬੇਰ ਕੱਪ 'ਤੇ ਕਬਜ਼ਾ ਕੀਤਾ।

2012 ਤੋਂ ਬਾਅਦ ਇਹ ਪਹਿਲਾ ਮੌਕਾ ਸੀ ਜਦੋਂ ਇਕੋ ਹੀ ਦੋ ਦੇਸ਼ਾਂ ਦੇ ਪੁਰਸ਼ ਅਤੇ ਮਹਿਲਾ ਦੋਵਾਂ ਵਰਗਾਂ ਦੇ ਫਾਈਨਲ ਵਿੱਚ ਇੱਕ ਦੂਜੇ ਦੇ ਖਿਲਾਫ ਖੇਡੇ। ਵਿਸ਼ਵ ਦੇ ਦੂਜੇ ਨੰਬਰ ਦੇ ਖਿਡਾਰੀ ਸ਼ੀ ਯੂਕੀ ਨੇ ਥਾਮਸ ਕੱਪ 'ਚ ਚੀਨ ਲਈ ਸ਼ਾਨਦਾਰ ਸ਼ੁਰੂਆਤ ਕਰਦੇ ਹੋਏ ਆਪਣੀ ਟੀਮ ਨੂੰ ਇੰਡੋਨੇਸ਼ੀਆ ਦੇ ਐਂਥਨੀ ਸਿਨੀਸੁਕਾ ਗਿਨਟਿੰਗ ਖਿਲਾਫ 21-17, 21-6 ਨਾਲ ਹਰਾ ਕੇ 1-0 ਦੀ ਬੜ੍ਹਤ ਦਿਵਾਈ।

ਡਬਲਜ਼ ਮੁਕਾਬਲੇ ਵਿੱਚ ਲਿਆਂਗ ਵੇਈਕੇਂਗ ਅਤੇ ਵਾਂਗ ਚਾਂਗ ਨੇ 64 ਮਿੰਟ ਤੱਕ ਚੱਲੇ ਮੈਚ ਵਿੱਚ ਫਜਰ ਅਲਫੀਅਨ ਅਤੇ ਮੁਹੰਮਦ ਰਿਆਨ ਅਰਦੀਯਾਂਤੋ ਨੂੰ 21-18, 17-21, 21-17 ਨਾਲ ਹਰਾ ਕੇ ਸਕੋਰ 2-0 ਕਰ ਦਿੱਤਾ, ਹਾਲਾਂਕਿ ਜੋਨਾਥਨ ਕ੍ਰਿਸਟੀ ਨੇ ਲੀ ਸ਼ਿਫੇਂਗ ਨੂੰ 21-10, 15-21, 21-17 ਨਾਲ ਹਰਾ ਕੇ ਇੰਡੋਨੇਸ਼ੀਆ ਨੂੰ ਵ੍ਹਾਈਟਵਾਸ਼ ਹੋਣ ਤੋਂ ਬਚਾ ਲਿਆ।

ਇਸ ਤੋਂ ਬਾਅਦ ਦੂਜੇ ਡਬਲਜ਼ 'ਚ ਹੀ ਜਿਟਿੰਗ ਅਤੇ ਰੇਨ ਜਿਆਂਗਯੂ ਨੇ ਮੁਹੰਮਦ ਸ਼ੋਹਿਬੁਲ ਫਿਕਰੀ ਅਤੇ ਬਾਘਾਸ ਮੌਲਾਨਾ 'ਤੇ 21-11, 21-15 ਨਾਲ ਸ਼ਾਨਦਾਰ ਜਿੱਤ ਦਰਜ ਕਰਕੇ ਚੀਨ ਨੂੰ 3-1 ਨਾਲ ਹਰਾ ਕੇ ਖਿਤਾਬ ਆਪਣੇ ਨਾਮ ਕੀਤਾ।

ਚੈਂਪੀਅਨਸ਼ਿਪ 'ਤੇ ਕਬਜ਼ਾ ਕਰਨ ਦੇ ਨਾਲ ਹੀ ਚੀਨ ਨੇ ਇਸ ਦੋ-ਸਾਲਾ ਟੂਰਨਾਮੈਂਟ 'ਚ ਹੁਣ ਤੱਕ ਕੁੱਲ 11 ਖਿਤਾਬ ਜਿੱਤੇ ਹਨ। ਇੰਡੋਨੇਸ਼ੀਆ 14 ਖ਼ਿਤਾਬਾਂ ਨਾਲ ਇਸ ਸੂਚੀ ਵਿੱਚ ਸਭ ਤੋਂ ਉੱਪਰ ਹੈ।

ਇਸ ਤੋਂ ਪਹਿਲਾਂ ਐਤਵਾਰ ਸਵੇਰੇ ਚੀਨ ਦੀ ਮਹਿਲਾ ਟੀਮ ਨੇ ਇੰਡੋਨੇਸ਼ੀਆ ਨੂੰ ਤਿੰਨ ਘੰਟੇ ਦੇ ਅੰਦਰ ਹਰਾ ਕੇ ਆਪਣਾ 16ਵਾਂ ਉਬੇਰ ਕੱਪ ਖਿਤਾਬ ਜਿੱਤਿਆ। ਓਲੰਪਿਕ ਚੈਂਪੀਅਨ ਚੇਨ ਯੂਫੇਈ ਨੇ ਸਿੰਗਲਜ਼ ਮੈਚ ਵਿੱਚ ਗ੍ਰੇਗੋਰੀਆ ਮਾਰਿਸਕਾ ਤੁਨਜੁੰਗ ਨੂੰ 21-7, 21-16 ਨਾਲ ਹਰਾ ਕੇ ਬੜ੍ਹਤ ਹਾਸਲ ਕੀਤੀ। ਵਿਸ਼ਵ ਦੀ ਨੰਬਰ 1 ਖਿਡਾਰਨ ਚੇਨ ਕਿੰਗਚੇਨ ਅਤੇ ਜੀਆ ਯਿਫਾਨ ਨੇ ਡਬਲਜ਼ ਮੈਚ ਵਿੱਚ ਸਿਤੀ ਫਾਦੀਆ ਸਿਲਵਾ ਰਾਮਧੰਤੀ ਅਤੇ ਰੇਬੇਕਾਹ ਸੁਗਿਆਰਤੋ ਨੂੰ 21-11, 21-8 ਨਾਲ ਹਰਾ ਕੇ ਚੀਨ ਨੂੰ 2-0 ਨਾਲ ਅੱਗੇ ਕਰ ਦਿੱਤਾ।

ਇਸ ਤੋਂ ਬਾਅਦ ਦੂਜੇ ਸਿੰਗਲਜ਼ ਮੈਚ ਵਿੱਚ ਇੰਡੋਨੇਸ਼ੀਆਈ ਕਿਸ਼ੋਰੀ ਐਸਟਰ ਨੂਰੁਮੀ ਟ੍ਰਾਈ ਨੇ ਪਹਿਲਾ ਸੈੱਟ 21-10 ਨਾਲ ਜਿੱਤਿਆ, ਪਰ ਹੀ ਬਿੰਗਜਿਆਓ ਨੇ ਵਾਪਸੀ ਕਰਦਿਆਂ 21-15, 21-17 ਨਾਲ ਜਿੱਤ ਦਰਜ ਕਰਕੇ ਉਬੇਰ ਕੱਪ ’ਤੇ ਕਬਜ਼ਾ ਕਰ ਲਿਆ।

ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ