ਚਿਤਰਕੂਟ, 09 ਮਈ (ਹਿ. ਸ.)। ਭਾਰਤੀ ਜਨਤਾ ਪਾਰਟੀ ਦੇ ਰਾਸ਼ਟਰੀ ਪ੍ਰਧਾਨ ਜੇਪੀ ਨੱਡਾ ਨੇ ਚਿਤਰਕੂਟ ਵਿੱਚ ਚੋਣ ਜਨ ਸਭਾ ਵਿੱਚ ਵਿਰੋਧੀ ਪਾਰਟੀਆਂ ਦੇ ਗਠਜੋੜ ਆਈਐਨਡੀਆਈਏ ਉੱਤੇ ਤਿੱਖਾ ਹਮਲਾ ਕੀਤਾ। ਨੱਡਾ ਨੇ ਕਿਹਾ ਕਿ ਇਹ ਗਠਜੋੜ ਭ੍ਰਿਸ਼ਟਾਚਾਰੀਆਂ ਦਾ ਇਕੱਠ ਹੈ। ਮੋਦੀ ਜੀ ਕਹਿੰਦੇ ਹਨ - ਭ੍ਰਿਸ਼ਟਾਚਾਰੀ ਹਟਾਓ, ਵਿਰੋਧੀ ਗਠਜੋੜ ਕਹਿੰਦਾ ਹੈ - ਭ੍ਰਿਸ਼ਟਾਚਾਰੀਆਂ ਨੂੰ ਬਚਾਓ। ਇਹ ਸਾਰੇ ਪਰਿਵਾਰਵਾਦੀ ਲੋਕ ਹਨ।
ਬੀਜੇਪੀ ਪ੍ਰਧਾਨ ਨੱਡਾ ਚਿਤਰਕੂਟ ਤੋਂ ਭਾਜਪਾ ਉਮੀਦਵਾਰ ਆਰਕੇ ਸਿੰਘ ਪਟੇਲ ਦੇ ਸਮਰਥਨ ਵਿੱਚ ਜਨਸਭਾ ਨੂੰ ਸੰਬੋਧਿਤ ਕਰ ਰਹੇ ਸਨ। ਨੱਡਾ ਨੇ ਕਿਹਾ ਕਿ ਰਾਹੁਲ ਗਾਂਧੀ ਦੇ ਇਕ ਕਮਾਂਡਰ ਅਤੇ ਸਲਾਹਕਾਰ ਨੇ ਚਮੜੀ ਦੇ ਆਧਾਰ 'ਤੇ ਭਾਰਤ ਨੂੰ ਵੰਡਣ ਦੀ ਗੱਲ ਕੀਤੀ ਹੈ। ਅਜਿਹੇ ਲੋਕ ਭਾਰਤ ਦੇ ਸੱਭਿਆਚਾਰ ਨਾਲ ਖਿਲਵਾੜ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਅੱਜ ਕੱਲ੍ਹ ਰਾਹੁਲ ਗਾਂਧੀ ਸੰਵਿਧਾਨ ਦੀ ਕਾਪੀ ਲੈ ਕੇ ਘੁੰਮ ਰਹੇ ਹਨ। ਸੰਵਿਧਾਨ ਵਿੱਚ ਬਾਬਾ ਸਾਹਿਬ ਅੰਬੇਡਕਰ ਨੇ ਲਿਖਿਆ ਹੈ ਕਿ ਰਾਖਵਾਂਕਰਨ ਧਰਮ ਦੇ ਨਾਮ ’ਤੇ ਨਹੀਂ ਹੋਵੇਗਾ ਜਦੋਂਕਿ ਕਾਂਗਰਸ ਦਲਿਤ, ਆਦਿਵਾਸੀ, ਪੱਛੜੇ ਅਤੇ ਅਤਿ ਪੱਛੜੇ ਭਰਾਵਾਂ ਦੇ ਹੱਕਾਂ ’ਤੇ ਡਾਕਾ ਮਾਰ ਕੇ ਧਰਮ ਦੇ ਆਧਾਰ ’ਤੇ ਰਾਖਵਾਂਕਰਨ ਦੇਣਾ ਚਾਹੁੰਦੀ ਹੈ।
ਭਾਜਪਾ ਪ੍ਰਧਾਨ ਨੇ ਕਿਹਾ ਕਿ ਇੱਕ ਸਮੇਂ ਉੱਤਰ ਪ੍ਰਦੇਸ਼ ਇੱਕ ਬਿਮਾਰ ਸੂਬਾ ਸੀ ਪਰ ਅੱਜ ਮੋਦੀ ਅਤੇ ਯੋਗੀ ਦੀ ਅਗਵਾਈ ਵਿੱਚ ਇਹ ਦੇਸ਼ ਦੇ ਮੋਹਰੀ ਰਾਜਾਂ ਵਿੱਚੋਂ ਇੱਕ ਬਣ ਗਿਆ ਹੈ। ਹੁਣ ਚਿਤਰਕੂਟ ਨੂੰ ਵੀ ਰੱਖਿਆ ਉਦਯੋਗਿਕ ਗਲਿਆਰੇ ਵਿੱਚ ਸ਼ਾਮਲ ਕਰ ਲਿਆ ਗਿਆ ਹੈ। ਇਸਦੇ ਇੱਥੇ ਆਉਣ ਨਾਲ ਚਿਤਰਕੂਟ ਅਤੇ ਬਾਂਦਾ ਦੀ ਤਸਵੀਰ ਬਦਲ ਜਾਵੇਗੀ ਅਤੇ ਇੱਥੋਂ ਦੇ ਨੌਜਵਾਨਾਂ ਨੂੰ ਰੁਜ਼ਗਾਰ ਦੇ ਨਵੇਂ ਮੌਕੇ ਮਿਲਣਗੇ। ਮੋਦੀ ਜੀ ਨੇ ਸਬਕਾ ਸਾਥ, ਸਬਕਾ ਵਿਕਾਸ, ਸਬਕਾ ਵਿਸ਼ਵਾਸ, ਸਬਕਾ ਪ੍ਰਯਾਸ ਦੇ ਮੰਤਰ ਨੂੰ ਧਾਰਨ ਕਰਦੇ ਹੋਏ ਪਿੰਡਾਂ, ਗਰੀਬਾਂ, ਸ਼ੋਸ਼ਿਤਾਂ, ਵਾਂਝਿਆਂ, ਪੀੜਤਾਂ, ਨੌਜਵਾਨਾਂ, ਕਿਸਾਨਾਂ ਅਤੇ ਔਰਤਾਂ ਨੂੰ ਮਜ਼ਬੂਤ ਕਰਨ ਦਾ ਕੰਮ ਕੀਤਾ। ਅੱਜ ਦੇਸ਼ ਵਿੱਚ ਰਿਪੋਰਟ ਕਾਰਡ, ਜਵਾਬਦੇਹੀ, ਵਿਕਾਸਵਾਦ ਅਤੇ ਸਭ ਨੂੰ ਨਾਲ ਲੈ ਕੇ ਚੱਲਣ ਦੀ ਰਾਜਨੀਤੀ ਚੱਲ ਰਹੀ ਹੈ। ਇਹ ਮੋਦੀ ਜੀ ਦਾ ਸੱਭਿਆਚਾਰ ਹੈ। ਜੋ ਕਿਹਾ ਗਿਆ ਉਹ ਕੀਤਾ ਗਿਆ ਅਤੇ ਜੋ ਨਹੀਂ ਕਿਹਾ ਗਿਆ ਉਹ ਵੀ ਕਰਕੇ ਦਿੱਤਾ ਗਿਆ ਹੈ।
ਨੱਡਾ ਨੇ ਕਿਹਾ ਕਿ ਭਾਰਤੀ ਰਾਜਨੀਤੀ 'ਚ ਪਰਿਵਾਰਵਾਦ, ਜਾਤੀਵਾਦ, ਵਿਅਕਤੀਵਾਦ, ਭ੍ਰਿਸ਼ਟਾਚਾਰ, ਵੋਟ ਬੈਂਕ ਅਤੇ ਤੁਸ਼ਟੀਕਰਨ ਦਾ ਬੋਲਬਾਲਾ ਸੀ ਪਰ ਮੋਦੀ ਨੇ 10 ਸਾਲਾਂ 'ਚ ਜਾਤੀਵਾਦ, ਖੇਤਰਵਾਦ ਅਤੇ ਤੁਸ਼ਟੀਕਰਨ ਦੀ ਰਾਜਨੀਤੀ ਨਾਲ ਲੋਹਾ ਲੈਂਦਿਆਂ ਵਿਕਾਸ ਦੀ ਰਾਜਨੀਤੀ ਨੂੰ ਅੱਗੇ ਵਧਾਇਆ ਅਤੇ ਮੰਤਰ ਦਿੱਤਾ- ਸਬਕਾ ਸਾਥ, ਸਬਕਾ ਵਿਕਾਸ, ਸਬਕਾ ਵਿਸ਼ਵਾਸ ਅਤੇ ਸਬਕਾ ਪ੍ਰਯਾਸ। 10 ਸਾਲ ਪਹਿਲਾਂ ਭਾਰਤ ਦੇ ਆਮ ਨਾਗਰਿਕ ਦੇ ਮਨ ਵਿੱਚ ਇਹ ਖਿਆਲ ਵੱਸ ਗਿਆ ਸੀ ਕਿ ਹੁਣ ਕੁਝ ਨਹੀਂ ਬਦਲਣ ਵਾਲਾ ਹੈ, ਰਾਜਨੀਤੀ ਇਹੋ ਜਿਹੀ ਹੁੰਦੀ ਹੈ, ਇੱਥੇ ਗੁੰਡਿਆਂ ਦਾ ਰਾਜ ਚੱਲਦਾ ਰਹੇਗਾ, ਪਰ ਮੋਦੀ ਦੇ ਆਉਣ ਤੋਂ ਬਾਅਦ ਭਾਰਤ ਦੀ ਰਾਜਨੀਤੀ ਵਿੱਚ ਸਭ ਕੁੱਝ ਬਦਲਿਆ ਹੈ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
