ਨਵੀਂ ਦਿੱਲੀ, 29 ਅਕਤੂਬਰ (ਹਿੰ.ਸ.)। ਭਾਰਤੀ ਟੇਬਲ ਟੈਨਿਸ ਖਿਡਾਰੀਆਂ ਮਾਨੁਸ਼ ਸ਼ਾਹ ਅਤੇ ਦੀਆ ਚਿਤਲੇ ਦੀ ਜੋੜੀ ਨੇ ਪਹਿਲੀ ਵਾਰ ਡਬਲਯੂਟੀਟੀ ਫਾਈਨਲਜ਼ ਲਈ ਕੁਆਲੀਫਾਈ ਕਰਕੇ ਇਤਿਹਾਸ ਰਚ ਦਿੱਤਾ ਹੈ।

ਨਵੀਨਤਮ ਡਬਲਯੂਟੀਟੀ ਸੀਰੀਜ਼ ਫਾਈਨਲਜ਼ ਰੇਸ ਰੈਂਕਿੰਗਜ਼ ਦੇ ਅਨੁਸਾਰ, ਸ਼ਾਹ-ਚਿਤਲੇ ਦੀ ਜੋੜੀ ਮੰਗਲਵਾਰ ਨੂੰ ਹਾਂਗਕਾਂਗ (ਚੀਨ) ਵਿੱਚ ਇਸ ਸਾਲ ਦੇ ਅੰਤ ਵਿੱਚ (10-14 ਦਸੰਬਰ) ਹੋਣ ਵਾਲੇ ਟੂਰਨਾਮੈਂਟ ਵਿੱਚ ਜਗ੍ਹਾ ਪੱਕੀ ਕਰਨ ਵਾਲੀ ਪੰਜਵੀਂ ਮਿਕਸਡ ਡਬਲਜ਼ ਟੀਮ ਬਣ ਗਈ। ਡਬਲਯੂਟੀਟੀ ਸਟਾਰ ਮੁਕਾਬਲੇਬਾਜ਼ ਮਸਕਟ (17-22 ਨਵੰਬਰ) ਤੋਂ ਬਾਅਦ ਫਾਈਨਲ ਰੇਸ ਰੈਂਕਿੰਗਜ਼ ਵਿੱਚੋਂ ਸੱਤ ਸਭ ਤੋਂ ਵਧੀਆ ਜੋੜੀਆਂ ਸਿੱਧੇ ਤੌਰ 'ਤੇ ਕੁਆਲੀਫਾਈ ਕਰਨਗੀਆਂ, ਜਦੋਂ ਕਿ ਅੱਠਵਾਂ ਸਥਾਨ ਮੇਜ਼ਬਾਨ ਦੇਸ਼ ਦੀ ਵਾਈਲਡਕਾਰਡ ਜੋੜੀ ਨੂੰ ਮਿਲੇਗਾ।ਵਿਸ਼ਵ ਟੇਬਲ ਟੈਨਿਸ ਫੈਡਰੇਸ਼ਨ (ਆਈਟੀਟੀਐਫ) ਦੀ ਤਾਜ਼ਾ ਰੈਂਕਿੰਗ ਵਿੱਚ ਇਹ ਭਾਰਤੀ ਜੋੜੀ ਅੱਠਵੇਂ ਸਥਾਨ 'ਤੇ ਹੈ। ਇਸ ਸੀਜ਼ਨ ਵਿੱਚ ਉਨ੍ਹਾਂ ਨੇ ਕਈ ਸ਼ਾਨਾਦਰ ਪ੍ਰਦਰਸ਼ਨ ਕੀਤੇ ਹਨ। ਅਪ੍ਰੈਲ ਵਿੱਚ ਡਬਲਯੂਟੀਟੀ ਕੰਟੈਂਡਰ ਟਿਊਨਿਸ ਵਿੱਚ, ਉਨ੍ਹਾਂ ਨੇ ਫਾਈਨਲ ਵਿੱਚ ਜਾਪਾਨ ਦੇ ਮਿਵਾ ਹਰੀਮੋਟੋ ਅਤੇ ਸੋਰਾ ਮਾਤਸੁਸ਼ੀਮਾ ਨੂੰ ਹਰਾ ਕੇ ਖਿਤਾਬ ਜਿੱਤਿਆ ਸੀ -ਜੋ ਉਨ੍ਹਾਂ ਦਾ ਸਭ ਤੋਂ ਵੱਡਾ ਅੰਤਰਰਾਸ਼ਟਰੀ ਖਿਤਾਬ ਰਿਹਾ।ਇਸ ਤੋਂ ਬਾਅਦ ਉਨ੍ਹਾਂ ਨੇ ਜੁਲਾਈ ਵਿੱਚ ਯੂਐਸ ਸਮੈਸ਼ ਵਿੱਚ ਜਾਪਾਨ ਦੀ ਸਤਸੁਕੀ ਓਡੋ ਅਤੇ ਕੋਰੀਆ ਦੀ ਓਹ ਜੁਨਸੁੰਗ ਨੂੰ ਹਰਾਇਆ, ਜਦੋਂ ਕਿ ਡਬਲਯੂਟੀਟੀ ਕੰਟੈਂਡਰ ਬਿਊਨਸ ਆਇਰਸ ਵਿੱਚ, ਉਨ੍ਹਾਂ ਨੇ ਸਤਸੁਕੀ ਓਡੋ ਅਤੇ ਜਾਪਾਨ ਦੀ ਹੀ ਹਿਰੋਤੋ ਸ਼ਿਨੋਜ਼ੁਕਾ ਨੂੰ ਹਰਾ ਕੇ ਪ੍ਰਭਾਵਸ਼ਾਲੀ ਜਿੱਤਾਂ ਹਾਸਲ ਕੀਤੀਆਂ।ਜ਼ਿਕਰਯੋਗ ਹੈ ਕਿ ਡਬਲਯੂਟੀਟੀ ਫਾਈਨਲਜ਼ 2021 ਵਿੱਚ ਸ਼ੁਰੂ ਹੋਇਆ ਸੀ। ਇਸ ਸਾਲ ਵੀ ਮੁਕਾਬਲੇ ਵਿੱਚ ਪੁਰਸ਼ ਅਤੇ ਮਹਿਲਾ ਸਿੰਗਲ ਵਰਗਾਂ ਵਿੱਚ 16-16 ਖਿਡਾਰੀ ਹਿੱਸਾ ਲੈਣਗੇ। 13 ਲੱਖ ਅਮਰੀਕੀ ਡਾਲਰ ਦੇ ਕੁੱਲ ਇਨਾਮੀ ਇਸ ਈਵੈਂਟ ਵਿੱਚ ਇਸ ਵਾਰ, ਪੁਰਸ਼ਾਂ ਅਤੇ ਮਹਿਲਾ ਡਬਲਜ਼ ਦੀ ਥਾਂ 'ਤੇ ਮਿਕਸਡ ਡਬਲਜ਼ ਈਵੈਂਟ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਮਿਕਸਡ ਡਬਲਜ਼ ਵਰਗ ਵਿੱਚ ਦੋ ਗਰੁੱਪ ਹੋਣਗੇ (ਹਰੇਕ ਵਿੱਚ ਚਾਰ ਜੋੜੇ)। ਗਰੁੱਪ ਪੜਾਅ ਤੋਂ ਬਾਅਦ ਸੈਮੀਫਾਈਨਲ ਹੋਣਗੇ, ਸਾਰੇ ਮੈਚ ਬੈਸਟ-ਆਫ-ਫਾਈਵ ਫਾਰਮੈਟ ਵਿੱਚ ਖੇਡੇ ਜਾਣਗੇ।

ਇਸ ਇਤਿਹਾਸਕ ਮੌਕੇ 'ਤੇ, ਦੀਆ ਚਿਤਲੇ ਨੇ ਇੱਕ ਬਿਆਨ ਵਿੱਚ ਕਿਹਾ, ਫਾਈਨਲ ਵਰਗੇ ਵੱਡੇ ਟੂਰਨਾਮੈਂਟ ਵਿੱਚ ਖੇਡਣਾ ਆਪਣੇ ਆਪ ’ਚ ਬਹੁਤ ਵੱਡਾ ਸਨਮਾਨ ਹੈ, ਅਤੇ ਇਹ ਉਪਲਬਧੀ ਹਾਸਲ ਕਰਨ ਵਾਲੀ ਪਹਿਲੀ ਭਾਰਤੀ ਹੋਣ 'ਤੇ ਹੋਰ ਵੀ ਮਾਣ ਹੈ। ਇਹ ਪਲ ਸਿਰਫ਼ ਸਾਡਾ ਨਹੀਂ ਹੈ - ਇਹ ਭਾਰਤੀ ਟੇਬਲ ਟੈਨਿਸ ਦੀ ਤਰੱਕੀ ਦਾ ਪ੍ਰਤੀਕ ਹੈ। ਅਸੀਂ ਇਸਨੂੰ ਯਾਦਗਾਰ ਬਣਾਉਣ ਲਈ ਆਪਣੀ ਪੂਰੀ ਕੋਸ਼ਿਸ਼ ਕਰਾਂਗੇ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ