ਨਵੀਂ ਦਿੱਲੀ, 1 ਅਪ੍ਰੈਲ (ਹਿੰ.ਸ.)। ਘਰੇਲੂ ਸ਼ੇਅਰ ਬਾਜ਼ਾਰ ਵਿੱਚ ਅੱਜ ਸ਼ੁਰੂਆਤੀ ਕਾਰੋਬਾਰ ਤੋਂ ਦਬਾਅ ਨਜ਼ਰ ਆ ਰਿਹਾ ਹੈ। ਅੱਜ ਦਾ ਕਾਰੋਬਾਰ ਭਾਰੀ ਗਿਰਾਵਟ ਨਾਲ ਸ਼ੁਰੂ ਹੋਇਆ, ਹਾਲਾਂਕਿ, ਜਿਵੇਂ ਹੀ ਬਾਜ਼ਾਰ ਖੁੱਲ੍ਹਿਆ ਖਰੀਦਦਾਰਾਂ ਨੇ ਮੋਰਚਾ ਸੰਭਾਲ ਲਿਆ ਅਤੇ ਹਰ ਪਾਸਿਓਂ ਖਰੀਦਦਾਰੀ ਸ਼ੁਰੂ ਕਰ ਦਿੱਤੀ। ਇਸ ਤੋਂ ਥੋੜੀ ਦੇਰ ਬਾਅਦ ਬਾਜ਼ਾਰ ਵਿੱਚ ਇੱਕ ਵਾਰ ਫਿਰ ਵਿਕਰੀ ਦਾ ਦਬਾਅ ਵਧਣ ਲੱਗਾ, ਜਿਸ ਕਾਰਨ ਸੈਂਸੈਕਸ ਅਤੇ ਨਿਫਟੀ ਦੋਵਾਂ ਸੂਚਕਾਂਕ ਵਿੱਚ ਗਿਰਾਵਟ ਆਈ। ਕਾਰੋਬਾਰ ਦੋਰਾਨ ਫਿਲਹਾਲ 11:25 ਵਜੇ ਤੱਕ ਸੈਂਸੈਕਸ 1081.48 ਅੰਕ ਭਾਵ 1.40 ਫੀਸਦੀ ਦੀ ਗਿਰਾਵਟ ਨਾਲ 76,333.44 ਅੰਕ ਦੇ ਪੱਧਰ ’ਤੇ ਅਤੇ ਨਿਫਟੀ 274.70 ਅੰਕ ਭਾਵ 1.17 ਫੀਸਦੀ ਦੀ ਗਿਰਾਵਟ ਨਾਲ 23,244.65 ਅੰਕ ਦੇ ਪੱਧਰ ’ਤੇ ਕਾਰੋਬਾਰ ਕਰ ਰਿਹਾ ਸੀ।
ਇਸ ਤੋਂ ਪਹਿਲਾਂ ਸ਼ੁਰੂਆਤੀ ਘੰਟੇ ਦੇ ਕਾਰੋਬਾਰ ਤੋਂ ਬਾਅਦ ਸ਼ੇਅਰ ਬਾਜ਼ਾਰ ਦੇ ਦਿੱਗਜ਼ ਸ਼ੇਅਰਾਂ ਵਿੱਚੋਂ ਟ੍ਰੇਂਟ ਲਿਮਟਿਡ, ਹੀਰੋ ਮੋਟੋਕਾਰਪ, ਜ਼ੋਮੈਟੋ, ਓਐਨਜੀਸੀ ਅਤੇ ਸਿਪਲਾ ਦੇ ਸ਼ੇਅਰ 3.46 ਫੀਸਦੀ ਤੋਂ ਲੈ ਕੇ 1.10 ਫੀਸਦੀ ਤੱਕ ਮਜ਼ਬੂਤੀ ਨਾਲ ਕਾਰੋਬਾਰ ਕਰ ਰਹੇ ਸਨ। ਦੂਜੇ ਪਾਸੇ ਸ਼੍ਰੀਰਾਮ ਫਾਈਨੈਂਸ, ਟੀਸੀਐਸ, ਐਚਸੀਐਲ ਟੈਕਨਾਲੋਜੀ, ਐਚਡੀਐਫਸੀ ਬੈਂਕ ਅਤੇ ਐਕਸਿਸ ਬੈਂਕ ਦੇ ਸ਼ੇਅਰ 1.59 ਤੋਂ ਲੈ ਕੇ 0.93 ਫੀਸਦੀ ਤੱਕ ਦੀ ਗਿਰਾਵਟ ਨਾਲ ਕਾਰੋਬਾਰ ਕਰ ਰਹੇ ਸਨ। ਇਸੇ ਦੌਰਾਨ ਸੈਂਸੈਕਸ ਵਿੱਚ ਸ਼ਾਮਲ 30 ਸ਼ੇਅਰਾਂ ਵਿੱਚੋਂ 13 ਸ਼ੇਅਰ ਖਰੀਦਦਾਰੀ ਸਮਰਥਨ ਦੇ ਕਾਰਨ ਗ੍ਰੀਨ ਜ਼ੋਨ ਵਿੱਚ ਰਹੇ। ਦੂਜੇ ਪਾਸੇ, ਵਿਕਰੀ ਦੇ ਦਬਾਅ ਕਾਰਨ 17 ਸ਼ੇਅਰ ਲਾਲ ਨਿਸ਼ਾਨ 'ਤੇ ਕਾਰੋਬਾਰ ਕਰ ਰਹੇ ਸਨ। ਜਦੋਂ ਕਿ ਨਿਫਟੀ ਵਿੱਚ ਸ਼ਾਮਲ 50 ਸ਼ੇਅਰਾਂ ਵਿੱਚੋਂ 30 ਸ਼ੇਅਰ ਹਰੇ ਨਿਸ਼ਾਨ ਵਿੱਚ ਅਤੇ 20 ਸ਼ੇਅਰ ਲਾਲ ਨਿਸ਼ਾਨ ਵਿੱਚ ਕਾਰੋਬਾਰ ਕਰਦੇ ਦਿਖਾਈ ਦਿੱਤੇ।
ਬੀਐਸਈ ਸੈਂਸੈਕਸ ਅੱਜ 532.34 ਅੰਕ ਡਿੱਗ ਕੇ 76,882.58 ਅੰਕਾਂ 'ਤੇ ਖੁੱਲ੍ਹਿਆ। ਕਾਰੋਬਾਰ ਦੀ ਸ਼ੁਰੂਆਤ ਵਿੱਚ, ਵਿਕਰੀ ਦੇ ਦਬਾਅ ਕਾਰਨ, ਸੂਚਕਾਂਕ 76,775.79 ਅੰਕਾਂ 'ਤੇ ਡਿੱਗ ਗਿਆ, ਪਰ ਇਸ ਤੋਂ ਬਾਅਦ ਖਰੀਦਦਾਰਾਂ ਨੇ ਹਮਲਾਵਰ ਢੰਗ ਨਾਲ ਖਰੀਦਦਾਰੀ ਕਰਨੀ ਸ਼ੁਰੂ ਕਰ ਦਿੱਤੀ। ਇਸ ਖਰੀਦਦਾਰੀ ਦੇ ਸਮਰਥਨ ਨਾਲ, ਕਾਰੋਬਾਰ ਦੇ ਪਹਿਲੇ ਅੱਧੇ ਘੰਟੇ ਦੇ ਅੰਦਰ, ਸੈਂਸੈਕਸ ਨੇ ਹੇਠਲੇ ਪੱਧਰ ਤੋਂ ਸ਼ਾਨਦਾਰ ਰਿਕਵਰੀ ਕੀਤੀ ਅਤੇ ਹਰੇ ਨਿਸ਼ਾਨ ਵਿੱਚ 77,487.05 ਅੰਕਾਂ ਤੱਕ ਪਹੁੰਚਣ ਵਿੱਚ ਸਫਲ ਰਿਹਾ। ਬਾਜ਼ਾਰ ਦੀ ਇਹ ਮਜ਼ਬੂਤੀ ਜ਼ਿਆਦਾ ਦੇਰ ਤੱਕ ਨਹੀਂ ਰਹਿ ਸਕੀ ਕਿਉਂਕਿ ਵੇਚਣ ਵਾਲਿਆਂ ਨੇ ਇੱਕ ਵਾਰ ਫਿਰ ਮੁਨਾਫ਼ਾ ਬੁਕਿੰਗ ਸ਼ੁਰੂ ਕਰ ਦਿੱਤੀ।ਸੈਂਸੈਕਸ ਵਾਂਗ, ਐਨਐਸਈ ਨਿਫਟੀ ਵੀ ਅੱਜ 178.25 ਅੰਕਾਂ ਦੀ ਗਿਰਾਵਟ ਨਾਲ 23,341.10 'ਤੇ ਖੁੱਲ੍ਹਿਆ। ਬਾਜ਼ਾਰ ਖੁੱਲ੍ਹਦੇ ਹੀ ਖਰੀਦਦਾਰੀ ਦੇ ਸਮਰਥਨ ਕਾਰਨ, ਇਹ ਸੂਚਕਾਂਕ ਕਾਰੋਬਾਰ ਦੇ ਪਹਿਲੇ ਅੱਧੇ ਘੰਟੇ ਵਿੱਚ ਗ੍ਰੀਨ ਜ਼ੋਨ ਵਿੱਚ 23,565.15 ਅੰਕਾਂ ਦੇ ਪੱਧਰ ਤੱਕ ਪਹੁੰਚਣ ਵਿੱਚ ਸਫਲ ਰਿਹਾ, ਪਰ ਇਸ ਤੋਂ ਬਾਅਦ, ਵਿਕਰੀ ਦਬਾਅ ਕਾਰਨ, ਇਹ ਸੂਚਕਾਂਕ ਫਿਰ ਤੋਂ ਲਾਲ ਜ਼ੋਨ ਵਿੱਚ ਖਿਸਕ ਗਿਆ।
ਇਸ ਤੋਂ ਪਹਿਲਾਂ ਆਖਰੀ ਕਾਰੋਬਾਰੀ ਦਿਨ ਸ਼ੁੱਕਰਵਾਰ ਨੂੰ ਸੈਂਸੈਕਸ 191.51 ਅੰਕ ਯਾਨੀ 0.25 ਫੀਸਦੀ ਦੀ ਗਿਰਾਵਟ ਦੇ ਨਾਲ 77,414.92 ਅੰਕਾਂ 'ਤੇ ਅਤੇ ਨਿਫਟੀ 72.60 ਅੰਕ ਯਾਨੀ 0.31 ਫੀਸਦੀ ਦੀ ਗਿਰਾਵਟ ਨਾਲ 23,519.35 ਅੰਕਾਂ 'ਤੇ ਬੰਦ ਹੋਇਆ ਸੀ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
