ਬੋਗੋਟਾ, 30 ਮਈ (ਹਿੰ.ਸ.)। ਭਾਰਤ ਦੁਨੀਆ ਦੇ ਆਪਣੇ ਮੁੱਖ ਭਾਈਵਾਲ ਦੇਸ਼ਾਂ ਨੂੰ ਪਾਕਿਸਤਾਨ ਵੱਲੋਂ ਪਾਲੇ ਜਾ ਰਿਹਾ ਅੱਤਵਾਦ ਦੇ ਰੂਪਾਂ ਤੋਂ ਜਾਣੂ ਕਰਵਾ ਰਿਹਾ ਹੈ। ਭਾਰਤੀ ਸੰਸਦੀ ਸਰਬ-ਪਾਰਟੀ ਵਫ਼ਦ ਦੇ ਨੇਤਾ ਅਤੇ ਮੈਂਬਰ ਵਿਸ਼ਵ ਨੇਤਾਵਾਂ ਨੂੰ ਇਹ ਯਕੀਨ ਦਿਵਾਉਣ ਵਿੱਚ ਸਫਲ ਰਹੇ ਕਿ ਪਾਕਿਸਤਾਨ ਵੱਲੋਂ ਕਹੀ ਗਈ ਕਿਸੇ ਵੀ ਗੱਲ 'ਤੇ ਭਰੋਸਾ ਨਹੀਂ ਕੀਤਾ ਜਾ ਸਕਦਾ। ਇਹ ਆਪਣੇ ਦੇਸ਼ ਵਿੱਚ ਅੱਤਵਾਦੀਆਂ ਦਾ ਪਾਲਣ ਪੋਸ਼ਣ ਕਰਕੇ ਵੱਡਾ ਕਰਦਾ ਹੈ। ਇਹ ਉਨ੍ਹਾਂ ਨੂੰ ਹਥਿਆਰ ਅਤੇ ਭਾਰੀ ਮਾਤਰਾ ਵਿੱਚ ਪੈਸਾ ਦੇ ਕੇ ਫੌਜ ਰਾਹੀਂ ਸਰਹੱਦ ਪਾਰ ਭਾਰਤ ਭੇਜਦਾ ਹੈ। ਭਾਰਤ ਵਿੱਚ ਦਾਖਲ ਹੋਏ ਇਹ ਸ਼ੈਤਾਨ ਮਾਸੂਮ ਲੋਕਾਂ ਦੇ ਮਨਾਂ ਵਿੱਚ ਜ਼ਹਿਰ ਭਰ ਕੇ ਉਨ੍ਹਾਂ ਨੂੰ ਆਪਣੇ ਜਾਲ਼ ’ਚ ਫਸਾਉਂਦੇ ਹਨ। ਉਹ ਭਾਰਤ ਦੇ ਰਣਨੀਤਕ ਕੇਂਦਰਾਂ, ਪ੍ਰਮੁੱਖ ਸ਼ਹਿਰਾਂ, ਸੈਨਿਕਾਂ ਅਤੇ ਨਾਗਰਿਕਾਂ 'ਤੇ ਹਮਲਾ ਕਰਦੇ ਅਤੇ ਕਰਵਾਉਂਦੇ ਹਨ।
ਭਾਰਤੀ ਸੰਸਦੀ ਸਰਬ-ਪਾਰਟੀ ਵਫ਼ਦ ਨੇ ਹੁਣ ਤੱਕ ਜਿਨ੍ਹਾਂ ਦੇਸ਼ਾਂ ਦਾ ਦੌਰਾ ਕੀਤਾ ਹੈ, ਉਨ੍ਹਾਂ ਸਾਰੇ ਦੇਸ਼ਾਂ ਦੀ ਸਰਕਾਰ ਨੇ ਅੱਤਵਾਦ ਵਿਰੁੱਧ ਲੜਾਈ ਵਿੱਚ ਸਮਰਥਨ ਦੇਣ ਦਾ ਵਾਅਦਾ ਕੀਤਾ ਹੈ। ਹਾਂ, ਕੋਲੰਬੀਆ ਦੇ ਰਵੱਈਏ ਤੋਂ ਕੁਝ ਨਿਰਾਸ਼ਾ ਜ਼ਰੂਰ ਹੋਈ। ਬੋਗੋਟਾ ਵਿੱਚ ਵਫ਼ਦ ਦੇ ਸਮੂਹ 5 ਦੀ ਅਗਵਾਈ ਕਰ ਰਹੇ ਕਾਂਗਰਸ ਸੰਸਦ ਮੈਂਬਰ ਸ਼ਸ਼ੀ ਥਰੂਰ ਨੇ ਕਿਹਾ ਕਿ ਅਸੀਂ ਕੋਲੰਬੀਆ ਨੂੰ ਇਹ ਯਕੀਨ ਦਿਵਾਉਣ ’ਚ ਕਾਮਯਾਬ ਰਹੇ ਹਾਂ ਕਿ ਅੱਤਵਾਦੀ ਭੇਜਣ ਵਾਲਿਆਂ ਅਤੇ ਉਨ੍ਹਾਂ ਦਾ ਵਿਰੋਧ ਕਰਨ ਵਾਲਿਆਂ ਵਿਚਕਾਰ ਕੋਈ ਸਮਾਨਤਾ ਨਹੀਂ ਹੋ ਸਕਦੀ। ਭਾਰਤ ਸਿਰਫ ਸਵੈ-ਰੱਖਿਆ ਦੇ ਆਪਣੇ ਅਧਿਕਾਰ ਦੀ ਵਰਤੋਂ ਕਰ ਰਿਹਾ ਹੈ। ਪਾਕਿਸਤਾਨ ਨੇ ਪਹਿਲਗਾਮ ਵਿੱਚ ਅੱਤਵਾਦੀਆਂ ਤੋਂ ਕਤਲੇਆਮ ਕਰਵਾ ਕੇ ਪੂਰੀ ਮਨੁੱਖਤਾ ਦਾ ਕਤਲ ਕੀਤਾ ਹੈ। ਕੋਲੰਬੀਆ ਨੇ ਵੀ ਅੱਤਵਾਦੀ ਹਮਲਿਆਂ ਨੂੰ ਝੱਲਿਆ ਹੈ। ਭਾਰਤ ਤਾਂ ਲਗਭਗ ਚਾਰ ਦਹਾਕਿਆਂ ਤੋਂ ਇਸਨੂੰ ਬਰਦਾਸ਼ਸਤ ਕਰ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਕੋਲੰਬੀਆ ਸਮਝ ਗਿਆ ਹੈ ਕਿ ਉਸਦਾ ਸ਼ੁਰੂਆਤੀ ਰੁਖ਼ ਗਲਤ ਸੀ। ਭਾਰਤ ਆਪਣੀ ਜਗ੍ਹਾ 'ਤੇ ਸਹੀ ਹੈ। ਥਰੂਰ ਨੇ ਕਿਹਾ ਕਿ ਆਪ੍ਰੇਸ਼ਨ ਸਿੰਦੂਰ ਬਹੁਤ ਜ਼ਰੂਰੀ ਸੀ। ਭਾਰਤੀ ਫੌਜ ਦੇ ਭਿਆਨਕ ਰੂਪ ਨੂੰ ਦੇਖ ਕੇ ਪਾਕਿਸਤਾਨ ਕੰਬਣ ਲੱਗਿਆ ਹੈ। ਇਸੇ ਲਈ ਉਹ ਬੇਬੁਨਿਆਦ ਬਿਆਨ ਦੇ ਰਿਹਾ ਹੈ। ਥਰੂਰ ਨੇ ਕਿਹਾ ਕਿ ਅਸੀਂ ਕੋਲੰਬੀਆ ਨੂੰ ਇਹ ਸੁਨੇਹਾ ਦਿੱਤਾ ਹੈ ਕਿ ਅਜਿਹਾ ਅੱਤਵਾਦੀ ਦੇਸ਼ ਤੋਂ ਹਮਦਰਦੀ ਦਾ ਹੱਕਦਾਰ ਨਹੀਂ ਹੈ। ਵਫ਼ਦ ਦੇ ਇੱਕ ਹੋਰ ਮੈਂਬਰ, ਸ਼ਿਵ ਸੈਨਾ ਦੇ ਸੰਸਦ ਮੈਂਬਰ ਮਿਲਿੰਦ ਦੇਵੜਾ ਨੇ ਕਿਹਾ ਕਿ ਕੋਲੰਬੀਆ ਨੇ ਕੁਝ ਤਰ੍ਹਾਂ ਦੇ ਗੁਰੀਲਾ ਯੁੱਧ ਦਾ ਸਾਹਮਣਾ ਕੀਤਾ ਹੈ। ਇਸੇ ਲਈ ਉਹ ਭਾਰਤ ਦੀ ਗੱਲ ਸਮਝ ਗਿਆ ਹੈ।
ਰੀਗਾ (ਲਾਤਵੀਆ) ਵਿੱਚ ਭਾਰਤੀ ਰਾਜਦੂਤ ਨਮਰਤਾ ਕੁਮਾਰ ਨੇ ਕਿਹਾ ਕਿ ਸੰਸਦ ਮੈਂਬਰ ਕਨੀਮੋਝੀ ਦੀ ਅਗਵਾਈ ਵਾਲਾ ਸਰਬ-ਪਾਰਟੀ ਵਫ਼ਦ ਰੀਗਾ ਪਹੁੰਚ ਗਿਆ ਹੈ। ਬਾਲਟਿਕ ਅਸੈਂਬਲੀ ਦੇ ਮੈਂਬਰਾਂ ਨਾਲ ਗੱਲਬਾਤ ਹੋਵੇਗੀ। ਅਸੈਂਬਲੀ ਤਿੰਨ ਬਾਲਟਿਕ ਦੇਸ਼ਾਂ - ਲਿਥੁਆਨੀਆ, ਐਸਟੋਨੀਆ ਅਤੇ ਲਾਤਵੀਆ ਦੇ ਸੰਸਦ ਮੈਂਬਰਾਂ ਦੀ ਨੁਮਾਇੰਦਗੀ ਕਰਦੀ ਹੈ। ਨਮਰਤਾ ਕੁਮਾਰ ਨੇ ਕਿਹਾ ਕਿ ਭਾਰਤ ਅਤੇ ਲਾਤਵੀਆ ਵਿਚਕਾਰ ਬਹੁਤ ਮਜ਼ਬੂਤ ਅਤੇ ਦੋਸਤਾਨਾ ਸਬੰਧ ਹਨ। ਲਾਤਵੀਆ ਅੱਤਵਾਦ ਵਿਰੁੱਧ ਹਰ ਲੜਾਈ ਵਿੱਚ ਭਾਰਤ ਦੇ ਨਾਲ ਹੈ। ਇਸ ਦੌਰਾਨ, ਸੰਸਦ ਮੈਂਬਰ ਸੁਪ੍ਰੀਆ ਸੂਲੇ ਦੀ ਅਗਵਾਈ ਹੇਠ ਆਲ ਪਾਰਟੀ ਐਮਪੀਜ਼ ਗਰੁੱਪ-7 ਦੇ ਵਫ਼ਦ ਨੇ ਦੱਖਣੀ ਅਫ਼ਰੀਕਾ ਦੀ ਰਾਜਧਾਨੀ ਪ੍ਰੀਟੋਰੀਆ ਦੇ ਇੰਡੀਆ ਹਾਊਸ ਵਿਖੇ ਸਥਾਨਕ ਸਿਆਸਤਦਾਨਾਂ, ਥਿੰਕ ਟੈਂਕਾਂ ਅਤੇ ਪ੍ਰਭਾਵਸ਼ਾਲੀ ਲੋਕਾਂ ਨਾਲ ਮੁਲਾਕਾਤ ਕਰਕੇ ਆਪਣੀ ਦੱਖਣੀ ਅਫ਼ਰੀਕਾ ਫੇਰੀ ਦੀ ਸਮਾਪਤੀ ਕੀਤੀ।
ਇਸ ਦੌਰੇ 'ਤੇ, ਦੱਖਣੀ ਅਫ਼ਰੀਕਾ ਵਿੱਚ ਭਾਰਤ ਦੇ ਹਾਈ ਕਮਿਸ਼ਨਰ ਪ੍ਰਭਾਤ ਕੁਮਾਰ ਨੇ ਕਿਹਾ ਕਿ ਇਹ ਇੱਕ ਸਫਲ ਦੌਰਾ ਹੈ। ਦੱਖਣੀ ਅਫ਼ਰੀਕਾ ਨੇ ਆਪਣਾ ਸਮਰਥਨ ਦੁਹਰਾਇਆ ਹੈ। ਵਫ਼ਦ ਦੇ ਮੈਂਬਰ, ਭਾਜਪਾ ਨੇਤਾ ਵੀ. ਮੁਰਲੀਧਰਨ ਨੇ ਕਿਹਾ ਕਿ ਬ੍ਰਿਕਸ ਜਾਂ ਗਲੋਬਲ ਦੱਖਣ ਦੇ ਹਿੱਤ ਭਾਰਤ ਲਈ ਸਭ ਤੋਂ ਮਹੱਤਵਪੂਰਨ ਹੋਣਗੇ। ਭਾਜਪਾ ਸੰਸਦ ਮੈਂਬਰ ਅਨੁਰਾਗ ਠਾਕੁਰ ਨੇ ਕਿਹਾ ਕਿ ਅੱਜ ਅੱਤਵਾਦ ਭਾਰਤ ਲਈ ਨਹੀਂ ਸਗੋਂ ਪੂਰੀ ਦੁਨੀਆ ਲਈ ਖ਼ਤਰਾ ਹੈ। ਭਾਰਤ ਦਾ ਸੁਨੇਹਾ ਬਹੁਤ ਮਜ਼ਬੂਤ ਅਤੇ ਸਪੱਸ਼ਟ ਹੈ। ਜ਼ਿਆਦਾਤਰ ਦੇਸ਼ ਖੁੱਲ੍ਹ ਕੇ ਭਾਰਤ ਦੇ ਸਮਰਥਨ ਵਿੱਚ ਸਾਹਮਣੇ ਆਏ ਹਨ। ਇਸ ਦੌਰਾਨ, ਭਾਜਪਾ ਸੰਸਦ ਮੈਂਬਰ ਰਵੀ ਸ਼ੰਕਰ ਪ੍ਰਸਾਦ ਦੀ ਅਗਵਾਈ ਵਿੱਚ ਸਰਬ-ਪਾਰਟੀ ਵਫ਼ਦ ਫਰਾਂਸ ਅਤੇ ਇਟਲੀ ਦੀ ਆਪਣੀ ਯਾਤਰਾ ਪੂਰੀ ਕਰਨ ਤੋਂ ਬਾਅਦ ਕੋਪਨਹੇਗਨ ਪਹੁੰਚ ਗਿਆ ਹੈ।
ਭਾਜਪਾ ਸੰਸਦ ਮੈਂਬਰ ਬੈਜਯੰਤ ਪਾਂਡਾ ਦੀ ਅਗਵਾਈ ਵਿੱਚ ਸਰਬ-ਪਾਰਟੀ ਵਫ਼ਦ ਨੇ ਸਾਊਦੀ ਅਰਬ ਵਿੱਚ ਦਿਰਿਆਹ ਦਾ ਦੌਰਾ ਕੀਤਾ। ਇਸਨੂੰ ਯੂਨੈਸਕੋ ਵਿਸ਼ਵ ਵਿਰਾਸਤ ਸਥਾਨ ਅਤੇ ਮਿੱਟੀ ਦੇ ਸ਼ਹਿਰ ਵਜੋਂ ਜਾਣਿਆ ਜਾਂਦਾ ਹੈ। ਇਹ ਆਪਣੀ ਰਵਾਇਤੀ ਮਿੱਟੀ-ਇੱਟਾਂ ਦੀ ਆਰਕੀਟੈਕਚਰ ਲਈ ਜਾਣਿਆ ਜਾਂਦਾ ਹੈ। ਸੀਅਰਾ ਲਿਓਨ ਦੇ ਫ੍ਰੀਟਾਊਨ ਵਿੱਚ, ਸ਼ਿਵ ਸੈਨਾ ਸੰਸਦ ਮੈਂਬਰ ਸ਼੍ਰੀਕਾਂਤ ਸ਼ਿੰਦੇ ਦੀ ਅਗਵਾਈ ਵਿੱਚ ਸਮੂਹ 4 ਵਫ਼ਦ ਨੇ ਰਾਸ਼ਟਰੀ ਸੁਰੱਖਿਆ ਕੋਆਰਡੀਨੇਟਰ ਅਬਦੁਲਾਈ ਕੌਲਕਰ ਅਤੇ ਉਨ੍ਹਾਂ ਦੀ ਟੀਮ ਨਾਲ ਮੁਲਾਕਾਤ ਕੀਤੀ ਹੈ।
ਜਕਾਰਤਾ (ਇੰਡੋਨੇਸ਼ੀਆ) ਵਿੱਚ, ਸਾਬਕਾ ਵਿਦੇਸ਼ ਮੰਤਰੀ ਅਤੇ ਕਾਂਗਰਸ ਨੇਤਾ ਸਲਮਾਨ ਖੁਰਸ਼ੀਦ ਨੇ ਕਿਹਾ ਕਿ ਕਸ਼ਮੀਰ ਵਿੱਚ ਲੰਬੇ ਸਮੇਂ ਤੋਂ ਇੱਕ ਵੱਡੀ ਸਮੱਸਿਆ ਸੀ। ਇਸਦਾ ਇੱਕ ਵੱਡਾ ਹਿੱਸਾ ਸੰਵਿਧਾਨ ਦੀ ਧਾਰਾ 370 ਵਿੱਚ ਸਰਕਾਰ ਦੀ ਸੋਚ ਵਿੱਚ ਝਲਕਦਾ ਸੀ। ਧਾਰਾ 370 ਨੂੰ ਰੱਦ ਕਰਨ ਤੋਂ ਬਾਅਦ ਹੋਈਆਂ ਚੋਣਾਂ ਵਿੱਚ 65 ਫੀਸਦੀ ਭਾਗੀਦਾਰੀ ਹੋਈ। ਇਸ ਕਾਰਨ ਪਾਕਿਸਤਾਨ ਦੇ ਸ਼ਾਸਕ ਘਬਰਾਏ ਹੋਏ ਹਨ। ਇਸੇ ਲਈ ਉਹ ਅਸ਼ਾਂਤੀ ਫੈਲਾ ਰਹੇ ਹਨ।
---------------
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
