ਤਰਨਤਾਰਨ, 11 ਜਨਵਰੀ (ਹਿੰ. ਸ.)। ਅਰੁਣਾਚਲ ਪ੍ਰਦੇਸ਼ ਵਿੱਚ ਹੋਣ ਵਾਲੀ ਆਉਣ ਵਾਲੀ ਮਾਊਂਟੇਨ ਟੇਰੇਨ ਬਾਈਕ (ਐਮ.ਟੀ.ਬੀ.) ਨੈਸ਼ਨਲ ਚੈਂਪੀਅਨਸ਼ਿਪ ਵਿੱਚ ਭਾਗ ਲੈਣ ਲਈ ਪੰਜਾਬ ਰਾਜ ਸਾਈਕਲਿੰਗ ਟੀਮ (ਮਾਊਂਟੇਨ ਬਾਈਕ) ਦੇ ਗਠਨ ਸਬੰਧੀ ਓਪਨ ਚੋਣ ਟਰਾਇਲ 29 ਜਨਵਰੀ ਨੂੰ ਜਾਗੋ–ਅਕਾਲ ਅਕੈਡਮੀ ਰੋਡ, ਪਿੰਡ ਕਾਲਵਾ (ਨਜ਼ਦੀਕੀ ਪਿੰਡ ਬਰਨ, ਪਟਿਆਲਾ–ਸਿਰਹਿੰਦ ਰੋਡ) ਵਿਖੇ ਕਰਵਾਏ ਜਾਣਗੇ। ਇਹ ਟਰਾਇਲ ਸਾਰੀਆਂ ਸ਼੍ਰੇਣੀਆਂ (ਪੁਰਸ਼ ਅਤੇ ਮਹਿਲਾ) ਲਈ ਹੋਣਗੇ ਅਤੇ ਭਾਗ ਲੈਣ ਵਾਲੇ ਖਿਡਾਰੀਆਂ ਲਈ ਪੰਜਾਬ ਦਾ ਮੂਲ ਨਿਵਾਸੀ ਹੋਣਾ ਲਾਜ਼ਮੀ ਹੈ। ਸਾਰੇ ਯੋਗ ਸਾਈਕਲਿੰਗ ਖਿਡਾਰੀ ਇਨ੍ਹਾਂ ਓਪਨ ਟਰਾਇਲਜ਼ ਵਿੱਚ ਭਾਗ ਲੈ ਸਕਦੇ ਹਨ।

ਇਹ ਟਰਾਇਲ ਸਾਰੀਆਂ ਸ਼੍ਰੇਣੀਆਂ ਲਈ ਕਰਵਾਏ ਜਾਣਗੇ, ਜਿਵੇਂ ਕਿ ਮੈਨ ਐਲੀਟ ਅਤੇ ਵੁਮੈਨ ਐਲੀਟ (19 ਸਾਲ ਅਤੇ ਇਸ ਤੋਂ ਉੱਪਰ), ਮੈਨ ਅੰਡਰ-23, ਮੈਨ ਅਤੇ ਵੁਮੈਨ ਜੂਨੀਅਰ (ਉਮਰ 17 ਅਤੇ 18 ਸਾਲ), ਅਤੇ ਯੂਥ ਬੋਆਇਜ਼ ਅਤੇ ਗਰਲਜ਼ (14 ਸਾਲ ਅਤੇ ਇਸ ਤੋਂ ਘੱਟ)। ਟਰਾਇਲਜ਼ ਵਿੱਚ ਸ਼ਾਮਲ ਹੋਣ ਵਾਲੇ ਖਿਡਾਰੀਆਂ ਲਈ ਪੰਜਾਬ ਦਾ ਡੋਮਿਸਾਇਲ ਸਰਟੀਫਿਕੇਟ, ਆਧਾਰ ਕਾਰਡ ਅਤੇ ਦੋ ਪਾਸਪੋਰਟ ਸਾਈਜ਼ ਫੋਟੋ ਨਾਲ ਲਿਆਉਣਾ ਲਾਜ਼ਮੀ ਹੈ।

ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਸ਼ੈਲੇਦਰ ਪਾਠਕ, ਚੇਅਰਮੈਨ, ਐਡ-ਹੌਕ ਕਮੇਟੀ (ਸਾਈਕਲਿੰਗ ਪੰਜਾਬ) ਅਤੇ ਸੰਯੁਕਤ ਸਕੱਤਰ, ਸਾਈਕਲਿੰਗ ਫੈਡਰੇਸ਼ਨ ਆਫ਼ ਇੰਡੀਆ (ਸੀਐਫਆਈ) ਨੇ ਸਪੱਸ਼ਟ ਕੀਤਾ ਕਿ ਪੰਜਾਬ ਵਿੱਚ ਸਾਈਕਲਿੰਗ ਨਾਲ ਸਬੰਧਤ ਕਿਸੇ ਵੀ ਕਿਸਮ ਦੀਆਂ ਗਤਿਵਿਧੀਆਂ ਅਤੇ ਓਪਨ ਚੋਣ ਟਰਾਇਲਜ਼ ਦੇ ਆਯੋਜਨ ਅਤੇ ਸੰਚਾਲਨ ਦਾ ਅਧਿਕਾਰ ਸਿਰਫ਼ ਸਾਈਕਲਿੰਗ ਫੈਡਰੇਸ਼ਨ ਆਫ਼ ਇੰਡੀਆ ਵੱਲੋਂ ਗਠਿਤ ਐਡ-ਹੌਕ ਕਮੇਟੀ ਕੋਲ ਹੀ ਹੈ, ਜਦ ਤੱਕ ਪੰਜਾਬ ਦੀ ਸਥਾਈ ਬਾਡੀ ਦਾ ਮੁੜ ਗਠਨ ਜਾਂ ਚੋਣ ਪ੍ਰਕਿਰਿਆ ਪੂਰੀ ਨਹੀਂ ਹੋ ਜਾਂਦੀ।

ਉਨ੍ਹਾਂ ਨੇ ਹੋਰ ਸਪਸ਼ਟ ਕੀਤਾ ਕਿ ਇਸ ਦੌਰਾਨ ਕਿਸੇ ਵੀ ਹੋਰ ਵਿਅਕਤੀ ਜਾਂ ਸੰਸਥਾ ਵੱਲੋਂ ਕਰਵਾਏ ਗਏ ਟਰਾਇਲ ਜਾਂ ਚੋਣ ਪ੍ਰਕਿਰਿਆ ਨੂੰ ਗੈਰ-ਅਧਿਕਾਰਤ ਅਤੇ ਅਵੈਧ ਮੰਨਿਆ ਜਾਵੇਗਾ। ਖਿਡਾਰੀਆਂ ਨੂੰ ਕਿਸੇ ਵੀ ਕਿਸਮ ਦੇ ਭਰਮ ਜਾਂ ਗਲਤ ਫਹਿਮੀ ਵਿੱਚ ਪੈਣ ਦੀ ਲੋੜ ਨਹੀਂ ਹੈ। ਪੰਜਾਬ ਦੇ ਸਾਰੇ ਸਾਈਕਲਿੰਗ ਖਿਡਾਰੀਆਂ ਨੂੰ ਕਿਸੇ ਵੀ ਗੈਰ-ਅਧਿਕਾਰਤ ਵਿਅਕਤੀ ਜਾਂ ਸੰਸਥਾ ਵੱਲੋਂ ਕਰਵਾਈਆਂ ਜਾਣ ਵਾਲੀਆਂ ਚੈਂਪੀਅਨਸ਼ਿਪਾਂ ਜਾਂ ਟਰਾਇਲਜ਼ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਸਾਈਕਲਿੰਗ ਫੈਡਰੇਸ਼ਨ ਆਫ਼ ਇੰਡੀਆ ਵੱਲੋਂ 25 ਦਸੰਬਰ 2025 ਨੂੰ ਪੰਜਾਬ ਵਿੱਚ ਸਾਈਕਲਿੰਗ ਗਤਿਵਿਧੀਆਂ ਦੇ ਸੁਚੱਜੇ ਸੰਚਾਲਨ ਅਤੇ ਖਿਡਾਰੀਆਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਅਸੁਵਿਧਾ ਤੋਂ ਬਚਾਉਣ ਦੇ ਮਕਸਦ ਨਾਲ ਐਡ-ਹੌਕ ਕਮੇਟੀ ਦਾ ਗਠਨ ਕੀਤਾ ਗਿਆ ਹੈ। ਇਹ ਕਮੇਟੀ ਆਪਣੇ ਨਿਯੁਕਤ ਅਬਜ਼ਰਵਰਾਂ ਅਤੇ ਪ੍ਰੈਜ਼ੀਡੈਂਟ ਕਮਿਸ਼ਨ ਪੈਨਲ (ਪੀਸੀਪੀ) ਦੇ ਨਿਯੁਕਤ ਪ੍ਰਤਿਨਿਧੀ ਦੀ ਨਿਗਰਾਨੀ ਹੇਠ ਓਪਨ ਟਰਾਇਲ ਕਰਵਾਏਗੀ। ਪਾਠਕ ਨੇ ਕਿਹਾ ਕਿ ਕਮੇਟੀ ਖਿਡਾਰੀਆਂ ਦੇ ਕਲਿਆਣ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ। ਸਹੀ ਅਤੇ ਸਮੇਂ-ਸਿਰ ਜਾਣਕਾਰੀ ਲਈ ਪੰਜਾਬ ਦੇ ਸਾਈਕਲਿਸਟ ਮਨੀਸ਼ ਸਾਹਨੀ, ਮੈਂਬਰ, ਐਡ-ਹੌਕ ਕਮੇਟੀ ਨਾਲ ਮੋਬਾਈਲ ਨੰਬਰ 9463909616 'ਤੇ ਸੰਪਰਕ ਕਰ ਸਕਦੇ ਹਨ।

ਹਿੰਦੂਸਥਾਨ ਸਮਾਚਾਰ / ਦਵਿੰਦਰ ਸਿੰਘ