ਢਾਕਾ, 12 ਫਰਵਰੀ (ਹਿੰ.ਸ.)। ਬੰਗਲਾਦੇਸ਼ ਵਿੱਚ 13ਵੀਂ ਸੰਸਦੀ ਚੋਣ ਅਤੇ ਰਾਸ਼ਟਰੀ ਜਨਮਤ ਸੰਗ੍ਰਹਿ ਲਈ ਵੋਟਿੰਗ ਚੱਲ ਰਹੀ ਹੈ, ਇਸ ਦੌਰਾਨ ਇੱਕ ਪ੍ਰੀਜ਼ਾਈਡਿੰਗ ਅਫਸਰ ਨੇ ਗੰਭੀਰ ਸਵਾਲ ਖੜ੍ਹੇ ਕੀਤੇ ਹਨ। ਉਨ੍ਹਾਂ ਕਿਹਾ ਕਿ ਢਾਕਾ-11 ਹਲਕੇ ਦੇ ਆਨੰਦਨਗਰ ਆਦਰਸ਼ ਹਾਈ ਸਕੂਲ ਪੋਲਿੰਗ ਸਟੇਸ਼ਨ 'ਤੇ ਵੱਡੀ ਭੀੜ ਨਕਲੀ ਜਾਪ ਰਹੀ ਹੈ। ਸਵੇਰੇ 11:30 ਵਜੇ ਤੱਕ, ਸਕੂਲ ਵਿੱਚ ਸਥਾਪਤ ਛੇ ਪੋਲਿੰਗ ਸਟੇਸ਼ਨਾਂ 'ਤੇ ਔਸਤ ਵੋਟਰਾਂ ਦੀ ਗਿਣਤੀ 23.96 ਫੀਸਦੀ ਰਹੀ।
ਢਾਕਾ ਟ੍ਰਿਬਿਊਨ ਦੀ ਰਿਪੋਰਟ ਦੇ ਅਨੁਸਾਰ, ਪ੍ਰੀਜ਼ਾਈਡਿੰਗ ਅਫਸਰ ਐਮਏ ਮੋਹਿਬੁਰ ਰਹਿਮਾਨ ਨੇ ਕਿਹਾ, ਵੱਡੇ ਗਿਣਤੀ ’ਚ ਵੋਟਰਾਂਂ ਦਾ ਪਹੁੰਚਣਾ ਯੋਜਨਾਬੱਧ ਜਾਪ ਰਿਹਾ ਹੈ। ਅਜਿਹੀ ਸਥਿਤੀ ਅਸਲ ਵੋਟਰਾਂ ਨੂੰ ਵੋਟ ਪਾਉਣ ਤੋਂ ਰੋਕਣ ਲਈ ਬਣਾਈ ਜਾ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਸਥਿਤੀ ਨੂੰ ਕੰਟਰੋਲ ਕਰਨ ਲਈ ਇੱਕ ਮੈਜਿਸਟ੍ਰੇਟ ਨੂੰ ਪਹਿਲਾਂ ਹੀ ਸੂਚਿਤ ਕੀਤਾ ਗਿਆ ਸੀ ਅਤੇ ਉਨ੍ਹਾਂ ਨੂੰ ਭਰੋਸਾ ਮਿਲਿਆ ਗਿਆ ਸੀ ਕਿ ਫੌਜ ਤਾਇਨਾਤ ਕੀਤੀ ਜਾਵੇਗੀ।
ਹਾਲਾਂਕਿ, ਪੋਲਿੰਗ ਸਟੇਸ਼ਨ ਨੰਬਰ 90 ਦੇ ਪ੍ਰੀਜ਼ਾਈਡਿੰਗ ਅਫਸਰ ਅਤੇ ਇੰਚਾਰਜ ਮੁਹੰਮਦ ਮੁਨਵਰ ਹੁਸੈਨ ਨੇ ਇੱਕ ਵੱਖਰੀ ਹੀ ਤਸਵੀਰ ਪੇਸ਼ ਕੀਤੀ। ਉਨ੍ਹਾਂ ਕਿਹਾ, ਵੋਟਿੰਗ ਵਿੱਚ ਕੋਈ ਬੇਨਿਯਮੀਆਂ ਨਹੀਂ ਹੋਈਆਂ। ਭੀੜ ਦਾ ਮੁੱਖ ਕਾਰਨ ਤੰਗ ਪ੍ਰਵੇਸ਼ ਦੁਆਰ ਹੈ।
ਇਸ ਦੌਰਾਨ, ਬਹੁਤ ਸਾਰੇ ਵੋਟਰਾਂ ਨੇ ਭੀੜ ਅਤੇ ਪ੍ਰਬੰਧਾਂ ਤੋਂ ਨਿਰਾਸ਼ਾ ਵੀ ਪ੍ਰਗਟ ਕੀਤੀ। 21 ਸਾਲਾ ਸ਼ਫੀਨ ਨੇ ਕਿਹਾ, ਜਦੋਂ ਮੈਂ ਸਵੇਰੇ 8 ਵਜੇ ਵੋਟ ਪਾਉਣ ਆਇਆ ਸੀ, ਤਾਂ ਭੀੜ ਸ਼ੁਰੂ ਤੋਂ ਹੀ ਇੱਕੋ ਜਿਹੀ ਸੀ। ਨਤੀਜਾ ਲੋਕਾਂ ਦੀ ਪਸੰਦ 'ਤੇ ਨਿਰਭਰ ਕਰੇਗਾ। ਜ਼ਿਕਰਯੋਗ ਹੈ ਕਿ ਆਨੰਦਨਗਰ ਆਦਰਸ਼ ਹਾਈ ਸਕੂਲ ਪੋਲਿੰਗ ਸਟੇਸ਼ਨ ਦੇ ਅਧੀਨ ਕੁੱਲ 19,290 ਵੋਟਰ ਰਜਿਸਟਰਡ ਹਨ। ਇਨ੍ਹਾਂ ਵਿੱਚ 9,791 ਪੁਰਸ਼ ਅਤੇ 9,499 ਔਰਤਾਂ ਸ਼ਾਮਲ ਹਨ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
