ਮਨੀਲਾ (ਫਿਲੀਪੀਨਜ਼), 1 ਅਕਤੂਬਰ (ਹਿੰ.ਸ.)। ਫਿਲੀਪੀਨਜ਼ ਵਿੱਚ ਮੰਗਲਵਾਰ ਰਾਤ ਨੂੰ 6.9 ਤੀਬਰਤਾ ਦਾ ਸ਼ਕਤੀਸ਼ਾਲੀ ਭੂਚਾਲ ਆਇਆ, ਜਿਸ ਨਾਲ ਭਾਰੀ ਤਬਾਹੀ ਹੋਈ ਹੈ। ਹੁਣ ਤੱਕ 27 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਹੈ। ਵੱਡੀ ਗਿਣਤੀ ਵਿੱਚ ਲੋਕ ਜ਼ਖਮੀ ਹੋਏ ਹਨ, ਅਤੇ ਮਰਨ ਵਾਲਿਆਂ ਦੀ ਗਿਣਤੀ ਵਧਣ ਦਾ ਅਨੁਮਾਨ ਹੈ। ਭੂਚਾਲ ਵਿੱਚ ਇਤਿਹਾਸਕ ਗਿਰਜਾਘਰਾਂ ਅਤੇ ਹੋਰ ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਖੇਤਰ ਦੇ ਬੁਨਿਆਦੀ ਢਾਂਚੇ ਨੂੰ ਕਾਫ਼ੀ ਨੁਕਸਾਨ ਪਹੁੰਚਿਆ ਹੈ। ਪ੍ਰਭਾਵਿਤ ਖੇਤਰਾਂ ਵਿੱਚ ਰਾਹਤ ਅਤੇ ਬਚਾਅ ਕਾਰਜ ਜਾਰੀ ਹਨ।

ਭੂਚਾਲ ਦਾ ਕੇਂਦਰ ਸੇਬੂ ਪ੍ਰਾਂਤ ਦੇ ਬੋਗੋ ਸਿਟੀ ਤੋਂ 17 ਕਿਲੋਮੀਟਰ ਉੱਤਰ-ਪੂਰਬ ਵਿੱਚ ਸੀ। ਸ਼ਕਤੀਸ਼ਾਲੀ ਭੂਚਾਲ ਨੇ ਪੂਰੇ ਖੇਤਰ ਵਿੱਚ ਦਹਿਸ਼ਤ ਫੈਲਾ ਦਿੱਤੀ, ਜਿਸ ਕਾਰਨ ਲੋਕ ਘਬਰਾਹਟ ਵਿੱਚ ਆਪਣੇ ਘਰਾਂ ਨੂੰ ਛੱਡ ਬਾਹਰ ਭੱਜ ਆਏ। ਮਰਨ ਵਾਲਿਆਂ ਦੀ ਗਿਣਤੀ 27 ਹੋ ਗਈ ਹੈ, ਜਦੋਂ ਕਿ ਵੱਡੀ ਗਿਣਤੀ ’ਚ ਲੋਕ ਜ਼ਖਮੀ ਹੋਏ ਹਨ। ਮਰਨ ਵਾਲਿਆਂ ਦੀ ਗਿਣਤੀ ਵਧਣ ਦਾ ਅਨੁਮਾਨ ਹੈ ਕਿਉਂਕਿ ਕਾਫ਼ੀ ਗਿਣਤੀ ’ਚ ਲੋਕ ਗੰਭੀਰ ਜ਼ਖਮੀ ਹਨ।

ਪ੍ਰਾਂਤਿਕ ਆਫ਼ਤ ਜੋਖਮ ਘਟਾਉਣ ਅਤੇ ਪ੍ਰਬੰਧਨ ਦਫਤਰ ਨੇ ਬੁੱਧਵਾਰ ਸਵੇਰੇ ਦੱਸਿਆ ਕਿ ਭੂਚਾਲ ਦਾ ਕੇਂਦਰ ਬੋਗੋ ਸਿਟੀ ਵਿੱਚ ਸਥਿਤ ਸੀ, ਜਿੱਥੇ ਘੱਟੋ-ਘੱਟ 27 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋਈ ਹੈ।ਦ ਮਨੀਲਾ ਟਾਈਮਜ਼ ਨੇ ਸੇਬੂ ਪ੍ਰੋਵਿੰਸ਼ੀਅਲ ਇਨਫਰਮੇਸ਼ਨ ਆਫਿਸ (ਪੀਆਈਓ) ਦਾ ਹਵਾਲਾ ਦਿੰਦੇ ਹੋਏ ਦੱਸਿਆ ਕਿ 6.9 ਤੀਬਰਤਾ ਵਾਲਾ ਭੂਚਾਲ ਲਗਭਗ 90,000 ਦੀ ਆਬਾਦੀ ਵਾਲੇ ਤੱਟਵਰਤੀ ਸ਼ਹਿਰ ਬੋਗੋ ਤੋਂ ਲਗਭਗ 17 ਕਿਲੋਮੀਟਰ (10 ਮੀਲ) ਉੱਤਰ-ਪੂਰਬ ਵਿੱਚ ਕੇਂਦਰਿਤ ਸੀ। ਤੇਜ਼ ਭੂਚਾਲ ਨੇ ਬੋਗੋ ਸਿਟੀ ਵਿੱਚ 13 ਲੋਕਾਂ ਦੀ ਜਾਨ ਲੈ ਲਈ, ਜਿਨ੍ਹਾਂ ਵਿੱਚ ਨੌਂ ਬਾਲਗ ਅਤੇ ਚਾਰ ਬੱਚੇ ਸ਼ਾਮਲ ਸਨ, ਜਦੋਂ ਕਿ ਗੁਆਂਢੀ ਸੈਨ ਰੇਮਿਗਿਓ ਵਿੱਚ ਚਾਰ ਲੋਕਾਂ ਦੀ ਮੌਤ ਹੋ ਗਈ।

ਤੇਜ਼ ਭੂਚਾਲ ਨੇ ਇਮਾਰਤਾਂ ਨੂੰ ਭਾਰੀ ਨੁਕਸਾਨ ਪਹੁੰਚਾਇਆ। ਇਤਿਹਾਸਕ ਚਰਚ ਸਮੇਤ ਕਈ ਹੋਰ ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਸ਼ਹਿਰ ਵਿੱਚ ਬਿਜਲੀ ਗੁੱਲ ਹੋ ਗਈ ਅਤੇ ਪੱਕੀਆਂ ਸੜਕਾਂ 'ਤੇ ਡੂੰਘੀਆਂ ਤਰੇੜਾਂ ਪਈਆਂ ਦਿਖਾਈ ਦਿੱਤੀਆਂ ਹਨ। ਮੰਗਲਵਾਰ ਰਾਤ ਨੂੰ ਆਏ ਸ਼ਕਤੀਸ਼ਾਲੀ ਭੂਚਾਲ ਕਾਰਨ 27 ਪਾਵਰ ਪਲਾਂਟ ਠੱਪ ਹੋ ਗਏ ਅਤੇ ਬਿਜਲੀ ਸਪਲਾਈ ਘਟ ਗਈ, ਜਿਸ ਤੋਂ ਬਾਅਦ ਫਿਲੀਪੀਨਜ਼ ਦੇ ਨੈਸ਼ਨਲ ਗਰਿੱਡ ਕਾਰਪੋਰੇਸ਼ਨ (ਐਨਜੀਸੀਪੀ) ਨੇ ਬੁੱਧਵਾਰ ਨੂੰ ਯੈਲੋ ਅਲਰਟ ਜਾਰੀ ਕੀਤਾ। ਇਹ ਯੈਲੋ ਅਲਰਟ ਦੁਪਹਿਰ 1 ਵਜੇ ਤੋਂ ਰਾਤ 12 ਵਜੇ ਤੱਕ ਲਾਗੂ ਰਹੇਗਾ। ਊਰਜਾ ਕੰਪਨੀਆਂ ਪ੍ਰਭਾਵਿਤ ਪਾਵਰ ਪਲਾਂਟਾਂ ਦੀ ਸਮਰੱਥਾ ਬਹਾਲ ਕਰ ਰਹੀਆਂ ਹਨ।

ਫਿਲੀਪੀਨਜ਼ ਪ੍ਰਸ਼ਾਂਤ ਮਹਾਸਾਗਰ ਦੇ ਰਿੰਗ ਆਫ਼ ਫਾਇਰ ਭਾਵ ਭੂਚਾਲ ਸੰਬੰਧੀ ਫਾਲਟ ਲਾਈਨਾਂ ਦੇ ਚੱਕਰ ਵਿੱਚ ਆਉਂਦਾ ਹੈ। ਇੱਥੇ ਹਰ ਸਾਲ ਤੂਫਾਨ ਅਤੇ ਚੱਕਰਵਾਤ ਆਉਂਦੇ ਹਨ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ