ਕੋਰਬਾ/ਜਾਂਜਗੀਰ-ਚਾਂਪਾ, 26 ਨਵੰਬਰ (ਹਿੰ.ਸ.)। ਛੱਤੀਸਗੜ੍ਹ ਦੇ ਜਾਂਜਗੀਰ-ਚਾਂਪਾ ਜ਼ਿਲ੍ਹੇ ਦੇ ਸੁਕਲੀ ਪਿੰਡ ਵਿੱਚ ਟਰੱਕ ਅਤੇ ਸਕਾਰਪੀਓ ਦੀ ਆਹਮੋ-ਸਾਹਮਣੀ ਟੱਕਰ ਵਿੱਚ ਪੰਜ ਲੋਕਾਂ ਦੀ ਮੌਤ ਹੋ ਗਈ। ਹਾਦਸੇ ਵਿੱਚ ਤਿੰਨ ਲੋਕ ਜ਼ਖਮੀ ਹੋ ਗਏ ਜਿਨ੍ਹਾਂ ਨੂੰ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ। ਡਾਕਟਰਾਂ ਨੇ ਜ਼ਖਮੀਆਂ ਨੂੰ ਗੰਭੀਰ ਦੱਸਿਆ ਹੈ।

ਜਾਂਜਗੀਰ ਪੁਲਿਸ ਨੇ ਦੱਸਿਆ ਕਿ ਇਹ ਹਾਦਸਾ ਬੀਤੀ ਰਾਤ ਰਾਸ਼ਟਰੀ ਰਾਜਮਾਰਗ 49 'ਤੇ ਸੁਕਲੀ ਪਿੰਡ ਵਿੱਚ ਵਾਪਰਿਆ। ਸਕਾਰਪੀਓ ਵਿੱਚ ਸਵਾਰ ਲੋਕ ਬਰਾਤ ਤੋਂ ਵਾਪਸ ਆ ਰਹੇ ਸਨ ਜਦੋਂ ਸਕਾਰਪੀਓ ਅਤੇ ਟਰੱਕ ਦੀ ਟੱਕਰ ਹੋ ਗਈ। ਟੱਕਰ ਇੰਨੀ ਭਿਆਨਕ ਸੀ ਕਿ ਸਕਾਰਪੀਓ ਬੁਰੀ ਤਰ੍ਹਾਂ ਨਾਲ ਨੁਕਸਾਨੀ ਗਈ।

ਪੁਲਿਸ ਦੇ ਅਨੁਸਾਰ, ਮ੍ਰਿਤਕਾਂ ਦੀ ਪਛਾਣ ਨਵਾਂਗੜ੍ਹ ਖੇਤਰ ਦੇ ਸੜਕ ਪਾਰਾ ਅਤੇ ਸ਼ਾਂਤੀ ਨਗਰ ਦੇ ਵਸਨੀਕ ਵਿਸ਼ਵਨਾਥ ਦੇਵਾਗਨ (43), ਰਾਜੇਂਦਰ ਕਸ਼ਯਪ (27), ਪੋਮੇਸ਼ਵਰ ਜਲਤਾਰੇ (33), ਭੂਪੇਂਦਰ ਸਾਹੂ (40) ਅਤੇ ਕਮਲਨਯਨ ਸਾਹੂ (22) ਵਜੋਂ ਹੋਈ ਹੈ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ