ਮੁੰਬਈ, 19 ਜਨਵਰੀ (ਹਿੰ.ਸ.)। ਸਲਮਾਨ ਖਾਨ ਅਤੇ ਰਸ਼ਮੀਕਾ ਮੰਦਾਨਾ ਦੀ ਫਿਲਮ ਸਿਕੰਦਰ ਰਿਲੀਜ਼ ਹੋਣ 'ਤੇ ਦਰਸ਼ਕਾਂ ਦੀਆਂ ਉਮੀਦਾਂ 'ਤੇ ਖਰੀ ਨਹੀਂ ਉਤਰੀ ਅਤੇ ਕਾਫ਼ੀ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ। 2025 ਦੀ ਈਦ 'ਤੇ ਪ੍ਰੀਮੀਅਰ ਹੋਈ ਇਸ ਫਿਲਮ ਤੋਂ ਬਹੁਤ ਉਮੀਦਾਂ ਲਗਾਈਆਂ ਗਈਆਂ ਸਨ, ਪਰ ਇਸਦੀ ਕਮਜ਼ੋਰ ਕਹਾਣੀ ਅਤੇ ਪੇਸ਼ਕਾਰੀ ਨੇ ਦਰਸ਼ਕਾਂ ਨੂੰ ਨਿਰਾਸ਼ ਕੀਤਾ। ਹੁਣ, ਰਸ਼ਮੀਕਾ ਮੰਦਾਨਾ ਨੇ ਫਿਲਮ ਬਾਰੇ ਖੁੱਲ੍ਹ ਕੇ ਗੱਲ ਕੀਤੀ ਹੈ ਅਤੇ ਆਪਣੇ ਫੈਸਲੇ ਨੂੰ ਸਪੱਸ਼ਟ ਕੀਤਾ ਹੈ।

ਇੱਕ ਇੰਟਰਵਿਊ ਵਿੱਚ, ਰਸ਼ਮੀਕਾ ਨੇ ਖੁਲਾਸਾ ਕੀਤਾ ਕਿ ਜਦੋਂ ਉਨ੍ਹਾਂ ਨੂੰ ਸਿਕੰਦਰ ਦੀ ਕਹਾਣੀ ਸੁਣਾਈ ਗਈ ਸੀ, ਤਾਂ ਉਸਦਾ ਰੂਪ ਕੁੱਝ ਵੱਖ ਸੀ। ਉਨ੍ਹਾਂ ਨੇ ਕਿਹਾ ਕਿ ਮੁਰੂਗਾਡੋਸ ਸਰ ਨਾਲ ਸ਼ੁਰੂਆਤੀ ਗੱਲਬਾਤ ਅਤੇ ਸਕ੍ਰਿਪਟ ਦਾ ਬਿਰਤਾਂਤ ਕਾਫ਼ੀ ਵੱਖਰਾ ਸੀ, ਪਰ ਫਿਲਮਾਂਕਣ ਦੌਰਾਨ ਕਹਾਣੀ ਵਿੱਚ ਕਈ ਬਦਲਾਅ ਆਏ। ਰਸ਼ਮੀਕਾ ਦੇ ਅਨੁਸਾਰ, ਇਹ ਫਿਲਮਾਂ ਵਿੱਚ ਆਮ ਹੈ, ਕਿਉਂਕਿ ਕਹਾਣੀ ਅਕਸਰ ਨਿਰਮਾਣ, ਸੰਪਾਦਨ ਅਤੇ ਰਿਲੀਜ਼ ਦੌਰਾਨ ਕਈ ਵਾਰ ਬਦਲ ਜਾਂਦੀ ਹੈ।ਰਸ਼ਮੀਕਾ ਦਾ ਇਹ ਬਿਆਨ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ, ਜਿੱਥੇ ਯੂਜ਼ਰਸ ਨੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਹੈ। ਕੁਝ ਲੋਕਾਂ ਨੇ ਫਿਲਮ ਵਿੱਚ ਸਲਮਾਨ ਅਤੇ ਰਸ਼ਮੀਕਾ ਦੀ ਕੈਮਿਸਟਰੀ 'ਤੇ ਸਵਾਲ ਉਠਾਏ, ਜਦੋਂ ਕਿ ਕੁਝ ਨੇ ਸਲਮਾਨ ਖਾਨ ਦੇ ਪ੍ਰਦਰਸ਼ਨ ਨੂੰ ਕਮਜ਼ੋਰ ਦੱਸਿਆ। ਰਿਪੋਰਟਾਂ ਦੇ ਅਨੁਸਾਰ, ਏਆਰ ਮੁਰੂਗਾਡੋਸ ਦੁਆਰਾ ਨਿਰਦੇਸ਼ਤ ਸਿਕੰਦਰ ਲਗਭਗ 200 ਕਰੋੜ ਰੁਪਏ ਦੇ ਬਜਟ 'ਤੇ ਬਣੀ ਸੀ, ਪਰ ਫਿਲਮ ਨੇ ਦੁਨੀਆ ਭਰ ਵਿੱਚ ਸਿਰਫ 185 ਕਰੋੜ ਰੁਪਏ ਦੀ ਹੀ ਕਮਾਈ ਕੀਤੀ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ