ਚੰਡੀਗੜ੍ਹ, 09 ਮਈ (ਹਿੰ.ਸ.)| ਸ਼ਹੀਦ ਭਗਤ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਨੋਏਡਾ ਲਈ 1 ਜੁਲਾਈ ਤੋਂ ਸਿੱਧੀ ਉਡਾਣ ਸੇਵਾ ਸ਼ੁਰੂ ਹੋਣ ਜਾ ਰਹੀ ਹੈ। ਇਸ ਨਾਲ ਚੰਡੀਗੜ੍ਹ, ਮੋਹਾਲੀ ਅਤੇ ਪੰਚਕੂਲਾ ਸਮੇਤ ਟ੍ਰਾਈਸਿਟੀ ਖੇਤਰ ਦੀ ਦਿੱਲੀ-ਐਨਸੀਆਰ ਅਤੇ ਪੱਛਮੀ ਉੱਤਰ ਪ੍ਰਦੇਸ਼ ਨਾਲ ਹਵਾਈ ਕਨੈਕਟਿਵਿਟੀ ਹੋਰ ਮਜ਼ਬੂਤ ਹੋਵੇਗੀ।

ਏਅਰਲਾਈਨ ਕੰਪਨੀ ਇੰਡੀਗੋ ਅਨੁਸਾਰ ਨੋਏਡਾ ਇੰਟਰਨੈਸ਼ਨਲ ਏਅਰਪੋਰਟ (ਜੇਵਰ ਏਅਰਪੋਰਟ) ਤੋਂ ਉਡਾਣਾਂ ਦੀ ਸ਼ੁਰੂਆਤ ਹੋ ਰਹੀ ਹੈ ਅਤੇ ਇਸੇ ਤਹਿਤ ਚੰਡੀਗੜ੍ਹ ਨੂੰ ਵੀ ਨੋਏਡਾ ਨਾਲ ਸਿੱਧਾ ਜੋੜਿਆ ਜਾ ਰਿਹਾ ਹੈ।

ਚੰਡੀਗੜ੍ਹ ਅਤੇ ਨੋਏਡਾ ਵਿਚਕਾਰ ਹਰ ਰੋਜ਼ ਦੋ ਸਿੱਧੀਆਂ ਉਡਾਣਾਂ ਚੱਲਣਗੀਆਂ। ਇਸ ਨਾਲ ਉਹ ਯਾਤਰੀਆਂ ਨੂੰ ਵੱਡੀ ਸਹੂਲਤ ਮਿਲੇਗੀ, ਜਿਨ੍ਹਾਂ ਨੂੰ ਹੁਣ ਤੱਕ ਦਿੱਲੀ ਹਵਾਈ ਅੱਡੇ ਉਤਰ ਕੇ ਬੱਸ, ਕੈਬ ਜਾਂ ਨਿੱਜੀ ਵਾਹਨ ਰਾਹੀਂ ਨੋਏਡਾ ਜਾਣਾ ਪੈਂਦਾ ਸੀ। ਨਵੀਂ ਸੇਵਾ ਨਾਲ ਸਮਾਂ ਬਚੇਗਾ ਅਤੇ ਵਪਾਰ ਤੇ ਰੋਜ਼ਗਾਰ ਗਤੀਵਿਧੀਆਂ ਨੂੰ ਵੀ ਉਤਸ਼ਾਹ ਮਿਲੇਗਾ।

ਉਡਾਣਾਂ ਦਾ ਸਮਾਂ ਵੀ ਜਾਰੀ ਕਰ ਦਿੱਤਾ ਗਿਆ ਹੈ। ਸਵੇਰੇ 6:15 ਵਜੇ ਨੋਏਡਾ ਤੋਂ ਉਡਾਣ ਭਰ ਕੇ 7:20 ਵਜੇ ਚੰਡੀਗੜ੍ਹ ਪਹੁੰਚੇਗੀ ਅਤੇ ਵਾਪਸੀ ਵਿੱਚ 7:40 ਵਜੇ ਚੰਡੀਗੜ੍ਹ ਤੋਂ ਚਲ ਕੇ 8:45 ਵਜੇ ਨੋਏਡਾ ਪਹੁੰਚੇਗੀ। ਦੂਜੀ ਉਡਾਣ ਸ਼ਾਮ 6:30 ਵਜੇ ਨੋਏਡਾ ਤੋਂ ਚੱਲ ਕੇ 7:35 ਵਜੇ ਚੰਡੀਗੜ੍ਹ ਆਵੇਗੀ, ਜਦਕਿ ਵਾਪਸੀ ਵਿੱਚ 7:55 ਵਜੇ ਚੰਡੀਗੜ੍ਹ ਤੋਂ ਰਵਾਨਾ ਹੋ ਕੇ ਰਾਤ 9 ਵਜੇ ਨੋਏਡਾ ਪਹੁੰਚੇਗੀ।

ਨਵੀਂ ਉਡਾਣਾਂ ਨਾਲ ਚੰਡੀਗੜ੍ਹ ਦੇ ਯਾਤਰੀਆਂ ਲਈ ਦਿੱਲੀ ਹਵਾਈ ਅੱਡੇ ਦਾ ਇੱਕ ਵਧੀਆ ਵਿਕਲਪ ਤਿਆਰ ਹੋਵੇਗਾ। ਖਾਸ ਕਰਕੇ ਨੋਏਡਾ, ਗ੍ਰੇਟਰ ਨੋਏਡਾ, ਗਾਜੀਆਬਾਦ ਅਤੇ ਪੱਛਮੀ ਉੱਤਰ ਪ੍ਰਦੇਸ਼ ਜਾਣ ਵਾਲਿਆਂ ਨੂੰ ਇਸ ਦਾ ਸਿੱਧਾ ਲਾਭ ਮਿਲੇਗਾ। ਇਸ ਨਾਲ ਸੜਕ ਰਾਹੀਂ ਯਾਤਰਾ ਘਟੇਗੀ ਅਤੇ ਟ੍ਰੈਫਿਕ ਤੋਂ ਵੀ ਰਾਹਤ ਮਿਲਣ ਦੀ ਉਮੀਦ ਹੈ।

ਨੋਏਡਾ ਇੰਟਰਨੈਸ਼ਨਲ ਏਅਰਪੋਰਟ ਨੂੰ ਦਿੱਲੀ-ਐਨਸੀਆਰ ਦੇ ਦੂਜੇ ਵੱਡੇ ਏਵੀਏਸ਼ਨ ਹੱਬ ਵਜੋਂ ਵਿਕਸਿਤ ਕੀਤਾ ਜਾ ਰਿਹਾ ਹੈ। ਇਸ ਵੇਲੇ ਇੰਡੀਗੋ ਚੰਡੀਗੜ੍ਹ ਤੋਂ ਅੰਮ੍ਰਿਤਸਰ, ਧਰਮਸ਼ਾਲਾ, ਜੈਪੁਰ, ਲਖਨਊ, ਦਿੱਲੀ, ਗੋਆ, ਮੁੰਬਈ, ਪਟਨਾ, ਸ੍ਰੀਨਗਰ, ਅਹਿਮਦਾਬਾਦ ਅਤੇ ਬੈਂਗਲੁਰੂ ਸਮੇਤ 16 ਸ਼ਹਿਰਾਂ ਲਈ ਉਡਾਣ ਸੇਵਾਵਾਂ ਚਲਾ ਰਹੀ ਹੈ। ਕੰਪਨੀ ਅਨੁਸਾਰ ਨਵੀਆਂ ਉਡਾਣਾਂ ਦੀ ਟਿਕਟ ਬੁਕਿੰਗ ਵੀ ਜਲਦ ਸ਼ੁਰੂ ਕੀਤੀ ਜਾਵੇਗੀ।

ਹਿੰਦੂਸਥਾਨ ਸਮਾਚਾਰ / GURSHARAN SINGH