ਕਾਠਮੰਡੂ, 11 ਜੁਲਾਈ (ਹਿੰ.ਸ.)। ਨੇਪਾਲੀ ਕ੍ਰਿਕਟ ਨੂੰ ਉਤਸ਼ਾਹਿਤ ਕਰਨ ਲਈ, ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ.ਸੀ.ਸੀ.ਆਈ.) ਨੇ ਆਪਣੀ ਏ ਟੀਮ ਨੂੰ ਨੇਪਾਲ ਭੇਜਣ ਅਤੇ ਨੇਪਾਲੀ ਰਾਸ਼ਟਰੀ ਟੀਮ ਨਾਲ ਮੈਚ ਖੇਡਣ ਦੀ ਇਜਾਜ਼ਤ ਦੇ ਦਿੱਤੀ ਹੈ।
ਹਾਲ ਹੀ ਵਿੱਚ, ਨੇਪਾਲ ਦੇ ਵਿਦੇਸ਼ ਮੰਤਰੀ ਸ਼ਿਸ਼ਿਰ ਖਨਾਲ ਦੇ ਭਾਰਤ ਦੇ ਅਧਿਕਾਰਤ ਦੌਰੇ ਦੌਰਾਨ, ਭਾਰਤ ਨੇ ਨੇਪਾਲੀ ਕ੍ਰਿਕਟ ਦੇ ਪ੍ਰੋਤਸਾਹਨ ਲਈ ਹਰ ਸੰਭਵ ਮਦਦ ਦੀ ਗੱਲ ਆਖੀ ਸੀ। ਇਸ ਚਰਚਾ ਤੋਂ ਬਾਅਦ, ਨੇਪਾਲ ਅਤੇ ਭਾਰਤ 'ਏ' ਟੀਮ ਵਿਚਕਾਰ ਕ੍ਰਿਕਟ ਮੈਚ ਤਹਿ ਕੀਤਾ ਗਿਆ ਹੈ।
ਨੇਪਾਲ ਕ੍ਰਿਕਟ ਐਸੋਸੀਏਸ਼ਨ ਵੱਲੋਂ ਆਯੋਜਿਤ, ਨੇਪਾਲ ਅਤੇ ਭਾਰਤ 'ਏ' ਵਿਚਕਾਰ ਕੀਰਤੀਪੁਰ ਦੇ ਟੀਯੂ ਅੰਤਰਰਾਸ਼ਟਰੀ ਕ੍ਰਿਕਟ ਮੈਦਾਨ 'ਤੇ ਤਿੰਨ ਮੈਚਾਂ ਦੀ ਟੀ-20 ਲੜੀ ਖੇਡੀ ਜਾਵੇਗੀ। ਨੇਪਾਲ ਨੇ ਅਧਿਕਾਰਤ ਤੌਰ 'ਤੇ ਇਸ ਇਤਿਹਾਸਕ ਲੜੀ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਅਨੁਸਾਰ, ਇਹ ਲੜੀ ਦਸੰਬਰ 2026 ਵਿੱਚ ਹੋਵੇਗੀ। ਸ਼ਡਿਊਲ ਅਨੁਸਾਰ, ਪਹਿਲਾ ਮੈਚ 9 ਦਸੰਬਰ ਨੂੰ, ਦੂਜਾ 11 ਦਸੰਬਰ ਨੂੰ ਅਤੇ ਤੀਜਾ ਅਤੇ ਆਖਰੀ ਮੈਚ 13 ਦਸੰਬਰ, 2026 ਨੂੰ ਖੇਡਿਆ ਜਾਵੇਗਾ।
ਇਸ ਲੜੀ ਦੀ ਮੇਜ਼ਬਾਨੀ ਦਾ ਫੈਸਲਾ ਸਕਾਟਲੈਂਡ ਵਿੱਚ ਆਯੋਜਿਤ ਅੰਤਰਰਾਸ਼ਟਰੀ ਕ੍ਰਿਕਟ ਪ੍ਰੀਸ਼ਦ (ਆਈਸੀਸੀ) ਕਾਨਫਰੰਸ ਦੌਰਾਨ ਲਿਆ ਗਿਆ। ਇਸ ਮੌਕੇ 'ਤੇ ਨੇਪਾਲ ਕ੍ਰਿਕਟ ਐਸੋਸੀਏਸ਼ਨ ਦੇ ਪ੍ਰਧਾਨ ਚਤੁਰ ਬਹਾਦਰ ਚੰਦ, ਸਕੱਤਰ ਪਾਰਸ ਖੜਕਾ ਅਤੇ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀਸੀਸੀਆਈ) ਦੇ ਸਕੱਤਰ ਦੇਵਜੀਤ ਸੈਕੀਆ ਵਿਚਕਾਰ ਵਿਸ਼ੇਸ਼ ਮੀਟਿੰਗ ਹੋਈ। ਇਸ ਮੀਟਿੰਗ ਵਿੱਚ ਹੀ ਨੇਪਾਲ ਅਤੇ ਭਾਰਤ 'ਏ' ਵਿਚਕਾਰ ਟੀ-20 ਲੜੀ ਦੀ ਮੇਜ਼ਬਾਨੀ 'ਤੇ ਅੰਤਿਮ ਸਹਿਮਤੀ ਬਣੀ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
