ਜਲੰਧਰ, 16 ਅਗਸਤ (ਹਿੰ.ਸ.)| ਜਲੰਧਰ ਸਿਟੀ ਰੇਲਵੇ ਸਟੇਸ਼ਨ ਨੂੰ ਵਰਲਡ ਕਲਾਸ ਸਹੂਲਤਾਂ ਨਾਲ ਲੈਸ ਕਰਨ ਲਈ ਰੀ-ਡਿਵੈਲਪਮੈਂਟ ਦਾ ਕੰਮ ਸ਼ੁਰੂ ਹੋ ਗਿਆ ਹੈ। ਨਿਰਮਾਣ ਕੰਪਨੀ ਵੱਲੋਂ ਰੇਲਵੇ ਦੇ ਪੁਰਾਣੇ ਕੁਆਰਟਰਾਂ ਵਿੱਚ ਸਾਈਟ ਦਫ਼ਤਰ ਤਿਆਰ ਕਰ ਲਿਆ ਗਿਆ ਹੈ, ਜਿੱਥੇ ਡ੍ਰਿਲਿੰਗ ਸਮੇਤ ਹੋਰ ਨਿਰਮਾਣ ਕਾਰਜ ਚੱਲ ਰਹੇ ਹਨ। ਜਲੰਧਰ ਕੈਂਟ ਸਟੇਸ਼ਨ ਦੇ ਕਾਇਆਕਲਪ ਤੋਂ ਬਾਅਦ ਹੁਣ ਸਿਟੀ ਸਟੇਸ਼ਨ ਨੂੰ ਵੀ ਆਧੁਨਿਕ ਰੂਪ ਦੇਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਇਸ ਪ੍ਰਾਜੈਕਟ ਲਈ 93 ਕਰੋੜ ਰੁਪਏ ਦਾ ਬਜਟ ਮਨਜ਼ੂਰ ਕੀਤਾ ਗਿਆ ਹੈ।

ਰੇਲਵੇ ਸੂਤਰਾਂ ਮੁਤਾਬਕ ਪੂਰੇ ਰੀ-ਡਿਵੈਲਪਮੈਂਟ ਪ੍ਰਾਜੈਕਟ ਨੂੰ ਦੋ ਸਾਲ ਦੀ ਨਿਰਧਾਰਤ ਸਮਾਂ-ਸੀਮਾ ਵਿੱਚ ਪੂਰਾ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ। ਕਾਇਆਕਲਪ ਤੋਂ ਬਾਅਦ ਸਟੇਸ਼ਨ ’ਤੇ ਆਧੁਨਿਕ ਇਮਾਰਤ ਦੇ ਨਾਲ ਯਾਤਰੀਆਂ ਲਈ ਵਿਸ਼ਾਲ ਏਅਰ ਕਨਕੋਰਸ, ਰਿਟੇਲ ਅਤੇ ਫੂਡ ਪਲਾਜ਼ਾ, ਵਾਈ-ਫਾਈ, ਆਧੁਨਿਕ ਟਾਇਲਟ ਅਤੇ ਵ੍ਹੀਲਚੇਅਰ-ਫ੍ਰੈਂਡਲੀ ਰੈਂਪ ਵਰਗੀਆਂ ਸਹੂਲਤਾਂ ਉਪਲਬਧ ਹੋਣਗੀਆਂ।

ਰੇਲਵੇ ਅਧਿਕਾਰੀਆਂ ਅਨੁਸਾਰ ਮਾਸਟਰ ਪਲਾਨ ਤਹਿਤ ਪਹਿਲੇ ਪੜਾਅ ਵਿੱਚ ਕਾਜ਼ੀ ਮੰਡੀ ਅਤੇ ਸੂਰਿਆ ਐਨਕਲੇਵ ਵੱਲ ਬਣੇ ਸੈਕੰਡ ਐਂਟਰੀ ਗੇਟ ਅਤੇ ਫਰੰਟ ਦੀਆਂ ਪੁਰਾਣੀਆਂ ਇਮਾਰਤਾਂ ਨੂੰ ਹਟਾਉਣ ਦਾ ਕੰਮ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਜੀਆਰਪੀ ਥਾਣੇ ਨੇੜੇ ਭਾਰੀ ਮਸ਼ੀਨਰੀ ਅਤੇ ਸਟਰਕਚਰ ਤਿਆਰ ਕਰਨ ਵਾਲੀਆਂ ਮਾਹਿਰ ਟੀਮਾਂ ਪਹੁੰਚ ਚੁੱਕੀਆਂ ਹਨ। ਇਸ ਇਲਾਕੇ ਵਿੱਚ ਨਵੇਂ ਬੁਨਿਆਦੀ ਢਾਂਚੇ ਦੀ ਉਸਾਰੀ ਲਈ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਹਨ।

ਯਾਤਰੀਆਂ ਦੀ ਆਵਾਜਾਈ ਪ੍ਰਭਾਵਿਤ ਨਾ ਹੋਵੇ, ਇਸ ਲਈ ਫਿਲਹਾਲ ਸਟੇਸ਼ਨ ਦੇ ਮੁੱਖ ਪ੍ਰਵੇਸ਼ ਦੁਆਰ ਨੂੰ ਨਹੀਂ ਤੋੜਿਆ ਜਾਵੇਗਾ। ਪਹਿਲਾਂ ਸੈਕੰਡ ਐਂਟਰੀ ਵਾਲੇ ਪਾਸੇ ਨਵੀਂ ਇਮਾਰਤ, ਰਸਤੇ ਅਤੇ ਹੋਰ ਸਹੂਲਤਾਂ ਤਿਆਰ ਕੀਤੀਆਂ ਜਾਣਗੀਆਂ। ਇਹ ਹਿੱਸਾ ਤਿਆਰ ਹੋ ਕੇ ਚਾਲੂ ਹੋਣ ਤੋਂ ਬਾਅਦ ਮੁੱਖ ਪ੍ਰਵੇਸ਼ ਦੁਆਰ ਦੇ ਰੀਨੋਵੇਸ਼ਨ ਦਾ ਕੰਮ ਸ਼ੁਰੂ ਕੀਤਾ ਜਾਵੇਗਾ। ਇਸ ਤਰੀਕੇ ਨਾਲ ਨਿਰਮਾਣ ਕਾਰਜ ਦੌਰਾਨ ਟਰੇਨਾਂ ਅਤੇ ਯਾਤਰੀਆਂ ਦੀ ਆਵਾਜਾਈ ਨੂੰ ਘੱਟ ਤੋਂ ਘੱਟ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ।

ਅੰਮ੍ਰਿਤ ਭਾਰਤ ਸਟੇਸ਼ਨ ਯੋਜਨਾ ਤਹਿਤ ਵਿਕਸਤ ਕੀਤੇ ਜਾ ਰਹੇ ਜਲੰਧਰ ਸਿਟੀ ਰੇਲਵੇ ਸਟੇਸ਼ਨ ’ਤੇ ਯਾਤਰੀਆਂ ਨੂੰ ਕਈ ਆਧੁਨਿਕ ਅਤੇ ਹਾਈਟੈਕ ਸਹੂਲਤਾਂ ਮਿਲਣਗੀਆਂ। ਇੱਥੇ ਏਸੀ ਲਾਊਂਜ ਅਤੇ ਆਧੁਨਿਕ ਵੇਟਿੰਗ ਹਾਲ ਵੀ ਤਿਆਰ ਕੀਤੇ ਜਾਣਗੇ। ਬਜ਼ੁਰਗਾਂ, ਦਿਵਿਆਂਗ ਯਾਤਰੀਆਂ ਅਤੇ ਭਾਰੀ ਸਮਾਨ ਨਾਲ ਸਫ਼ਰ ਕਰਨ ਵਾਲੇ ਲੋਕਾਂ ਲਈ ਐਸਕੇਲੇਟਰ ਅਤੇ ਲਿਫਟ ਦੀ ਸਹੂਲਤ ਵੀ ਉਪਲਬਧ ਹੋਵੇਗੀ। ਟਿਕਟਾਂ ਲਈ ਲੰਬੀਆਂ ਕਤਾਰਾਂ ਤੋਂ ਰਾਹਤ ਦੇਣ ਵਾਸਤੇ ਵੱਖਰੇ ਅਤੇ ਆਧੁਨਿਕ ਟਿਕਟ ਕਾਊਂਟਰ ਬਣਾਏ ਜਾਣਗੇ।

ਰੀ-ਡਿਵੈਲਪਮੈਂਟ ਤਹਿਤ ਸਟੇਸ਼ਨ ਦਾ ਡਿਜ਼ਾਈਨ ਈਕੋ-ਫ੍ਰੈਂਡਲੀ ਰੱਖਣ ਦੀ ਯੋਜਨਾ ਹੈ। ਇਸ ਵਿੱਚ ਕੁਦਰਤੀ ਰੌਸ਼ਨੀ ਅਤੇ ਬਿਹਤਰ ਵੈਂਟੀਲੇਸ਼ਨ ਦਾ ਖਾਸ ਧਿਆਨ ਰੱਖਿਆ ਜਾਵੇਗਾ। ਨਵੇਂ ਸਟੇਸ਼ਨ ਨੂੰ ਹਾਲ ਹੀ ਵਿੱਚ ਆਧੁਨਿਕ ਸਹੂਲਤਾਂ ਨਾਲ ਵਿਕਸਤ ਕੀਤੇ ਗਏ ਜਲੰਧਰ ਕੈਂਟ ਸਟੇਸ਼ਨ ਦੀ ਤਰਜ਼ ’ਤੇ ਯਾਤਰੀ-ਮਿੱਤਰ ਬਣਾਉਣ ਦੀ ਤਿਆਰੀ ਹੈ। ਰੀ-ਡਿਵੈਲਪਮੈਂਟ ਪੂਰਾ ਹੋਣ ਤੋਂ ਬਾਅਦ ਜਲੰਧਰ ਸਿਟੀ ਰੇਲਵੇ ਸਟੇਸ਼ਨ ਨਾ ਸਿਰਫ਼ ਆਧੁਨਿਕ ਦਿੱਖ ਵਿੱਚ ਨਜ਼ਰ ਆਵੇਗਾ, ਸਗੋਂ ਯਾਤਰੀਆਂ ਨੂੰ ਇੱਕੋ ਥਾਂ ’ਤੇ ਕਈ ਅਤਿ-ਆਧੁਨਿਕ ਸਹੂਲਤਾਂ ਵੀ ਮਿਲਣਗੀਆਂ।

ਹਿੰਦੂਸਥਾਨ ਸਮਾਚਾਰ / GURSHARAN SINGH