ਵਾਸ਼ਿੰਗਟਨ, 26 ਜੁਲਾਈ (ਹਿੰ.ਸ.)। ਅਮਰੀਕਾ ਦੇ ਨਿਆਂ ਵਿਭਾਗ ਨੇ ਦੁਨੀਆ ਦੇ ਸਭ ਤੋਂ ਖਤਰਨਾਕ, ਹਿੰਸਕ ਅਤੇ ਤਾਕਤਵਰ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਕਰਨ ਵਾਲੇ ਸੰਗਠਨਾਂ ਵਿੱਚੋਂ ਇੱਕ ਸਿਨਾਲੋਆ ਕਾਰਟੈਲ ਦੇ ਦੋ ਨਾਮੀ ਨੇਤਾਵਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਦਿ ਨਿਊਯਾਰਕ ਟਾਈਮਜ਼ ਅਖਬਾਰ ਦੀ ਰਿਪੋਰਟ ਅਨੁਸਾਰ, ਮੈਕਸੀਕੋ ਦੇ ਨਾਮੀ ਡਰੱਗ ਮਾਫੀਆ ਅਤੇ ਸਿਨਾਲੋਆ ਕਾਰਟੈਲ ਦੇ ਸਹਿ-ਸੰਸਥਾਪਕ ਇਸਮਾਈਲ ਐਲ ਮੇਓ ਜ਼ਾਂਬਾਡਾ ਨੂੰ ਅਮਰੀਕੀ ਸੰਘੀ ਏਜੰਟਾਂ ਨੇ ਐਲ ਪਾਸੋ, ਟੈਕਸਾਸ ਵਿੱਚ ਗ੍ਰਿਫਤਾਰ ਕਰ ਲਿਆ ਹੈ।
ਰਿਪੋਰਟ ਮੁਤਾਬਕ ਨਾਲ ਹੀ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੀ ਦੁਨੀਆ ਦੇ 'ਗੌਡਫਾਦਰ' ਵਜੋਂ ਜਾਣੇ ਜਾਂਦੇ ਐਲ ਚਾਪੋ ਗੁਜ਼ਮੈਨ ਦੇ ਪੁੱਤਰ ਜੋਆਕਿਨ ਗੁਜ਼ਮੈਨ ਲੋਪੇਜ਼ ਨੂੰ ਵੀ ਗ੍ਰਿਫਤਾਰ ਕੀਤਾ ਗਿਆ ਹੈ। ਜ਼ਾਂਬਾਡਾ 'ਤੇ ਫੈਂਟਾਨਾਇਲ ਦੇ ਨਿਰਮਾਣ ਅਤੇ ਤਸਕਰੀ ਅਤੇ ਹੋਰ ਨਸ਼ੀਲੇ ਪਦਾਰਥਾਂ (ਕੋਕੀਨ, ਹੈਰੋਇਨ, ਮੇਥਾਮਫੇਟਾਮਾਈਨ) ਦੀ ਤਸਕਰੀ ਦਾ ਦੋਸ਼ ਹੈ। ਅਮਰੀਕੀ ਸਰਕਾਰ ਨੇ ਉਸਦੀ ਗ੍ਰਿਫਤਾਰੀ ਲਈ 125 ਕਰੋੜ ਰੁਪਏ ਦੇ ਇਨਾਮ ਦਾ ਐਲਾਨ ਕੀਤਾ ਸੀ।
ਦੱਸਿਆ ਜਾ ਰਿਹਾ ਹੈ ਕਿ 76 ਸਾਲਾ ਜ਼ਾਂਬਾਡਾ ਅਤੇ ਐਲ ਚਾਪੋ ਗੁਜ਼ਮੈਨ ਇਕੱਠੇ ਅਪਰਾਧ ਕਰਦੇ ਸਨ। ਫਰਵਰੀ ਵਿੱਚ ਜ਼ਾਂਬਾਡਾ ਨੂੰ ਯੂਐਸ ਪ੍ਰੌਸੀਕਿਊਟਰਾਂ ਵਲੋਂ ਫੈਂਟਾਨਿਲ ਦੇ ਨਿਰਮਾਣ ਅਤੇ ਤਸਕਰੀ ਦੀ ਸਾਜ਼ਿਸ਼ ਦਾ ਦੋਸ਼ ਲਗਾਇਆ ਗਿਆ। ਇਹ ਪਦਾਰਥ ਹੈਰੋਇਨ ਤੋਂ ਵੀ ਵੱਧ ਖਤਰਨਾਕ ਮੰਨਿਆ ਜਾਂਦਾ ਹੈ। ਇਸਨੂੰ ਅਮਰੀਕੀ ਓਪੀਔਡ ਸੰਕਟ ਲਈ ਜ਼ਿੰਮੇਵਾਰ ਠਹਿਰਾਇਆ ਗਿਆ ਹੈ।
ਅਮਰੀਕਾ ਦੇ ਅਟਾਰਨੀ ਜਨਰਲ ਮੈਰਿਕ ਗਾਰਲੈਂਡ ਨੇ ਕਿਹਾ ਕਿ ਦੋਵੇਂ ਵਿਅਕਤੀ ਦੁਨੀਆ ਦੇ ਸਭ ਤੋਂ ਹਿੰਸਕ ਅਤੇ ਸ਼ਕਤੀਸ਼ਾਲੀ ਡਰੱਗ ਤਸਕਰੀ ਸੰਗਠਨਾਂ ਵਿੱਚੋਂ ਇੱਕ ਦੀ ਅਗਵਾਈ ਕਰਦੇ ਹਨ। ਐਲ ਮੇਓ ਅਤੇ ਲੋਪੇਜ਼ ਨੂੰ ਸਿਨਾਲੋਆ ਕਾਰਟੈਲ ਦੇ ਮੁੱਖ ਨੇਤਾਵਾਂ ਵਜੋਂ ਸੂਚੀਬੱਧ ਕੀਤਾ ਗਿਆ ਹੈ। ਦੋਵਾਂ ਨੂੰ ਜਹਾਜ਼ ਤੋਂ ਉਤਰਦੇ ਸਮੇਂ ਗ੍ਰਿਫਤਾਰ ਕੀਤਾ ਗਿਆ। ਜੁਲਾਈ 2018 ਵਿੱਚ ਅਮਰੀਕੀ ਸੰਸਦ ਵਿੱਚ ਪੇਸ਼ ਕੀਤੀ ਗਈ ਇੱਕ ਰਿਪੋਰਟ ਦੇ ਅਨੁਸਾਰ, ਸਿਨਾਲੋਆ ਕਾਰਟੈਲ ਦੀ ਸਾਲਾਨਾ ਆਮਦਨ ਤਿੰਨ ਅਰਬ ਡਾਲਰ ਹੈ। ਇਸਦਾ ਪ੍ਰਭਾਵ ਘੱਟੋ-ਘੱਟ 50 ਦੇਸ਼ਾਂ ਵਿੱਚ ਹੈ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ / ਸੰਜੀਵ