ਇਸਲਾਮਾਬਾਦ, 04 ਜਨਵਰੀ (ਹਿੰ.ਸ.)। ਪਾਕਿਸਤਾਨ ਦੇ ਅਸ਼ਾਂਤ ਖੈਬਰ ਪਖਤੂਨਖਵਾ ਸੂਬੇ ਦੇ ਕੁਰੱਮ ਜ਼ਿਲੇ ਦੇ ਡਿਪਟੀ ਕਮਿਸ਼ਨਰ ਜਾਵੇਦੁੱਲਾ ਮਹਿਸੂਦ ਅੱਜ ਬਾਗਾਨ ਇਲਾਕੇ 'ਚ ਹੋਈ ਗੋਲੀਬਾਰੀ 'ਚ ਜ਼ਖਮੀ ਹੋ ਗਏ। ਡਿਪਟੀ ਕਮਿਸ਼ਨਰ ਮਹਿਸੂਦ ਜ਼ਿਲ੍ਹੇ ਵਿੱਚ ਦੋ ਕਬਾਇਲੀ ਗੁੱਟਾਂ ਦਰਮਿਆਨ ਹਥਿਆਰਬੰਦ ਸੰਘਰਸ਼ ਨੂੰ ਖ਼ਤਮ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾ ਰਹੇ ਹਨ।
ਜੀਓ ਨਿਊਜ਼ ਚੈਨਲ ਦੀ ਖਬਰ ਮੁਤਾਬਕ ਬਾਗਾਨ ਇਲਾਕੇ 'ਚ ਜੰਗੀ ਕਬੀਲਿਆਂ ਵਿਚਾਲੇ 1 ਜਨਵਰੀ ਨੂੰ ਹੋਏ ਸ਼ਾਂਤੀ ਸਮਝੌਤੇ ਤੋਂ ਬਾਅਦ ਅੱਜ ਫਿਰ ਅਸ਼ਾਂਤ ਇਲਾਕੇ 'ਚ ਹਿੰਸਾ ਭੜਕ ਗਈ। ਇਲਾਕੇ ਵਿੱਚ ਸ਼ਾਂਤੀ ਬਹਾਲ ਕਰਨ ਦੇ ਯਤਨਾਂ ਵਿੱਚ ਅਹਿਮ ਭੂਮਿਕਾ ਨਿਭਾਅ ਰਹੇ ਡਿਪਟੀ ਕਮਿਸ਼ਨਰ ਨੂੰ ਹਸਪਤਾਲ ਲਿਜਾਇਆ ਗਿਆ ਹੈ।
ਦੱਸਿਆ ਗਿਆ ਹੈ ਕਿ ਜ਼ਿਲ੍ਹਾ ਡਿਪਟੀ ਕਮਿਸ਼ਨਰ ਮਹਿਸੂਦ ਦੀ ਅਗਵਾਈ ਹੇਠ ਅੱਜ ਜ਼ਰੂਰੀ ਵਸਤਾਂ ਲੈ ਕੇ ਵਾਹਨਾਂ ਦਾ ਕਾਫ਼ਲਾ ਪਾਰਾਚਿਨਾਰ ਲਈ ਰਵਾਨਾ ਹੋਇਆ। ਤਾਲ-ਪਾਰਾਚਿਨਾਰ ਰੋਡ 'ਤੇ ਪਹੁੰਚਦੇ ਹੀ ਕਾਫਲੇ 'ਤੇ ਗੋਲੀਬਾਰੀ 'ਚ ਮਹਿਸੂਦ ਜ਼ਖਮੀ ਹੋ ਗਏ। ਗੌਰਤਲਬ ਹੈ ਕਿ 1 ਜਨਵਰੀ ਨੂੰ ਹੋਏ ਸ਼ਾਂਤੀ ਸਮਝੌਤੇ ਤੋਂ ਬਾਅਦ ਸਾਰੀਆਂ ਧਿਰਾਂ ਨੇ ਪਾਰਾਚਿਨਾਰ ਨੂੰ ਸਹਾਇਤਾ ਭੇਜਣ ਲਈ ਸਹਿਮਤੀ ਜਤਾਈ ਸੀ।ਇਸ ਗੋਲੀਬਾਰੀ ਦੀ ਘਟਨਾ 'ਤੇ ਖੈਬਰ ਪਖਤੂਨਖਵਾ ਦੇ ਮੁੱਖ ਸਕੱਤਰ ਨਦੀਮ ਅਸਲਮ ਚੌਧਰੀ ਨੇ ਕਿਹਾ ਕਿ ਸ਼ਾਂਤੀ ਕਮੇਟੀਆਂ ਕਾਫਲੇ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਅਤੇ ਸਮਝੌਤਿਆਂ ਦੀ ਪਾਲਣਾ ਨੂੰ ਯਕੀਨੀ ਬਣਾਉਣ ਲਈ ਜ਼ਿੰਮੇਵਾਰ ਹਨ। ਕਮੇਟੀਆਂ ਵਿੱਚ ਸਥਾਨਕ ਨਿਵਾਸੀ, ਕਬਾਇਲੀ ਬਜ਼ੁਰਗ ਅਤੇ ਸਾਰੇ ਸੰਪਰਦਾਵਾਂ ਅਤੇ ਭਾਈਚਾਰਿਆਂ ਦੀ ਨੁਮਾਇੰਦਗੀ ਕਰਨ ਵਾਲੇ ਸਿਆਸੀ ਆਗੂ ਸ਼ਾਮਲ ਹਨ।ਸਰਕਾਰੀ ਸੂਤਰਾਂ ਨੇ ਖੁਲਾਸਾ ਕੀਤਾ ਹੈ ਕਿ ਸਥਾਨਕ ਨਿਵਾਸੀਆਂ ਨੇ ਪੜਾਅਵਾਰ ਪ੍ਰਕਿਰਿਆ ਵਿੱਚ 15 ਦਿਨਾਂ ਦੇ ਅੰਦਰ ਆਪਣੇ ਹਥਿਆਰ ਸੌਂਪਣ ਦਾ ਵਾਅਦਾ ਕੀਤਾ ਹੈ। ਇੱਕ ਮਹੀਨੇ ਵਿੱਚ ਬੰਕਰਾਂ ਨੂੰ ਨਸ਼ਟ ਕਰਨ ਦਾ ਟੀਚਾ ਹੈ। ਇਸ ਜ਼ਿਲ੍ਹੇ ਵਿੱਚ ਜੰਗਬੰਦੀ ਲਾਗੂ ਕਰਵਾਉਣ ਲਈ ਜਿਰਗਾ ਵਿੱਚ ਲੰਮਾ ਸਮਾਂ ਵਿਚਾਰ-ਵਟਾਂਦਰਾ ਹੋਇਆ ਹੈ। ਕੁਰੱਮ ਜ਼ਿਲ੍ਹੇ ਵਿੱਚ ਅਲੀਜ਼ਈ ਅਤੇ ਬਾਗਾਨ ਕਬਾਇਲੀ ਸਮੂਹਾਂ ਵਿਚਕਾਰ ਝੜਪਾਂ 22 ਨਵੰਬਰ ਨੂੰ ਉਦੋਂ ਸ਼ੁਰੂ ਹੋਈਆਂ ਜਦੋਂ ਪਾਰਾਚਿਨਾਰ ਨੇੜੇ ਯਾਤਰੀ ਵੈਨਾਂ ਦੇ ਕਾਫਲੇ 'ਤੇ ਹਮਲਾ ਕੀਤਾ ਗਿਆ ਸੀ। ਇਸ ਹਮਲੇ ਵਿਚ 47 ਲੋਕ ਮਾਰੇ ਗਏ ਸਨ।
---------------
---------------
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
