ਵੈਟੀਕਨ ਸਿਟੀ, 21 ਅਪ੍ਰੈਲ (ਹਿੰ.ਸ.)। ਕੈਥੋਲਿਕ ਈਸਾਈ ਧਰਮ ਗੁਰੂ ਪੋਪ ਫਰਾਂਸਿਸ ਦਾ ਈਸਟਰ ਸੋਮਵਾਰ ਨੂੰ 88 ਸਾਲ ਦੀ ਉਮਰ ਵਿੱਚ ਦਿਹਾਂਤ ਹੋ ਗਿਆ। ਉਨ੍ਹਾਂ ਨੇ ਆਪਣੇ ਸਰਕਾਰੀ ਨਿਵਾਸ ਕਾਸਾ ਸਾਂਤਾ ਮਾਰਟਾ, ਵੈਟੀਕਨ ਵਿਖੇ ਆਖਰੀ ਸਾਹ ਲਿਆ। ਅਪੋਸਟੋਲਿਕ ਚੈਂਬਰ ਦੇ ਕੈਮਰਲੇਂਗੋ, ਕਾਰਡੀਨਲ ਕੇਵਿਨ ਫੈਰੇਲ ਨੇ ਸਵੇਰੇ 9:45 ਵਜੇ ਕਾਸਾ ਸਾਂਤਾ ਮਾਰਟਾ ਤੋਂ ਪੋਪ ਫਰਾਂਸਿਸ ਦੇ ਦਿਹਾਂਤ ਦਾ ਐਲਾਨ ਕੀਤਾ।

ਵੈਟੀਕਨ ਨਿਊਜ਼ ਦੇ ਅਨੁਸਾਰ, ਅਪੋਸਟੋਲਿਕ ਚੈਂਬਰ ਦੇ ਕੈਮਰਲੇਂਗੋ ਕਾਰਡੀਨਲ ਕੇਵਿਨ ਫੈਰੇਲ ਨੇ ਕਿਹਾ, ਪਿਆਰੇ ਭਰਾਵੋ ਅਤੇ ਭੈਣੋ! ਇਹ ਬਹੁਤ ਦੁੱਖ ਦੇ ਨਾਲ ਹੈ ਕਿ ਮੈਂ ਪਵਿੱਤਰ ਪਿਤਾ ਫਰਾਂਸਿਸ ਦੇ ਦਿਹਾਂਤ ਦਾ ਐਲਾਨ ਕਰਦਾ ਹਾਂ। ਬਿਸ਼ਪ ਫਰਾਂਸਿਸ ਨੇ ਅੱਜ ਸਵੇਰੇ 7:35 ਵਜੇ ਆਖਰੀ ਸਾਹ ਲਿਆ। ਉਨ੍ਹਾਂ ਦਾ ਸਾਰਾ ਜੀਵਨ ਪ੍ਰਭੂ ਅਤੇ ਚਰਚ ਦੀ ਸੇਵਾ ਨੂੰ ਸਮਰਪਿਤ ਰਿਹਾ। ਉਨ੍ਹਾਂ ਨੇ ਸਾਨੂੰ ਇਮਾਨਦਾਰੀ, ਹਿੰਮਤ ਅਤੇ ਵਿਸ਼ਵਵਿਆਪੀ ਪਿਆਰ ਨਾਲ ਨੈਤਿਕ ਕਦਰਾਂ-ਕੀਮਤਾਂ ਨਾਲ ਜੀਣਾ ਸਿਖਾਇਆ। ਉਨ੍ਹਾਂ ਨੂੰ ਪ੍ਰਭੂ ਯਿਸੂ ਦੇ ਸੱਚੇ ਚੇਲੇ ਵਜੋਂ ਅਥਾਹ ਸ਼ੁਕਰਗੁਜ਼ਾਰੀ ਨਾਲ ਹਮੇਸ਼ਾ ਯਾਦ ਕੀਤਾ ਜਾਵੇਗਾ। ਪੋਪ ਫਰਾਂਸਿਸ ਦੀ ਆਤਮਾ ਨੂੰ ਤ੍ਰਿਏਕ ਈਸ਼ਵਰ ਦੇ ਬੇਅੰਤ ਦਿਆਲੂ ਪਿਆਰ ਲਈ ਸਮਰਪਿਤ ਕੀਤੀ ਜਾਂਦੀ ਹੈ।

ਜ਼ਿਕਰਯੋਗ ਹੈ ਕਿ ਬ੍ਰੌਨਕਾਈਟਿਸ ਤੋਂ ਪੀੜਤ ਪੋਪ ਫਰਾਂਸਿਸ ਨੂੰ ਇਸ ਸਾਲ 14 ਫਰਵਰੀ ਨੂੰ ਰੋਮ ਦੇ ਐਗੋਸਟਿਨੋ ਜੇਮੇਲੀ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਡਾਕਟਰਾਂ ਨੇ 18 ਫਰਵਰੀ ਨੂੰ ਉਨ੍ਹਾਂ ਦੇ ਡਬਲ ਨਮੂਨੀਆ ਦਾ ਇਲਾਜ ਕੀਤਾ। ਇਸ ਹਸਪਤਾਲ ਵਿੱਚ 38 ਦਿਨ ਰਹਿਣ ਤੋਂ ਬਾਅਦ, ਪੋਪ ਕਾਸਾ ਸੈਂਟਾ ਮਾਰਟਾ ਵਾਪਸ ਆ ਗਏ ਸਨ।

ਵੈਟੀਕਨ ਨਿਊਜ਼ ਦੀ ਖ਼ਬਰ ਵਿੱਚ ਕਿਹਾ ਗਿਆ ਹੈ ਕਿ ਪਿਛਲੇ ਸਾਲ ਅਪ੍ਰੈਲ ਵਿੱਚ ਪੋਪ ਫਰਾਂਸਿਸ ਨੇ ਆਪਣੇ ਅੰਤਿਮ ਸੰਸਕਾਰ ਦੀਆਂ ਰਸਮਾਂ ਲਈ ਲਿਟਰਜ਼ਿਕਲ ਬੁੱਕ ਦੇ ਇੱਕ ਅਪਡੇਟ ਕੀਤੇ ਸੰਸਕਰਣ ਨੂੰ ਮਨਜ਼ੂਰੀ ਦਿੱਤੀ ਸੀ। ਅਪੋਸਟੋਲਿਕ ਸਮਾਰੋਹਾਂ ਦੇ ਮਾਸਟਰ, ਆਰਚਬਿਸ਼ਪ ਡਿਏਗੋ ਰਵੇਲੀ ਦੇ ਅਨੁਸਾਰ, ਪੋਪ ਫਰਾਂਸਿਸ ਨੇ ਅੰਤਿਮ ਸੰਸਕਾਰ ਦੀਆਂ ਰਸਮਾਂ ਨੂੰ ਸਰਲ ਬਣਾਉਣ ਦੀ ਬੇਨਤੀ ਕੀਤੀ ਸੀ। ਆਰਚਬਿਸ਼ਪ ਰਵੇਲੀ ਨੇ ਕਿਹਾ, ਨਵੀਨੀਕਰਣ ਕੀਤੀ ਗਈ ਰਸਮ ਦਾ ਉਦੇਸ਼ ਇਸ ਗੱਲ 'ਤੇ ਹੋਰ ਵੀ ਜ਼ੋਰ ਦੇਣਾ ਹੈ ਕਿ ਰੋਮਨ ਪੋਪ ਦਾ ਅੰਤਿਮ ਸੰਸਕਾਰ ਮਸੀਹ ਦੇ ਇੱਕ ਪਾਦਰੀ ਅਤੇ ਚੇਲੇ ਦਾ ਅੰਤਿਮ ਸੰਸਕਾਰ ਹੈ, ਨਾ ਕਿ ਇਸ ਦੁਨੀਆਂ ਦੇ ਕਿਸੇ ਸ਼ਕਤੀਸ਼ਾਲੀ ਆਦਮੀ ਦਾ।’’ ਐਨਬੀਸੀ ਨਿਊਜ਼ ਦੇ ਅਨੁਸਾਰ, ਪੋਪ ਫਰਾਂਸਿਸ ਐਤਵਾਰ ਨੂੰ ਈਸਟਰ ਸੇਵਾਵਾਂ ਦੇ ਉਤਸਵ ਦੌਰਾਨ ਸੇਂਟ ਪੀਟਰਜ਼ ਬੇਸਿਲਿਕਾ ਦੀ ਬਾਲਕੋਨੀ ਵਿੱਚ ਨਜ਼ਰ ਆਏ। ਵੈਟੀਕਨ ਦੇ ਸੇਂਟ ਪੀਟਰਸ ਸਕੁਏਅਰ 'ਤੇ ਹਜ਼ਾਰਾਂ ਲੋਕ ਉਨ੍ਹਾਂ ਨੂੰ ਦੇਖਣ ਲਈ ਇਕੱਠੇ ਹੋਏ ਸਨ। ਪੋਪ ਵ੍ਹੀਲਚੇਅਰ 'ਤੇ ਸਨ। ਉਹ ਬਾਲਕੋਨੀ ਤੋਂ ਡੈਫੋਡਿਲ ਅਤੇ ਟਿਊਲਿਪਸ ਨਾਲ ਭਰੇ ਇੱਕ ਚੌਕ ਵੱਲ ਦੇਖ ਰਹੇ ਸਨ। ਉਨ੍ਹਾਂ ਨੇ ਹੱਥ ਹਿਲਾ ਕੇ ਸਾਰਿਆਂ ਨੂੰ ਆਸ਼ੀਰਵਾਦ ਦਿੱਤਾ ਅਤੇ ਕਿਹਾ, ਪਿਆਰੇ ਭਰਾਵੋ ਅਤੇ ਭੈਣੋ, ਤੁਹਾਨੂੰ ਈਸਟਰ ਦੀਆਂ ਸ਼ੁਭਕਾਮਨਾਵਾਂ। ਪੋਪ ਫਰਾਂਸਿਸ ਨੇ ਐਤਵਾਰ ਸਵੇਰੇ ਅਮਰੀਕੀ ਉਪ ਰਾਸ਼ਟਰਪਤੀ ਜੇਡੀ ਵੈਂਸ ਨਾਲ ਮੁਲਾਕਾਤ ਕੀਤੀ ਸੀ। ਵੈਟੀਕਨ ਸਿਟੀ ਦੇ ਬੁਲਾਰੇ ਦੇ ਅਨੁਸਾਰ, ਇਸ ਦੌਰਾਨ ਦੋਵਾਂ ਨੇ ਈਸਟਰ ਦੀਆਂ ਸ਼ੁਭਕਾਮਨਾਵਾਂ ਦਾ ਆਦਾਨ-ਪ੍ਰਦਾਨ ਕੀਤਾ। ਪਿਛਲੇ ਹਫ਼ਤੇ, ਫਰਾਂਸਿਸ ਨੇ ਇਮੀਗ੍ਰੇਸ਼ਨ ਮਾਮਲੇ ਨੂੰ ਲੈ ਕੇ ਟਰੰਪ ਪ੍ਰਸ਼ਾਸਨ ਦੀ ਜਨਤਕ ਤੌਰ 'ਤੇ ਆਲੋਚਨਾ ਕੀਤੀ ਸੀ।

ਜ਼ਿਕਰਯੋਗ ਹੈ ਕਿ ਇਸ ਵਾਰ ਪੋਪ ਫਰਾਂਸਿਸ ਨੇ ਈਸਟਰ ਮਾਸ ਦੀ ਅਗਵਾਈ ਨਹੀਂ ਕੀਤੀ। ਸੇਂਟ ਪੀਟਰਜ਼ ਬੇਸਿਲਿਕਾ ਦੇ ਸੇਵਾਮੁਕਤ ਆਰਕਪ੍ਰਾਈਸਟ, ਕਾਰਡੀਨਲ ਐਂਜੇਲੋ ਕੋਮਾਸਟ੍ਰੀ, ਨੇ ਉਨ੍ਹਾਂ ਦੀ ਜਗ੍ਹਾ ਲਈ ਅਤੇ ਉਨ੍ਹਾਂ ਦਾ ਪ੍ਰਵਚਨ ਪੜ੍ਹਿਆ। ਮਾਸ ਸਮਾਪਤੀ ਤੋਂ ਬਾਅਦ, ਪੋਪ ਫਰਾਂਸਿਸ ਨੇ ਤਾੜੀਆਂ ਦੀ ਗੂੰਜ ਵਿੱਚ ਦੁਨੀਆ ਭਰ ਵਿੱਚ ਸ਼ਾਂਤੀ ਦੀ ਅਪੀਲ ਕੀਤੀ। ਉਨ੍ਹਾਂ ਨੇ ਖਾਸ ਤੌਰ 'ਤੇ ਗਾਜ਼ਾ ਦਾ ਜ਼ਿਕਰ ਕੀਤਾ। ਜੰਗਬੰਦੀ ਅਤੇ ਸਾਰੇ ਬੰਧਕਾਂ ਦੀ ਰਿਹਾਈ ਦਾ ਸੱਦਾ ਦਿੱਤਾ। ਪੋਪ ਨੇ ਯੂਕਰੇਨ, ਇਜ਼ਰਾਈਲ, ਲੇਬਨਾਨ ਅਤੇ ਸੀਰੀਆ ਵਿੱਚ ਈਸਾਈ ਭਾਈਚਾਰਿਆਂ ਲਈ ਪ੍ਰਾਰਥਨਾ ਕੀਤੀ, ਅਤੇ ਅਰਮੀਨੀਆ, ਅਜ਼ਰਬਾਈਜਾਨ, ਸੁਡਾਨ, ਦੱਖਣੀ ਸੁਡਾਨ, ਮਿਆਂਮਾਰ, ਸਾਹੇਲ ਅਤੇ ਹੌਰਨ ਆਫ਼ ਅਫਰੀਕਾ ਖੇਤਰਾਂ ਅਤੇ ਕਾਂਗੋ ਲੋਕਤੰਤਰੀ ਗਣਰਾਜ ਵਿੱਚ ਚੱਲ ਰਹੇ ਸੰਘਰਸ਼ ਅਤੇ ਦੁੱਖਾਂ ਦਾ ਜ਼ਿਕਰ ਕੀਤਾ।

ਉਨ੍ਹਾਂ ਨੇ ਪਿਛਲੇ ਹਫਤੇ ਦੇ ਅੰਤ ਵਿੱਚ ਪਾਮ ਸੰਡੇ ’ਤੇ ਸੇਂਟ ਪੀਟਰਜ਼ ਸਕੁਏਅਰ ਵਿੱਚ ਭੀੜ ਦਾ ਧੰਨਵਾਦ ਕੀਤਾ, ਅਤੇ ਪਵਿੱਤਰ ਵੀਰਵਾਰ ਨੂੰ ਉਨ੍ਹਾਂ ਨੇ ਇੱਕ ਰੋਮਨ ਜੇਲ੍ਹ ਦਾ ਦੌਰਾ ਕੀਤਾ। ਉਨ੍ਹਾਂ ਨੇ ਮਹੀਨੇ ਦੇ ਸ਼ੁਰੂ ਵਿੱਚ ਵੈਟੀਕਨ ਵਿਖੇ ਰਾਜਾ ਚਾਰਲਸ ਅਤੇ ਰਾਣੀ ਕੈਮਿਲਾ ਨਾਲ ਨਿੱਜੀ ਤੌਰ 'ਤੇ ਮੁਲਾਕਾਤ ਵੀ ਕੀਤੀ। ਮਾਰਚ ਵਿੱਚ ਫਰਾਂਸਿਸ ਨੂੰ ਹਸਪਤਾਲ ਤੋਂ ਛੁੱਟੀ ਮਿਲਣ ਤੋਂ ਬਾਅਦ, ਉਨ੍ਹਾਂ ਦੀ ਮੈਡੀਕਲ ਟੀਮ ਦੇ ਮੁਖੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਦੋ ਮਹੀਨੇ ਹੋਰ ਆਰਾਮ ਦੀ ਲੋੜ ਪਵੇਗੀ। ਇੱਥੇ ਇਹ ਦੱਸਣਾ ਜ਼ਰੂਰੀ ਹੈ ਕਿ ਪੋਪ ਫਰਾਂਸਿਸ ਇਸ ਵਾਰ ਕੈਥੋਲਿਕ ਚਰਚ ਦੇ ਜਯੰਤੀ ਸਮਾਰੋਹਾਂ ਵਿੱਚ ਸ਼ਾਮਲ ਨਹੀਂ ਹੋਏ।

ਜੋਰਜ ਮਾਰੀਓ ਬਰਗੋਗਲੀਓ ਤੋਂ ਪੋਪ ਬਣਨ ਤੱਕ ਦਾ ਸਫ਼ਰ

ਪੋਪ ਫਰਾਂਸਿਸ ਦਾ ਜਨਮ 17 ਦਸੰਬਰ 1936 ਨੂੰ ਅਰਜਨਟੀਨਾ ਦੀ ਰਾਜਧਾਨੀ ਬਿਊਨਸ ਆਇਰਸ ਵਿੱਚ ਹੋਇਆ ਸੀ। ਜਨਮ ਸਮੇਂ, ਉਨ੍ਹਾਂ ਨੂੰ ਜੋਰਜ ਮਾਰੀਓ ਬਰਗੋਗਲੀਓ ਨਾਮ ਦਿੱਤਾ ਗਿਆ। ਉਨ੍ਹਾਂ ਦੇ ਮਾਪੇ ਇਟਲੀ ਤੋਂ ਆਏ ਪ੍ਰਵਾਸੀ ਸਨ। ਪਿਤਾ ਮਾਰੀਓ ਰੇਲਵੇ ਅਕਾਊਂਟੈਂਟ ਅਤੇ ਉਨ੍ਹਾਂ ਦੀ ਮਾਂ ਰੇਜੀਨਾ ਸਿਵੋਰੀ ਘਰੇਲੂ ਔਰਤ ਸਨ। ਉਨ੍ਹਾਂ ਨੇ ਕੈਮੀਕਲ ਟੈਕਨੀਸ਼ੀਅਨ ਵਜੋਂ ਗ੍ਰੈਜੂਏਸ਼ਨ ਪੂਰੀ ਕੀਤੀ। ਫਿਰ ਉਨ੍ਹਾਂ ਨੇ ਵਿਲਾ ਡੇਵੋਟੋ ਦੇ ਡਾਇਓਸੇਸਨ ਸੈਮੀਨਰੀ ਵਿੱਚ ਦਾਖਲ ਹੋ ਕੇ ਪੁਜਾਰੀਵਾਦ ਦਾ ਰਸਤਾ ਚੁਣਿਆ। 11 ਮਾਰਚ 1958 ਨੂੰ, ਉਹ ਸੋਸਾਇਟੀ ਆਫ਼ ਜੀਸਸ ਵਿੱਚ ਸ਼ਾਮਲ ਹੋਏ। ਇਸ ਤੋਂ ਬਾਅਦ, ਉਨ੍ਹਾਂ ਨੇ ਚਿਲੀ ਵਿੱਚ ਹਿਊਮੈਨਿਟੀਜ਼ ਵਿੱਚ ਆਪਣੀ ਪੜ੍ਹਾਈ ਪੂਰੀ ਕੀਤੀ। ਫਿਰ ਉਹ 1963 ਵਿੱਚ ਅਰਜਨਟੀਨਾ ਵਾਪਸ ਪਰਤੇ ਅਤੇ ਸੈਨ ਮਿਗੁਏਲ ਵਿੱਚ ਕਾਲਜਿਓ ਡੀ ਸੈਨ ਜੋਸੇ ਤੋਂ ਦਰਸ਼ਨ ਵਿੱਚ ਗ੍ਰੈਜੂਏਟ ਹੋਏ। 1964 ਤੋਂ 1965 ਤੱਕ ਉਨ੍ਹਾਂ ਨੇ ਸਾਂਤਾ ਫੇ ਦੇ ਕਾਲਜ ਆਫ਼ ਦ ਇਮੈਕੁਲੇਟ ਕਨਸੈਪਸ਼ਨ ਵਿੱਚ ਸਾਹਿਤ ਅਤੇ ਮਨੋਵਿਗਿਆਨ ਪੜ੍ਹਾਇਆ, ਅਤੇ 1966 ਵਿੱਚ ਉਨ੍ਹਾਂ ਨੇ ਬਿਊਨਸ ਆਇਰਸ ਦੇ ਕੋਲੇਜੀਓ ਡੇਲ ਸਲਵਾਟੋਰ ਵਿੱਚ ਵੀ ਇਹੀ ਵਿਸ਼ੇ ਪੜ੍ਹਾਏ। 1967-70 ਤੱਕ ਉਨ੍ਹਾਂ ਨੇ ਧਰਮ ਸ਼ਾਸਤਰ ਦਾ ਅਧਿਐਨ ਕੀਤਾ ਅਤੇ ਸੈਨ ਜੋਸ ਦੇ ਕੋਲੇਜਿਓ ਤੋਂ ਡਿਗਰੀ ਪ੍ਰਾਪਤ ਕੀਤੀ।

1969 ਵਿੱਚ ਪੁਜਾਰੀ ਨਿਯੁਕਤ

3 ਦਸੰਬਰ, 1969 ਨੂੰ, ਉਨ੍ਹਾਂ ਨੂੰ ਆਰਚਬਿਸ਼ਪ ਰੇਮਨ ਜੋਸ ਕੈਸਟੇਲਾਨੋ ਨੇ ਪਾਦਰੀ ਨਿਯੁਕਤ ਕੀਤਾ ਗਿਆ। ਉਨ੍ਹਾਂ ਨੇ 1970 ਅਤੇ 1971 ਦੇ ਵਿਚਕਾਰ ਸਪੇਨ ਦੀ ਅਲਕਾਲਾ ਡੀ ਹੇਨਾਰੇਸ ਯੂਨੀਵਰਸਿਟੀ ਵਿੱਚ ਆਪਣੀ ਸਿਖਲਾਈ ਜਾਰੀ ਰੱਖੀ। 20 ਮਈ 1992 ਨੂੰ ਪੋਪ ਜੌਨ ਪਾਲ II ਨੇ ਉਨ੍ਹਾਂ ਨੂੰ ਔਕਾ ਦਾ ਬਿਸ਼ਪ ਅਤੇ ਬਿਊਨਸ ਆਇਰਸ ਦਾ ਸਹਾਇਕ ਨਿਯੁਕਤ ਕੀਤਾ। 3 ਜੂਨ, 1997 ਨੂੰ ਉਨ੍ਹਾਂ ਨੂੰ ਬਿਊਨਸ ਆਇਰਸ ਦਾ ਕੋਐਡਜਿਊਟਰ ਆਰਚਬਿਸ਼ਪ ਬਣਾਇਆ ਗਿਆ। ਉਹ 28 ਫਰਵਰੀ 1998 ਨੂੰ ਕਾਰਡੀਨਲ ਕਵਾਰਾਸੀਨੋ ਦੀ ਮੌਤ ਤੋਂ ਬਾਅਦ ਆਰਚਬਿਸ਼ਪ ਬਣੇ।

2001 ਵਿੱਚ ਕਾਰਡੀਨਲ ਬਣੇ

ਤਿੰਨ ਸਾਲ ਬਾਅਦ, 21 ਫਰਵਰੀ 2001 ਨੂੰ, ਜੌਨ ਪਾਲ II ਨੇ ਉਨ੍ਹਾਂ ਨੂੰ ਕਾਰਡੀਨਲ ਬਣਾਇਆ, ਜਿਸ ਨਾਲ ਉਨ੍ਹਾਂ ਨੂੰ ਸੈਨ ਰੌਬਰਟੋ ਬੇਲਾਰਮੀਨੋ ਦਾ ਖਿਤਾਬ ਦਿੱਤਾ ਗਿਆ। ਉਨ੍ਹਾਂ ਨੇ ਆਪਣੇ ਪੈਰੋਕਾਰਾਂ ਨੂੰ ਕਿਹਾ ਕਿ ਉਹ ਉਨ੍ਹਾਂ ਦੀ ਕਾਰਡੀਨਲ ਨਿਯੁਕਤੀ ਦਾ ਜਸ਼ਨ ਮਨਾਉਣ ਲਈ ਰੋਮ ਨਾ ਆਉਣ, ਸਗੋਂ ਉਹ ਪੈਸਾ ਜੋ ਉਹ ਯਾਤਰਾ 'ਤੇ ਖਰਚ ਕਰਨਗੇ, ਗਰੀਬਾਂ ਨੂੰ ਦਾਨ ਕਰਨ। ਜ਼ਿਕਰਯੋਗ ਹੈ ਕਿ ਕਾਰਡੀਨਲ ਦੁਨੀਆ ਭਰ ਦੇ ਬਿਸ਼ਪ ਅਤੇ ਵੈਟੀਕਨ ਅਧਿਕਾਰੀ ਹੁੰਦੇ ਹਨ, ਜਿਨ੍ਹਾਂ ਨੂੰ ਪੋਪ ਵੱਲੋਂ ਨਿੱਜੀ ਤੌਰ 'ਤੇ ਚੁਣਿਆ ਜਾਂਦਾ ਹੈ। ਉਨ੍ਹਾਂ ਨੂੰ ਉਨ੍ਹਾਂ ਦੇ ਖਾਸ ਲਾਲ ਕੱਪੜਿਆਂ ਤੋਂ ਪਛਾਣਿਆ ਜਾਂਦਾ ਹੈ। ਇਨ੍ਹਾਂ ਕਾਰਡੀਨਲਾਂ ਦੇ ਸਮੂਹ ਨੂੰ ਕਾਲਜ ਆਫ਼ ਕਾਰਡੀਨਲਜ਼ ਕਿਹਾ ਜਾਂਦਾ ਹੈ।

13 ਮਾਰਚ 2013 ਨੂੰ ਚੁਣਿਆ ਗਿਆ ਪੋਪਫਰਵਰੀ 2013 ਵਿੱਚ, ਪੋਪ ਬੇਨੇਡਿਕਟ ਸੋਹਲ੍ਹਵੇਂ ਨੇ ਬੁਢਾਪੇ ਅਤੇ ਸਿਹਤ ਸਮੱਸਿਆਵਾਂ ਦਾ ਹਵਾਲਾ ਦਿੰਦੇ ਹੋਏ ਪੋਪ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ। ਅਗਲੇ ਪੋਪ ਦੀ ਚੋਣ ਲਈ ਉਸੇ ਸਾਲ ਮਾਰਚ ਦੇ ਸ਼ੁਰੂ ਵਿੱਚ ਇੱਕ ਸੰਮੇਲਨ ਬੁਲਾਇਆ ਗਿਆ। 13 ਮਾਰਚ ਨੂੰ, ਕਾਰਡੀਨਲਜ਼ ਕਾਲਜ ਵੱਲੋਂ ਪੰਜਵੇਂ ਦੌਰ ਦੀ ਵੋਟਿੰਗ ਤੋਂ ਬਾਅਦ ਬਰਗੋਗਲੀਓ ਨੂੰ ਪੋਪ ਚੁਣਿਆ ਗਿਆ। ਫਿਰ ਉਨ੍ਹਾਂ ਨੇ ਅਸੀਸੀ ਦੇ ਸੇਂਟ ਫਰਾਂਸਿਸ ਦੇ ਸਨਮਾਨ ਵਿੱਚ ਆਪਣਾ ਨਾਮ ਫਰਾਂਸਿਸ ਚੁਣਿਆ। ਉਨ੍ਹਾਂ ਨੂੰ ਰੋਮਨ ਕੈਥੋਲਿਕ ਚਰਚ ਦਾ 266ਵਾਂ ਪੋਪ ਮੰਨਿਆ ਜਾਂਦਾ ਹੈ।

ਮੁਕਤ ਬਾਜ਼ਾਰ ਦੀਆਂ ਆਰਥਿਕ ਨੀਤੀਆਂ ਦਾ ਕੀਤਾ ਵਿਰੋਧ

ਪੋਪ ਫਰਾਂਸਿਸ ਨੂੰ ਕੁਝ ਲੋਕ ਉਦਾਰਵਾਦੀ ਦੇ ਰੂਪ ਵਿੱਚ ਦੇਖਦੇ ਹਨ। ਉਨ੍ਹਾਂ ਨੇ ਕਿਹਾ ਸੀ ਕਿ ਚਰਚ ਨੂੰ ਸਮਲਿੰਗੀ ਲੋਕਾਂ ਤੋਂ ਮੁਆਫੀ ਮੰਗਣੀ ਚਾਹੀਦੀ। ਉਨ੍ਹਾਂ ਨੇ ਮੁਕਤ ਬਾਜ਼ਾਰ ਆਰਥਿਕ ਨੀਤੀਆਂ ਦਾ ਵਿਰੋਧ ਕੀਤਾ। ਇਸਦੇ ਨਾਲ ਹੀ, ਉਨ੍ਹਾਂ ਦੇ ਕਈ ਫੈਸਲਿਆਂ ਨੂੰ ਰੂੜੀਵਾਦੀ ਕਰਾਰ ਦਿੱਤਾ ਗਿਆ। 2016 ਵਿੱਚ, ਰੋਮਨ ਕੈਥੋਲਿਕ ਨਿਊਜ਼ ਵੈੱਬਸਾਈਟ ਕਰਕਸ ਦੇ ਸੰਪਾਦਕ, ਜੌਨ ਐਲਨ ਜੂਨੀਅਰ ਨੇ ਲਿਖਿਆ ਕਿ ਫਰਾਂਸਿਸ ਵੀ ਸਪੱਸ਼ਟ ਤੌਰ 'ਤੇ ਰੂੜੀਵਾਦੀ ਹਨ। ਉਨ੍ਹਾਂ ਕਿਹਾ ਕਿ ਪੋਪ ਨੇ ਅਜੇ ਤੱਕ ਚਰਚ ਦੀਆਂ ਸਿੱਖਿਆਵਾਂ ਦੇ ਅਧਿਕਾਰਤ ਸੰਗ੍ਰਹਿ, ਕੈਟੇਚਿਜ਼ਮ ਵਿੱਚ ਇੱਕ ਵੀ ਕੌਮਾ ਨਹੀਂ ਬਦਲਿਆ ਹੈ। ਉਨ੍ਹਾਂ ਨੇ ਔਰਤ ਪਾਦਰੀਆਂ ਨੂੰ ਨਾਂਹ ਕਿਹਾ ਹੈ, ਸਮਲਿੰਗੀ ਵਿਆਹ ਨੂੰ ਨਾਂਹ ਕਿਹਾ ਹੈ, ਗਰਭਪਾਤ ਨੂੰ ਸਭ ਤੋਂ ਭਿਆਨਕ ਅਪਰਾਧ ਦੱਸਿਆ ਹੈ ਅਤੇ ਹਰ ਹੋਰ ਵਿਵਾਦਪੂਰਨ ਮੁੱਦੇ 'ਤੇ ਆਪਣੇ ਆਪ ਨੂੰ ਚਰਚ ਦਾ ਵਫ਼ਾਦਾਰ ਪੁੱਤਰ ਘੋਸ਼ਿਤ ਕੀਤਾ ਹੈ।

ਜ਼ਿਕਰਯੋਗ ਹੈ ਕਿ ਜਦੋਂ ਉਨ੍ਹਾਂ ਨੇ 2013 ਵਿੱਚ ਪੋਪ ਦਾ ਅਹੁਦਾ ਸੰਭਾਲਿਆ ਸੀ, ਤਾਂ ਚਰਚ ਨੂੰ ਵੈਟੀਲੈਕਸ ਸਕੈਂਡਲ ਦੇ ਦੋਸ਼ਾਂ ਦਾ ਸਾਹਮਣਾ ਕਰਨਾ ਪਿਆ ਸੀ।

ਕਿਹਾ- ਬਾਲ ਸ਼ੋਸ਼ਣ ਚਰਚ ਦੀ ਵਿਰਾਸਤ 'ਤੇ ਧੱਬਾ :

ਇਹ ਦੋਸ਼ ਵੈਟੀਕਨ ਵਿੱਚ ਭ੍ਰਿਸ਼ਟਾਚਾਰ ਦਾ ਪਰਦਾਫਾਸ਼ ਕਰਨ ਵਾਲੇ ਗੁਪਤ ਦਸਤਾਵੇਜ਼ਾਂ ਦੇ ਲੀਕ ਹੋਣ ਤੋਂ ਬਾਅਦ ਲੱਗੇ। ਇੱਕ ਪੋਪ ਹੋਣ ਦੇ ਨਾਤੇ ਉਨ੍ਹਾਂ ਨੇ ਚਰਚ ਵਿੱਚ ਸੁਧਾਰ, ਭ੍ਰਿਸ਼ਟਾਚਾਰ ਅਤੇ 'ਬਾਲ ਸ਼ੋਸ਼ਣ ਦੀਆਂ ਦੁਖਦਾਈ ਉਦਾਹਰਣਾਂ' ਨੂੰ ਖਤਮ ਕਰਨੇ ਦਾ ਟੀਚਾ ਰੱਖਿਆ। 2024 ਵਿੱਚ, ਉਨ੍ਹਾਂ ਨੇ ਬਾਲ ਸ਼ੋਸ਼ਣ ਨੂੰ ਚਰਚ ਦੀ ਵਿਰਾਸਤ 'ਤੇ ਇੱਕ ਧੱਬਾ ਦੱਸਿਆ। ਪੋਪ ਦੇ ਅਹੁਦੇ ਦੀ ਖਾਲੀ ਹੋਣ ਦੀ ਅਧਿਕਾਰਤ ਘੋਸ਼ਣਾ ਦੇ ਨਾਲ ਹੀ ਉਨ੍ਹਾਂ ਦੇ ਉੱਤਰਾਧਿਕਾਰੀ ਦੀ ਚੋਣ ਦੀ ਪ੍ਰਕਿਰਿਆ ਸ਼ੁਰੂ ਹੋਵੇਗੀ। ਇਸ ਲਈ, ਵੈਟੀਕਨ ਸਿਟੀ ਵਿੱਚ ਕਾਰਡੀਨਲ ਦੀਆਂ ਮੈਰਾਥਨ ਮੀਟਿੰਗਾਂ ਹੋਣਗੀਆਂ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ