ਨਵੀਂ ਦਿੱਲੀ, 25 ਅਪ੍ਰੈਲ (ਹਿੰ.ਸ.)। ਹਾਊਸਿੰਗ ਲੋਨ ਪ੍ਰਦਾਤਾ ਐਲਆਈਸੀ ਹਾਊਸਿੰਗ ਫਾਈਨੈਂਸ ਲਿਮਟਿਡ ਨੇ ਸ਼ੁੱਕਰਵਾਰ ਨੂੰ ਆਪਣੇ ਹੋਮ ਲੋਨ ਦਰਾਂ ਵਿੱਚ 0.25 ਫੀਸਦੀ ਦੀ ਕਟੌਤੀ ਦਾ ਐਲਾਨ ਕੀਤਾ ਹੈ। ਭਾਰਤੀ ਰਿਜ਼ਰਵ ਬੈਂਕ (ਆਰਬੀਆਈ) ਵੱਲੋਂ ਪਾਲਿਸੀ ਦਰ ਰੈਪੋ ਰੇਟ ਵਿੱਚ ਕਟੌਤੀ ਤੋਂ ਬਾਅਦ ਐਲਆਈਸੀ ਹਾਊਸਿੰਗ ਫਾਈਨੈਂਸ ਨੇ ਇਹ ਕਦਮ ਚੁੱਕਿਆ ਹੈ। ਨਵੀਆਂ ਦਰਾਂ 28 ਅਪ੍ਰੈਲ ਤੋਂ ਲਾਗੂ ਹੋਣਗੀਆਂ।
ਦੇਸ਼ ਦੀਆਂ ਸਭ ਤੋਂ ਵੱਡੀਆਂ ਹਾਊਸਿੰਗ ਫਾਈਨੈਂਸ ਕੰਪਨੀਆਂ ਵਿੱਚੋਂ ਇੱਕ ਐਲਆਈਸੀ ਹਾਊਸਿੰਗ ਫਾਈਨੈਂਸ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਇਹ ਬਦਲਾਅ ਨਵੀਂ ਫਿਕਸਡ 10 ਸਕੀਮ ਸਮੇਤ ਵੱਖ-ਵੱਖ ਹੋਮ ਲੋਨ ਸਕੀਮਾਂ 'ਤੇ ਲਾਗੂ ਹੋਵੇਗਾ। ਐਲਆਈਸੀ ਹਾਊਸਿੰਗ ਪ੍ਰਾਈਮ ਲੈਂਡਿੰਗ ਰੇਟ (ਐਲਐਚਪੀਐਲਆਰ) ਵਿੱਚ ਇਸ ਕਟੌਤੀ ਨਾਲ ਮੌਜੂਦਾ ਅਤੇ ਨਵੇਂ ਕਰਜ਼ਦਾਰਾਂ ਦੋਵਾਂ ਨੂੰ ਲਾਭ ਹੋਵੇਗਾ ਕਿਉਂਕਿ ਇਹ ਘਰੇਲੂ ਕਰਜ਼ੇ ਨੂੰ ਵਧੇਰੇ ਕਿਫਾਇਤੀ ਬਣਾ ਦੇਵੇਗਾ। ਕੰਪਨੀ ਦੇ ਅਨੁਸਾਰ ਸੋਧੀਆਂ ਵਿਆਜ ਦਰਾਂ ਹੁਣ 8 ਫੀਸਦੀ ਤੋਂ ਸ਼ੁਰੂ ਹੋਣਗੀਆਂ, ਜੋ ਕਿ 28 ਅਪ੍ਰੈਲ ਤੋਂ ਲਾਗੂ ਹੋਣਗੀਆਂ। ਐਲਐਚਪੀਐਲਆਰ ਹਰ ਤਰ੍ਹਾਂ ਦੇ ਕਰਜ਼ਿਆਂ 'ਤੇ ਵਿਆਜ ਦਰਾਂ ਨਿਰਧਾਰਤ ਕਰਨ ਲਈ ਬੈਂਚਮਾਰਕ ਦਰ ਵਜੋਂ ਕੰਮ ਕਰਦਾ ਹੈ।
ਐਲਆਈਸੀ ਹਾਊਸਿੰਗ ਫਾਈਨੈਂਸ ਲਿਮਟਿਡ (ਐਲਆਈਸੀ ਐਚਐਫਐਲ) ਭਾਰਤ ਦੀਆਂ ਸਭ ਤੋਂ ਵੱਡੀਆਂ ਹਾਊਸਿੰਗ ਫਾਈਨੈਂਸ ਕੰਪਨੀਆਂ ਵਿੱਚੋਂ ਇੱਕ ਹੈ, ਜੋ ਕਿ ਐਲਆਈਸੀ ਦੀ ਸਹਾਇਕ ਕੰਪਨੀ ਹੈ। ਇਹ ਕੰਪਨੀ ਮੁੱਖ ਤੌਰ 'ਤੇ ਉਨ੍ਹਾਂ ਲੋਕਾਂ ਨੂੰ ਹਾਊਸਿੰਗ ਲੋਨ ਪ੍ਰਦਾਨ ਕਰਦੀ ਹੈ ਜੋ ਰਿਹਾਇਸ਼ੀ ਘਰ ਯਾਨੀ ਫਲੈਟ ਖਰੀਦਣ ਜਾਂ ਬਣਾਉਣ ਲਈ ਵਿੱਤ ਚਾਹੁੰਦੇ ਹਨ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
26 Apr 2025
