ਬੀਜਿੰਗ, 9 ਅਪ੍ਰੈਲ (ਹਿੰ.ਸ.)। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਟੈਰਿਫ ਨੇ ਬੁੱਧਵਾਰ ਸਵੇਰੇ ਏਸ਼ੀਆ ਪ੍ਰਸ਼ਾਂਤ ਖੇਤਰ ਦੇ ਸਟਾਕ ਬਾਜ਼ਾਰਾਂ ਵਿੱਚ ਭੂਚਾਲ ਲਿਆ ਦਿੱਤਾ। ਵਾਲ ਸਟ੍ਰੀਟ ਵਿੱਚ ਭਾਰੀ ਗਿਰਾਵਟ ਦੇਖਣ ਨੂੰ ਮਿਲੀ। ਵ੍ਹਾਈਟ ਹਾਊਸ ਵੱਲੋਂ ਚੀਨ 'ਤੇ ਵਾਧੂ ਟੈਰਿਫਾਂ ਦਾ ਐਲਾਨ ਕਰਨ ਤੋਂ ਬਾਅਦ ਸਟਾਕ ਮਾਰਕੀਟ ਉਦਾਸ ਦਿਖਾਈ ਦੇ ਰਿਹਾ ਹੈ। ਚੀਨ ਦੇ ਸਰਕਾਰੀ ਅਖਬਾਰ ਗਲੋਬਲ ਟਾਈਮਜ਼ ਨੇ ਦੁਨੀਆ ਭਰ ਦੇ ਵੱਖ-ਵੱਖ ਸਮਾਚਾਰ ਸਰੋਤਾਂ ਤੋਂ ਇਕੱਤਰ ਕੀਤੀਆਂ ਖ਼ਬਰਾਂ ਵਿੱਚ ਇਹ ਦਾਅਵਾ ਕੀਤਾ ਹੈ।
ਗਲੋਬਲ ਟਾਈਮਜ਼ ਦੀ ਰਿਪੋਰਟ ਅਨੁਸਾਰ, ਆਸਟ੍ਰੇਲੀਆ ਦਾ ਐਸਐਂਡਪੀ/ਏਐਸਐਕਸ 200 ਬੁੱਧਵਾਰ ਸਵੇਰੇ 1.06 ਫੀਸਦੀ, ਜਾਪਾਨ ਦਾ ਨਿਕੱਕੇਈ 225 ’ਚ 3.14 ਫੀਸਦੀ, ਟੌਪਿਕਸ ’ਚ 3.26 ਫੀਸਦੀ, ਦੱਖਣੀ ਕੋਰੀਆ ਦੇ ਕੋਸਪੀ ’ਚ 0.18 ਫੀਸਦੀ ਅਤੇ ਸਮਾਲ-ਕੈਪ ਕੋਸਕੈਡ ’ਚ 0.44 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ। ਇਸ ਦੌਰਾਨ, ਹਾਂਗ ਕਾਂਗ ਦਾ ਹੈਂਗ ਸੇਂਗ ਇੰਡੈਕਸ ਬੁੱਧਵਾਰ ਸਵੇਰੇ 10 ਵਜੇ ਦੇ ਕਰੀਬ 2.27 ਫੀਸਦੀ ਡਿੱਗ ਕੇ 19,670.24 'ਤੇ ਆ ਗਿਆ।
ਬੁੱਧਵਾਰ ਸਵੇਰੇ ਚੀਨ ਦੇ ਪ੍ਰਮੁੱਖ ਸੂਚਕਾਂਕ ਨੇ ਮਿਸ਼ਰਤ ਪ੍ਰਦਰਸ਼ਨ ਦਿਖਾਇਆ। ਸ਼ੰਘਾਈ ਕੰਪੋਜ਼ਿਟ ਇੰਡੈਕਸ 0.68 ਫੀਸਦੀ ਡਿੱਗ ਕੇ 3,124.19 ਅੰਕ 'ਤੇ, ਸ਼ੇਨਜ਼ੇਨ ਕੰਪੋਨੈਂਟ ਇੰਡੈਕਸ 0.16 ਫੀਸਦੀ ਡਿੱਗ ਕੇ 9,409.48 ਅੰਕ 'ਤੇ ਆ ਗਿਆ। ਇਸ ਤੋਂ ਪਹਿਲਾਂ ਮੰਗਲਵਾਰ ਨੂੰ ਐਸਐਂਡਪੀ 500 ’ਚ ਗਿਰਾਵਟ ਆਈ ਅਤੇ ਇਹ ਕਰੀਬ ਇੱਕ ਸਾਲ ਵਿੱਚ ਪਹਿਲੀ ਵਾਰ 5,000 ਅੰਕਾਂ ਤੋਂ ਹੇਠਾਂ ਬੰਦ ਹੋਇਆ। 2 ਅਪ੍ਰੈਲ ਨੂੰ ਅਮਰੀਕੀ ਵਪਾਰਕ ਭਾਈਵਾਲਾਂ ਵਿਰੁੱਧ ਭਾਰੀ ਟੈਰਿਫ ਲਗਾਉਣ ਦੇ ਐਲਾਨ ਤੋਂ ਬਾਅਦ ਐਸਐਂਡਪੀ 500 ਦਾ ਬਾਜ਼ਾਰ ਮੁੱਲ 5.83 ਟ੍ਰਿਲੀਅਨ ਡਾਲਰ ਘੱਟ ਗਿਆ ਹੈ। 1950 ਦੇ ਦਹਾਕੇ ਵਿੱਚ ਸੂਚਕਾਂਕ ਦੀ ਸਿਰਜਣਾ ਤੋਂ ਬਾਅਦ ਇਹ ਚਾਰ ਦਿਨਾਂ ਵਿੱਚ ਸਭ ਤੋਂ ਵੱਡਾ ਨੁਕਸਾਨ ਹੈ। ਮੰਗਲਵਾਰ ਨੂੰ ਐਪਲ ਦੇ ਸ਼ੇਅਰ 4.98 ਫੀਸਦੀ ਡਿੱਗ ਗਏ। ਅਮਰੀਕੀ ਇਲੈਕਟ੍ਰਿਕ ਕਾਰ ਨਿਰਮਾਤਾ ਟੇਸਲਾ ’ਚ 4.9 ਫੀਸਦੀ ਗਿਰਾਵਟ ਆਈ। ਟੇਸਲਾ ਨੂੰ ਸਭ ਤੋਂ ਵੱਧ ਨੁਕਸਾਨ ਹੋਇਆ।ਟੇਸਲਾ ਦੇ ਸੀਈਓ ਐਲੋਨ ਮਸਕ ਨੇ ਵ੍ਹਾਈਟ ਹਾਊਸ ਦੀਆਂ ਵਪਾਰ ਨੀਤੀਆਂ ਨੂੰ ਸਿੱਧੇ ਤੌਰ 'ਤੇ ਸੰਬੋਧਿਤ ਕੀਤੇ ਬਿਨਾਂ ਪ੍ਰਸ਼ਾਸਨ ਦੇ ਚੋਟੀ ਦੇ ਵਪਾਰ ਸਲਾਹਕਾਰ ਨੂੰ ਮੂਰਖ ਦੱਸਿਆ। ਬੀਜਿੰਗ ਵਿੱਚ ਚਾਈਨਾ ਸੋਸਾਇਟੀ ਫਾਰ ਵਰਲਡ ਟ੍ਰੇਡ ਆਰਗੇਨਾਈਜ਼ੇਸ਼ਨ ਸਟੱਡੀਜ਼ ਦੇ ਉਪ ਪ੍ਰਧਾਨ ਹੂਓ ਜਿਆਂਗੁਓ ਨੇ ਕਿਹਾ ਕਿ ਟੈਰਿਫ ਜਿੰਨੇ ਜ਼ਿਆਦਾ ਹੋਣਗੇ, ਅਮਰੀਕੀ ਅਰਥਵਿਵਸਥਾ ਲਈ ਓਨਾ ਹੀ ਵੱਡਾ ਜੋਖਮ ਹੋਵੇਗਾ। ਮੁਦਰਾਸਫੀਤੀ ਦਾ ਦਬਾਅ ਵਧੇਗਾ ਅਤੇ ਸੰਭਾਵੀ ਤੌਰ 'ਤੇ ਅਮਰੀਕੀ ਆਰਥਿਕ ਵਿਕਾਸ ਹੌਲੀ ਹੋ ਜਾਵੇਗਾ। ਵ੍ਹਾਈਟ ਹਾਊਸ ਦੇ ਇੱਕ ਅਧਿਕਾਰੀ ਨੇ ਪੁਸ਼ਟੀ ਕੀਤੀ ਕਿ ਪਹਿਲਾਂ ਲਗਾਏ ਗਏ ਟੈਰਿਫਾਂ ਤੋਂ ਇਲਾਵਾ, ਅਮਰੀਕਾ ਨੇ ਚੀਨੀ ਉਤਪਾਦਾਂ 'ਤੇ 50 ਫੀਸਦੀ ਵਾਧੂ ਟੈਰਿਫ ਲਗਾਉਣ ਦੀ ਧਮਕੀ ਦਿੱਤੀ ਹੈ। ਬੁੱਧਵਾਰ ਨੂੰ ਇਸਦੀ ਕੁੱਲ ਦਰ 104 ਫੀਸਦੀ ਤੱਕ ਪਹੁੰਚ ਗਈ। ਚੀਨੀ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਉਹ ਅਮਰੀਕਾ ਨੂੰ ਢੁਕਵਾਂ ਜਵਾਬ ਦੇਣਗੇ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
