ਦੁਬਈ, 10 ਮਈ (ਹਿੰ.ਸ.)। ਏਸ਼ੀਅਨ ਖੇਡਾਂ ਦੇ ਚਾਂਦੀ ਦਾ ਤਗਮਾ ਜੇਤੂ ਮੁਹੰਮਦ ਅਫਜ਼ਲ ਨੇ ਸ਼ੁੱਕਰਵਾਰ ਨੂੰ ਦੁਬਈ ਵਿੱਚ ਆਯੋਜਿਤ ਯੂਏਈ ਅਥਲੈਟਿਕਸ ਗ੍ਰਾਂ ਪ੍ਰੀ ਵਿੱਚ ਪੁਰਸ਼ਾਂ ਦੀ 800 ਮੀਟਰ ਦੌੜ ਵਿੱਚ ਨਵਾਂ ਰਾਸ਼ਟਰੀ ਰਿਕਾਰਡ ਬਣਾ ਦਿੱਤਾ। ਅਫਜ਼ਲ ਨੇ ਦੌੜ 1 ਮਿੰਟ 45.61 ਸਕਿੰਟ ਵਿੱਚ ਪੂਰੀ ਕੀਤੀ, ਜਿਸ ਨਾਲ ਜਿਨਸਨ ਜੌਹਨਸਨ ਵੱਲੋਂ 2018 ਵਿੱਚ ਬਣਾਇਆ ਗਿਆ 1:45.65 ਸਕਿੰਟ ਦਾ ਰਿਕਾਰਡ ਤੋੜ ਦਿੱਤਾ।

ਕੀਨੀਆ ਦੇ ਦੌੜਾਕ ਨੇ ਮਾਰੀ ਬਾਜ਼ੀ, ਅਫਜ਼ਲ ਰਹੇ ਦੂਜੇ :

29 ਸਾਲਾ ਅਫਜ਼ਲ ਨੇ ਇਹ ਉਪਲਬਧੀ ਦੁਬਈ ਪੁਲਿਸ ਸਟੇਡੀਅਮ ਵਿੱਚ ਆਯੋਜਿਤ ਵਿਸ਼ਵ ਅਥਲੈਟਿਕਸ ਕਾਂਟੀਨੈਂਟਲ ਟੂਰ ਦੇ ਕਾਂਸੀ ਪੱਧਰ ਦੇ ਮੁਕਾਬਲੇ ਵਿੱਚ ਹਾਸਲ ਕੀਤੀ। ਹਾਲਾਂਕਿ, ਉਹ ਕੀਨੀਆ ਦੇ ਨਿਕੋਲਸ ਕਿਪਲਾਗਟ ਤੋਂ ਪਿੱਛੇ ਰਹੇ, ਜਿਨ੍ਹਾਂ ਨੇ 1:45.38 ਸਕਿੰਟ ਵਿੱਚ ਦੌੜ ਜਿੱਤੀ।

ਵਰਲਡ ਚੈਂਪੀਅਨਸ਼ਿਪ ਲਈ ਕੁਆਲੀਫਾਈ ਸਮਾਂ ਨਹੀਂ ਛੂਹ ਸਕੇ :

ਹਾਲਾਂਕਿ ਅਫਜ਼ਲ ਨੇ ਨਵਾਂ ਰਾਸ਼ਟਰੀ ਰਿਕਾਰਡ ਤਾਂ ਬਣਾਇਆ, ਪਰ ਉਹ 2025 ਵਿਸ਼ਵ ਚੈਂਪੀਅਨਸ਼ਿਪ ਲਈ 1:44.50 ਸਕਿੰਟ ਦੇ ਆਟੋਮੈਟਿਕ ਕੁਆਲੀਫਿਕੇਸ਼ਨ ਟਾਈਮ ਨੂੰ ਪਾਰ ਨਹੀਂ ਕਰ ਸਕੇ। ਇਸ ਤੋਂ ਪਹਿਲਾਂ, ਉਨ੍ਹਾਂ ਨੇ 2023 ਹਾਂਗਜ਼ੂ ਏਸ਼ੀਅਨ ਖੇਡਾਂ ਵਿੱਚ 800 ਮੀਟਰ ਵਿੱਚ ਚਾਂਦੀ ਦਾ ਤਗਮਾ ਜਿੱਤਿਆ ਸੀ, ਜਿੱਥੇ ਉਨ੍ਹਾਂ ਨੇ 1:48.43 ਸਕਿੰਟ ਦਾ ਸਮਾਂ ਲਿਆ ਸੀ।

ਅਨੀਮੇਸ਼ ਕੁਜੁਰ ਦਾ 200 ਮੀਟਰ ’ਚ ਸ਼ਾਨਦਾਰ ਪ੍ਰਦਰਸ਼ਨ :

ਦੂਜੇ ਪਾਸੇ, ਰਾਸ਼ਟਰੀ ਰਿਕਾਰਡ ਧਾਰਕ ਅਨੀਮੇਸ਼ ਕੁਜੁਰ ਨੇ 200 ਮੀਟਰ ਦੌੜ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ 20.45 ਸਕਿੰਟਾਂ ਵਿੱਚ ਜਿੱਤ ਪ੍ਰਾਪਤ ਕੀਤੀ। ਕੁਜੁਰ ਨੇ ਇਸ ਤੋਂ ਪਹਿਲਾਂ 2025 ਫੈਡਰੇਸ਼ਨ ਕੱਪ ਵਿੱਚ 20.40 ਸਕਿੰਟ ਦਾ ਸਮਾਂ ਕੱਢ ਕੇ ਅਮਲਾਨ ਬੋਰਗੋਹੇਨ ਦਾ ਤਿੰਨ ਸਾਲ ਪੁਰਾਣਾ ਰਿਕਾਰਡ (20.52 ਸਕਿੰਟ) ਤੋੜਿਆ ਸੀ।

ਉੱਥੇ ਹੀ ਇਸ ਈਵੈਂਟ ਵਿੱਚ ਬੋਰਗੋਹੇਨ 21.08 ਸਕਿੰਟ ਦੇ ਸਮੇਂ ਨਾਲ ਪੰਜਵੇਂ ਸਥਾਨ 'ਤੇ ਰਹੇ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ