ਟੋਰਾਂਟੋ, 5 ਜੁਲਾਈ (ਹਿੰ.ਸ.)। ਬ੍ਰਾਜ਼ੀਲੀਅਨ ਕਲੱਬ ਫਲੂਮਿਨੈਂਸ ਨੇ ਫੀਫਾ ਕਲੱਬ ਵਿਸ਼ਵ ਕੱਪ 2025 ਵਿੱਚ ਆਪਣੀ ਸ਼ਾਨਦਾਰ ਮੁਹਿੰਮ ਜਾਰੀ ਰੱਖਦੇ ਹੋਏ ਸ਼ੁੱਕਰਵਾਰ ਨੂੰ ਸਾਊਦੀ ਅਰਬ ਦੇ ਅਲ ਹਿਲਾਲ ਨੂੰ 2-1 ਨਾਲ ਹਰਾ ਕੇ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾ ਲਈ।

ਟੂਰਨਾਮੈਂਟ ਦੇ ਅੰਡਰਡੌਗ ਮੰਨੇ ਜਾਣ ਵਾਲੇ ਫਲੂਮਿਨੈਂਸ ਨੇ ਪਹਿਲੇ ਹਾਫ ਵਿੱਚ ਮੈਥੀਅਸ ਮਾਰਟੀਨੇਲੀ ਦੇ ਸ਼ਾਨਦਾਰ ਗੋਲ ਦੀ ਮਦਦ ਨਾਲ ਲੀਡ ਹਾਸਲ ਕੀਤੀ। ਹਾਲਾਂਕਿ, ਦੂਜੇ ਹਾਫ ਦੀ ਸ਼ੁਰੂਆਤ ਵਿੱਚ, ਮਾਰਕਸ ਲਿਓਨਾਰਡੋ ਨੇ ਅਲ ਹਿਲਾਲ ਲਈ ਬਰਾਬਰੀ ਦਾ ਗੋਲ ਕੀਤਾ। ਪਰ ਫਲੂਮਿਨੈਂਸ ਨੇ ਹਾਰ ਨਹੀਂ ਮੰਨੀ ਅਤੇ 70ਵੇਂ ਮਿੰਟ ਵਿੱਚ, ਹਰਕੂਲੀਸ ਨੇ ਫੈਸਲਾਕੁੰਨ ਗੋਲ ਕਰਕੇ ਆਪਣੀ ਟੀਮ ਨੂੰ ਇਤਿਹਾਸਕ ਜਿੱਤ ਦਿਵਾਈ। ਇਹ ਦੋਵਾਂ ਕਲੱਬਾਂ ਵਿਚਕਾਰ ਪਹਿਲਾ ਮੁਕਾਬਲਾ ਸੀ।

ਫਲੂਮਿਨੈਂਸ, ਜਿਸਨੂੰ ਇਸ ਟੂਰਨਾਮੈਂਟ ਵਿੱਚ ਇੱਕ ਕਮਜ਼ੋਰ ਦਾਅਵੇਦਾਰ ਮੰਨਿਆ ਜਾ ਰਿਹਾ ਸੀ, ਹੁਣ ਸੈਮੀਫਾਈਨਲ ਵਿੱਚ ਪਾਲਮੀਰਾਸ ਅਤੇ ਚੇਲਸੀ ਵਿਚਕਾਰ ਕੁਆਰਟਰ ਫਾਈਨਲ ਮੈਚ ਦੇ ਜੇਤੂ ਨਾਲ ਭਿੜੇਗੀ।

ਮੈਚ ਇੱਕ ਭਾਵਨਾਤਮਕ ਪਲ ਨਾਲ ਸ਼ੁਰੂ ਹੋਇਆ, ਜਿੱਥੇ ਖਿਡਾਰੀਆਂ ਅਤੇ ਦਰਸ਼ਕਾਂ ਨੇ ਲਿਵਰਪੂਲ ਦੇ ਪੁਰਤਗਾਲੀ ਫਾਰਵਰਡ ਡਿਓਗੋ ਜੋਟਾ ਅਤੇ ਉਨ੍ਹਾਂ ਦੇ ਛੋਟੇ ਭਰਾ ਆਂਦਰੇ ਸਿਲਵਾ ਦੀ ਕਾਰ ਹਾਦਸੇ ਵਿੱਚ ਹੋਈ ਮੌਤ 'ਤੇ ਇੱਕ ਮਿੰਟ ਦਾ ਮੌਨ ਰੱਖ ਕੇ ਸ਼ਰਧਾਂਜਲੀ ਭੇਟ ਕੀਤੀ।

ਮੈਚ ਦੇ ਮੁੱਖ ਅੰਸ਼:

ਪਹਿਲਾ ਗੋਲ : ਜੋਆਓ ਕੈਂਸਾਲੋ ਦੇ ਡਿਫੈਂਸਿਵ ਲੈਪਸ ਦਾ ਫਾਇਦਾ ਉਠਾਉਂਦੇ ਹੋਏ ਗੈਬਰੀਅਲ ਫੁਏਂਟੇਸ ਨੇ ਮਾਰਟੀਨੇਲੀ ਨੂੰ ਪਾਸ ਦਿੱਤਾ, ਜਿਨ੍ਹਾਂ ਨੇ ਸ਼ਾਨਦਾਰ ਲੈਫਟ ਫੁੱਟ ਸ਼ਾਟ ਨਾਲ ਟਾਪ ਕਾਰਨਰ ਵਿੱਚ ਗੇਂਦ ਪਹੁੰਚਾਈ।

ਬਰਾਬਰੀ ਦਾ ਗੋਲ : ਦੂਜੇ ਹਾਫ ਦੇ ਸ਼ੁਰੂ ਵਿੱਚ ਕਾਲੀਦੂ ਕੂਲੀਬਾਲੀ ਦੇ ਹੈਡਰ ਤੋਂ ਬਾਅਦ ਲਿਓਨਾਰਡੋ ਨੇ ਗੋਲ ਕਰਕੇ ਸਕੋਰ 1-1 ਕਰ ਦਿੱਤਾ।

ਮਹੱਤਵਪੂਰਨ ਗੋਲ : ਹਰਕੂਲੀਸ, ਜੋ ਬੈਂਚ ਤੋਂ ਉਤਰੇ ਨੇ ਸ਼ਾਨਦਾਰ ਟੱਚ ਨਾਲ ਬਾਕਸ ਵਿੱਚ ਪ੍ਰਵੇਸ਼ ਕੀਤਾ ਅਤੇ ਹੇਠਲੇ ਕੋਨੇ ਵਿੱਚ ਸਟੀਕ ਫਿਨਿਸ਼ ਨਾਲ ਗੋਲ ਕਰਕੇ ਟੀਮ ਨੂੰ ਜਿੱਤ ਦਿਵਾਈ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ