ਪਟਿਆਲਾ, 1 ਅਗਸਤ (ਹਿੰ. ਸ.)। ਪਟਿਆਲਾ ਜ਼ਿਲ੍ਹੇ ਦੇ ਪਿੰਡ ਰਵਾਸ ਬ੍ਰਾਹਮਣਾ ਵਿਖੇ ਸੂਰਾਂ ’ਚ ਅਫ਼ਰੀਕੀ ਸਵਾਈਨ ਬੁਖਾਰ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਤੋਂ ਬਾਅਦ ਪ੍ਰਸ਼ਾਸਨ ਨੇ ਤੁਰੰਤ ਕਾਰਵਾਈ ਕਰਦੇ ਹੋਏ ਪਿੰਡ ਅਤੇ ਇਸਦੇ 10 ਕਿਲੋਮੀਟਰ ਤੱਕ ਦੇ ਇਲਾਕੇ ਨੂੰ ਸੀਲ ਕਰ ਦਿੱਤਾ ਹੈ। ਪਸ਼ੂ ਪਾਲਣ ਵਿਭਾਗ ਨੇ ਇਸ ਖੇਤਰ ਨੂੰ “ਸੰਕਰਮਿਤ” ਘੋਸ਼ਿਤ ਕੀਤਾ ਹੈ। ਵਧੀਕ ਡਿਪਟੀ ਕਮਿਸ਼ਨਰ (ਦਿਹਾਤੀ) ਈਸ਼ਾ ਸਿੰਘਲ ਨੇ ਭਾਰਤੀ ਸਿਵਲ ਸੁਰੱਖਿਆ ਕੋਡ, 2023 ਦੀ ਧਾਰਾ 163 ਅਧੀਨ ਸ਼ਕਤੀਆਂ ਵਰਤਦਿਆਂ ਸੂਰਾਂ ਨਾਲ ਸੰਬੰਧਿਤ ਸਾਰੀ ਆਵਾਜਾਈ ’ਤੇ ਪਾਬੰਦੀ ਲਾ ਦਿੱਤੀ ਹੈ। ਇਹ ਰੋਕ 31 ਜੁਲਾਈ ਤੋਂ 30 ਸਤੰਬਰ 2025 ਤੱਕ ਲਾਗੂ ਰਹੇਗੀ।ਨਵੇਂ ਨਿਯਮਾਂ ਅਨੁਸਾਰ ਪ੍ਰਭਾਵਿਤ ਖੇਤਰ ਵਿੱਚੋਂ ਜਾਂ ਇਸ ਵੱਲ ਜ਼ਿੰਦੇ ਜਾਂ ਮਰੇ ਸੂਰ, ਜੰਗਲੀ ਸੂਰ, ਸੂਰ ਦਾ ਮਾਸ, ਚਾਰਾ, ਖੇਤੀਬਾੜੀ ਦੇ ਉਪਕਰਨ ਜਾਂ ਮਸ਼ੀਨਰੀ ਦੀ ਆਵਾਜਾਈ ਸਖ਼ਤ ਮਨਾਹੀ ਹੈ। ਰਾਸ਼ਟਰੀ ਉੱਚ ਸੁਰੱਖਿਆ ਪਸ਼ੂ ਰੋਗ ਸੰਸਥਾ, ਭੋਪਾਲ ਦੀ ਰਿਪੋਰਟ ਮੁਤਾਬਕ, ਰਵਾਸ ਬ੍ਰਾਹਮਣਾ ਪਿੰਡ ਕੇਂਦਰਿਤ ਖੇਤਰ ਨੂੰ 0 ਤੋਂ 1 ਕਿਮੀ ਤੱਕ “ਪ੍ਰਭਾਵਿਤ ਜ਼ੋਨ” ਤੇ 1 ਤੋਂ 10 ਕਿਮੀ ਤੱਕ “ਨਿਗਰਾਨੀ ਜ਼ੋਨ” ਵਜੋਂ ਚਿੰਨ੍ਹਿਤ ਕੀਤਾ ਗਿਆ ਹੈ। ਪ੍ਰਸ਼ਾਸਨ ਲੋਕਾਂ ਨੂੰ ਹਦਾਇਤ ਕਰ ਰਿਹਾ ਹੈ ਕਿ ਉਹ ਹੁਕਮਾਂ ਦੀ ਪਾਲਣਾ ਕਰਕੇ ਰੋਗ ਦੇ ਫੈਲਾਅ ਨੂੰ ਰੋਕਣ ਵਿੱਚ ਸਹਿਯੋਗ ਕਰਨ।

ਹਿੰਦੂਸਥਾਨ ਸਮਾਚਾਰ / ਦਵਿੰਦਰ ਸਿੰਘ