ਨਵੀਂ ਦਿੱਲੀ, 31 ਜੁਲਾਈ (ਹਿੰ.ਸ.)। ਐਚਆਈਐਚ ਹਾਕੀ ਵਿਸ਼ਵ ਕੱਪ 2026 ਦੀ ਸ਼ੁਰੂਆਤ ਵਿੱਚ ਦੋ ਹਫ਼ਤਿਆਂ ਤੋਂ ਵੀ ਘੱਟ ਸਮਾਂ ਬਾਕੀ ਹੈ। ਅਜਿਹੇ ਵਿੱਚ ਭਾਰਤੀ ਪੁਰਸ਼ ਹਾਕੀ ਟੀਮ ਅੰਤਿਮ ਤਿਆਰੀਆਂ ਵਿੱਚ ਰੁੱਝੀ ਹੋਈ ਹੈ। ਟੀਮ ਦੇ ਸਟਾਰ ਫਾਰਵਰਡ ਮਨਦੀਪ ਸਿੰਘ, ਅਭਿਸ਼ੇਕ ਅਤੇ ਸ਼ਿਲਾਨੰਦ ਲਾਕੜਾ ਦਾ ਮੰਨਣਾ ਹੈ ਕਿ ਆਧੁਨਿਕ ਹਾਕੀ ਵਿੱਚ ਸਫਲਤਾ ਲਈ ਫਾਰਵਰਡ ਖਿਡਾਰੀਆਂ ਵਿੱਚ ਚੰਗਾ ਤਾਲਮੇਲ, ਇਕਸਾਰਤਾ ਅਤੇ ਟੀਮ ਵਰਕ ਬਹੁਤ ਜ਼ਰੂਰੀ ਹੈ।

ਆਪਣੇ ਚੌਥੇ ਐਫਆਈਐਚ ਵਿਸ਼ਵ ਕੱਪ ਵਿੱਚ ਹਿੱਸਾ ਲੈਣ ਜਾ ਰਹੇ ਤਜਰਬੇਕਾਰ ਫਾਰਵਰਡ ਮਨਦੀਪ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਨੇ ਆਪਣੇ ਕਰੀਅਰ ਦੇ ਸ਼ੁਰੂ ਵਿੱਚ ਸੀਨੀਅਰ ਖਿਡਾਰੀਆਂ ਤੋਂ ਬਹੁਤ ਕੁਝ ਸਿੱਖਿਆ ਹੈ ਅਤੇ ਹੁਣ ਉਹ ਤਜਰਬਾ ਨੌਜਵਾਨ ਖਿਡਾਰੀਆਂ ਨਾਲ ਸਾਂਝਾ ਕਰ ਰਹੇ ਹਨ। ਉਨ੍ਹਾਂ ਨੇ ਹਾਕੀ ਇੰਡੀਆਂ ਦੇ ਹਵਾਲੇ ਨਾਲ ਕਿਹਾ, ‘‘ਜਦੋਂ ਮੈਂ ਛੋਟਾ ਸੀ, ਮੈਂ ਸੀਨੀਅਰ ਖਿਡਾਰੀਆਂ ਨੂੰ ਬਹੁਤ ਸਾਰੇ ਸਵਾਲ ਪੁੱਛਦਾ ਸੀ ਅਤੇ ਉਨ੍ਹਾਂ ਤੋਂ ਬਹੁਤ ਕੁਝ ਸਿੱਖਿਆ। ਹੁਣ, ਮੈਂ ਉਹ ਤਜਰਬਾ ਨੌਜਵਾਨ ਫਾਰਵਰਡਾਂ ਨਾਲ ਸਾਂਝਾ ਕਰਦਾ ਹਾਂ। ਅਸੀਂ ਦਬਾਅ ਨਾਲ ਨਜਿੱਠਣ, ਸ਼ਾਂਤ ਰਹਿਣ ਅਤੇ ਵੱਡੇ ਮੈਚਾਂ ਵਿੱਚ ਸਹੀ ਫੈਸਲੇ ਲੈਣ ਬਾਰੇ ਚਰਚਾ ਕਰਦੇ ਹਾਂ।

ਮਨਦੀਪ ਦੇ ਅਨੁਸਾਰ, ਗੋਲ-ਸਕੋਰਿੰਗ ਸਫਲਤਾ ਸਿਰਫ਼ ਪ੍ਰਤਿਭਾ ਤੋਂ ਨਹੀਂ ਸਗੋਂ ਚੰਗੀ ਤਰ੍ਹਾਂ ਯੋਜਨਾਬੱਧ ਅਭਿਆਸ ਤੋਂ ਮਿਲਦੀ ਹੈ। ਉਨ੍ਹਾਂ ਨੇ ਕਿਹਾ, ਫਾਰਵਰਡਾਂ ਲਈ ਸਾਡੇ ਅਭਿਆਸ ਸੈਸ਼ਨ ਬਹੁਤ ਖਾਸ ਹਨ। ਅਸੀਂ ਡੀ ਦੇ ਅੰਦਰ ਤਾਲਮੇਲ ਬਣਾਉਣ, ਅੰਤਿਮ ਪਾਸ ਨੂੰ ਸਹੀ ਢੰਗ ਨਾਲ ਪ੍ਰਾਪਤ ਕਰਨ ਅਤੇ ਹਰ ਹਮਲੇ ਨੂੰ ਅੰਜਾਮ ਦੇਣ 'ਤੇ ਅਣਥੱਕ ਮਿਹਨਤ ਕਰਦੇ ਹਾਂ। ਸਾਡਾ ਉਦੇਸ਼ ਹਰ ਵਾਰ ਡੀ ਵਿੱਚ ਦਾਖਲ ਹੋਣ ’ਤੇ ਗੋਲ ਕਰਨਾ, ਗੋਲ 'ਤੇ ਸ਼ਾਟ ਲਗਉਣਾ ਜਾਂ ਪੈਨਲਟੀ ਕਾਰਨਰ ਹਾਸਲ ਕਰਨਾ ਹੁੰਦਾ ਹੈ।

ਉਨ੍ਹਾਂ ਨੇ ਅੱਗੇ ਕਿਹਾ, ਇੱਕ ਚੰਗਾ ਸਟ੍ਰਾਈਕਰ ਸਿਰਫ਼ ਗੋਲ ਕਰਨ ਬਾਰੇ ਨਹੀਂ ਸੋਚਦਾ। ਹਾਕੀ ਟੀਮ ਦੀ ਖੇਡ ਹੈ, ਅਤੇ ਸਾਥੀਆਂ ਨਾਲ ਸਮਝ ਜਿੰਨੀ ਬਿਹਤਰ ਹੋਵੇਗੀ, ਪ੍ਰਦਰਸ਼ਨ ਓਨਾ ਹੀ ਪ੍ਰਭਾਵਸ਼ਾਲੀ ਹੋਵੇਗਾ।

ਆਪਣੇ ਪਹਿਲੇ ਐਫਆਈਐਚ ਵਿਸ਼ਵ ਕੱਪ ਲਈ ਤਿਆਰੀ ਕਰ ਰਹੇ ਸ਼ਿਲਾਨੰਦ ਲਾਕੜਾ ਨੇ ਕਿਹਾ ਕਿ ਸੀਨੀਅਰ ਖਿਡਾਰੀਆਂ, ਖਾਸ ਕਰਕੇ ਮਨਦੀਪ ਸਿੰਘ ਦਾ ਮਾਰਗਦਰਸ਼ਨ ਬਹੁਤ ਮਦਦਗਾਰ ਰਿਹਾ ਹੈ। ਉਨ੍ਹਾਂ ਨੇ ਕਿਹਾ, ਜਦੋਂ ਵੀ ਮੈਂ ਕੋਈ ਗਲਤੀ ਕਰਦਾ ਹਾਂ, ਤਾਂ ਸੀਨੀਅਰ ਖਿਡਾਰੀ ਮੈਨੂੰ ਦੱਸਦੇ ਹਨ ਕਿ ਮੈਨੂੰ ਕਿੱਥੇ ਸੁਧਾਰ ਕਰਨ ਦੀ ਲੋੜ ਹੈ। ਮਨਦੀਪ ਭਾਈ ਹਮੇਸ਼ਾ ਮੈਨੂੰ ਉਤਸ਼ਾਹਿਤ ਕਰਦੇ ਹਨ ਅਤੇ ਮੈਨੂੰ ਸਹੀ ਦਿਸ਼ਾ ਦਿਖਾਉਂਦੇ ਹਨ। ਉਨ੍ਹਾਂ ਦੀ ਸਲਾਹ ਮੈਨੂੰ ਲਗਾਤਾਰ ਸਿੱਖਣ ਅਤੇ ਸੁਧਾਰ ਕਰਨ ਵਿੱਚ ਮਦਦ ਕਰਦੀ ਹੈ।

ਲਾਕੜਾ ਦਾ ਮੰਨਣਾ ਹੈ ਕਿ ਆਧੁਨਿਕ ਹਾਕੀ ਵਿੱਚ, ਇੱਕ ਫਾਰਵਰਡ ਦੀ ਭੂਮਿਕਾ ਹੁਣ ਗੋਲ ਕਰਨ ਤੱਕ ਸੀਮਤ ਨਹੀਂ ਰਹਿ ਗਈ ਹੈ। ਉਨ੍ਹਾਂ ਨੇ ਕਿਹਾ, ਮੈਂ ਹਮੇਸ਼ਾ ਟੀਮ ਲਈ ਹਰ ਸੰਭਵ ਤਰੀਕੇ ਨਾਲ ਯੋਗਦਾਨ ਪਾਉਣ ਦੀ ਕੋਸ਼ਿਸ਼ ਕਰਦਾ ਹਾਂ। ਭਾਵੇਂ ਇਹ ਮੌਕੇ ਪੈਦਾ ਕਰਨ, ਗੋਲ ਕਰਨਾ ਹੋਵੇ ਜਾਂ ਟੈਕਲ ਬਣਾਉਣ ਦੀ ਗੱਲ ਹੋਵੇ, ਮੈਂ ਹਰ ਪਹਿਲੂ ਵਿੱਚ ਯੋਗਦਾਨ ਪਾਉਣ ਦੀ ਕੋਸ਼ਿਸ਼ ਕਰਦਾ ਹਾਂ। ਹੁਣ, ਫਾਰਵਰਡ ਵੀ ਟੀਮ ਦੀ ਰੱਖਿਆ ਦੀ ਪਹਿਲੀ ਲਾਈਨ ਹਨ। ਜੇਕਰ ਅਸੀਂ ਚੰਗੀ ਤਰ੍ਹਾਂ ਡਿਫੈਂਸ ਕਰਦੇ ਹਾਂ, ਤਾਂ ਡਿਫੈਂਡਰਾਂ ਅਤੇ ਮਿਡਫੀਲਡਰਾਂ ਦਾ ਕੰਮ ਆਸਾਨ ਹੋ ਜਾਂਦਾ ਹੈ।

ਭਾਰਤੀ ਟੀਮ ਦੇ ਭਰੋਸੇਮੰਦ ਗੋਲ ਸਕੋਰਰ ਅਭਿਸ਼ੇਕ ਨੇ ਕਿਹਾ ਕਿ ਉਨ੍ਹਾਂ ਦੀ ਇਕਸਾਰਤਾ ਦਾ ਰਾਜ਼ ਸਰੀਰਕ ਅਤੇ ਮਾਨਸਿਕ ਤੌਰ 'ਤੇ ਸਖ਼ਤ ਤਿਆਰੀ ਹੈ। ਉਨ੍ਹਾਂ ਨੇ ਕਿਹਾ, ‘‘ਇੱਕ ਸਟਰਾਈਕਰ ਦੀ ਇਕਸਾਰਤਾ ਗੇਂਦ ਤੋਂ ਬਾਹਰ ਉਸਦੀਆਂ ਗਤੀਵਿਧੀਆਂ ਨਾਲ ਸ਼ੁਰੂ ਹੁੰਦੀ ਹੈ। ਆਫ-ਦਿ-ਬਾਲ ਮੂਵਮੈਂਟ ਅਤੇ ਪ੍ਰੇਸਿੰਗ ਬਹੁਤ ਮਹੱਤਵਪੂਰਨ ਹਨ ਕਿਉਂਕਿ ਫਾਰਵਰਡ ਟੀਮ ਦੀ ਰੱਖਿਆ ਦੀ ਪਹਿਲੀ ਲਾਈਨ ਹੁੰਦੇ ਹਨ। ਇੱਕ ਵਾਰ ਜਦੋਂ ਉਹ ਗੇਂਦ ਪ੍ਰਾਪਤ ਕਰ ਲੈਂਦੇ ਹਨ, ਤਾਂ ਇਹ ਸਾਡੀ ਜ਼ਿੰਮੇਵਾਰੀ ਹੁੰਦੀ ਹੈ ਕਿ ਅਸੀਂ ਦੂਜੇ ਫਾਰਵਰਡਾਂ ਨਾਲ ਤਾਲਮੇਲ ਬਣਾਈਏ ਅਤੇ ਫਿਰ ਹਮਲੇ ਨੂੰ ਗੋਲ, ਸ਼ਾਟ ਜਾਂ ਪੈਨਲਟੀ ਕਾਰਨਰ ਵਿੱਚ ਬਦਲੀਏ।’‘

ਮਾਨਸਿਕ ਤਾਕਤ ਬਾਰੇ ਉਨ੍ਹਾਂ ਨੇ ਕਿਹਾ, ਡੀ ਦੇ ਅੰਦਰ ਸੰਜਮ ਅਭਿਆਸ ਤੋਂ ਆਉਂਦਾ ਹੈ। ਜੇਕਰ ਤੁਸੀਂ ਸਿਖਲਾਈ ਵਿੱਚ ਸਖ਼ਤ ਮਿਹਨਤ ਨਹੀਂ ਕਰਦੇ, ਤਾਂ ਤੁਸੀਂ ਦਬਾਅ ਹੇਠ ਸਹੀ ਫੈਸਲੇ ਨਹੀਂ ਲੈ ਸਕੋਗੇ। ਅਸੀਂ ਧਿਆਨ ਅਤੇ ਅਨੁਭਵ ਰਾਹੀਂ ਮਾਨਸਿਕ ਤੌਰ 'ਤੇ ਵੀ ਆਪਣੇ ਆਪ ਨੂੰ ਮਜ਼ਬੂਤ ਕਰਦੇ ਹਾਂ। ਜਿੰਨਾ ਜ਼ਿਆਦਾ ਅਸੀਂ ਖੇਡਦੇ ਹਾਂ, ਓਨਾ ਹੀ ਅਸੀਂ ਮੁਸ਼ਕਲ ਹਾਲਾਤਾਂ ਵਿੱਚ ਸ਼ਾਂਤ ਰਹਿ ਸਕਦੇ ਹਾਂ।

ਐਫਆਈਐਚ ਹਾਕੀ ਵਿਸ਼ਵ ਕੱਪ 2026 ਦਾ ਆਯੋਜਨ 15 ਤੋਂ 30 ਅਗਸਤ ਤੱਕ ਬੈਲਜੀਅਮ ਅਤੇ ਨੀਦਰਲੈਂਡ ਵਿੱਚ ਹੋਵੇਗਾ। ਭਾਰਤ ਨੂੰ ਪੂਲ ਡੀ ਵਿੱਚ ਰੱਖਿਆ ਗਿਆ ਹੈ, ਜਿੱਥੇ ਇਹ 15 ਅਗਸਤ ਨੂੰ ਵੇਲਜ਼ ਵਿਰੁੱਧ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰੇਗਾ। ਇਸ ਤੋਂ ਬਾਅਦ, ਭਾਰਤੀ ਟੀਮ ਇੰਗਲੈਂਡ ਅਤੇ ਕੱਟੜ ਵਿਰੋਧੀ ਪਾਕਿਸਤਾਨ ਦਾ ਸਾਹਮਣਾ ਕਰੇਗੀ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ