ਮੈਲਬੌਰਨ, 18 ਅਗਸਤ (ਹਿੰ.ਸ.)। ਬੰਗਲਾਦੇਸ਼ ਖਿਲਾਫ ਡਾਰਵਿਨ ਟੈਸਟ ਵਿੱਚ ਸ਼ਰਮਨਾਕ ਹਾਰ ਤੋਂ ਬਾਅਦ, ਆਸਟ੍ਰੇਲੀਆ ਨੇ ਦੂਜੇ ਅਤੇ ਆਖਰੀ ਟੈਸਟ ਲਈ ਆਪਣੀ ਟੀਮ ਵਿੱਚ ਇੱਕ ਬਦਲਾਅ ਕੀਤਾ ਹੈ। ਓਪਨਰ ਜੇਕ ਵੇਦਰਲਡ ਨੂੰ ਟੀਮ ਵਿੱਚੋਂ ਬਾਹਰ ਕਰ ਦਿੱਤਾ ਗਿਆ ਹੈ, ਜਦੋਂ ਕਿ ਖੱਬੇ ਹੱਥ ਦੇ ਬੱਲੇਬਾਜ਼ ਮੈਥਿਊ ਰੇਨਸ਼ਾ ਨੂੰ ਉਨ੍ਹਾਂ ਦੀ ਜਗ੍ਹਾ ਸ਼ਾਮਲ ਕੀਤਾ ਗਿਆ ਹੈ।ਡਾਰਵਿਨ ਵਿੱਚ ਖੇਡੇ ਗਏ ਪਹਿਲੇ ਟੈਸਟ ਵਿੱਚ ਆਸਟ੍ਰੇਲੀਆ ਨੂੰ ਬੰਗਲਾਦੇਸ਼ ਦੇ ਹੱਥੋਂ ਨੌਂ ਵਿਕਟਾਂ ਦੀ ਕਰਾਰੀ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਇਸ ਹਾਰ ਨੇ ਟੀਮ ਦੀ ਬੱਲੇਬਾਜ਼ੀ 'ਤੇ ਗੰਭੀਰ ਸਵਾਲ ਖੜ੍ਹੇ ਕੀਤੇ ਹਨ। ਵੇਦਰਲਡ ਪਹਿਲੇ ਟੈਸਟ ਵਿੱਚ ਸਿਰਫ਼ 23 ਅਤੇ ਜ਼ੀਰੋ ਦੌੜਾਂ ਹੀ ਬਣਾ ਸਕੇ ਸਨ। ਵੇਦਰਲਡ ਨੇ ਪਿਛਲੇ ਸਾਲ ਘਰੇਲੂ ਐਸ਼ੇਜ਼ ਲੜੀ ਦੌਰਾਨ ਆਪਣਾ ਅੰਤਰਰਾਸ਼ਟਰੀ ਡੈਬਿਊ ਕੀਤਾ ਸੀ। ਛੇ ਟੈਸਟਾਂ ਵਿੱਚ, ਉਨ੍ਹਾਂ ਨੇ ਹੁਣ ਤੱਕ 20.36 ਦੀ ਔਸਤ ਨਾਲ 224 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ ਸਿਰਫ਼ ਇੱਕ ਅਰਧ ਸੈਂਕੜਾ ਸ਼ਾਮਲ ਹੈ।

ਕ੍ਰਿਕਟ ਆਸਟ੍ਰੇਲੀਆ ਦੇ ਹਵਾਲੇ ਨਾਲ ਮੁੱਖ ਕੋਚ ਐਂਡਰਿਊ ਮੈਕਡੋਨਲਡ ਨੇ ਵੈਦਰਲਡ ਦੀ ਤਕਨੀਕ ਵਿੱਚ ਕੀਤੇ ਗਏ ਬਦਲਾਅ ਬਾਰੇ ਕਿਹਾ ਕਿ ਬੱਲੇਬਾਜ਼ ਨੇ ਬੱਲੇਬਾਜ਼ੀ ਦੌਰਾਨ ਆਪਣੀ ਖੜ੍ਹੀ ਸਥਿਤੀ ਅਤੇ ਗਤੀ ਵਿੱਚ ਕੁਝ ਬਦਲਾਅ ਕੀਤੇ ਸਨ। ਹਾਲਾਂਕਿ, ਉਨ੍ਹਾਂ ਨੇ ਮੰਨਿਆ ਕਿ ਇੰਨੇ ਛੋਟੇ ਸੈਂਪਲ ਸਾਈਜ਼ ਦੇ ਆਧਾਰ 'ਤੇ, ਇਹ ਕਹਿਣਾ ਮੁਸ਼ਕਲ ਹੈ ਕਿ ਅੰਤਰਰਾਸ਼ਟਰੀ ਦਬਾਅ ਹੇਠ ਬਦਲਾਅ ਕਿੰਨੇ ਪ੍ਰਭਾਵਸ਼ਾਲੀ ਹੋਣਗੇ। ਆਸਟ੍ਰੇਲੀਆ ਦੇ ਲਈ ਰੇਨਸ਼ਾ ਨੂੰ ਸ਼ਾਮਿਲ ਕਰਨਾ ਇੱਕ ਰਵਾਇਤੀ ਵਿਕਲਪ ਮੰਨਿਆ ਜਾ ਰਿਹਾ ਹੈ। ਮੈਕੇ ਵਿੱਚ ਟੈਸਟ ਡੈਬਿਊ ਕਰਨ ਜਾ ਰਹੇ ਇਸ ਮੈਦਾਨ ’ਤੇ ਰੇਨਸ਼ਾ ਪਹਿਲਾਂ ਹੀ ਦੋ ਪਹਿਲੀ ਸ਼੍ਰੇਣੀ ਸੈਂਕੜੇ ਲਗਾ ਚੁੱਕੇ ਹਨ। 30 ਸਾਲਾ ਰੇਨਸ਼ਾ ਨੇ ਆਖਰੀ ਵਾਰ ਲਗਭਗ ਤਿੰਨ ਸਾਲ ਪਹਿਲਾਂ ਭਾਰਤ ਵਿਰੁੱਧ ਟੈਸਟ ਖੇਡਿਆ ਸੀ। ਉਨ੍ਹਾਂ ਨੇ 14 ਟੈਸਟਾਂ ਵਿੱਚ 24 ਪਾਰੀਆਂ ਵਿੱਚ 645 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ ਇੱਕ ਸੈਂਕੜਾ ਅਤੇ ਤਿੰਨ ਅਰਧ ਸੈਂਕੜੇ ਸ਼ਾਮਲ ਹਨ। ਉਨ੍ਹਾਂ ਦੀ ਬੱਲੇਬਾਜ਼ੀ ਔਸਤ 29.31 ਰਹੀ ਹੈ।

ਹਾਲਾਂਕਿ, ਘਰੇਲੂ ਸ਼ੈਫੀਲਡ ਸ਼ੀਲਡ ਵਿੱਚ ਰੇਨਸ਼ਾ ਦਾ ਪ੍ਰਦਰਸ਼ਨ ਲਗਾਤਾਰ ਚੰਗਾ ਰਿਹਾ ਹੈ। ਉਨ੍ਹਾਂ ਨੇ ਕਵੀਂਸਲੈਂਡ ਲਈ 10 ਪਾਰੀਆਂ ਵਿੱਚ ਲਗਭਗ 50 ਦੀ ਔਸਤ ਨਾਲ 499 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ ਤਿੰਨ ਸੈਂਕੜੇ ਅਤੇ ਇੱਕ ਅਰਧ ਸੈਂਕੜਾ ਸ਼ਾਮਲ ਹੈ।

ਇੰਗਲਿਸ ਵੀ ਬਣ ਸਕਦੇ ਹਨ ਓਪਨਰ : ਆਸਟ੍ਰੇਲੀਆ ਕੋਲ ਟ੍ਰੈਵਿਸ ਹੈੱਡ ਦੇ ਨਾਲ ਪਾਰੀ ਦੀ ਸ਼ੁਰੂਆਤ ਕਰਨ ਲਈ ਜੋਸ਼ ਇੰਗਲਿਸ ਦਾ ਵਿਕਲਪ ਵੀ ਮੌਜੂਦ ਹੈ। ਪੰਜ ਟੈਸਟ ਖੇਡ ਚੁੱਕੇ ਇਸ ਵਿਕਟਕੀਪਰ-ਬੱਲੇਬਾਜ਼ ਨੇ ਆਮ ਤੌਰ 'ਤੇ ਸ਼ੈਫੀਲਡ ਸ਼ੀਲਡ ਵਿੱਚ ਮੱਧ ਕ੍ਰਮ ਵਿੱਚ ਬੱਲੇਬਾਜ਼ੀ ਕੀਤੀ ਹੈ। ਹਾਲਾਂਕਿ, ਪਿਛਲੇ ਨਵੰਬਰ ਵਿੱਚ ਇੰਗਲੈਂਡ ਲਾਇਨਜ਼ ਵਿਰੁੱਧ 40 ਅਤੇ 125 ਦੌੜਾਂ ਦੀ ਉਨ੍ਹਾਂ ਦੀ ਨਾਬਾਦ ਪਾਰੀ ਨੇ ਉਨ੍ਹਾਂ ਨੂੰ ਸਿਖਰਲੇ ਕ੍ਰਮ ਵਿੱਚ ਮੌਕਾ ਦਿੱਤੇ ਜਾਣ ਦੀਆਂ ਸੰਭਾਵਨਾਵਾਂ ਵਧਾ ਦਿੱਤੀਆਂ।

ਆਸਟ੍ਰੇਲੀਆ ਇਸ ਸਮੇਂ ਬੰਗਲਾਦੇਸ਼ ਵਿਰੁੱਧ ਦੋ ਮੈਚਾਂ ਦੀ ਟੈਸਟ ਲੜੀ ਵਿੱਚ 0-1 ਨਾਲ ਪਿੱਛੇ ਹੈ। ਦੋਵਾਂ ਟੀਮਾਂ ਵਿਚਕਾਰ ਦੂਜਾ ਅਤੇ ਆਖਰੀ ਟੈਸਟ 22 ਅਗਸਤ ਤੋਂ ਮੈਕੇ ਵਿੱਚ ਖੇਡਿਆ ਜਾਵੇਗਾ।

ਆਸਟ੍ਰੇਲੀਆ ਟੀਮ: ਪੈਟ ਕਮਿੰਸ (ਕਪਤਾਨ), ਸਕਾਟ ਬੋਲੈਂਡ, ਐਲੇਕਸ ਕੈਰੀ, ਕੈਮਰਨ ਗ੍ਰੀਨ, ਜੋਸ਼ ਹੇਜ਼ਲਵੁੱਡ, ਟ੍ਰੈਵਿਸ ਹੈੱਡ, ਜੋਸ਼ ਇੰਗਲਿਸ, ਮਾਰਨਸ ਲਾਬੂਸ਼ੇਨ, ਨਾਥਨ ਲਿਓਨ, ਮੈਥਿਊ ਰੇਨਸ਼ਾ, ਸਟੀਵ ਸਮਿਥ, ਮਿਸ਼ੇਲ ਸਟਾਰਕ, ਬਿਊ ਵੈਬਸਟਰ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ