ਮਹਿਲ ਕਲਾਂ, 25 ਨਵੰਬਰ (ਹਿੰ. ਸ.)। ਮਹਿਲ ਕਲਾਂ ਦੇ ਕਿਸਾਨ ਨੇ ਆਪਣੇ ਖੇਤ ਦੀ ਪਰਾਲੀ ਨੂੰ ਪੂੰਜੀ ਸਾਬਿਤ ਕਰਦਿਆਂ ਉਦਾਹਰਨ ਪੇਸ਼ ਕੀਤੀ ਹੈ। ਜ਼ਿਲ੍ਹੇ ਦੇ ਪਿੰਡ ਵਜੀਦਕੇ ਕਲਾਂ ਦੇ ਅਗਾਂਹਵਧੂ ਕਿਸਾਨ ਬਲਜਿੰਦਰ ਸਿੰਘ ਨੇ ਸਬਸਿਡੀ 'ਤੇ ਮਿਲੇ ਬੇਲਰ ਦੀ ਸਹਾਇਤਾ ਨਾਲ ਲਗਭਗ 550 ਏਕੜ ਰਕਬੇ ਵਿੱਚੋਂ ਤਕਰੀਬਨ 15000 ਕੁਇੰਟਲ ਪਰਾਲੀ ਇੱਕਠੀ ਕੀਤੀ ਹੈ। ਇਸ ਪਰਾਲੀ ਨੂੰ ਸੁਚੱਜੇ ਢੱਗ ਨਾਲ ਪਰਾਲੀ ਦੀ ਸੰਭਾਲ ਕਰਕੇ ਇਸਨੂੰ ਕਮਾਈ ਦਾ ਸਾਧਨ ਬਣਾਇਆ ਹੈ ਜੋਕਿ ਦੂਸਰੇ ਕਿਸਾਨਾਂ ਲਈ ਇੱਕ ਪ੍ਰੇਰਣਾਦਾਇਕ ਉਦਾਹਰਣ ਹੈ।

ਕਿਸਾਨ 4 ਏਕੜ ਵਿੱਚ ਖੇਤੀ ਕਰਦਾ ਹੈ ਅਤੇ ਪਿਛਲੇ ਕਈ ਸਾਲਾਂ ਤੋਂ ਪਰਾਲੀ ਨੂੰ ਅੱਗ ਨਹੀਂ ਲਗਾਈ। ਪਹਿਲਾਂ ਉਹ ਪਰਾਲੀ ਦੀ ਤੂੜੀ ਬਣਾਉਂਦੇ ਸਨ ਤੇ ਸਾਲ 20218 ਵਿੱਚ ਉਸਨੂੰ ਸੁਪਰਸੀਡਰ 'ਤੇ ਸਬਸਿਡੀ ਮਿਲੀ, ਉਸ ਤੋਂ ਬਾਅਦ ਉਹ ਸੁਪਰਸੀਡਰ ਨਾਲ ਕਣਕ ਦੀ ਬਿਜਾਈ ਕਰ ਰਹੇ ਹਨ। ਇਸ ਸਾਲ ਉਸ ਨੂੰ ਬੇਲਰ ਸਬਸਿਡੀ 'ਤੇ ਨਿਕਲਿਆ ਹੈ ਜਿਸ ਨਾਲ ਉਸਨੇ ਆਪਣੇ ਖੇਤ ਦੇ ਨਾਲ ਨਾਲ ਹੋਰਨਾਂ ਪਿੰਡਾਂ ਦੇ ਕਿਸਾਨਾਂ ਦੇ ਲਗਭਗ 550 ਏਕੜ ਵਿੱਚੋਂ ਲਗਭਗ 15000 ਕੁਇੰਟਲ ਪਰਾਲੀ ਇੱਕਠੀ ਕੀਤੀ।

ਉਸਨੇ ਆਪਣੀ ਜ਼ਮੀਨ ਵਿੱਚ ਪਰਾਲੀ ਦਾ ਡੰਪ ਲਗਾ ਕੇ ਪਰਾਲੀ ਸਟੋਰ ਕੀਤੀ ਹੈ, ਇਸ ਨਾਲ ਉਹਨਾਂ ਦਾ ਪਰਾਲੀ ਸਟੋਰੇਜ ਦਾ ਖਰਚਾ ਘਟਿਆ ਤੇ ਉਹ ਜ਼ਿਆਦਾ ਏਰੀਆ ਕਵਰ ਕਰਕੇ ਜ਼ਿਆਦਾ ਮਾਤਰਾ ਵਿੱਚ ਪਰਾਲੀ ਇੱਕਠੀ ਕਰਕੇ ਜ਼ਿਆਦਾ ਲਾਭ ਹੋਇਆ। ਡਿਪਟੀ ਕਮਿਸ਼ਨਰ ਬਰਨਾਲਾ ਟੀ ਬੈਨਿਥ ਨੇ ਕਿਸਾਨ ਦੀ ਸ਼ਲਾਘਾ ਕੀਤੀ। ਓਨ੍ਹਾਂ ਕਿਹਾ ਕਿ ਜ਼ਿਲ੍ਹੇ ਦੇ ਕਿਸਾਨ ਜੇਕਰ ਬਲਜਿੰਦਰ ਸਿੰਘ ਵਾਂਗ ਬੇਲਰ, ਰੀਪਰ, ਮਲਚਰ, ਹੈਪੀਸੀਡਰ, ਸੁਪਰ ਸੀਡਰ ਦੀ ਵਰਤੋਂ ਸਮੇਂ ਸਿਰ ਤੇ ਸਹੀ ਤਰੀਕੇ ਨਾਲ ਕਰਨ ਤਾਂ ਪਰਾਲੀ ਨੂੰ ਅੱਗ ਲਗਾਉਣ ਦੀ ਬਜਾਇ ਇਸ ਨੂੰ ਪੂੰਜੀ ਵਜੋਂ ਵਰਤ ਕੇ ਵਾਧੂ ਆਮਦਨ ਵਧ ਸਕਦੇ ਹਨ। ਡਿਪਟੀ ਕਮਿਸ਼ਨਰ ਨੇ ਅਪੀਲ ਕੀਤੀ ਕਿ ਸਾਰੇ ਕਿਸਾਨ ਪਰਾਲੀ ਨੂੰ ਬੋਝ ਨਹੀਂ, ਸਗੋਂ ਪੂੰਜੀ ਸਮਝ ਕੇ ਇਸਦੀ ਸਹੀ ਸੰਭਾਲ ਕਰਨ। ਇਸ ਨਾਲ ਨਾ ਸਿਰਫ਼ ਵਾਤਾਵਰਣ ਦੀ ਸੁਰੱਖਿਆ ਹੁੰਦੀ ਹੈ, ਸਗੋਂ ਖੇਤੀਬਾੜੀ ਵਿੱਚ ਨਵੇਂ ਕਮਾਈ ਦੇ ਰਾਹ ਵੀ ਖੁੱਲ੍ਹਦੇ ਹਨ।

ਹਿੰਦੂਸਥਾਨ ਸਮਾਚਾਰ / ਦਵਿੰਦਰ ਸਿੰਘ