ਲੁਧਿਆਣਾ, 13 ਦਸੰਬਰ (ਹਿੰ. ਸ.)। ਪੰਜਾਬ ਦੇ ਉਦਯੋਗ ਅਤੇ ਵਪਾਰ ਮੰਤਰੀ ਸੰਜੀਵ ਅਰੋੜਾ ਨੇ ਮਜ਼ਬੂਤ ਰਾਸ਼ਟਰੀ ਅਰਥਵਿਵਸਥਾ ਦੀ ਨਿਰਮਾਣ ਪ੍ਰਕਿਰਿਆ ਵਿੱਚ ਚਾਰਟਡ ਅਕਾਊਂਟੈਂਟਸ (ਸੀਏਜ਼) ਦੀ ਕੇਂਦਰੀ ਭੂਮਿਕਾ ਉਤੇ ਜ਼ੋਰ ਦਿੰਦਿਆਂ ਵਿੱਤੀ ਪਾਰਦਰਸ਼ਤਾ ਅਤੇ ਦੱਖਲਦਾਰੀ ਨੂੰ ਹੋਰ ਮਜ਼ਬੂਤ ਕਰਨ ਲਈ ਕ੍ਰਿਤ੍ਰਿਮ ਬੁੱਧੀਮੱਤਾ (ਏਆਈ) ਅਤੇ ਆਧੁਨਿਕ ਸੂਚਨਾ ਤਕਨਾਲੋਜੀ ਟੂਲਾਂ ਨੂੰ ਅਪਣਾਉਣ ਦੀ ਅਪੀਲ ਕੀਤੀ।
ਲੁਧਿਆਣਾ ਵਿਖੇ ਇੰਸਟੀਚਿਊਟ ਆਫ਼ ਚਾਰਟਡ ਅਕਾਊਂਟੈਂਟਸ ਆਫ਼ ਇੰਡੀਆ (ਆਈਸੀਏਆਈ) ਵੱਲੋਂ ਆਯੋਜਿਤ ਦੋ ਦਿਨਾਂ ਰਾਸ਼ਟਰੀ ਕਾਨਫਰੰਸ ਦੀ ਪ੍ਰਧਾਨਗੀ ਕਰਦੇ ਹੋਏ ਮੰਤਰੀ ਨੇ ਕਿਹਾ ਕਿ ਜਦੋਂ ਵੀ ਸਰਕਾਰ ਲੋਕ-ਹਿਤ ਵਿੱਚ ਨੀਤੀਆਂ ਜਾਂ ਯੋਜਨਾਵਾਂ ਤਿਆਰ ਕਰਦੀ ਹੈ, ਤਦ ਚਾਰਟਡ ਅਕਾਊਂਟੈਂਟਸ ਦੀ ਭੂਮਿਕਾ ਅਟੁੱਟ ਹੁੰਦੀ ਹੈ। ਉਨ੍ਹਾਂ ਦੱਸਿਆ ਕਿ ਵਿੱਤੀ ਮੁਲਾਂਕਣ ਲਈ ਸੀਏਜ਼ ਦੀ ਲੋੜ ਹੁੰਦੀ ਹੈ ਤਾਂ ਜੋ ਸਰਕਾਰੀ ਸਕੀਮਾਂ ਦੇ ਲਾਭ ਸਹੀ ਲਾਭਪਾਤਰੀਆਂ ਤੱਕ ਪਹੁੰਚ ਸਕਣ। ਉਨ੍ਹਾਂ ਕਿਹਾ ਕਿ ਬਜਟ ਤਿਆਰੀ, ਕਮੇਟੀ ਕਾਰਜ ਅਤੇ ਦਿਨਚਰਿਆ ਪ੍ਰਸ਼ਾਸਨ ਸਮੇਤ ਨੀਤੀ-ਨਿਰਮਾਣ ਦੇ ਹਰ ਪੜਾਅ ਵਿੱਚ ਸੀਏਜ਼ ਅਹਿਮ ਭੂਮਿਕਾ ਨਿਭਾਂਦੇ ਹਨ।
ਸੰਜੀਵ ਅਰੋੜਾ ਨੇ ਚਾਰਟਡ ਅਕਾਊਂਟੈਂਟਸ ਨੂੰ ਸਲਾਹ ਦਿੱਤੀ ਕਿ ਗਾਹਕਾਂ ਦਾ ਡਾਟਾ ਹਾਰਡ ਡਿਸਕ ਵਰਗੇ ਭੌਤਿਕ ਸਟੋਰੇਜ ਉਪਕਰਨਾਂ ਦੀ ਬਜਾਏ ਸੁਰੱਖਿਅਤ ਕਲਾਊਡ ਪਲੇਟਫਾਰਮਾਂ ’ਤੇ ਸਟੋਰ ਕੀਤਾ ਜਾਵੇ, ਕਿਉਂਕਿ ਭੌਤਿਕ ਉਪਕਰਨ ਚੋਰੀ ਜਾਂ ਨੁਕਸਾਨ ਲਈ ਅਸੁਰੱਖਿਅਤ ਹੁੰਦੇ ਹਨ। ਉਨ੍ਹਾਂ ਸਾਂਝਾ ਕੀਤਾ ਕਿ ਉਨ੍ਹਾਂ ਦੇ ਉਦਯੋਗ ਅਤੇ ਬਿਜਲੀ ਵਿਭਾਗ ਨੀਤੀਆਂ ਅਤੇ ਯੋਜਨਾਵਾਂ ਨੂੰ ਹੋਰ ਸੁਧਾਰਨ ਲਈ ਨਿਰੰਤਰ ਤੌਰ ’ਤੇ ਚਾਰਟਡ ਅਕਾਊਂਟੈਂਟਸ ਦੀ ਸੇਵਾਵਾਂ ਲੈਂਦੇ ਹਨ।
ਮੰਤਰੀ ਨੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠ ਜਾਪਾਨ ਅਤੇ ਦੱਖਣੀ ਕੋਰੀਆ ਦੇ ਹਾਲੀਆ ਉੱਚ ਪੱਧਰੀ ਦੌਰੇ ਦਾ ਵੀ ਜ਼ਿਕਰ ਕੀਤਾ, ਜਿਸ ਦੌਰਾਨ ਪ੍ਰਮੁੱਖ ਕੰਪਨੀਆਂ ਨਾਲ ਕਈ ਕਰੋੜ ਰੁਪਏ ਦੇ ਸਮਝੌਤਾ ਯਾਦਾਸ਼ਤਾਂ (ਐਮਓਯੂਜ਼) ਸਾਈਨ ਕੀਤੀਆਂ ਗਈਆਂ।
ਨੌਜਵਾਨ ਚਾਰਟਡ ਅਕਾਊਂਟੈਂਟਸ ਨੂੰ ਸੰਬੋਧਨ ਕਰਦੇ ਹੋਏ ਉਨ੍ਹਾਂ ਨੇ ਜਾਪਾਨੀ ਭਾਸ਼ਾ ਸਿੱਖਣ ਲਈ ਪ੍ਰੇਰਿਤ ਕੀਤਾ ਅਤੇ ਕਿਹਾ ਕਿ ਜਾਪਾਨ ਵਿੱਚ ਭਾਸ਼ਾ ਵਿੱਚ ਨਿਪੁੰਨ ਪੇਸ਼ੇਵਰਾਂ ਲਈ ਰੋਜ਼ਗਾਰ ਦੇ ਵਿਸ਼ਾਲ ਮੌਕੇ ਉਪਲਬਧ ਹਨ। ਸੰਜੀਵ ਅਰੋੜਾ ਨੇ ਲੁਧਿਆਣਾ ਵਿੱਚ ਰਾਸ਼ਟਰੀ ਕਾਨਫਰੰਸ ਦੇ ਸੁਚੱਜੇ ਆਯੋਜਨ ਦੀ ਪ੍ਰਸ਼ੰਸਾ ਕੀਤੀ ਅਤੇ ਆਸ ਜਤਾਈ ਕਿ ਅਜਿਹੇ ਸਮਾਗਮ ਚਾਰਟਡ ਅਕਾਊਂਟੈਂਟ ਪੇਸ਼ੇ ਪ੍ਰਤੀ ਜਾਗਰੂਕਤਾ ਵਧਾਉਣਗੇ, ਜਿਸ ਨਾਲ ਆਉਣ ਵਾਲੇ ਸਾਲਾਂ ਵਿੱਚ ਮੌਜੂਦਾ 19 ਫੀਸਦੀ ਪਾਸ ਪ੍ਰਤੀਸ਼ਤ ਵਿੱਚ ਸੁਧਾਰ ਆਵੇਗਾ।
ਹਿੰਦੂਸਥਾਨ ਸਮਾਚਾਰ / ਦਵਿੰਦਰ ਸਿੰਘ
