ਮੁੰਬਈ, 27 ਮਾਰਚ (ਹਿੰ.ਸ.)। ਬੰਬੇ ਜਿਮਖਾਨਾ ਵਿਖੇ ਬੁੱਧਵਾਰ ਨੂੰ ਹੋਏ ਰੋਮਾਂਚਕ ਮੈਚਾਂ ਵਿੱਚ ਅਨਾਹਤ ਸਿੰਘ, ਜੋਸ਼ਨਾ ਚਿਨੱਪਾ ਅਤੇ ਅਭੈ ਸਿੰਘ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਜੇਐਸਡਬਲਯੂ ਇੰਡੀਅਨ ਓਪਨ ਦੇ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾਈ। ਇਹ ਭਾਰਤ ਦਾ ਪਹਿਲਾ ਪੀਐਸਏ ਕਾਪਰ ਟੂਰਨਾਮੈਂਟ ਹੈ ਅਤੇ ਇਸ ਵਿੱਚ ਇੱਕ ਵਿਲੱਖਣ ਮੋੜ ਆਇਆ ਕਿਉਂਕਿ ਮੈਚ ਬੰਬੇ ਜਿਮਖਾਨਾ ਦੇ ਲਾਅਨ 'ਤੇ ਬਾਹਰੀ ਗਲਾਸ ਕੋਰਟ 'ਤੇ ਖੇਡੇ ਗਏ। ਸੈਮੀਫਾਈਨਲ ਅਤੇ ਫਾਈਨਲ ਮੈਚ ਵੀ ਇਸ ਕੋਰਟ 'ਤੇ ਖੇਡੇ ਜਾਣਗੇ।
ਭਾਰਤ ਦੀ ਨੰਬਰ 1 ਸਕੁਐਸ਼ ਖਿਡਾਰਨ ਅਤੇ ਜੇਐਸਡਬਲਯੂ ਦੀ ਸਮਰਥਿਤ ਅਨਾਹਤ ਸਿੰਘ ਦਾ ਆਪਣੇ ਕੁਆਰਟਰ ਫਾਈਨਲ ਮੈਚ ਲਈ ਕੋਰਟ ਵਿੱਚ ਦਾਖਲ ਹੋਣ 'ਤੇ ਭੀੜ ਵੱਲੋਂ ਜ਼ੋਰਦਾਰ ਤਾੜੀਆਂ ਨਾਲ ਸਵਾਗਤ ਕੀਤਾ ਗਿਆ। ਉਨ੍ਹਾਂ ਦਾ ਮਿਸਰ ਦੀ ਨਦੀਨ ਏਲਹਾਮੀ ਵਿਰੁੱਧ ਮੁਕਾਬਲਾ ਸੀ। ਅਨਾਹਤ ਨੇ ਚੰਗੀ ਸ਼ੁਰੂਆਤ ਕੀਤੀ ਅਤੇ ਪਹਿਲੀ ਗੇਮ 'ਤੇ ਪੂਰੀ ਤਰ੍ਹਾਂ ਦਬਦਬਾ ਬਣਾਇਆ। ਪਰ ਏਲਹਾਮੀ ਨੇ ਜ਼ੋਰਦਾਰ ਵਾਪਸੀ ਕੀਤੀ ਅਤੇ ਦੂਜਾ ਗੇਮ ਟਾਈ-ਬ੍ਰੇਕ ਤੱਕ ਲਿਜਾ ਕੇ ਜਿੱਤ ਲਿਆ। ਇਸ ਤੋਂ ਬਾਅਦ, ਉਨ੍ਹਾਂ ਨੇ ਤੀਜਾ ਗੇਮ ਵੀ ਜਿੱਤਿਆ ਅਤੇ ਮੈਚ ਵਿੱਚ 2-1 ਦੀ ਬੜ੍ਹਤ ਬਣਾ ਲਈ। ਹਾਲਾਂਕਿ, ਘਰੇਲੂ ਦਰਸ਼ਕਾਂ ਦੇ ਸਮਰਥਨ ਨਾਲ, ਅਨਾਹਤ ਨੇ ਚੌਥੀ ਗੇਮ ਜਿੱਤ ਕੇ ਸਕੋਰ 2-2 ਨਾਲ ਬਰਾਬਰ ਕਰ ਦਿੱਤਾ। ਫੈਸਲਾਕੁੰਨ ਗੇਮ ਵਿੱਚ ਦੋਵਾਂ ਖਿਡਾਰੀਆਂ ਵਿਚਕਾਰ ਸਖ਼ਤ ਮੁਕਾਬਲਾ ਸੀ, ਪਰ 17 ਸਾਲਾ ਅਨਾਹਤ ਨੇ ਦਬਾਅ ਹੇਠ ਸ਼ਾਨਦਾਰ ਖੇਡਿਆ ਅਤੇ ਰੋਮਾਂਚਕ ਮੈਚ ਜਿੱਤ ਕੇ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ।
ਜੋਸ਼ਨਾ ਚਿਨੱਪਾ ਸ਼ਾਮ ਦੇ ਸੈਸ਼ਨ ਵਿੱਚ ਚੋਟੀ ਦਾ ਦਰਜਾ ਪ੍ਰਾਪਤ ਆਕਾਂਕਸ਼ਾ ਸਾਲੁੰਖੇ ਨਾਲ ਭਿੜੀ। ਦੋਵੇਂ ਭਾਰਤੀ ਖਿਡਾਰੀਆਂ ਨੇ ਇੱਕ ਦੂਜੇ ਦੇ ਖੇਡ ਨੂੰ ਚੰਗੀ ਤਰ੍ਹਾਂ ਸਮਝਿਆ ਅਤੇ ਸਖ਼ਤ ਮੁਕਾਬਲਾ ਦਿੱਤਾ। ਚਿਨੱਪਾ ਨੇ ਪਹਿਲੇ ਦੋ ਗੇਮ ਬਹੁਤ ਕਰੀਬੀ ਫਰਕ ਨਾਲ ਜਿੱਤੇ, ਪਰ ਸਾਲੁੰਖੇ ਨੇ ਸ਼ਾਨਦਾਰ ਵਾਪਸੀ ਕੀਤੀ ਅਤੇ ਦੋ ਮੈਚ ਜਿੱਤ ਕੇ ਮੈਚ ਨੂੰ ਫੈਸਲਾਕੁੰਨ ਗੇਮ ਵਿੱਚ ਪਹੁੰਚਾ ਦਿੱਤਾ। ਆਖਰਕਾਰ ਚਿਨੱਪਾ ਨੇ 56 ਮਿੰਟ ਤੱਕ ਚੱਲੇ ਰੋਮਾਂਚਕ ਮੈਚ ਵਿੱਚ 3-2 (12-10, 13-11, 9-11, 9-11, 11-5) ਨਾਲ ਜਿੱਤ ਪ੍ਰਾਪਤ ਕਰਕੇ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ।
ਪੁਰਸ਼ ਵਰਗ ਵਿੱਚ, ਭਾਰਤ ਦੇ ਅਭੈ ਸਿੰਘ ਨੇ ਮਲੇਸ਼ੀਆ ਦੇ ਅਮੀਸ਼ੇਨਰਾਜ ਚੰਦਰਨ ਵਿਰੁੱਧ ਸ਼ਾਨਦਾਰ ਖੇਡ ਦਿਖਾਈ। ਆਪਣੀ ਸ਼ਾਨਦਾਰ ਫਾਰਮ ਨੂੰ ਜਾਰੀ ਰੱਖਦੇ ਹੋਏ, ਅਭੈ ਨੇ ਸ਼ੁਰੂ ਤੋਂ ਹੀ ਮੈਚ 'ਤੇ ਆਪਣਾ ਕੰਟਰੋਲ ਬਣਾਈ ਰੱਖਿਆ ਅਤੇ ਆਪਣੇ ਵਿਰੋਧੀ ਨੂੰ ਕੋਈ ਮੌਕਾ ਨਹੀਂ ਦਿੱਤਾ। ਉਨ੍ਹਾਂ ਨੇ ਸਿਰਫ਼ 34 ਮਿੰਟਾਂ ਵਿੱਚ 3-0 (11-5, 11-8, 11-7) ਨਾਲ ਜਿੱਤ ਪ੍ਰਾਪਤ ਕਰਕੇ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ।
ਦਿਨ ਦੇ ਆਖਰੀ ਕੁਆਰਟਰ ਫਾਈਨਲ ਵਿੱਚ, ਭਾਰਤ ਦੇ ਵੀਰ ਚੋਤਰਾਨੀ ਦਾ ਸਾਹਮਣਾ ਮਿਸਰ ਦੇ ਕਰੀਮ ਅਲ ਟੋਰਕੀ ਨਾਲ ਸੀ। ਹਾਲਾਂਕਿ ਵੀਰ ਨੇ ਬਹੁਤ ਕੋਸ਼ਿਸ਼ ਕੀਤੀ, ਪਰ ਉਹ ਕਰੀਮ ਦਾ ਸਾਹਮਣਾ ਨਹੀਂ ਕਰ ਸਕੇ ਅਤੇ 27 ਮਿੰਟਾਂ ਵਿੱਚ 0-3 (11-4, 11-8, 11-5) ਨਾਲ ਹਾਰਨ ਤੋਂ ਬਾਅਦ ਟੂਰਨਾਮੈਂਟ ਤੋਂ ਬਾਹਰ ਹੋ ਗਏ।
---------------
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
